ការអប់រំ ត្រូវបានគូសបញ្ជាក់យ៉ាងខ្លាំងនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ព្រមជាមួយនឹងការផ្ដល់ថ្នាក់សិក្ខាសាលា សម្រាប់សិស្សវិទ្យាល័យ នោះសាសនាចក្រក៏បានឧបត្ថម្ភថ្នាក់ខាងសាសនាផងដែរ ដែលត្រូវបានស្គាល់ថា « ថ្នាក់វិទ្យាស្ថាន » សម្រាប់យុវមជ្ឈិមវ័យនៅលីវ ដែលមានអាយុចាប់ពី 18 ឆ្នាំ ដល់ 30 ឆ្នាំ និងសិស្សមហាវិទ្យាល័យដែលបានរៀបការរួចផងដែរ ។
- គ្រូបង្រៀនពេញម៉ោង និងអ្នកស្ម័គ្រចិត្ត បង្រៀនដល់សិស្សនៅក្នុងអគារវិទ្យាស្ថានសាសនាផ្ទាល់របស់សាសនាចក្រ នៅតាមសាលាប្រជុំសាសនាចក្រនៅតាមមូលដ្ឋាន ឬនៅក្នុងផ្ទះឯកជន ។ ថ្នាក់ប្រចាំសប្ដាហ៍ ត្រូវបានបង្រៀន អំឡុងសប្ដាហ៍ និងពេលល្ងាច ។
- ថ្នាក់រៀនទាំងឡាយ រួមមានការបង្រៀនខាងសាសនា ក្នុងគម្ពីរសញ្ញាចាស់ និងគម្ពីរសញ្ញាថ្មី ព្រះគម្ពីរមរមន ប្រវត្តិសាសនាចក្រ ការដើរលេងជាគូ និងអាពាហ៍ពិពាហ៍ និងរបៀបដើម្បីស្រាវជ្រាវពង្សប្រវត្តិ ។
- ថ្នាក់វិទ្យាស្ថានក៏ផ្ដល់ដល់សិស្សនូវឱកាសជាច្រើន ដើម្បីរីកចម្រើនតាមរយៈសេវាមនុស្សធម៌ ការបំពាក់បំប៉នអំពីថ្នាក់ដឹកនាំ និងការប្រាស្រ័យទាក់ទងជាសង្គម ។ វាត្រូវបានរៀបចំឡើងដើម្បីចិញ្ចឹមបីបាច់ខាងវិញ្ញាណ នៅពេលសិស្សប្រឈមមុខនឹងសម្ពាធនានា ការសាកល្បង និងឧបសគ្គនៃជីវិតប្រចាំថ្ងៃ ។
- ថ្នាក់វិទ្យាស្ថាន បន្ដរីកចម្រើននៅខាងក្នុង និងខាងក្រៅសហរដ្ឋអាមេរិក ។ នៅក្នុងឆ្នាំ 2005 មានសិស្សច្រើនជាង 200,000 នាក់ ត្រូវបានចុះឈ្មោះក្នុងថ្នាក់វិទ្យាស្ថានសាសនា នៅប្រទេសក្រៅ បើប្រៀបធៀបនឹងចំនួន 167,000 នាក់នៅក្នុងសហរដ្ឋអាមេរិក ។