សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែលសកម្ម មានទំនោរឆ្ពោះទៅរកកម្រិតនៃការចូលរួមផ្ទាល់ខ្លួនក្នុងកិច្ចការរបស់សាសនាចក្រយ៉ាងខ្ពស់មួយ ដែលរួមមានការគ្រប់គ្រងសាសនាចក្រក្នុងមូលដ្ឋានជាដើម ។ អវត្តមាននៃការបង់ប្រាក់ ការបង់ថ្លៃបព្វជិត មានន័យថា ថ្នាក់ដឹកនាំ គឺមានវិមជ្ឈការយ៉ាងខ្លាំងនៅទូទាំងពិភពលោក ហើយសមាជិកភាគច្រើនរួមចំណែកតាមរយៈកិច្ចខិតខំប្រឹងប្រែងស្ម័គ្រចិត្ត ដូចជាការបង្រៀន ឬសេវាដទៃទៀតតាមប្រភេទផ្សេងគ្នា ។
អ្នកដឹកនាំក្រុមជំនុំតាមមូលដ្ឋាន ត្រូវបានហៅថា ប៊ីស្សព ហើយជាធម្មតា បម្រើក្នុងតំណែងនោះរយៈពេលប្រហែលជាប្រាំឆ្នាំ ។ ពេលបញ្ចប់ការបម្រើរបស់គាត់ គាត់អាចត្រូវបានចាត់ឲ្យមានការទទួលខុសត្រូវកាន់តែខ្ពស់នៅក្នុងតំបន់ភូមិសាស្ត្រកាន់តែធំ ឬក៏ត្រឡប់ទៅរកឱកាសបម្រើដែលមានតម្រូវការស្រាលៗ នៅក្នុងក្រុមជំនុំរបស់គាត់វិញ ។
នៅក្នុងការសម្ភាសន៍មួយ នៅខែ ធ្នូ ឆ្នាំ 2004 ជាមួយនឹងកម្មវិធីទូរទស្សន៍ ដែលដឹកនាំដោយ លែរី ឃីង នោះប្រធាន ហ្គរដុន ប៊ី ហ៊ិងគ្លី បានឆ្លើយតបចំពោះសំណួរដែលសួរថា « វាជាការលំបាកដើម្បីធ្វើជាសមាជិកម្នាក់ មែនទេ ? » ប្រធាន ហ៊ីងគ្លី ក៏បានមានប្រសាសន៍ថា ៖ « វាពុំដូច្នោះទេ វាអស្ចារ្យណាស់ ។ ខ្ញុំគួរតែនិយាយដូច្នោះថា វាជាតម្រូវការ ជាការរំពឹងទុកដ៏អស្ចារ្យ ប៉ុន្តែវាអស្ចារ្យណាស់ » ។
ទាក់ទងនឹងសមាជិកថ្មី ដែលចូលរួមក្នុងសាសនាចក្រ ប្រធានហ៊ីងគ្លី បានមានប្រសាសន៍ថា ៖ « ពួកគេត្រូវបានដាក់ឲ្យធ្វើការ ។ ពួកគេទទួលបានការទទួលខុសត្រូវ ។ ពួកគេត្រូវបានធ្វើឲ្យមានអារម្មណ៍ថាមានចំណែកក្នុងការផ្លាស់ប្ដូរទៅមុខដ៏អស្ចារ្យនៃកិច្ចការរបស់ព្រះនេះ ។ … មិនយូរប៉ុន្មានពួកគេរកឃើញថា មានការរំពឹងទុកជាច្រើនពីពួកគេក្នុងនាមជាពួកបរិសុទ្ធថ្ងៃចុងក្រោយ ។ ពួកគេពុំអន់ចិត្តទេ ។ ពួកគេបំពេញការទទួលខុសត្រូវរបស់ពួកគេ ហើយចូលចិត្តវា ។ ពួកគេរំពឹងឲ្យសាសនារបស់ពួកគេ មានតម្រូវការ ដើម្បីតម្រូវឲ្យមានការផ្លាស់ប្ដូរក្នុងជីវិតរស់នៅពួកគេ ។ ពួកគេបំពេញតាមតម្រូវការ ។ ពួកគេថ្លែងទីបន្ទាល់អំពីសេចក្ដីល្អដ៏អស្ចារ្យ ដែលកើតមានចំពោះពួកគេ ។ ពួកគេមានចិត្តក្លៀវក្លា ហើយស្មោះត្រង់ » ។
