សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ អនុវត្តតាមគោលការណ៍ក្នុងគម្ពីរបរិសុទ្ធ អំពីដង្វាយមួយភាគក្នុងដប់ តាមរយៈការបរិច្ចាគ 10 ភាគរយនៃចំណូលរបស់ពួកគេទៅក្នុងសាសនាចក្រ ។
ដង្វាយមួយភាគក្នុងដប់ ត្រូវបានគេស្គាល់ ចាប់តាំងពីជំនាន់ព្រះគម្ពីរសញ្ញាចាស់មកម្ល៉េះ ។ ឧទាហរណ៍ វាត្រូវបានកត់ត្រានៅក្នុង លោកុប្បត្តិ 14:17-20 ថាអ័ប្រាហាំ បានបង់ដង្វាយមួយភាគដប់ទៅដល់មិលគីស្សាដែក ។ សព្វថ្ងៃនេះ ប្រាក់ដង្វាយមួយភាគក្នុងដប់ ត្រូវបានប្រើប្រាស់សម្រាប់គោលបំណងផ្សេងៗគ្នាមួយ រួមមានទាំង កិច្ចខិតខំផ្នែកសប្បុរសធម៌ និងសំណង់សាលាជំនុំ និងព្រះវិហារបរិសុទ្ធ ។ ប្រាក់ដង្វាយមួយភាគក្នុងដប់ ក៏បង់ថ្លៃសម្រាប់ចំណាយប្រតិបត្តិការ និងជំនួយដល់មូលនិធិអ្នកផ្សព្វផ្សាយសាសនា ការអប់រំ និងកម្មវិធីពង្សប្រវត្តិ ។
ពួកបរិសុទ្ធថ្ងៃចុងក្រោយ បានផ្ដល់ការបរិច្ចាគដង្វាយមួយភាគក្នុងដប់របស់ពួកគេទៅដល់អ្នកដឹកនាំតាមមូលដ្ឋាន ។ អ្នកដឹកនាំតាមមូលដ្ឋានទាំងនេះ បញ្ជូនប្រាក់ទៅកាន់ទីស្នាក់ការកណ្ដាលសាសនាចក្រនៅទីក្រុងសលត៍ លេក រដ្ឋយូថាហ៍ ជាកន្លែងដែលគណៈកម្មការមួយ ធ្វើការកំណត់ពីវិធីជាក់លាក់ដើម្បីប្រើមូលនិធិទាំងឡាយ ។ ក្រុមប្រឹក្សានេះមាន គណៈប្រធានទីមួយ, កូរ៉ុមសាវកដប់ពីរនាក់ និង គណៈប៊ីស្សពជាអធិបតី។
ក៏ដូចជាសមាជិកនៃជំនឿដទៃទៀតជាច្រើនដែរ ពួកបរិសុទ្ធថ្ងៃចុងក្រោយ ជឿថា ការថ្វាយដង្វាយមួយភាគក្នុងដប់ បង្ហាញនូវការដឹងគុណចំពោះព្រះ ហើយនាំមកនូវពរជ័យខាងវិញ្ញាណ និងខាងសាច់ឈាម ។