Additional Resource

យ៉ូសែប ស្ម៊ីធ

យ៉ូសែប ស៊្មីធ គឺ​ជា​អ្នក​បង្កើត និង ជា​ប្រធាន​ទី​មួយ​នៃ សាសនាចក្រ​នៃ​ព្រះយេស៊ូវគ្រីស្ទ​នៃ​ពួក​បរិសុទ្ធ​ថ្ងៃ​ចុងក្រោយ ។ លោក និង អ្នក​ដែល​ជឿ​តាម​លោក បាន​រៀបចំ​សាសនាចក្រ​ឡើង​ជា​ផ្លូវការ​នៅ​ភូមិ​ហ្វាយ៉ែត្ត នូវ យ៉ោក នៅ​ថ្ងៃ​ទី 6 ខែ មេសា ឆ្នាំ 1830 ។ លោក​បាន​ធ្វើ​អធិបតី​លើ​សាសនាចក្រ​រហូត​ដល់​ថ្ងៃ​ទី 27 ខែ មិថុនា ឆ្នាំ 1844 គឺ​ជា​ពេល​ដែល​លោក​ត្រូវគេ​ធ្វើ​ទុក្ករកម្ម ។ នៅ​ក្រោម​ការដឹកនាំ​របស់​លោក សមាជិកភាព​ក្នុង​សាសនាចក្រ​បាន​កើន​ឡើង​ពី​ប្រាំមួយ​នាក់​ទៅ​ដល់ 26,000 នាក់ ។

នៅ​ពាក់​កណ្ដាល​ទសវត្សរ៍​ឆ្នាំ 1800 ចៅហ្វាយ​ក្រុង បូស្តុន និង អ្នក​និពន្ធ​ជាតិ និង អ្នក​សរសេរ​ពី​នយោបាយ​ឈ្មោះ ចូសាយ ឃ្វីនស៊ី បាន​សរសេរ​ថា ៖ « នៅ​ពេល​អនាគត​នឹង​មាន​សំណួរ​ចោទ​ឡើង​ថា តើ​ពួក​អាមេរិក​ដ៏​ឆ្នើម​បាន​ធ្វើ​អ្វី​ខ្លះ ដើម្បី​ផ្ដួចផ្ដើម​គំនិត និង ជោគវាសនា​នៃ​ជន​រួម​ជាតិ​ខ្លួន ជាង​អ្នក​ណា​ទៀត​នៅ​លើ​ទ្វីប​នេះ ? ជា​រឿង​ចម្លែក​អស្ចារ្យ​ដូច​បាន​ឃើញ​មក​ហើយ​ថា វា​ពុំ​មែន​មិន​អាច​កើត​ឡើង​បាន​នោះ​ទេ ដែល​ចម្លើយ​ចំពោះ​សំណួរ​នេះ​នឹង​ឆ្លើយ​ថា គឺ​យ៉ូសែប ស៊្មីធ ដែល​ជា​ព្យាការី​ពួក​មរមន ! » ។

យ៉ូសែប ស្ម៊ីធ ជុញ្ញ័រ។ បាន​កើត​នៅ​ថ្ងៃ​ទី 23 ខែ ធ្នូ ឆ្នាំ 1805 នៅ​ភូមិ​សារ៉ុន រដ្ឋ វ័រម៉ន្ត ដែល​ឪពុក​​លោក​ឈ្មោះ​ យ៉ូសែប និង ម្តាយ​ឈ្មោះ លូស៊ី ម៉ាក ស្ម៊ីធ ។ លោក​បាន​កើត​ក្នុង​គ្រួសារ​កសិករ​ក្រីក្រ ជា​កូន​ទី​ប្រាំ​ក្នុង​ចំណោម​កូន​ទាំង 11 នាក់​ដែល​—ប្រាំបួន​នាក់​បាន​នៅ​រស់ ។ ពីព្រោះ​តែ​គ្រួសារ​របស់​លោក​ពុំ​អាច​ផ្គត់ផ្គង់​ការសិក្សា​រដ្ឋ​ដែល​មាន​តម្លៃ​ថ្លៃ​បាន នោះ​យ៉ូសែប រៀន​បាន​ត្រឹម​ថ្នាក់​ទី​បី​នៅ​សាលា​ចំណេះដឹង​ទូទៅ​តែ​ប៉ុណ្ណោះ ។ លោក​បាន​ទទួល​ការអប់រំ​ច្រើន​នៅ​ផ្ទះ​ពី​ការសិក្សា​ព្រះ​គម្ពីរ​បរិសុទ្ធ​ជា​គ្រួសារ​ជាមួយ​នឹង​បងប្អូន​ប្រុស​ស្រី​របស់​លោក ។