បន្ថែមទៅលើការបម្រើដែលបានចាត់តាំងឲ្យក្នុងក្រុមជំនុំតាមធម្មតារបស់ពួកគេ សមាជិកអាចបរិច្ចាគពេលវេលារបស់ពួកគេ ដើម្បីឧបត្ថម្ភដល់សុខុមាលភាពរបស់សាសនាចក្រ និងប្រព័ន្ធមនុស្សធម៌ ។ រឿងនោះ អាចទាក់ទងនឹងការបរិច្ចាគពេលវេលាជាច្រើន ពីមួយគ្រាទៅមួយគ្រា នៅឯរោងចក្រធ្វើម្ហូបកំប៉ុងក្នុងមូលដ្ឋានមួយ ដែលធ្វើម្ហូបអាហារសម្រាប់អ្នកខ្វះខាត ។
សមាជិក ក៏បរិច្ចាគខាងហិរញ្ញវត្ថុនៅក្នុងកម្រិតមួយ ដែលធ្វើឲ្យមនុស្សជាច្រើនដែលនៅខាងក្រៅជំនឿរបស់យើងភ្ញាក់ផ្អើលផងដែរ ។ ជាតួយ៉ាង សមាជិកសកម្ម បរិច្ចាគមួយភាគដប់នៃប្រាក់ចំណូលប្រចាំឆ្នាំរបស់ពួកគេដល់សាសនាចក្រ បន្ថែមពីលើការបរិច្ចាគប្រចាំខែសម្រាប់អ្នកខ្វះខាត ។
ជាទូទៅ សមាជិកសាសនាចក្រសកម្មចូលរួមការបម្រើក្នុងព្រះវិហារសម្រាប់រយៈពេលបីម៉ោង នៅថ្ងៃអាទិត្យ ដែលបែងចែកការប្រជុំជាបីផ្សេងៗគ្នា ។ កម្មវិធីថ្វាយបង្គំសំខាន់ គឺមានច្រើនជាងមួយម៉ោង ហើយត្រូវបានស្គាល់ថា ការប្រជុំសាក្រាម៉ង់ ។ បុរស និងស្ត្រី ត្រូវបានចាត់ជាមុនឲ្យឡើងនិយាយនៅលើវេទិកា ហើយក្រុមជំនុំ ចូលរួមនៅក្នុងទំនុកតម្កើង ការអធិស្ឋាន និងទទួលទាន « សាក្រាម៉ង់ » — នំប៉័ង និងទឹក តំណាងឲ្យដង្វាយធួនរបស់ព្រះយេស៊ូវគ្រីស្ទ សម្រាប់អំពើបាបរបស់មនុស្សលោក ។ ពេលនៅសល់ទាំងប៉ុន្មាន ត្រូវបានរំលែកជាថ្នាក់សាលាថ្ងៃអាទិត្យ និងថ្នាក់បុរស ថ្នាក់ស្ត្រី ថ្នាក់យុវវ័យ និងថ្នាក់កុមារ ។ ការប្រជុំថ្ងៃអាទិត្យទាំងអស់ ត្រូវបានបើកសម្រាប់មនុស្សគ្រប់រូប ទាំងអ្នកជាសមាជិកនៃសាសនាចក្រ និងអ្នកពុំមែនជាសមាជិក ។
សិស្សដែលមានវ័យនៅវិទ្យាល័យ ចូលរួមក្នុងថ្នាក់សិក្ខាសាលា— ជាថ្នាក់រៀនមួយដែលមានប្រាំថ្ងៃក្នុងមួយសប្ដាហ៍ ដែលផ្ដោតទៅលើការសិក្សាបទគម្ពីរ ។ អាស្រ័យទៅតាមកន្លែងដែលយុវវ័យរស់នៅ ពួកគេអាចជួបជុំគ្នាអំឡុងពេលសាលារៀនរដ្ឋ មុនម៉ោងចូលសាលារៀនរដ្ឋ ឬបន្ទាប់ពីម៉ោងសាលារៀនរដ្ឋ ។