គ្រូបង្រៀនសួរសុខទុក្ខម្នាក់ គឺជាស្ត្រីម្នាក់ដែលត្រូវបានចាត់ឲ្យមើលខុសត្រូវ និងជួយដល់ស្ត្រីដទៃទៀត នៅក្នុងវួដ ឬសាខាពួកបរិសុទ្ធថ្ងៃចុងក្រោយរបស់គាត់ ។ គ្រូបង្រៀនសួរសុខទុក្ខពីរនាក់ ត្រូវបានចាត់ឲ្យទៅស្ត្រីម្នាក់ៗ ពួកគេទាក់ទងនឹងគាត់ យ៉ាងហោចណាស់មួយខែម្ដង ហើយលើកទឹកចិត្តឲ្យគាត់ខិតខំរស់នៅតាមដំណឹងល្អនៃព្រះយេស៊ូវគ្រីស្ទរបស់គាត់ ។ ដោយមានបញ្ចូលនូវសារលិខិតនៃការបង្រៀនខាងវិញ្ញាណមួយក្នុងការសួរសុខទុក្ខជាទៀងទាត់នេះ ដែលត្រូវបានកែសម្រួលដើម្បីបំពេញទៅតាមតម្រូវការ និងកង្វល់របស់ស្ត្រីម្នាក់ៗ ។ ជាញឹកញាប់ សារលិខិតទាំងឡាយ ធ្វើឲ្យមានការពិភាក្សាដំណឹងល្អបន្ថែមទៀត ហើយស្ត្រីៗរៀនជាមួយគ្នា ។
« គ្រូបង្រៀនសួរសុខទុក្ខ បម្រើជំនួសឲ្យព្រះអង្គសង្គ្រោះ ។ ដៃរបស់យើង គឺជាព្រះហស្តទ្រង់ ក្ដីស្រឡាញ់របស់យើង ជាក្ដីស្រឡាញ់របស់ទ្រង់ ហើយការបម្រើរបស់យើង គឺជាការបម្រើរបស់ទ្រង់ ។ គ្រូបង្រៀនសួរសុខទុក្ខល្អ ស្គាល់ស្ត្រីទាំងឡាយ ដែលពួកគេទៅសួរសុខទុក្ខ ។ ពួកគាត់ស្រឡាញ់ បម្រើ និងជួយដល់ពួកគេឲ្យរៀនដំណឹងល្អ… ពួកគាត់ផ្ដោតទៅលើការការពារគេហដ្ឋាន និងជីវិតរស់នៅ ។ គ្មានឯកសិទ្ធិណាសំខាន់ជាងការមើលខុសត្រូវ និងពង្រឹងដល់មនុស្សម្នាក់ទៀតនោះទេ »ប្រធានសមាគមសង្គ្រោះទូទៅ ជូលី ប៊ី ប៊េក បានមានប្រសាសន៍ ។
បន្ថែមពីលើទិដ្ឋភាពខាងវិញ្ញាណនៃការហៅបម្រើរបស់ពួកគេ គ្រូបង្រៀនសួរសុខទុក្ខ ក៏ជួយដល់តម្រូវការខាងសាច់ឈាមរបស់ស្ត្រី និងគ្រួសារគាត់ផងដែរ ។ ឧទាហរណ៍ គ្រូបង្រៀនសួរសុខទុក្ខ អាចផ្ដល់ជាអាហារ បន្ទាប់ពីស្ត្រីម្នាក់សម្រាលកូនរួច ឬជួយសម្អាតផ្ទះ ពេលស្ត្រីម្នាក់ឈឺ ។
ស្ត្រីភាគច្រើនក្នុងសាសនាចក្រ មានឱកាសបម្រើជាគ្រូបង្រៀនសួរសុខទុក្ខ ។ កម្មវិធីការបង្រៀនសួរសុខទុក្ខ ត្រូវបានសម្របសម្រួលដោយសមាគមសង្គ្រោះ ជាអង្គការសម្រាប់ស្ត្រីនៅក្នុងក្រុមជំនុំពួកបរិសុទ្ធថ្ងៃចុងក្រោយនីមួយៗ ។
កម្មវិធីការបង្រៀនសួរសុខទុក្ខ ត្រូវបានបំពេញបន្ថែមដោយ កម្មវិធី ការបង្រៀនតាមផ្ទះ ក្នុងការមើលថែចំពោះសេចក្ដីត្រូវការនៃពួកបរិសុទ្ធថ្ងៃចុងក្រោយ ។ គ្រូបង្រៀនតាមផ្ទះ គឺជាបុរសពីរនាក់ ដែលត្រូវបានចាត់ឲ្យទៅសួរសុខទុក្ខមនុស្សគ្រប់គ្នា ដែលរស់នៅក្នុងផ្ទះមួយ ។