យ៉ូសែប ស្ម៊ីធ ជុញ្ញ័របានកើតនៅថ្ងៃទី 23 ខែ ធ្នូ ឆ្នាំ 1805 នៅភូមិ សារ៉ុន រដ្ឋ វ័រម៉ន្ត ដែលឪពុកលោកឈ្មោះ យ៉ូសែប និង ម្តាយឈ្មោះ លូស៊ី ម៉ាក ស្ម៊ីធ ។ លោកបានកើតក្នុងគ្រួសារកសិករក្រីក្រ ជាកូនទីប្រាំក្នុងចំណោមកូនទាំង 11 នាក់ដែល—ប្រាំបួននាក់បាននៅរស់ ។ ពីព្រោះតែគ្រួសាររបស់លោកពុំអាចផ្គត់ផ្គង់ការសិក្សារដ្ឋដែលមានតម្លៃថ្លៃបាន នោះយ៉ូសែប រៀនបានត្រឹមថ្នាក់ទីបីនៅសាលាចំណេះដឹងទូទៅតែប៉ុណ្ណោះ ។ លោកបានទទួលការអប់រំជាចម្បងនៅផ្ទះ មកពីការសិក្សាព្រះគម្ពីរបរិសុទ្ធជាគ្រួសារជាមួយនឹងបងប្អូនប្រុសស្រីរបស់លោក ។
ដោយមានការច្របូកច្របល់ខាងសាសនានៅគ្រានិយមសាសនាក្នុងរដ្ឋ នូវ យ៉ោក ដែលលោកបានរស់នៅក្នុងឆ្នាំ 1820 យ៉ូសែបមានអាយុ 14 ឆ្នាំ បានអានវគ្គមួយនៅក្នុងព្រះគម្ពីរសញ្ញាថ្មី ដែលក្រោយមកលោកបានសរសេរថា វាបាននិយាយចាក់ចូលទៅក្នុងដួងព្រលឹងរបស់លោក ។ វាគឺជាការដាស់តឿនមួយចំពោះអ្នកទាំងឡាយ ដែលខ្វះប្រាជ្ញា ដើម្បីស្វែងរកវាមកពីប្រភពដ៏ទេវភាពមួយ ។ ការឆ្លើយតបរបស់យ៉ូសែប គឺត្រូវទៅរកកន្លែងស្ងាត់មួយនៅក្នុងតំបន់ព្រៃមួយ នៅជិតនឹងផ្ទះលោក ហើយបានអធិស្ឋានខ្លាំងជាលើកដំបូងក្នុងជីវិតរបស់លោក ។
អ្វីដែលបានកើតមកតាមក្រោយនោះ បានផ្លាស់ប្ដូរយ៉ូសែប ស៊្មីធ ជារៀងរហូត ហើយលោកបានក្លាយជាមនុស្សសំខាន់ម្នាក់ នៃជំនឿរបស់ពួកបរិសុទ្ធថ្ងៃចុងក្រោយ ។ យ៉ូសែប ចែងទុកថា ព្រះជាព្រះបិតា និង ព្រះយេស៊ូវគ្រីស្ទ បានបង្ហាញព្រះកាយដល់លោក ។ « ខ្ញុំបានឃើញបង្គោលពន្លឺមួយនៅចំលើក្បាលខ្ញុំ មានរស្មីចែងចាំងលើសជាងសុរិយាទៅទៀត ដែលចុះសន្សឹមៗមកចំលើរូបខ្ញុំ ។ នៅក្នុងពន្លឺនោះ លោកបានឃើញតួអង្គពីរ—តួអង្គមួយបានមានព្រះបន្ទូលហៅឈ្មោះយ៉ូសែប ដោយចង្អុលទៅតួអង្គមួយទៀតថា « នេះជាព្រះរាជបុត្រាស្ងួនភ្ងាររបស់យើង ។ ចូរស្ដាប់តាមទ្រង់ចុះ ! » ។សមាជិកសាសនាចក្រហៅបទពិសោធន៍នេះថាជា « ការនិមិត្តដំបូង » ។ វាបានចាប់ផ្ដើមកិច្ចការនៃការស្ដារឡើងវិញនៃសាសនាចក្រព្រះយេស៊ូវគ្រីស្ទនៅលើផែនដីនេះ ។