មិត្តភក្តិ​របស់​យ៉ូសែប គឺ ប៉ាលី ប្រាត្ត បាន​រៀបរាប់​ពី​រូបរាង​របស់​លោក​ថា​មាន​កំពស់ 6 ហ្វីត ( 1.83 ម៉ែត ) « សមសួន មាំមួន ហើយ​រហ័សរហួន សម្បុរ​ជ្រះ សក់​ស្លូត ភ្នែក​ខៀវ​ស្រទន់ [ និង ] មាន​ពុក​ចង្ការ​ស្ដើង » ។ ដោយ​មាន​ទំនោរ « ចូលចិត្ត​សប្បាយ​ពី​ធម្មជាតិ » យ៉ូសែប ចូលចិត្ត​លេង​ជាមួយ​ក្មេងៗ ឬ បោក​ចំបាប់ និង « ល្បែង​ទាញ​ដំបង » ក្នុង​ការប្រកួត​កម្លាំង ។ ពួក​បរិសុទ្ធ​ថ្ងៃ​ចុងក្រោយ​ម្នាក់​ដែល​បាន​មក​លេង​យ៉ូសែប នៅ​ទីក្រុង ខឺតឡង់ រដ្ឋ អូហៃអូ បាន​សរសេរ​ថា ៖ « លក្ខណៈ​ខាង​ក្រៅ​របស់​លោក​ពុំ​ស្ដែង​ចេញ​ដូច​ជា​អ្វី​ដែល​ខ្ញុំ​រពឹង​ថា​ជួប​នឹង​ព្យាការី​របស់​ព្រះ​ទាល់​តែ​សោះ ។ ផ្ទុយ​ទៅ​វិញ ... ខ្ញុំ​បែរ​ជា​ឃើញ​ថា លោក​ជា​បុរស​រាក់ទាក់ រួសរាយ គួរ​ឲ្យ​ចូលចិត្ត ចេះ​ធ្វើ​ឲ្យ​គេ​រីករាយ ។ ខ្ញុំ​ពុំ​អាច​មិន​ចូលចិត្ត​លោក​បាន​ទេ » ។

កាល​នៅ​វ័យ 7 ឆ្នាំ យ៉ូសែប មាន​ជំងឺ​គ្រុន​ពោះវៀន​អំឡុង​ការឆ្លង​ក្នុង​តំបន់​មួយ ។ ទោះ​ជា​លោក​បាន​ជា​សះស្បើយ​ក្នុង​រយៈ​ពេល​ពីរ​សប្ដាហ៍​ក្ដី រោគ​ឆ្លង​ដ៏​ឈឺ​ចាប់​មួយ​នោះ​បាន​បៀម​នៅ​ក្នុង​ឆ្អឹង​ជើង​របស់​យ៉ូសែប ។ នៅ​ពេល​ដែល​ការព្យាយាម​សម្អាត​រោគ​ឆ្លង​នោះ​បរាជ័យ គ្រូពេទ្យ​ចង់​ធ្វើ​ការកាត់​ជើង​ចេញ ។ ម្ដាយ​របស់​យ៉ូសែប បាន​សុំ​ឲ្យ​គ្រូពេទ្យ​វះកាត់​ម្ដង​ទៀត ហើយ​គ្រូពេទ្យ​បាន​កាត់​យក​ឆ្អឹង​ដែល​មាន​រោគ​ឆ្លង​នោះ​ចេញ​ដោយ​ពុំ​មាន​ថ្នាំ​ស្ពឹក ឬ ឧបករណ៍​ពេទ្យ​ត្រឹមត្រូវ​ឡើយ ។ យ៉ូសែប ដែល​បាន​បដិសេធ​មិន​ឲ្យ​គេ​ចង​ភ្ជាប់​នឹង​គ្រែ ឬ ផឹក​ជាតិ​ស្រវឹង​ដើម្បី​បន្សាប​ការឈឺចាប់​នោះ បាន​ទ្រាំ​នឹង​ការវះកាត់​នៅ​ក្នុង​រង្វង់​ដៃ​របស់​ឪពុក​លោក ។ ទោះ​ជា​លោក​បាន​ដើរ​ដោយ​ប្រើ​ឈើ​ច្រត់​អស់​រយៈ​ពេល​បី​ឆ្នាំ និង រង​ឈឺ​ចាប់​ដោយ​ការដើរ​ខ្ចើចៗ​អស់​មួយ​ជីវិត​ក្ដី ក៏​យ៉ូសែប បាន​ជា​សះស្បើយ​ដែរ ។

