Cambodian NGOs Initiate Wide-ranging Children’s Hygiene Program

នៅក្នុងពិធីមួយកាលពីពេលព្រឹកថ្ងៃទី ១៧ ខែកក្កដា ក្នុងស្រុកបាគង ខេត្តសៀមរាប អង្គការ RACHA និងអង្គការសប្បុរសធម៌ អិល.ឌី.អេស. ដែលជាដៃគូមនុស្សធម៌របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានចាប់ផ្ដើមកម្មវិធីអនាម័យច្រើនប្រភេទសម្រាប់កុមារ។កុមារដែល គ្រប់អាយុចូលរៀនចំនួន ២៥០ នាក់ត្រូវបានណែនាំអំពីកម្មវិធីសុខភាពផ្ទាល់ខ្លួនមួយដែលបានរៀបចំឡើងដើម្បីបង្រៀនពួកគេឲ្យមានទម្លាប់អនាម័យប្រសើរជាងមុន។ គោលបំណងសំខាន់បំផុតនៃកម្មវិធីគឺ ការប្រើប្រាស់ប្រព័ន្ធធុងចម្រោះទឹកថ្មីដែលបង្កើតដោយអង្គការ RACHA ដើម្បីផ្ដល់ទឹកបរិភោគ ដល់សិស្ស និងប្រជាពលរដ្ឋក្នុងមូលដ្ឋានបានពេញមួយឆ្នាំពីអាងស្តុកទឹកភ្លៀងនៅរដូវវស្សា ឬពីអណ្ដូងទឹកនៅរដូវប្រាំង។

ពិធីកាត់ខ្សែបូរ បានប្រារព្ធធ្វើឡើងនៅពេលការបញ្ចប់ជាស្ថាពរនូវប្រព័ន្ធទឹកស្អាតថ្មី និងដើម្បីផ្ដល់ជាសញ្ញាអំពីការចាប់ផ្ដើមនៃកម្មវិធីអប់រំអនាម័យ ទូលំទូលាយដល់កុមារដែលគ្រប់អាយុចូលរៀន។ កម្មវិធីរួមមានកញ្ចប់អនាម័យដែលរៀបចំដោយអង្គការសប្បុរសធម៌ អិល.ឌី.អេស. ហើយត្រូវបានផ្ដល់ឲ្យដល់សិស្សចំនួន ២៥០ នាក់។ កញ្ចប់ មានដូចជា កន្សែង ក្រមា សាប៊ូ ច្រាសដុសធ្មេញ ថ្នាំដុសធ្មេញ និងកន្ត្រៃកាត់ក្រចក។ បន្ទាប់មក បុគ្គលិកអង្គការ RACHA បានបង្រៀនសិស្សរយៈពេល ៦ ម៉ោងអំពីការប្រើប្រាស់កញ្ចប់ ការផ្គត់ផ្គង់ទឹកថ្មី និងការប្រើប្រាស់បង្គន់ឲ្យបានត្រឹមត្រូវ។

បុគ្គលិកសាលារៀន និងមន្ត្រីរដ្ឋាភិបាលដែលចូលរួមពិធីបានថ្លែងអំណរគុណចំពោះអង្គការខាងលើចំពោះកិច្ចខិតខំប្រឹងប្រែងក្នុងការជួយដោះស្រាយតម្រូវការសុខភាពរបស់កុមារនៅក្នុងសហគមន៍របស់ពួកគេ។ លោក ពូ សំ អាត - ដែលជាអភិបាលស្រុកបាគង ខេត្តសៀមរាប បានមានប្រសាសន៍ទៅកាន់កុមារចំនួន ២៥០ នាក់នៅក្នុងពិធីដោយសង្កត់លើភាពចាំបាច់សម្រាប់កុមារ និងឪពុកម្តាយក្នុងការប្រើប្រាស់ទឹកស្អាត និងទម្លាប់អនាម័យល្អដើម្បីទទួលបានសុខភាពល្អ។ លោកបានមានប្រសាសន៍ថា « កុមារដែលមានសុខភាពល្អ និងឪពុកម្ដាយដែលមានសុខភាពល្អ នឹងជំរុញឲ្យកូនរៀនពូកែ » ។

1 / 2

Download Photos