Additional Resource

ព្រះវិហារ​បរិសុទ្ធ

ព្រះវិហារ​បរិសុទ្ធ​ពុំ​មែន​ជា​ទី​ថ្វាយ​បង្គំ​ធម្មតានៅ​​ថ្ងៃ​អាទិត្យ​សម្រាប់​សមាជិក​នៃ​សាសនាចក្រ​នៃ​ព្រះ​យេស៊ូវគ្រីស្ទ​នៃ​ពួក​បរិសុទ្ធ​ថ្ងៃ​ចុង​ក្រោយ​នោះ​ទេ ។ ព្រះវិហារ​បរិសុទ្ធ​គឺ​ខុសគ្នា​ស្រឡះ​ពី​រោង​ថ្វាយ​បង្គំ និង សាលា​ប្រជុំ​ធម្មតា​រាប់​ពាន់​កន្លែង​នៅ​ពាសពេញ​ពិភពលោក​ដែល​ត្រូវ​បាន​ប្រើប្រាស់​សម្រាប់​ការប្រជុំ​នៅ​ថ្ងៃ​អាទិត្យ ។

មនុស្ស​គ្រប់​រូប​ដោយ​មិន​ប្រកាន់​សាសនា​ឡើយ អាច​ចូល​ក្នុង​សាលា​ប្រជុំ​ពួក​បរិសុទ្ធ​ថ្ងៃ​ចុងក្រោយ និង ចូលរួម​ការប្រជុំ​បាន ។ ប៉ុន្តែ ដោយ​សារ​ភាព​ពិសិដ្ឋ​របស់​ព្រះវិហារ​បរិសុទ្ធ​ជា « ព្រះ​ដំណាក់​នៃ​ព្រះ​អម្ចាស់ » នោះ​មាន​តែ​សមាជិក​សាសនាចក្រ​ដែល​មាន​ភាព​ស័ក្តិសម​​ប៉ុណ្ណោះ ទើប​អាច​អនុញ្ញាត​ឲ្យ​ចូល​ក្នុង​ព្រះវិហារ​បរិសុទ្ធ​បាន ។ សមាជិក​ត្រូវ​តែ​គោរព​តាម​គោលការណ៍​គ្រឹះ​នៃ​សេចក្ដី​ជំនឿ និង បង្ហាញ​​ដល់​អ្នក​ដឹកនាំ​ប្រចាំ​មូលដ្ឋាន​ក្នុង​រយៈ​ពេល​ពីរ​ឆ្នាំ​ម្ដង​ដើម្បី​អាច​បាន​ចូល​ក្នុង​ព្រះវិហារ​បរិសុទ្ធ ។