យ៉ូសែប ស៊្មីធ បាន​រៀបការ​នឹង អិមម៉ា ហេល នៅ​ថ្ងៃ​ទី 18 ខែ មករា ឆ្នាំ 1827 ។ រយៈ​ពេល 17 ឆ្នាំ​នៃ​អាពាហ៍ពិពាហ៍ ពួក​លោក​មាន​កូន 11 នាក់ មាន​ពីរ​នាក់​ជា​កូន​ចិញ្ចឹម ។ កូន​ទាំង​បី​នាក់​ដំបូង​របស់​យ៉ូសែប និង អិមម៉ា​បាន​ស្លាប់​ពេល​ដែល​បាន​កើត​មក ។ ក្នុង​ឆ្នាំ 1831 ពួក​លោក​បាន​ទទួល​ចិញ្ចឹម​កូន​ភ្លោះ ដែល​មាន​កូន​ប្រុស​ម្នាក់​ក្នុង​ចំណោម​កូន​ភ្លោះ​នោះ​បាន​ស្លាប់​ពី​មុន​ថ្ងៃ​កំណើត​មួយ​ខួប​របស់​គេ ។ 12 ឆ្នាំ​ជាង​ក្រោយ​មក អិមម៉ា បាន​ផ្ដល់​កំណើត​ដល់​កូន​ប្រុស​ប្រាំ​មួយ​នាក់​ថែម​ទៀត ដែល​មាន​បួន​នាក់​បាន​នៅ​រស់—កូន​ពៅ​គេ​បាន​កើត​មក​ប្រាំ​ខែ បន្ទាប់​ពី​មរណភាព​របស់​យ៉ូសែប ។

ដោយ​មាន​ការច្របូកច្របល់​ខាង​សាសនា​នៅ​គ្រា​និយម​សាសនា​ក្នុង​រដ្ឋ នូវ យ៉ោក ដែល​លោក​បាន​រស់នៅ​ក្នុង​ឆ្នាំ 1820 យ៉ូសែប​មាន​អាយុ 14 ឆ្នាំ បាន​អាន​សំបុត្រ​នៅ​ក្នុង​ព្រះ​គម្ពីរ​សញ្ញា​ថ្មី ហើយ​បាន​ដើរ​ចូល​ទៅ​ក្នុង​ព្រៃ​ដើម្បី​អធិស្ឋាន ។ យ៉ូសែប​ចែង​ទុក​ថា ព្រះ និង ព្រះយេស៊ូវគ្រីស្ទ បាន​បង្ហាញ​ព្រះកាយ​ដល់​លោក ។ លោក​បាន​ចែង​ថា « ខ្ញុំ​បាន​ឃើញ​បង្គោល​ពន្លឺ​មួយ​នៅ​ចំ​លើ​ក្បាល​ខ្ញុំ មាន​រស្មី​ចែងចាំង​លើស​ជាង​សុរិយា​ទៅទៀត ដែល​ចុះ​សន្សឹមៗ​មក​ចំ​លើ​រូប​ខ្ញុំ » ។ នៅ​ក្នុង​ពន្លឺ​នោះ លោក​បាន​ឃើញ​តួ​អង្គ​ពីរ—តួ​អង្គ​មួយ​បាន​មាន​ព្រះ​បន្ទូល​ហៅ​ឈ្មោះ​យ៉ូសែប ដោយ​ចង្អុល​ទៅ​តួ​អង្គ​មួយ​ទៀត​ថា « នេះ​ជា​ព្រះ​រាជ​បុត្រា​ស្ងួនភ្ងារ​របស់​យើង ។ ចូរ​ស្ដាប់​តាម​ទ្រង់​ចុះ ! » សមាជិក​សាសនាចក្រ​ហៅ​បទពិសោធន៍​នេះ​ថា​ជា « ទស្សន​និមិត្ត​ដំបូង » ។ វា​បាន​ផ្លាស់​ប្ដូរ​យ៉ូសែប ស៊្មីធ ហើយ​លោក​បាន​ក្លាយ​ជា​មនុស្ស​សំខាន់​នៃ​ជំនឿ​របស់​ពួក​បរិសុទ្ធ​ថ្ងៃ​ចុង​ក្រោយ ។ វា​បាន​ចាប់ផ្ដើម​កិច្ចការ​នៃ​ការស្ដារ​ឡើង​វិញ​នៃ​សាសនាចក្រ​ព្រះយេស៊ូវគ្រីស្ទ​នៅ​លើ​ផែនដី​នេះ ។

