មានទីតាំងនៅកណ្ដាលទីក្រុងសលត៍ លេក វិសាលដ្ឋាននៃព្រះវិហារបរិសុទ្ធជាប្រវត្តិសាស្ត្រ គឺជាគោលដៅភ្ញៀវទេសចរណ៍ដ៏ល្បីបំផុតមួយ ក្នុងរដ្ឋយូថាហ៍ និងក្នុងពិភពលោក ជាទីស្នាក់ការកណ្ដាលរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ការដើរទស្សនាវិសាលនដ្ឋានព្រះវិហារបរិសុទ្ធ ដោយឥតគិតថ្លៃ មានជា 30 ភាសា ដែលមានអ្នកនាំភ្ញៀវជាអ្នកនិយាយភាសាកំណើត ។ តំបន់ដែលមានទំហំ 35 រ៉ៃ បានទាក់ទាញអ្នកទស្សនារាប់លាននាក់ មកពីជុំវិញពិភពលោក ដោយសារតែបណ្ណាល័យស្រាវជ្រាវដ៏ល្បី សកម្មភាពខាងវប្បធម៌ និងអគារប្រវត្តិសាស្ត្ររបស់ខ្លួន ។ ផ្នែកដ៏សំខាន់នៃវិសាលនដ្ឋាននោះ គឺព្រះវិហារបរិសុទ្ធសលត៍ លេក ដ៏អស្ចារ្យដែលចំណាយពេល 40 ឆ្នាំ ដើម្បីសាងសង់ ។ ខណៈដែលព្រះវិហារបរិសុទ្ធ ពុំបើកឲ្យទស្សនាជាសាធារណៈ នោះអ្នកទស្សនាទាំងឡាយ អាចទៅក្នុងរោងឧបោសថសលត៍ លេក ដែលត្រូវបានសាងសង់នៅក្នុងឆ្នាំ 1867 ។ រោងឧបោសថ មានកៅអីសម្រាប់មនុស្ស 2900 នាក់ ហើយទទួលភ្ញៀវនៃព្រឹត្តការណ៍សាសនា និងសហគមន៍ផ្សេងៗ រួមមានទាំងតួនាទីរបស់វា ជាទីស្នាក់ការកណ្ដាលនៃក្រុមចម្រៀងរោងឧបោសថមរមនដ៏ល្បីលើពិភពលោក ។ ការហាត់សមរបស់ក្រុមចម្រៀង គឺបើកឲ្យទស្សនាជាសាធារណៈ ។
មានមជ្ឈមណ្ឌលសម្រាប់អ្នកទស្សនាចំនួនពីរនៅវិសាលដ្ឋាននៃព្រះវិហារបរិសុទ្ធ ដែលមនុស្សអាចរៀនច្រើនអំពីជំនឿរបស់ពួកបរិសុទ្ធថ្ងៃចុងក្រោយ តាមរយៈការតាំងពិពណ៌ និងខ្សែភាពយន្ដ ។ មជ្ឈមណ្ឌលសម្រាប់អ្នកទស្សនាខាងជើងមានរូបសំណាកព្រះគ្រីស្ទរបស់ប៊ើថេល ថូវ៉ាលសិន ដែលមានកំពស់ 11 ហ្វីត ។ ការតាំងពិពណ៌នៅមជ្ឈមណ្ឌលសម្រាប់អ្នកទស្សនាខាងត្បូង មានរូបសំណាកនៃព្រះវិហារ បរិសុទ្ធសលត៍ លេក ផ្ដល់នូវពន្លឺនៅខាងក្នុងអគារប្រវត្តិសាស្ត្រ ។
ខាងលិចនៃវិសាលដ្ឋាននៃព្រះវិហារបរិសុទ្ធ មនុស្សចាប់អារម្មណ៍រៀនច្រើនអំពីពង្សាវតា ប្រមូលផ្ដុំគ្នានៅ បណ្ណាល័យពង្សប្រវត្តិ ជាប្រភេទបណ្ណាល័យធំបំផុតនៅក្នុងពិភពលោក ។ ក៏មាន សារៈមន្ទីរប្រវត្តិសាស្ត្រសាសនាចក្រ ដែលប្រាប់អំពីប្រវត្តិសាសនាចក្រទូទាំងពិភពលោក តាមរយៈកម្មវិធី និងការតាំងពិពណ៌អប់រំ ។ អគារទាំងពីរនេះ បើកឲ្យមនុស្សគ្រប់គ្នាចូលទស្សនាដោយឥតគិតថ្លៃ ។ អ្នកទាំងឡាយណាដែលចាប់អារម្មណ៍នៅក្នុងការរៀនបន្ថែមទៀតអំពីប្រវត្តិសាស្ត្រមរមន ក៏អាចទស្សនា បណ្ណាល័យប្រវត្តិសាស្ត្រសាសនាចក្រ ដែលមានទីតាំងនៅទិសឦសាននៃវិសាលនដ្ឋានព្រះវិហារបរិសុទ្ធ ។
