សេចក្ដីថ្លែងជាសង្ខេបចំនួនដប់បី បានសរសេរដោយយ៉ូសែប ស្ម៊ីធដើម្បីសង្ខេបអំពីគោលលទ្ធិសំខាន់ៗមួយចំនួនរបស់សាសនាចក្រ ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
1. យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និង ដល់ព្រះរាជបុត្រាទ្រង់គឺព្រះយេស៊ូវគ្រីស្ទ ហើយដល់ ព្រះវិញ្ញាណបរិសុទ្ធ ។
2. យើងខ្ញុំជឿថា មនុស្សទាំងអស់នឹងត្រូវទទួលទោសចំពោះអំពើបាបរបស់ខ្លួនផ្ទាល់ គឺមិនមែនចំពោះអំពើរំលងរបស់លោកអ័ដាមទេ ។
3. យើងខ្ញុំជឿថា តាមរយៈដង្វាយធួននៃព្រះគ្រីស្ទ នោះមនុស្សលោកទាំងអស់អាចបានសង្គ្រោះ ដោយសារការគោរពតាមក្រឹត្យវិន័យ និង ពិធីការទាំងឡាយនៃដំណឹងល្អ ។
4. យើងខ្ញុំជឿថា គោលការណ៍ទីមួយ និង ពិធីបរិសុទ្ធទាំងឡាយនៃដំណឹងល្អគឺ ៖ ទីមួយ សេចក្តីជំនឿ ជឿដល់ព្រះអម្ចាស់យេស៊ូវគ្រីស្ទ ទីពីរការប្រែចិត្ត ទីបីបុណ្យជ្រមុជទឹកដោយការពន្លិចសម្រាប់ការផ្តាច់បាប ទីបួនការដាក់ដៃលើ សម្រាប់អំណោយទានជាព្រះវិញ្ញាណបរិសុទ្ធ ។
5. យើងខ្ញុំជឿថា មនុស្សត្រូវតែបានហៅពីព្រះ ដោយការព្យាករណ៍ និង ដោយការដាក់ដៃលើ ដោយអស់អ្នកណាដែលមានសិទ្ធិអំណាច ដើម្បីនឹងផ្សាយដំណឹងល្អ ហើយប្រព្រឹត្តពិធីការទាំងឡាយនៃដំណឹងល្អ ។
6. យើងខ្ញុំជឿចំពោះការរៀបចំដូចគ្នា ដូចដែលមាននៅក្នុងសាសនាចក្រពីអតីតកាលដូចជា ពួកសាវក ពួកព្យាការីពួកគ្រូគង្វាល ពួកគ្រូ ពួកគ្រូផ្សាយដំណឹងល្អ ជាដើម ។
7. យើងខ្ញុំជឿដល់អំណោយទានខាងភាសា ការព្យាករណ៍ វិវរណៈ ការនិមិត្ត ការប្រោសឲ្យជា ការបកប្រែភាសា ជាដើម ។
8. យើងខ្ញុំជឿថាព្រះគម្ពីរបរិសុទ្ធគឺជាព្រះបន្ទូលនៃព្រះ បើសិនជាបានបកប្រែត្រឹមត្រូវ យើងខ្ញុំក៏ជឿដែរថា ព្រះគម្ពីរមរមនជាព្រះបន្ទូលនៃព្រះ ។
9. យើងខ្ញុំជឿចំពោះការណ៍ទាំងអស់ ដែលទ្រង់បានបើកសម្ដែងមក និង ការណ៍ទាំងអស់ ដែលទ្រង់បើកសម្ដែង នៅពេលឥឡូវនេះ ហើយយើងខ្ញុំជឿថា ទ្រង់នឹងបើកសម្ដែងនូវការណ៍ដ៏ធំ និង សំខាន់ៗជាច្រើន ដែលទាក់ទងទៅនឹងនគរនៃព្រះ ។
10. យើងខ្ញុំជឿចំពោះការប្រមូលដ៏ពិតប្រាកដ នៃសាសន៍អ៊ីស្រាអែល និង ចំពោះការកសាងឡើងវិញនូវពូជទាំង 10 អំបូរថា ក្រុងស៊ីយ៉ូន ( ក្រុងយេរូសាឡិមថ្មី ) នឹងត្រូវបានស្ថាបនានៅលើទ្វីបអាមេរិកថា ព្រះគ្រីស្ទនឹងសោយរាជ្យនៅលើផែនដីផ្ទាល់ ហើយថា ផែនដីនឹង បានផ្លាស់ប្តូរសារជាថ្មី ហើយនឹងទទួលសិរីល្អដ៏ប្រកបដោយភាពបរមសុខ ។
11. យើងខ្ញុំសូមអះអាងយកសិទ្ធិក្នុងការថ្វាយបង្គំព្រះដ៏មានមហិទ្ធីឬទ្ធិ ស្របតាមការណែនាំនៃសម្បជញ្ញៈរបស់យើងខ្ញុំ ហើយសូម បណ្ដោយឲ្យមនុស្សទាំងអស់ មានសិទ្ធិដូចគ្នា ចូរឲ្យគេថ្វាយបង្គំតាមរបៀបណានៅទីណា ឬអ្វីក៏ដោយដែលគេប្រាថ្នា ។
12. យើងខ្ញុំជឿចំពោះការនៅក្រោមអំណាចស្ដេច ប្រធានាធិបតី អ្នកគ្រប់គ្រង និង ចៅក្រមទាំងឡាយ ក្នុងការគោរពប្រតិបត្តិ និង ការគាំទ្រច្បាប់ ។
13. យើងខ្ញុំជឿលើការប្រព្រឹត្តដោយទៀងត្រង់ ត្រឹមត្រូវ បរិសុទ្ធ សប្បុរស គុណធម៌ ហើយលើការធ្វើល្អដល់មនុស្សទាំងអស់ ពិតមែនហើយ យើងខ្ញុំអាចនិយាយបានថា យើងខ្ញុំដើរតាមសេចក្តីដាស់តឿនរបស់ប៉ុល— យើងជឿដល់អ្វីៗទាំងអស់ យើងខ្ញុំសង្ឃឹមដល់អ្វីៗទាំងអស់ យើងខ្ញុំបានទ្រាំទ្រអ្វីៗជាច្រើន ហើយសង្ឃឹមថានឹងអាចទ្រាំទ្រអ្វីៗទាំងអស់បានដែរ ។ ហើយបើសិនជាមានអ្វីណាមួយ ដែលប្រកបដោយគុណធម៌ គួរស្រឡាញ់ ឬឈ្មោះល្អ ឬគួរឲ្យសរសើរ នោះយើងខ្ញុំស្វែងរករបស់ផងទាំងនេះហើយ ។