យ៉ូសែប ស៊្មីធ ប្រហែលជាត្រូវបានគេស្គាល់ច្បាស់ មកពីការបកប្រែរបស់លោកនៃព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ ។ ប៉ុន្មានឆ្នាំ បន្ទាប់ពីការនិមិត្តដំបូងរបស់លោកមក សមាជិកសាសនាចក្រជឿថា យ៉ូសែប ត្រូវបាននាំទៅឯកូនភ្នំមួយនៅក្បែរភូមិប៉ាលម៉ៃរ៉ា រដ្ឋនូវ យ៉ោក ជាកន្លែងដែលលោកបានទទួលបញ្ជីបុរាណមកពីទេវតាមួយអង្គ ដែលមានព្រះនាមថា មរ៉ូណៃ ។ បញ្ជីនោះ បានឆ្លាក់លើផ្ទាំងលោហៈ ប្រាប់ពីប្រវត្តិប្រជាជនមួយ ដែលបានរស់នៅលើទ្វីបអាមេរិកនៅជំនាន់ព្រះគ្រីស្ទ រួមទាំងការលេចមកនៃព្រះគ្រីស្ទដែលបានរស់ឡើងវិញចំពោះពួកគេផងដែរ ។ យ៉ូសែប បានបកប្រែកំណត់ត្រា ប្រហែលជារយៈពេលបីខែ ហើយលទ្ធផលនៃព្រះគម្ពីរមរមនដំបូង ត្រូវបានបោះពុម្ពនៅរដ្ឋនូវ យ៉ោក ក្នុងឆ្នាំ 1830 ។ ជាច្បាប់មួយដែលមានទំព័រច្រើនជាង 500 សន្លឹក ព្រះគម្ពីរមរមន គឺជាការបរិច្ចាគដ៏អស្ចារ្យមួយ របស់យ៉ូសែប និងជាគម្ពីរគ្រឹះមួយនៃសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
ពួកបរិសុទ្ធថ្ងៃចុងក្រោយ ជឿថា សិទ្ធិអំណាចដ៏ទេវភាព ត្រូវបានបាត់បង់នៅក្នុងសាសនាចក្រពីបុរាណ បន្ទាប់ការស្លាប់របស់ពួកសាវក ហើយតម្រូវឲ្យមានការស្ដារឡើងវិញមួយ តាមរយៈការធ្វើអន្តរាគមន៍ពីព្រះ ។ ការស្ដារឡើងវិញនៃសិទ្ធិអំណាចបព្វជិតភាព តាមរយៈយ៉ូសែប ស្ម៊ីធ នៅក្នុងពាក់កណ្ដាលសតវត្សរ៍ដំបូងនៃសតវត្សរ៍ទី 19 គឺជាព្រឹត្តិការណ៍ពិតមួយ ដោយមានទស្សនកិច្ចពីអ្នកទាំងឡាយដែលកាន់សិទ្ធិអំណាចពីបុរាណ ។
យ៉ូសែប ស្ម៊ីធ និងសហការីប្រាំនាក់ទៀត ព្រមទាំងអ្នក 50 នាក់ដទៃទៀត បានចូលរួមក្នុងការរៀបចំសាសនាចក្រជាផ្លូវការនៅក្នុងផ្ទះឈើមួយនៅ ភូមិ ហ្វាយ៉ែតរដ្ឋនូវ យ៉ោក នៅថ្ងៃទី 6 ខែ មេសា ឆ្នាំ 1830 ។ លោកបានធ្វើជាអធិបតីលើសាសនាចក្រ រហូតដល់ថ្ងៃទី 27 ខែ មិថុនា ឆ្នាំ 1844 នៅពេលលោកត្រូវបានគេសម្លាប់ ។ នៅក្រោមការដឹកនាំរបស់លោក សមាជិកភាពក្នុងសាសនាចក្របានកើនឡើងពីចំនួនដ៏តូចមួយ ទៅដល់ចំនួនច្រើនជាង 26,000 នាក់ ។
