សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ជឿលើភាពបរិសុទ្ធនៃជីវិតមនុស្សលោក ហេតុដូច្នេះហើយ យើងប្រឆាំងនឹងសុមរណៈ ។ សុមរណៈមានន័យថា ធ្វើឲ្យបុគ្គលម្នាក់អស់ជីវិតដោយចេតនានៅពេលដែលគេរងឈឺចាប់ដោយស្ថានភាព ឬ ជំងឺដែលពុំអាចព្យាបាលជា ។ អំពើដោយចេតនាបែបនេះដើរតួជាអ្នកបញ្ចប់ជីវិតដែលតាំងជាអ្នកជំនួយក្នុងអត្តឃាតកម្ម ។ ការបញ្ចប់ជីវិតមួយតាមរបៀបនេះ គឺជាការបំពានបទបញ្ញត្តិរបស់ព្រះ ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយពុំជឿថា ការទុកឲ្យបុគ្គលម្នាក់អស់ជីវិតទៅដោយសារជំងឺក្នុងខ្លួនដោយការយកឧបករណ៍ទ្រទ្រង់ជីវិតចេញពីអ្នកជំងឺក្នុងករណីជំងឺរ៉ាំរ៉ៃ ថាជានិយមន័យនៃសុមរណៈនោះទេ ។ កាលបានអស់ជីវិតទៅដោយសារតែជំងឺប្រភេទនោះ ឬ ឧបទ្ទវហេតុមួយបានក្លាយទៅជារឿងដែលចៀសមិនរួចទៅហើយ វាគួរតែមើលឃើញថាជាពរជ័យ និង ជាចំណែកមួយនៃគោលបំណងជីវិតដ៏នៅអស់កល្បជានិច្ច ។ សមាជិកពុំគួរគិតថា ខ្លួនមានតួនាទីបន្តជីវិតរមែងស្លាប់ដោយមធ្យោបាយដែលពុំសមហេតុផលឡើយ ។ ការសម្រេចចិត្តទាំងនេះ ប្រសើរបំផុតត្រូវសម្រេចដោយសមាជិកក្រុមគ្រួសារបន្ទាប់ពីបានទទួលយោបល់ខាងវិជ្ជសាស្ត្រដ៏ឈ្លាសវៃ និង មានសមត្ថភាព ហើយស្វែងរកការណែនាំពីស្ថានសួគ៌តាមរយៈការតមអាហារ និង ការអធិស្ឋាន ។