ក្រុមជំនុំនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានរៀបចំឡើងតាមភូមិសាស្ត្រ ហើយសមាជិកចូលរួមកម្មវិធីថ្វាយបង្គំនៅជិតនឹងគេហដ្ឋានរបស់ពួកគេ ។ សមាជិកម្នាក់ៗ ជាសមាជិកវួដ ឬសាខាមួយ ។ អ្នកដឹកនាំដែលឥតមានប្រាក់កម្រៃនៃវួដមួយ ត្រូវបានហៅថាជា ប៊ីស្សព ។ គាត់គឺជាសមាជិកម្នាក់នៃក្រុមជំនុំ ដែលត្រូវបានសុំឲ្យបម្រើជាអ្នកស្ម័គ្រចិត្តក្នុងតំណែងនេះ ។
វួដនីមួយៗ មានថ្នាក់រៀន និងសកម្មភាពជាច្រើន សម្រាប់វ័យផ្សេងៗគ្នា រួមមាន កុមារ យុវវ័យ និងមនុស្សពេញវ័យ ។ ពេលវេលា និងកិច្ចខិតខំដ៏ច្រើន ដែលតម្រូវឲ្យមានដើម្បីបម្រើដល់វួដមួយ និងបំពេញសេចក្ដីត្រូវការរបស់សមាជិក គឺត្រូវបានអនុវត្តដោយសមាជិកផ្ទាល់ ។ សមាជិកភាគច្រើន ត្រូវបានសុំដោយអ្នកដឹកនាំក្នុងមូលដ្ឋាន ដើម្បីបរិច្ចាគ តាមសមត្ថភាពជាក់លាក់ ។ កាតព្វកិច្ចជាច្រើនរួមមាន ការគ្រប់គ្រងក្នុងមូលដ្ឋាន ការបង្រៀន ឬការបម្រើតាមតំណែងដែលបានណែនាំ ។ ការទទួលខុសត្រូវទាំងនេះ ត្រូវបានផ្លាស់ប្ដូរពីមួយគ្រាទៅមួយគ្រា ស្របតាមតម្រូវការរបស់ក្រុមជំនុំ ។
សមាជិកនៃវួដមួយ ថ្វាយបង្គំជាមួយគ្នានៅថ្ងៃអាទិត្យ ហើយមានសកម្មភាពអំឡុងសប្ដាហ៍ ។ វួដមួយ គឺជាសហគមន៍មួយ ដែលពួកមរមន អាចបង្កើតមិត្តភាព ហើយគាំទ្រដល់សមាជិកសាសនាចក្រដែលជាបងប្អូនពួកគេ ក្នុងកិច្ចខិតខំដើម្បីថ្វាយបង្គំ និងធ្វើតាម ព្រះយេស៊ូវគ្រីស្ទ ។ មនុស្សគ្រប់គ្នា ត្រូវបានស្វាគមន៍ឲ្យមកទស្សនាកម្មវិធីថ្វាយបង្គំវួដ នៅថ្ងៃអាទិត្យ ។
វួដជាច្រើន បង្កើតបានជាស្ដេកមួយ ដែលស្រដៀងគ្នានឹងភូមិភាគកាតូលិកមួយ ។ អ្នកដឹកនាំស្ដេកមួយ ត្រូវបានហៅថាជាប្រធានស្ដេក ។ នៅក្នុងតំបន់ដែលមានសមាជិកសាសនាចក្រតិច នោះពួកបរិសុទ្ធថ្ងៃចុងក្រោយ ត្រូវបានរៀបចំជាមណ្ឌល និងសាខា ជំនួសពាក្យថាស្ដេក និងវួដ ។ អ្នកដឹកនាំនៃសាខាមួយពុំមានប្រាក់ខែទេ ត្រូវបានហៅជាប្រធានសាខា ។