វិវរណៈរបស់យ៉ូសែប ស្ម៊ីធ បានណែនាំនូវការបង្កើតថ្មីខាងទេវវិទ្យាដ៏ទាក់ទាញ និងឧបសគ្គនានាចំពោះព្រះវិហារជាច្រើននៃជំនាន់នោះ ។ លោករឹងមាំនៅក្នុងការការពារសេរីភាពខាងសាសនារបស់លោកចំពោះមនុស្សគ្រប់ជំនឿទាំងអស់ ។ វិវរណៈរបស់លោក បានណែនាំគោលគំនិតដូច្នេះថា ព្រះវិហារបរិសុទ្ធ ដែលកិច្ចការសង្គ្រោះ អាចធ្វើឡើងសម្រាប់មរណជន និងការយល់ដឹងអំពីកម្រិតទាំងបីនៃស្ថានសួគ៌ដ៏ទូលំទូលាយ និងអំពីជោគវាសនាទីបញ្ចប់នៅក្នុងជីវិតបន្ទាប់របស់កូនចៅស្មោះត្រង់នៃព្រះ ។ បទពិសោធន៍របស់លោកជាមួយនឹងការនិមិត្តដំបូង បាននាំពួកបរិសុទ្ធថ្ងៃចុងក្រោយ យល់អំពីលក្ខណៈរបស់ព្រះ និងព្រះយេស៊ូវគ្រីស្ទខាងរូបកាយ ហើយថាមនុស្សលោក ត្រូវបានបង្កើតឡើងតាមរូបអង្គទ្រង់ ។ លោកបាននិយាយ និងសរសេរជារឿយៗអំពីការប្រមូលផ្ដុំនៃពួកអ៊ីស្រាអែលនៅថ្ងៃចុងក្រោយ ហើយបានបង្រៀនវាពុំមែនគ្រាន់តែក្នុងពាក្យនៃការប្រមូលផ្ដុំនៃពួកយូដា ទៅអ៊ីស្រាអែលប៉ុណ្ណោះទេ ប៉ុន្តែក៏ជាការប្រមូលមនុស្សរបស់ព្រះទាំងអស់ទៅកាន់ទីសុវត្ថិភាព និងបរិសុទ្ធភាពផងដែរ ។ សូមមើលផងដែរ ៖ ហេតុអ្វី និងយ៉ាងដូចម្ដេច បានជាពួកមរមនខុសពីគេ ?
នៅក្រៅសាសនាចក្រ យ៉ូសែប ស្ម៊ីធ ក៏ត្រូវបានគេស្គាល់ពីសេចក្តីផ្តើមរបស់លោកអំពីការអនុវត្តន៍ពហុពន្ធភាពកាលពីបុរាណ តាមរយៈវិវរណៈផងដែរ តែទោះជាយ៉ាងណារឿងនេះ ពុំមានអនុវត្តនៅក្នុងសាសនាចក្រឡើយ ហើយវាពុំត្រូវបានពួកសមាជិកសាសនាចក្រយកមកពិភាក្សាជាញឹកញាប់ឡើយ លើកលែងតែវាស្ថិតនៅក្នុងបរិបទខាងប្រវត្តិសាស្ត្រមួយប៉ុណ្ណោះ ។
ក្នុងគ្រាដែលលោកបានដឹកនាំសាសនាទើបនឹងកើតថ្មី យ៉ូសែប បានបង្កើតកម្មវិធីបេសកកម្មអន្តរជាតិមួយ ហើយអ្វីដែលបានឃើញនៅសព្វថ្ងៃនេះគឺជាអង្គការស្ត្រីធំជាងគេនៅលើពិភពលោក ។ លោកបានត្រួតត្រាលើអគារនៅក្នុងទីក្រុងទាំងបី និង ដឹកនាំការដ្ឋានសាងសង់ព្រះវិហារបរិសុទ្ធពីរ—នៅក្នុងពេលដែលស៊ូទ្រាំនឹងការបៀតបៀនក៏ខ្លាំងមកពីពួកមនុស្សកំណាចក្នុងមូលដ្ឋាន ដែលទីបំផុតបានបណ្ដេញសមាជិកសាសនាចក្រចេញពីទីក្រុងទាំងបី ដែលយ៉ូសែប បានតាំងឡើងនោះ ។
