ព្រិកហាំ យ៉ង់ ពេលខ្លះហៅថាជា ម៉ូសេអាមេរិកកាំង ឬអ្នកត្រួសត្រាយផ្លូវដ៏អស្ចារ្យ ។ លោកចេញមកពីក្នុងចំណោមអ្នកដឹកនាំសាសនាចក្រកាលពីជំនាន់មុន ដើម្បីដឹកនាំអ្នកភៀសខ្លួនដោយសាសនារាប់រយពាន់នាក់ ធ្វើដំណើរឆ្លងកាត់ព្រំដែនដែលគ្មានអារ្យធម៌ភាគខាងលិចនៃសហរដ្ឋអាមេរិក ។ លោកបាននាំពួកគេទៅក្នុងស្រុកដែលមិនសូវល្អ បានធ្វើប្រឡាយបញ្ចូលទឹក និងដាំដុះក្នុងស្រុកនោះ ហើយបានបង្កើតជាការតាំងលំនៅដោយមានភាពជោគជ័យជាច្រើន ។ នៅពេលក្រុមទីមួយនៃក្រុមអ្នកត្រួសត្រាយផ្លូវ មរមន បានទៅដល់ជ្រលងភ្នំសលត៍ លេក ក្នុងឆ្នាំ 1847 បន្ទាប់ពីការធ្វើដំណើរចម្ងាយ 1300 ម៉ែល ឆ្លងកាត់ទីវាលដ៏ធំ នោះព្រិកហាំ យ៉ង់ បានមើលទៅទីដែលសោះកក្រោះ វាលខ្សាច់ស្ងួត នោះ ហើយបានប្រកាសថា « នេះគឺជាកន្លែងល្អហើយ » ។
ព្រិកហាំ យ៉ង់ បានកើតនៅថ្ងៃទី 1 ខែ មិថុនា ឆ្នាំ 1801 ហើយធំឡើងនៅលំនៅដ្ឋានឯដែនដីមួយក្នុងរដ្ឋ វ័រម៉ន្ត ហើយបានទៅសាលារៀនជាផ្លូវការបានតែ 11 ថ្ងៃប៉ុណ្ណោះ ។ គាត់ជាជាងឈើ ជាងធ្វើគ្រោងទ្វាបង្អួច ជាងលាបថ្នាំ និងកញ្ចក់ដ៏មានជំនាញម្នាក់ ។
ការប្រែចិត្តជឿក្នុងសាសនាចក្ររបស់លោក ពុំមែនភ្លាមៗទេ ។ អស់រយៈពេលពីរឆ្នាំ លោកបានពិនិត្យមើលយ៉ាងយកចិត្តទុកដាក់អំពី ព្រះគម្ពីរមរមន ហើយបានចូលរួមក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពេលលោកបានជឿពីសេចក្ដីពិតនៃព្រះគម្ពីរមរមន ។ ក្រោយមក លោកបានដឹកនាំសាសនាចក្រ ជាប្រធានទីពីរ អស់រយៈពេល 30 ឆ្នាំ ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
ព្រិកហាំ យ៉ង់ បានគ្រប់គ្រងលើការធ្វើដំណើរឆ្លងកាត់ទីវាលរបស់អ្នកត្រួសត្រាយផ្លូវពី 60000 ទៅ 70000 នាក់ ទៅកាន់ជ្រលងភ្នំសលត៍ លេក ពី រដ្ឋ អិលលីណោយ និងកន្លែងត្រៀមដទៃទៀត ដូចជារដ្ឋ អៃអូវ៉ានិង រដ្ឋ មីសសួរី ដែលបានបង្កើតលំនៅដ្ឋានចំនួន 350 ទៅ 400 កន្លែងនៅក្នុងរដ្ឋ យូថាហ៍ អារីស្សូណា កាលីហ្វូញ៉ា អៃដាហូ ណាវ៉ាដា និង វ៉ាយអូមីង ហើយបានបង្កើតប្រព័ន្ធនៃការចែកចាយដីមួយ ដែលក្រោយមកបានឲ្យសច្ចាប័នដោយសមាជ ។