ទៅទិសខាងកើតនៃវិសាលនដ្ឋានព្រះវិហារបរិសុទ្ធ គឺជាអគារការិយាល័យសាសនាចក្រ ដែលមាន 28 ជាន់ ដែលត្រូវបានសាងសង់ឡើងក្នុងឆ្នាំ 1972 ។ នេះគឺជាអគារដ៏ខ្ពស់បំផុតក្នុងទីក្រុងសលត៍ លេក ហើយអ្នកទស្សនា អាចឡើងទៅលើដំបូលអគារ ដើម្បីមើលទេសភាពដ៏ស្រស់ស្អាតក្នុងតំបន់នោះ ។ នៅជាប់នឹងអគារការិយាល័យសាសនាចក្រ គឺជាអគារគ្រប់គ្រងសាសនាចក្រ ដែលមានរចនាបថបុរាណ ដែលត្រូវបានសាងសង់ឡើងក្នុងឆ្នាំ 1917 ។ អគារនេះ មានការិយាល័យរបស់អ្នកដឹកនាំសាសនាចក្របច្ចុប្បន្ន ហើយពុំបើកជាសាធារណៈទេ ។
កន្លែងដែលអ្នកទស្សនាចូលចិត្ត គឺជាអគាររំឭកចាំយ៉ូសែបស្ម៊ីធដែលមានអាយុចាស់ជាសតវត្សរ៍ ដែលជាសណ្ឋាគារយូថាហ៍កាលពីមុន ។ អគារដ៏ធំចំណាស់នេះ ស្វាគមន៍សាធារណៈជន ឲ្យចូលទៅអាហារដ្ឋានចំនួនបីរបស់វា និងបន្ទប់ជប់លៀងចម្រុះ និងកន្លែងសម្រាប់ការិយាល័យសម្រាប់បុគ្គលិកសាសនាចក្រ ។ អ្នកទស្សនា ក៏អាចមើលខ្សែភាពយន្ដដោយឥតគិតថ្លៃ ដែលមានឈ្មោះថា យ៉ូសែប ស្ម៊ីធ ព្យាការីនៃការស្ដារឡើងវិញ អំពីប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ខាងជើងនៃវិសាលដ្ឋាននៃព្រះវិហារបរិសុទ្ធមានមជ្ឈមណ្ឌលសន្និសីទ ដែលមានចំនុះ 21000 កៅអី ដែលជាមហាសាលធំជាងគេបំផុតក្នុងពិភពលោក ។ អគារនេះ ត្រូវបានសាងសង់ចប់នៅឆ្នាំ 2000 ត្រូវបានប្រើប្រាស់សម្រាប់សន្និសីទទូទៅរបស់សាសនាចក្រ ដែលធ្វើឡើងពីរដងក្នុងមួយឆ្នាំ ហើយចាក់ផ្សាយទូទាំងពិភពលោក ។ មជ្ឈមណ្ឌលសន្និសីទទូទៅ ក៏ទទួលធ្វើពិធីប្រគុំតន្ត្រី និងការសម្តែងផ្សេងៗ រួមមានទាំងក្រុមចម្រៀងរោងឧបោសថមរមនដ៏ល្បី ការប្រគុំតន្ត្រីបុណ្យគ្រីស្ទម៉ាស។ ទំនៀមទំលាប់ថ្ងៃបុណ្យផ្សេងទៀតជាទីពេញចិត្ត នៅវិសាលដ្ឋាននៃព្រះវិហារបរិសុទ្ធគឺការតាំងភ្លើងបុណ្យគ្រីស្ទម៉ាស់ប្រចាំឆ្នាំ ។
អ្នកទស្សនាវិសាលដ្ឋាននៃព្រះវិហារបរិសុទ្ធ មានអារម្មណ៍ថា ពួកគេត្រឡប់ទៅអតីតកាល ពេលទៅមើលផ្ទះដែលនៅជិតនោះពីរ ដែលបានសាងសង់ឡើងនៅពាក់កណ្ដាលសតវត្សរ៍ 1800 សម្រាប់ប្រធានសាសនាចក្រ ព្រិកហាំ យ៉ង់ និងគ្រួសាររបស់លោក ។ ការដើរទស្សនាដោយឥតគិតថ្លៃ ត្រូវបានផ្ដល់ឲ្យនៅផ្ទះប៊ីហៃខណៈដែលមានភោជនីយដ្ឋានមួយនៅក្នុង ផ្ទះឡាយអិន មានបម្រើអាហារជាលក្ខណៈអាហារមេផ្ទះ ។
អ្នកធ្វើដំណើរ ដែលស្នាក់នៅអាកាសយាន្ដដ្ឋានអន្តរជាតិសលត៍ លេក អាចជិះឡានក្រុងដោយឥតគិតថ្លៃទៅកាន់វិសាលដ្ឋាននៃព្រះវិហារបរិសុទ្ធ ហើយអាចដើរទស្សនា ខណៈដែលពួកគេកំពុងរង់ចាំជើងហោះហើររបស់ពួកគេនោះ ។