យ៉ូសែប ស៊្មីធ ត្រូវបាន​ស្គាល់​ច្បាស់​ពី​ការបកប្រែ​របស់​លោក​នៃ​ព្រះគម្ពីរ​មរមន ៖ សក្ខីបទ​មួយ​ទៀត​អំពី​ព្រះយេស៊ូវគ្រីស្ទ ។ សមាជិក​សាសនាចក្រ​ជឿ​ថា យ៉ូសែប ត្រូវបាន​នាំ​ទៅ​ឯ​ទួល​ក្បែរ​ភូមិ​ប៉ាលម៉ៃរ៉ា នូវ យ៉ោក ជា​កន្លែង​ដែល​លោក​បាន​ទទួល​បញ្ជី​បុរាណ​ពី​ទេវតា​ព្រះ​នាម​ថា មរ៉ូណៃ ។ បញ្ជី​នោះ​ត្រូវបាន​ឆ្លាក់​លើ​ផ្ទាំង​មាស​ប្រាប់​ពី​ប្រវត្តិ​ប្រជាជន ដែល​បាន​រស់នៅ​លើ​ទ្វីប​អាមេរិក​នៅ​ជំនាន់​ព្រះគ្រីស្ទ ។ យ៉ូសែប បាន​បកប្រែ​ផ្ទាំង​ទាំង​នោះ​ក្នុង​រយៈ​ពេល​បី​ខែ ហើយ​ព្រះគម្ពីរ​មរមន​ត្រូវបាន​បោះពុម្ព​ជា​លើក​ទី​មួយ​ដោយ អ៊ី.ប៊ី ហ្គ្រែនឌីន ក្នុង​ឆ្នាំ 1830 ។

ថ្វី​បើ​បាន​កើត​ក្នុង​ត្រកូល​កសិករ យ៉ូសែប បាន​ធ្វើការ​ជា​អ្នក​បោះពុម្ព សហគ្រិន និង អ្នក​ជំនួញ ។ ក្នុង​គ្រា​ដែល​លោក​បាន​ដឹកនាំ​សាសនា​ទើប​នឹង​កើត​ថ្មី យ៉ូសែប បាន​បង្កើត​កម្មវិធី​បេសកកម្ម​អន្តរជាតិ​មួយ ហើយ​អ្វី​ដែល​បាន​ឃើញ​នៅ​សព្វថ្ងៃ​នេះ​គឺ​ជា​អង្គការ​ស្ត្រី​ធំ​ជាង​គេ​នៅ​លើ​ពិភពលោក ។ លោក​បាន​ត្រួតត្រា​លើ​អគារ​នៅ​ក្នុង​ទីក្រុង​ទាំង​បី និង ដឹកនាំ​ការដ្ឋាន​សាងសង់​ព្រះវិហារ​បរិសុទ្ធ —ទាំង​អស់​នេះ​គឺ​នៅ​ខណៈ​ដែល​ប្រឈម​មុខ​នឹង​ការបៀតបៀន​ពី​ឧក្រិតជន​ក្នុង​មូលដ្ឋាន ដែល​ទីបំផុត​បាន​បណ្ដេញ​សមាជិក​ចេញ​ពី​ទីក្រុង​ទាំង​បី​ដែល​យ៉ូសែប បាន​បោះ​ទីតាំង ។