គ្រាន់តែរយៈពេលបួនថ្ងៃ បន្ទាប់ពីក្រុមនៃអ្នកត្រួសត្រាយផ្លូវមរមនទីមួយ បានទៅដល់ជ្រលងភ្នំសលត៍ លេកដ៏សោះកក្រោះនោះ ព្រិកហាំ យ៉ង់ បានចាក់ឈើច្រត់របស់លោកទៅក្នុងដី ត្រង់កន្លែងដែលព្រះវិហារបរិសុទ្ធសលត៍ លេក ឈរនៅសព្វថ្ងៃនេះ ហើយបានប្រកាសថា « ទីនេះហើយ ដែលនឹងជាទីព្រះវិហារបរិសុទ្ធនៃព្រះរបស់យើង » ។
នៅក្នុងឆ្នាំ 1849 ប្រធាន យ៉ង់ បានបង្កើតមូលនិធិអន្ដោប្រវេសន៍អចិន្ត្រៃយ៍ ដើម្បីជួយដល់ជនអន្តោប្រវេសន៍ក្រីក្រនៃពួកបរិសុទ្ធថ្ងៃចុងក្រោយ ។ មូលនិធិនេះ បានជួយដល់ជនអន្ដោប្រវេសន៍ចំនួនប្រហែល 30000 នាក់មកពីកោះអង់គ្លេស ស្កានឌីណាវ៉ា ស្វ៊ីស អាល្លីម៉ង់ និងណេឌើឡែន ដែលបានមកដល់អាមេរិក— ដែលមានចំនួនច្រើនជាងមួយភាគបីនៃជនអន្ដោប្រវេសន៍ពួកបរិសុទ្ធថ្ងៃចុងក្រោយសរុប មកពីទ្វីបអើរ៉ុប អំឡុងគ្រានោះ ។
ព្រិកហាំ យ៉ង់ ក៏បានបម្រើមុខងារពីរ គឺជាអភិបាលគ្រប់គ្រងដែនដីរដ្ឋយូថាហ៍ទីមួយ និង ជាស្នងការទីមួយខាងកិច្ចការជនជាតិអាមេរិកកាំងក្រហម នៃដែនដីរដ្ឋយូថាហ៍ ។ លើសពីនោះ លោកបានរៀបចំចុះកិច្ចព្រមព្រៀង និងជួយក្នុងការបង្កើតខ្សែទូរលេខ និង ផ្លូវដែក បានបង្កើតគណៈកម្មការដ៏ធំមួយខាងឧស្សាហកម្ម និងអាជីវកម្ម— រួមមាន ហាងឌីប៉ាតាម៉ង់ដំបូងគេរបស់អាមេរិក វិទ្យាស្ថានមើរកានថែលសហប្រតិបត្តិការស៊ីយ៉ូន— និងជាអ្នកប្រឆាំងតវ៉ាផ្ដល់សិទ្ធិដល់ស្រ្តីធ្វើការបោះឆ្នោត ។
ក្រៅពីការរៀនសូត្រជាផ្លូវការមានកម្រិតកំណត់ ព្រិកហាំ យ៉ង់ គឺជាអ្នកគាំទ្រ ការអប់រំ ។ គាត់បានបង្កើតវិទ្យាស្ថានជាច្រើន ដែលក្រោយមកក្លាយជា សាកលវិទ្យាល័យព្រិកហាំ យ៉ង់ នៅក្នុងទីក្រុងប្រូវ៉ូ រដ្ឋយូថាហ៍ និងសាកលវិទ្យាល័យយូថាហ៍ នៅក្នុងទីក្រុងសលត៍ លេក ។
ព្រិកហាំ យ៉ង់ ត្រូវបានស្គាល់ថាជាអ្នកអនុវត្តការរៀបការប្រពន្ធច្រើនផងដែរ ។ គាត់បានរៀបការនឹងស្ត្រីយ៉ាងហោចណាស់ 20 នាក់ ហើយមាន 16 នាក់បានបង្កើតកូនឲ្យគាត់បាន 57 នាក់ ។ សាសនាចក្រ ក្រោយមកបានរំលាយចោលនូវការរៀបការប្រពន្ធច្រើន ហើយពុំអនុញ្ញាតឲ្យមានការអនុវត្តនេះ អស់រយៈពេលច្រើនជាង 100 ឆ្នាំហើយ ។ សព្វថ្ងៃ ការអនុវត្តន៍ពហុពន្ធភាព នឹងមាននូវការដាក់ទោសដល់ការកាត់កាលចេញ ។
ព្រិកហាំ យ៉ង់ បានទទួលមរណភាពដោយសារជំងឺ នៅថ្ងៃទី 29 ខែ សីហា ឆ្នាំ 1877 នៅក្នុងផ្ទះរបស់គាត់ នៅក្នុងទីក្រុងសលត៍ លេក ។ គាត់មានអាយុ 76 ឆ្នាំ ។