សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ផ្ដល់កម្មវិធីមួយដ៏ពេញលេញ សម្រាប់យុវវ័យតាមរយៈអង្គការយុវជន និងអង្គការយុវនារី ។ យុវវ័យ មានអាយុពី 12 ឆ្នាំ ដល់ 17 ឆ្នាំ ជួបជុំគ្នាក្នុងថ្នាក់នៅថ្ងៃអាទិត្យ សម្រាប់ការណែនាំខាងសាសនា និងជាច្រើនដងក្នុងមួយខែ សម្រាប់សកម្មភាពសង្គម រួមទាំងគម្រោងការបម្រើ កីឡា ការបោះជំរុំ និងការរាំកំសាន្ដ ។ យុវជន និងយុវនារី ក៏ផ្ដល់ឲ្យនូវតំណែងថ្នាក់ដឹកនាំផងដែរ នៅក្នុងអង្គការ ដែលពួកគេរៀនអំពី ជំនាញថ្នាក់ដឹកនាំ ដូចជា ការដាក់គោលដៅ ការរៀបចំសកម្មភាពក្រុម និងការដោះស្រាយបញ្ហា ។
យុវជនដែលមានភាពសក្ដិសម ត្រូវបានតែងតាំងជាឌីកុននៅក្នុងបព្វជិតភាពអើរ៉ុនក្នុងអាយុ 12 ឆ្នាំ ។ ពួកគេនឹងឡើងទៅដល់តំណែងគ្រូនៅអាយុ 14 ឆ្នាំ ហើយបន្ទាប់មកនឹងទៅតំណែងសង្ឃ នៅអាយុ 16 ឆ្នាំ ។ ការទទួលខុសត្រូវចម្បងមួយរបស់អ្នកដឹកនាំនៅក្នុងកម្មវិធីយុវជន គឺដើម្បីរៀបចំយុវជនឲ្យធ្វើនូវការទទួលខុសត្រូវបព្វជិតភាព ហើយស្ថាបនាទីបន្ទាល់អំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។
ការទទួលខុសត្រូវរបស់យុវជន ដែលកាន់តំណែងបព្វជិតភាព រួមមានការរៀបចំ និងការផ្ដល់សាក្រាម៉ង់ ( សេចក្ដីរួបរួមគ្នា ) ចំពោះសមាជិកសាសនាចក្រ អំឡុងកម្មវិធីថ្វាយបង្គំថ្ងៃអាទិត្យ ការសួរសុខទុក្ខ និងការបង្រៀនសមាជិកនៅតាមផ្ទះពួកគេ ហើយនឹងការប្រមូលការបរិច្ចាគសម្រាប់អ្នកក្រីក្រ ។
អង្គការយុវជន ក៏រៀបចំក្មេងប្រុសសម្រាប់កាតព្វកិច្ចនាពេលអនាគតក្នុងគ្រួសារពួកគេ ជីវិតផ្ទាល់ខ្លួនគេ និងសហគមន៍ តាមរយៈកម្មវិធីសម្រេចស្នាដៃ ដែលហៅថា « កាតព្វកិច្ចចំពោះព្រះ » ផងដែរ ។ បន្ថែមពីលើនោះ សាសនាចក្រចារយល់ព្រម និងជាអ្នកឧបត្ថម្ភ ក្រុមកាយឫទ្ធិសម្រាប់យុវជននៅក្នុងសហរដ្ឋអាមេរិក និងប្រទេសកាណាដា ។
គោលបំណងនៃកម្មវិធីយុវនារី គឺដើម្បីជួយដល់យុវនារីវ័យជំទង់ ឲ្យស្ថាបនាទីបន្ទាល់របស់ពួកគេទៅលើព្រះយេស៊ូវគ្រីស្ទ ហើយរៀនជំនាញ ដើម្បីរៀបចំខ្លួនសម្រាប់តួនាទីនាពេលអនាគតរបស់ពួកគេ ក្នុងនាមជាស្ត្រីក្នុងសាសនាចក្រ និងក្នុងនាមជាសមាជិកនៃសមាគមសង្គ្រោះ ។
អ្នកដឹកនាំយុវនារី រៀបចំផែនការរាល់សប្ដាហ៍សម្រាប់ថ្នាក់ថ្ងៃអាទិត្យ ដែលបង្រៀនយុវនារីអំពីគោលការណ៍ទាំងឡាយនៃដំណឹងល្អ និងរបៀបដើម្បីអនុវត្តគោលការណ៍ទាំងនោះក្នុងជីវិតប្រចាំថ្ងៃ ។
យុវនារី ចូលរួមក្នុងកម្មវិធីសម្រេចជោគជ័យមួយ ដែលហៅថា « ការអភិវឌ្ឍន៍ខ្លួន » ដោយការដាក់គោលដៅ នៅក្នុងគុណតម្លៃទាំងប្រាំបី ៖ សេចក្ដីជំនឿ និស្ស័យនៃព្រះ គុណសម្បត្តិផ្ទាល់ខ្លួន ចំណេះវិជ្ជា ការជ្រើសរើស និងការទទួលខុសត្រូវ ការងារល្អ សេចក្ដីទៀងត្រង់ និងគុណធម៌ ។ យុវនារី ក៏រៀនជំនាញដែលប្រកបដោយគុណតម្លៃ ហើយទទួលរង្វាន់ តាមរយៈកម្មវិធីបោះជំរុំយុវនារីផងដែរ ។