អង្គការបព្វជិតរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានគ្រប់គ្រងជាចម្បងដោយគណៈប្រធាន ។ ចាប់តាំងពីតួគ្រប់គ្រងខ្ពស់បំផុតក្នុងសាសនាចក្រ គឺគណៈប្រធានទីមួយ ទៅដល់ក្រុមជំនុំក្នុងមូលដ្ឋាន គណៈប្រធាននីមួយៗទាំងនេះ ត្រូវបានបង្កើតឡើងដោយមាន ប្រធានម្នាក់ និងទីប្រឹក្សាពីរនាក់ ។ ករណីលើកលែងមួយចំពោះទម្រង់នេះ គឺមាននៅក្នុងវួដតាមមូលដ្ឋាន ជាកន្លែងដែលមានអ្នកដឹកនាំឥតមានប្រាក់កម្រៃ ត្រូវបានហៅថាជា ប៊ីស្សព ។ បុរសពីរនាក់ ដែលជួយគាត់ គឺនៅតែហៅថាជា ទីប្រឹក្សា ។
ទោះជានៅកម្រិតគ្រប់គ្រងណាក៏ដោយ គោលបំណងរបស់ទីប្រឹក្សា គឺដើម្បីផ្ដល់ជំនួយ និងគាំទ្រដល់ប្រធាន ឬប៊ីស្សព ។ ទីប្រឹក្សា ធ្វើកាតព្វកិច្ចគ្រប់គ្រង និងខាងវិញ្ញាណផ្សេងៗ តាមដែលចាត់ដោយប្រធាន ឬប៊ីស្សព ហើយបំពេញជំនួស នៅពេលប្រធាន ឬប៊ីស្សព ពុំនៅ ។ អាស្រ័យទៅលើអង្គការ ទីប្រឹក្សាទាំងនេះ អាចជាបុរស ឬស្ត្រីនៅគ្រប់អាយុ ។ ឧទាហរណ៍ ទីប្រឹក្សានៅក្នុងគណៈប្រធានស្ដេក គឺជាបុរសពេញវ័យ ខណៈដែលទីប្រឹក្សាក្នុងកូរ៉ុម ឌីកុន គឺជាក្មេងប្រុសៗ ដែលមានអាយុចន្លោះពី 12 ឆ្នាំ និង 13 ឆ្នាំ ។ ដូចគ្នានោះដែរ ទីប្រឹក្សាក្នុង គណៈប្រធានសមាគមសង្គ្រោះ គឺជាស្ត្រីពេញវ័យ ខណៈដែលទីប្រឹក្សាក្នុងថ្នាក់យុវនារី គឺជាក្មេងស្រីវ័យជំទង់ ដែលមានអាយុចន្លោះពី 12 ឆ្នាំ និង 18 ឆ្នាំ ។