ពីព្រោះតែសិទ្ធិខាងសាសនា និង សិទ្ធិរដ្ឋប្បវេណីរបស់ពួកសមាជិកសាសនាចក្រ ក្នុងនាមជាពលរដ្ឋអាមេរិកកាំង ត្រូវគេបដិសេធចោល ទោះជាមានការអង្វរកច្រើនលើកច្រើនសារដល់សហព័ន្ធរដ្ឋាភិបាលក្ដី ក៏ពួកអ្នកដឹកនាំសាសនាចក្រ បានប្រកាសពីបេក្ខភាពរបស់យ៉ូសែប ស្ម៊ីធ ធ្វើជាប្រធានាធិបតីនៃសហរដ្ឋអាមេរិកក្នុងខែ មករា ឆ្នាំ 1844 ។ មកដល់ខែឧសភា យ៉ូសែប ត្រូវបានជ្រើសរើសដោយអនុសញ្ញា ទីក្រុងណៅវូ រដ្ឋអិលលីណោយ ។ វេទិកានយោបាយរបស់លោកបានអំពាវនាវឲ្យមានអន្តរាគមន៍ពីរដ្ឋាភិបាលជាប្រយោជន៍ដល់សិទ្ធិខាងសាសនា និង សិទ្ធិប្បវេណីក្នុងការប្រឈមមុខនឹងការបៀតបៀន ។ យ៉ូសែប និង បងប្រុសរបស់លោក ត្រូវបានមនុស្សកំណាចមួយក្រុមសម្លាប់ក្នុងខែ មិថុនា នៅឆ្នាំដដែលនោះ ដើម្បីរារាំងកុំឲ្យលោកចូលរួមកាន់តំណែងនយោបាយបាន ។
យ៉ូសែប និង បងប្រុសរបស់លោក ហៃរុម ត្រូវគេបាញ់សម្លាប់នៅថ្ងៃទី 27 ខែ មិថុនា ឆ្នាំ 1844 ដោយឧក្រិតជនមួយក្រុមដែលមានឧក្រិតជនពី 150 ទៅ 200 នាក់ ។ បងប្អូនប្រុសទាំងឡាយ និងសហការីជិតស្និតមួយចំនួន ត្រូវបានចាប់ខ្លួនដាក់ក្នុងគុកអិលលីណោយ ដោយចោទប្រកាន់ថាក្បត់ជាតិដោយខុសឆ្គង បន្ទាប់ពីការប្រគល់ខ្លួនទៅឲ្យច្បាប់ ។ យ៉ូសែប មានអាយុ 38 ឆ្នាំ ហៃរ៉ុម មានអាយុ 44 ឆ្នាំ ។ នៅថ្ងៃទី 28 ខែ មិថុនា សាកសពរបស់យ៉ូសែប និង ហៃរ៉ុម ត្រូវបានគេរៀបចំ និង ដាក់នៅខាងក្រៅឲ្យអ្នកកាន់ទុក្ខ ប្រមាណ 10,000នាក់ បានឃើញ ហើយត្រូវបានបញ្ចុះនៅថ្ងៃបន្ទាប់ដោយសម្ងាត់ ដើម្បីចៀសវាងពីការវាយប្រហារ ឬ ការបំផ្លាញរូបកាយរបស់ពួកមនុស្សកំណាច ។
សាសនាចក្រដែលយ៉ូសែប បានស្ថាបនាឡើងក្នុងឆ្នាំ 1830 នៅសព្វថ្ងៃនេះ មានសមាជិកច្រើនជាង 14 លាននាក់ជឿជាសាកល ហើយយ៉ូសែប ស្ម៊ីធ ផ្ទាល់ត្រូវបានពួកបរិសុទ្ធថ្ងៃចុងក្រោយគោរពថាជាព្យាការីសំខាន់បំផុតនៃសម័យទំនើប ។ ជាការផ្ទុយទៅនឹងការអះអាងដោយពួកមារសត្រូវនៃសាសនាចក្រមួយចំនួន យ៉ូសែប គឺពុំត្រូវបានសមាជិកនៃសាសនាចក្រថ្វាយបង្គំទេ ។ លោកត្រូវបានគេគោរពជាព្យាការីម្នាក់ ប៉ុន្តែលោកជាមនុស្សម្នាក់ដែលមានកំហុស និងមានការធ្លាក់ចុះជាធម្មតាដូចមនុស្សដទៃដែរ ។