ភាព​ពិសិដ្ឋ​នៃ​ព្រះវិហារ​បរិសុទ្ធ​ពី​ជំនាន់​បុរាណ​ស្ដែង​នៅ​ក្នុង​ព្រះ​គម្ពីរ​សញ្ញា​ចាស់ និង សញ្ញា​ថ្មី ។ នៅ​ក្នុង​ព្រះគម្ពីរ​សញ្ញា​ចាស់ ម៉ូសេ បាន​ឲ្យ​កូនចៅ​អ៊ីស្រាអែល​យក​រោង​ឧបោសថ​ទៅ​ជាមួយ​ពួកគេ ( ព្រះវិហារ​បរិសុទ្ធ​ដ៏​ធំ​ដែល​អាច​បត់បែន​យក​តាម​ខ្លួន​បាន ) នៅ​ពេល​ដែល​ពួកគេ​ចុះ​ទៅ​ក្នុង​ទី​រហោស្ថាន ។ ស្ដេចសាឡូម៉ូន បាន​សាងសង់ និង ឧទ្ទិស​ព្រះវិហារ​បរិសុទ្ធ​ដ៏​ល្អ​អស្ចារ្យ ដែល​ត្រូវ​បាន​បំផ្លិច​បំផ្លាញ​ដោយ​ពួក​បាប៊ីឡូន​ក្នុង​ឆ្នាំ 586 មុន គ.ស. ។ វា​ត្រូវបាន​ជួសជុល​សាងសង់​ឡើង​វិញ ហើយ​ក្រោយ​មក​រីក​សុះសាយ​យ៉ាង​ខ្លាំង ប៉ុន្តែ​ត្រូវបាន​បំផ្លិចបំផ្លាញ​ចោល​សារជា​ថ្មី​ដោយ​ពួក​រ៉ូម៉ាំង​នៅ​ឆ្នាំ​ទី 70 នៃ គ.ស. ។ ជញ្ជាំង​ភាគ​ខាង​លិច​ដ៏​ធំ​នៅ​តែ​មាន​ក្នុង​ទីក្រុង យេរ៉ូសាឡិម​សព្វថ្ងៃ​នេះ ហើយ​ទោះ​ជា​មួយ​សហសវត្សរ៍​បាន​កន្លង​ទៅ​ហើយ​ក្ដី ក៏​នៅ​តែ​បន្សល់​ទី​ពិសិដ្ឋ​មួយ​សម្រាប់​ពួក​សាសន៍​យូដា​ដែរ ។ ព្រះគម្ពីរ​សញ្ញា​ថ្មី ចារ​ពី​ដំណើរ​រឿង​របស់​ព្រះយេស៊ូវគ្រីស្ទ​សម្អាត​ព្រះ​វិហារ​បរិសុទ្ធ​ នៅ​ពេល​ដែល​ភាព​ពិសិដ្ឋ​របស់​ព្រះវិហារ​បរិសុទ្ធ​ត្រូវបាន​ជាន់​ឈ្លី​ដោយ​ការលក់​ដូរ​របស់​ប្រជារាស្ត្រ​នៅ​ក្នុង​ទីធ្លា​ព្រះវិហារបរិសុទ្ធ​ ។

ព្រះវិហារ​បរិសុទ្ធ​នានា​របស់​ពួក​បរិសុទ្ធ​ថ្ងៃ​ចុងក្រោយ ត្រូវ​បាន​ចាត់ទុក​ថា​ជា​ព្រះ​ដំណាក់​នៃ​ព្រះអម្ចាស់ ដែល​ជា​ទី​បរិសុទ្ធ ហើយ​សុខសាន្ត​ដាច់​ពី​ភាព​កង្វល់​​នៃ​លោកិយ ។ ព្រះវិហារ​បរិសុទ្ធ​ទាំងនេះ​ជា​ទី​កន្លែង ដែល​សមាជិក​សាសនាចក្រ​ធ្វើ​ការសន្យា និង ការតាំងចិត្ត​សំខាន់​ជាមួយ​ព្រះ ។ ព្រះវិហារ​បរិសុទ្ធ​ក៏​ជា​កន្លែង​ដែល​សច្ចា​ប្រណិធាន​ដ៏​ខ្ពស់​នៃ​សេចក្ដី​ជំនឿ​កើត​មាន—អាពាហ៍ពិពាហ៍​នៃ​គូស្វាមី​ភរិយា និង « ការផ្សារភ្ជាប់ » នៃ​ក្រុម​គ្រួសារ​សម្រាប់​ភាព​អស់​កល្ប​ជានិច្ច ។

ព្រះវិហារ​បរិសុទ្ធ​បម្រើ​ជា​កន្លែង​ដែល​ពិធី​នានា​មាន​ដូចជា ពិធី​បុណ​ជ្រមុជ​ទឹក និង អាពាហ៍ពិពាហ៍​ដ៏​នៅ​អស់​កល្ប​ជានិច្ច ​អាច​ត្រូវ​បាន​ធ្វើ​ឡើង​ជំនួស​ជន​ដែល​ស្លាប់​ហើយ —ជា​ទង្វើ​មួយ​ដែល​ពួក​បរិសុទ្ធ​ជឿ ត្រូវ​បាន​ធ្វើ​តៗ​មក​នៅ​ក្នុង​ជំនាន់​ព្រះគម្ពីរ​សញ្ញា​ថ្មី ប៉ុន្តែ​ក្រោយ​មក​នោះ​ត្រូវ​បាន​រលាយ​សាប​សូន្យ​អស់​ទៅ ។

