ទីស្នាក់ការកណ្តាល
សាសនាចក្រ ត្រូវបានដឹកនាំដោយសាវក 15 រូប ។ សាវករៀម ច្បងបំផុត គឺជាប្រធាននៃសាសនាចក្រ ហើយលោកជ្រើសរើសសាវកពីរនាក់ទៀត ឲ្យធ្វើជាទីប្រឹក្សា ។ មុខងារទាំងបីនេះ ក្នុងនាមជាគណៈប្រធានទីមួយ គឺជាតួអង្គគ្រប់គ្រងដ៏ខ្ពស់បំផុតនៃសាសនាចក្រ ។ ពួកដប់ពីរនាក់ដទៃទៀត បង្កើតជាកូរ៉ុមនៃពួកដប់ពីរនាក់ — ជាតួអង្គគ្រប់គ្រងខ្ពស់បំផុតទីពីររបស់សាសនាចក្រ ។ គណៈប្រធានទីមួយ និងពួកដប់ពីរនាក់ មើលខុសត្រូវលើសាសនាចក្រទាំងមូលរួមគ្នា ។ សមាជិកសាសនាចក្រ ចម្លងរចនាសម្ព័ន្ធអង្គការនេះតាមគម្ពីរសញ្ញាថ្មី ។
ពួកសាវកទាំងអស់ ត្រូវបានសមាជិកសាសនាចក្រ គោរពជា « សាក្សីពិសេស » របស់ព្រះយេស៊ូវគ្រីស្ទ នៅទូទាំងពិភពលោក ។ ពួកលោកធ្វើដំណើរជាញឹកញាប់ ថ្លែងសុន្ទរកថា និងលើកទឹកចិត្តសមាជិកនៃក្រុមជំនុំដ៏ធំ ហើយជួយអ្នកពុំមែនជាសមាជិកទទួលចំណាប់អារម្មណ៍ ព្រមទាំងប្រជុំជាមួយនឹងពួកអ្នកដឹកនាំក្នុងមូលដ្ឋាន ។
ពួកអ្នកដឹកនាំ បានហៅពួកចិតសិបនាក់— តាមតំណែងមួយទៀតក្នុងគម្ពីរសញ្ញាថ្មី— ដើម្បីជួយពួកសាវកដប់ពីរនាក់ និងបម្រើនៅក្នុងទីតាំងផ្សេងៗគ្នានៅលើពិភពលោក ។ មានកូរ៉ុមនៃពួកចិតសិបនាក់ចំនួនប្រាំបីកូរ៉ុមនាពេលបច្ចុប្បន្ននេះ ។ កូរ៉ុមនីមួយៗ អាចមានចំនួនដល់ទៅ 70 នាក់ ។ ពួកចិតសិបនាក់មួយចំនួន ត្រូវបានចាត់ទៅមុខងារគ្រប់គ្រងនៅទីស្នាក់ការកណ្តាល ប៉ុន្តែភាគច្រើនរស់នៅ និងធ្វើការនៅតាមតំបន់ភូមិសាស្ត្ររបស់សាសនាចក្រជាក់លាក់ ។
សូមមើលផងដែរ ៖ « របៀបដែលប្រធានសាសនាចក្រត្រូវបានជ្រើសរើស » ។
ក្រុមជំនុំក្នុងមូលដ្ឋាន
អ្នកដឹកនាំនៃក្រុមជំនុំមួយ ត្រូវបានហៅថាជាប៊ីស្សព ។ « តំបន់ » គ្រប់គ្រងរបស់គាត់ ត្រូវបានហៅថា វួដ ។
វួដមួយក្រុម បង្កើតបានជាស្ដេកមួយ ហើយអ្នកដឹកនាំស្ដេក គឺជាប្រធានស្ដេក ។ « ស្ដេក » ពុំមែនជាពាក្យដែលមាននៅក្នុងគម្ពីរសញ្ញាថ្មីទេ ប៉ុន្តែវាដកចេញមកពីនិមិត្តរូបត្រសាលក្នុងគម្ពីរសញ្ញាចាស់ ដែល « ត្រសាល » ឬព្រះវិហារ ត្រូវបានឈរឡើងដោយមានការគាំទ្រពីចំរឹងទាំងឡាយ ។
ជាទូទៅប្រធានស្ដេក និងប៊ីស្សព គឺជាអ្នកដឹកនាំដែលសមាជិកនៃសាសនាចក្រជួបច្រើនបំផុត ។ ពួកអ្នកដឹកនាំទាំងនេះ ពុំមានប្រាក់ខែទេ ហើយមានឯករាជ្យក្នុងមូលដ្ឋានដ៏ជាក់លាក់មួយ ។
ពេលវេលា និងកិច្ចខិតខំដ៏ច្រើន ដែលតម្រូវឲ្យមានដើម្បីបម្រើដល់ស្ដេក ឬវួដមួយ និងបំពេញសេចក្ដីត្រូវការរបស់សមាជិក គឺត្រូវបានអនុវត្តដោយសមាជិកផ្ទាល់ ។ សមាជិកភាគច្រើន ត្រូវបានសុំដោយអ្នកដឹកនាំក្នុងមូលដ្ឋាន ដើម្បីបរិច្ចាគ តាមសមត្ថភាពជាក់លាក់ ។ កាតព្វកិច្ចជាច្រើនរួមមាន ការគ្រប់គ្រងក្នុងមូលដ្ឋាន ការបង្រៀន ឬការបម្រើតាមតំណែងដែលបានណែនាំ ។ ការទទួលខុសត្រូវទាំងនេះ ត្រូវបានផ្លាស់វេនគ្នាពីមួយគ្រាទៅមួយគ្រា ។ ជាទូទៅ ប៊ីស្សព បម្រើសម្រាប់រយៈពេលប្រហែលជាប្រាំឆ្នាំ ហើយប្រធានស្ដេកបម្រើប្រហែលជាប្រាំបួនឆ្នាំ ។
អង្គការជំនួយ
សាសនាចក្រ ផ្ដល់ជាអង្គការជំនួយក្នុងមូលដ្ឋាន ដែលហៅថា សមាគមសង្គ្រោះ ថ្នាក់សាលាថ្ងៃអាទិត្យ ថ្នាក់យុវជន ថ្នាក់យុវនារី និងថ្នាក់អង្គការបឋមសិក្សា ។
សាសនាចក្រ ប្រតិបត្តិការប្រព័ន្ធអប់រំ ប្រព័ន្ធសុខុមាលភាព និងកម្មវិធីផ្សព្វផ្សាយសាសនា ។