នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពាក្យ ការផ្សារភ្ជាប់ សំដៅទៅលើការរួបរួមគ្នានៃបុរសម្នាក់ និងស្ត្រីម្នាក់ ព្រមទាំងកូនៗរបស់ពួកគាត់សម្រាប់ភាពអស់កល្បជានិច្ច ។ ការផ្សារភ្ជាប់នេះអាចត្រូវបានធ្វើឡើងតែនៅក្នុងព្រះវិហារបរិសុទ្ធមួយ ដោយបុរសម្នាក់ដែលមានបព្វជិតភាព ឬសិទ្ធិអំណាចមកពីព្រះ ។ តាមជំនឿរបស់ពួកបរិសុទ្ធថ្ងៃចុងក្រោយ ការផ្សារភ្ជាប់ មានន័យថា ទំនាក់ទំនងគ្រួសារទាំងនេះ នឹងកាន់ខ្ជាប់បន្ទាប់ពីសេចក្ដីស្លាប់ បើបុគ្គលម្នាក់ៗ រស់នៅស្របតាមការបង្រៀនរបស់ព្រះយេស៊ូវគ្រីស្ទ ។ សម្រាប់ពួកបរិសុទ្ធថ្ងៃចុងក្រោយ គ្រួសារគឺសំខាន់ក្នុងផែនការរបស់ព្រះ ជាអង្គភាពដ៏សំខាន់បំផុត ទាំងនៅលើផែនដី និងនៅក្នុងភាពអស់កល្បជានិច្ច ។
នៅពេលបុរសម្នាក់ និងស្ត្រីម្នាក់ បានរៀបការនៅក្នុងព្រះវិហារបរិសុទ្ធមរមន ពិធីការត្រូវបានហៅថាជា ការផ្សារភ្ជាប់ ។ នៅពេលកូនៗ កើតមកក្នុងចំណងគូស្វាមីភរិយានេះក្រោយមក នោះពួកគេត្រូវបានចាត់ទុកថា បានផ្សារភ្ជាប់ដោយស្វ័យប្រវត្តិទៅនឹងឪពុកម្ដាយរបស់ពួកគេ ។ គូស្វាមីភរិយា ដែលចូលរួមក្នុងសាសនាចក្រ បន្ទាប់ពីពួកគេបានរៀបការរួចហើយ ឬពុំបានរៀបការនៅក្នុងព្រះវិហារបរិសុទ្ធពីដំបូង ដោយសារមូលហេតុផ្សេងៗ នៅតែមានឱកាសដើម្បីផ្សារភ្ជាប់នឹងគ្នាក្នុងព្រះវិហារបរិសុទ្ធនាពេលក្រោយ ។ ឪពុកម្ដាយ អាចមានកូនៗផ្សារភ្ជាប់នឹងពួកគេនៅគ្រានោះ ។ ពិធីបរិសុទ្ធនៃការផ្សារភ្ជាប់ទាំងនេះ ក៏ត្រូវបានធ្វើឡើងជំនួសមរណជនផងដែរ ដើម្បីចងភ្ជាប់ក្រុមគ្រួសារជាមួយគ្នារាប់ជំនាន់ ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
ព្រះយេស៊ូវគ្រីស្ទផ្ទាល់ បានមានបន្ទូលអំពីគំនិតនៃការផ្សារភ្ជាប់នៅក្នុងព្រះគម្ពីរសញ្ញាចាស់ ។
« កាលព្រះយេស៊ូវ បានយាងមកដល់ក្រវល់ក្រុងសេសារា ភីលីព នោះទ្រង់មានព្រះបន្ទូល សាកសួរពួកសិស្សថា តើមនុស្សទាំងឡាយ គេថាកូនមនុស្សជានរណា? …
« ហើយស៊ីម៉ូន ពេត្រុសទូលឆ្លើយថា ទ្រង់ជាព្រះគ្រីស្ទ ជាព្រះរាជបុត្រា នៃព្រះដ៏មានព្រះជន្មរស់ ។
« រួចព្រះយេស៊ូវ មានបន្ទូលតបឆ្លើយវិញថា អ្នកស៊ីម៉ូន កូនយ៉ូណាសអើយ ៖ ត្បិតវមិនមែនជាសាច់ឈាម ដែលបានសម្តែងឲ្យអ្នកស្គាល់ទេ គឺព្រះវរបិតានៃខ្ញុំដែលគង់នៅស្ថានសួគ៌វិញ ។
« ខ្ញុំប្រាប់អ្នកថា អ្នកឈ្មោះពេត្រុស ខ្ញុំនឹងតាំងពួកជំនុំខ្ញុំនៅលើថ្មដានេះ ហើយទ្វារស្ថានឃុំព្រលឹងមនុស្សស្លាប់ នឹងមិនដែលឈ្នះពួកជំនុំឡើយ ។
« ខ្ញុំនឹងឲ្យកូនសោនៃនគរស្ថានសួគ៌ដល់អ្នក បើអ្នកនឹងចងទុកអ្វីៗនៅផែនដី នោះនឹងត្រូវចងទុកនៅលើស្ថានសួគ៌ដែរ ហើយបើអ្នកនឹងស្រាយអ្វីៗនៅផែនដី នោះនឹងត្រូវស្រាយនៅស្ថានសួគ៌ដែរ » (ម៉ាថាយ 16:13 16–19)។
ពួកបរិសុទ្ធថ្ងៃចុងក្រោយ ជឿលើសិទ្ធិអំណាចដូចគ្នានេះ ដែលបានប្រគល់ដល់ពេត្រុស គឺត្រូវបានប្រគល់ដល់យ៉ូសែប ស្ម៊ីធ ក្នុងឆ្នាំ 1829 ហើយបានផ្ដល់តទៅព្យាការីបច្ចុប្បន្ន និងប្រធានសាសនាចក្រ ថូម៉ាស អេស ម៉នសុន ។ មានតែព្យាការីទេ ទើបអាចផ្ដល់អំណាចនៃការផ្សារភ្ជាប់ទៅបុរសដទៃ ហើយមានតែបុរសមួយចំនួនតិចប៉ុណ្ណោះ ដែលកាន់សិទ្ធិអំណាចនេះនៅពេលដែលបានផ្ដល់ឲ្យនាពេលណាមួយ ។