FamilySearch គឺជាអង្គការពង្សាវតាដ៏ធំបំផុតក្នុងពិភពលោក ។ ចាប់តាំងពីឆ្នាំ 1894 FamilySearch បានធ្វើការជាមួយនឹងបណ្ណាសាដ្ឋាន បណ្ណាល័យ និងព្រះវិហារជាច្រើន នៅក្នុងប្រទេសជាង 100 ប្រទេស ដើម្បីជួយដំណើរការឲ្យមានកំណត់ត្រាងាយស្រួលក្នុងតម្លៃតិចតួច ដើម្បីជួយមនុស្សរកឃើញជីដូនជីតារបស់ពួកគេ ។
ជារៀងរាល់ខែ មានមនុស្សជាង 3 លាននាក់ ប្រើកំណត់ត្រា ធនធាន និងសេវាកម្ម FamilySearch ដើម្បីរៀនបន្ថែមអំពីពង្សប្រវត្តិរបស់ពួកគេ ។ កំណត់ត្រា និងសេវាកម្មទាំងនេះ មាននៅតាមអ៊ិនធើរណិត នៅ FamilySearch.org ឬនៅតាម មជ្ឈមណ្ឌលពង្សប្រវត្តិជាង 4600 កន្លែងក្នុងប្រទេសចំនួន 126 ប្រទេស រួមទាំងបណ្ណាល័យពង្សប្រវត្តិ នៅទីក្រុង សលត៍ លេក រដ្ឋ យូថាហ៍ ដ៏ល្បីល្បាញផងដែរ ។
FamilySearch គឺជាសេវាកម្មមួយដែលបានផ្ដល់ឲ្យ ដោយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ការតាំងចិត្តរបស់ FamilySearch ដើម្បីជួយមនុស្សទំនាក់ទំនងនឹងជីដូនជីតារបស់ពួកគេ គឺជាឬសគល់នៅក្នុងជំនឿរបស់ពួកមរមន ថាក្រុមគ្រួសារ គឺសំខាន់នៅក្នុងជីវិតរបស់យើង ហើយថាទំនាក់ទំនងគ្រួសារ គឺពិតជាបន្ដមានរហូតហួសពីជីវិតនេះ ។ ដោយសារចំណាប់អារម្មណ៍ទៅលើពង្សប្រវត្តិ ពុំមានកំណត់ចំពោះវប្បធម៌ ជាតិពន្ធ ឬជំនឿសាសនា នោះធនធាន FamilySearch មានសម្រាប់មនុស្សគ្រប់គ្នា ដែលចង់រុករកបន្ថែមទៀត អំពីគ្រួសារ និងដូនតារបស់ពួកគេ ចាប់តាំងពីកំណត់ត្រាព្រះវិហារនៅក្នុងអ៊ឺរ៉ុប ទៅដល់ប្រវត្តិផ្ទាល់មាត់នៅក្នុងទ្វីបអាហ្រ្វិក ។
ក្នុងនាមជាអង្គការពុំមានប្រាក់ចំណេញ នោះ FamilySearch ពឹងផ្អែកលើការជួយឧបត្ថម្ភមកពី អ្នកស្ម័គ្រចិត្ត នៅទូទាំងពិភពលោក ។ អ្នកស្ម័គ្រចិត្តទាំងនេះ ជួយធ្វើលិបិក្រមកំណត់ត្រា ផ្ដល់ជំនួយផ្ទាល់ និងចែកចាយចំណេះដឹងពួកគេអំពីការស្រាវជ្រាវពង្សាវតា ។
FamilySearch ផ្ដល់ជំនួយដោយផ្ទាល់ចំពោះអ្នកប្រវត្តិវិទូគ្រួសារដែលមានបទពិសោធន៍ និងអ្នកទាំងឡាយណាដែលទើបតែចាប់ផ្ដើមដំណើរការខាងពង្សាវតារបស់ពួកគេ ។ ជំនួយនេះ អាចទទួលបាននៅតាមបណ្ដាញមជ្ឈមណ្ឌលពង្សប្រវត្តិ ឬតាមរយៈការទំនាក់ទំនងទៅជំនួយ FamilySearch នៅ support@familysearch.org ឬតាមទូរស័ព្ទលេខ 1-800-406-1830 នៅសហរដ្ឋអាមេរិក និងប្រទេស កាណាដា ។ សូមចុចនៅទីនេះ សម្រាប់បញ្ជីលេខទូរស័ព្ទទំនាក់ទំនងនៅក្នុងប្រទេស និងខេត្តផ្សេងៗទៀត ។