ព្រះវិហារ​បរិសុទ្ធ​តម្រង់​ពួក​បរិសុទ្ធ​ថ្ងៃ​ចុងក្រោយ​ទៅ​រក​ព្រះយេស៊ូវគ្រីស្ទ និង ជីវិត​ចុងក្រោយ​របស់​ពួកគេ​នៅ​ជាមួយ​ទ្រង់ ព្រះ​វរបិតា​សួគ៌ និង សមាជិក​ក្រុម​គ្រួសារ​របស់​គេ​ ប្រសិន​បើ​គេ​ធ្វើតាម​កាបង្រៀន​របស់​ព្រះគ្រីស្ទ​ដោយ​ស្មោះត្រង់ ។ក្នុង​វិវរណៈ​សម័យ​ទំនើប យ៉ូសែប ស៊្មីធ បាន​ទទួល​ការណែនាំ​ឲ្យ​សាងសង់​ព្រះវិហារ​បរិសុទ្ធ​នៅ​ទីក្រុង ខឺត​ឡង់ រដ្ឋ អូហៃអូ ( ត្រូវបាន​ឧទ្ទិស​ឆ្លង​ក្នុង​ឆ្នាំ 1836 ) ។ ក្រោយ​មក លោក​ត្រូវ​បាន​ណែនាំ​ឲ្យ​សាងសង់​ព្រះវិហារ​បរិសុទ្ធ​មួយ​នៅ​ទីក្រុង ណៅវូ រដ្ឋ អិលលីណោយ ( ឆ្នាំ 1846 ) ។ ដោយសារ​ព្រះវិហារ​បរិសុទ្ធ​មាន​សារៈ​សំខាន់​យ៉ាង​ខ្លាំង​​ ចំពោះ​សមាជិក​សាសនាចក្រ​នៅ​សម័យ​មុន ទើប​វេលា​ដែល​បាន​មក​ដល់​ច្រក​ភ្នំ សលត៍ លេក ព្រិកហាំ យ៉ង់ បាន​ជ្រើស​យក​ទីតាំង​ដើម្បី​សាងសង់​ព្រះវិហារ​បរិសុទ្ធ ។

មាន​ព្រះវិហារ​បរិសុទ្ធ​ចំនួន 152 កន្លែងនៅ​​ទូទាំង​ពិភពលោក​ រួម​ទាំង​កន្លែង​កំពុង​តែដំណើរការ កំពុង​តែ​សាងសង់ ឬ បាន​ប្រកាស​រួច ។នៅ​លើ​កំពូល​ព្រះវិហារ​បរិសុទ្ធ​ភាគ​ច្រើន ​មាន​រូប​សំណាក់​ពណ៌​មាស​នៃ​បុរស​ពាក់​អាវ​វែង​កំពុង​ផ្លុំ​ត្រែ ។ រូប​សំណាក់​នោះ​ពិពណ៌នា​ពី​ទេវតា​មរ៉ូណៃ ដែល​ជា​ព្យាការី​ជំនាន់​បុរាណ និង ជា​តួអង្គ​​សំខាន់​នៅ​ក្នុង​ព្រះ​គម្ពីរ​មរមរន ។ រូប​សំណាក់​នេះ ​ជា​និមិត្តរូប​នៃ​ប្រកាស​ដំណឹង​ល្អ​នៃ​ព្រះយេស៊ូវគ្រីស្ទ​ទៅ​ដល់​ពិភពលោក ។

Style Guide Note:When reporting about The Church of Jesus Christ of Latter-day Saints, please use the complete name of the Church in the first reference. For more information on the use of the name of the Church, go to our online Style Guide.