ពីព្រោះ​តែ​សិទ្ធិ​ខាង​សាសនា និង សិទ្ធិ​ប្បវេណី​របស់​ពួក​បរិសុទ្ធ​ជា​ប្រជាជន​អាមេរិក​ត្រូវ​គេ​បដិសេធ​ចោល​ទោះ​ជា​មាន​ការអង្វរក​ច្រើន​លើក​ច្រើន​សារ​ដល់​សហព័ន្ធ​រដ្ឋាភិបាល​ក្ដី ក៏​ពួក​អ្នក​ដឹកនាំ​សាសនាចក្រ​បាន​ប្រកាស​ពី​បេក្ខភាព​របស់​យ៉ូសែប ស្ម៊ីធ ធ្វើ​ជា​ប្រធានាធិបតី​នៃ​សហរដ្ឋ​អាមេរិក​ក្នុង​ខែ មករា ឆ្នាំ 1844 ។ ដល់​ត្រឹម​ខែ ឧសភា យ៉ូសែប ត្រូវ​បាន​ជ្រើស​តាំង​ដោយ​អនុសញ្ញា​ទីក្រុង ណាវ៉ូ រដ្ឋ អិលលីណោយ ។ វេទិកា​នយោបាយ​របស់​លោក​បាន​អំពាវនាវ​ឲ្យ​មាន​អន្តរាគមន៍​ពី​រដ្ឋាភិបាល​ជា​ប្រយោជន៍​ដល់​សិទ្ធិ​ខាង​សាសនា និង សិទ្ធិ​ប្បវេណី​ក្នុង​ការប្រឈម​មុខ​នឹង​ការបៀតបៀន ។ ដោយ​ការហួស​ចិត្ត យ៉ូសែប និង បង​ប្រុស​របស់​លោក​ត្រូវ​ពួក​ឧក្រិតជន​សម្លាប់​ក្នុង​ខែ មិថុនា នៅ​ឆ្នាំ​ដដែល​នោះ ដើម្បី​រារាំង​កុំ​ឲ្យ​លោក​ចូល​រួម​នយោបាយ​បាន ។

យ៉ូសែប និង បងប្រុស​របស់​លោក ហៃរុម ត្រូវគេ​បាញ់​សម្លាប់​នៅ​ថ្ងៃ​ទី 27 ខែ មិថុនា ឆ្នាំ 1844 ដោយ​ឧក្រិតជន​ម្នាក់​ក្នុង​ចំណោម​ឧក្រិតជន 150 ទៅ 200 នាក់ ។ ឧក្រិតជន​ទាំងនោះ​ត្រូវ​ឃុំ​ខ្លួន​ក្នុង​ពន្ធនាគារ រដ្ឋ អិលលីណោយ ពី​បទ​ចោទ​ប្រកាន់​ខុស និង ក្បត់​ជាតិ បន្ទាប់​ពី​ពួក​វា​ត្រូវបាន​ហ៊ុំព័ទ្ធ​ដោយ​រង្វង់​ច្បាប់ ។ យ៉ូសែប​មាន​អាយុ 28 ឆ្នាំ ហៃរុម​មាន​អាយុ 44 ឆ្នាំ ។ នៅ​ថ្ងៃ​ទី 28 ខែ មិថុនា សព​របស់​យ៉ូសែប និង ហៃរ៉ុម ត្រូវ​បាន​គេ​រៀបចំ និង ដាក់​នៅ​ខាង​ក្រៅ​ឲ្យ​អ្នក​កាន់ទុក្ខ​យំ​សោក​ប្រមាណ 10,000​នាក់ បាន​ឃើញ ហើយ​ត្រូវ​បញ្ចុះ​នៅ​ថ្ងៃ​បន្ទាប់​ដោយ​សម្ងាត់ ចៀសវាង​ការវាយ​ប្រហារ ឬ ការបំផ្លាញ​រូបកាយ​ជា​ទី​សក្ការៈ​ពី​សំណាក់​ពួក​ឧក្រិតជន ។

សាសនាចក្រ​នៃ​ព្រះយេស៊ូវគ្រីស្ទ​នៃ​ពួក​បរិសុទ្ធ​ថ្ងៃ​ចុងក្រោយ​សព្វថ្ងៃ​មាន​ចំនួន 14 លាន​នាក់​ជាង ។ ពួក​បរិសុទ្ធ​ថ្ងៃ​ចុងក្រោយ គោរព​យ៉ូសែប ស៊្មីធ ទុក​ជា​ព្យាការីដូច​ពួកគេ​គោរព​ពួក​ព្យាការី​ក្នុង​ព្រះគម្ពីរ​បរិសុទ្ធ​ដែល​មាន​ដូចជា ម៉ូសេ និង អេសាយ​ជាដើម ។

Style Guide Note:When reporting about The Church of Jesus Christ of Latter-day Saints, please use the complete name of the Church in the first reference. For more information on the use of the name of the Church, go to our online Style Guide.