អភិបាល​ខេត្ដ​ព្រៃវែងមានប្រសាសន៍​​នៅពិធីប្រគល់​រទេះជនពិការ

នៅក្នុងពិធីប្រគល់រទេះជនពិការនៅមជ្ឈមណ្ឌលស្ដារនីតិសម្បទានៃខេត្ដព្រៃវែង   ជនពិការ 30 នាក់​បានទទួល​រទេះជនពិការម៉ូតថ្មី ។ ឯកឧត្ដម ហាស សារ៉េត អភិបាលនៃក្រុមប្រឹក្សាភិបាលខេត្ដព្រៃវែងបានមានប្រសាសន៍ ស្វាគមន៍​និងបានប្រគល់រទេះជនពិការដែលទើបតែផលិតបានថ្មីៗទៅជនពិការ ។  ឯកឧត្ដម ហាស សារ៉េត មានប្រសាសន៍​ថា “ខ្ញុំសូមយកឱកាសនេះដើម្បីសម្ដែងនូវការកោតសរសើយ៉ាងជ្រាលជ្រៅរបស់ខ្ញុំចំពោះអង្គការសប្បុរសធម៌​នៃពួកបរិសុទ្ធ​ថ្ងៃចុងក្រោយ ដែលបានជួយឧបត្ថម្ភខាងផ្នែកហិរញ្ញវត្ថុដល់ អង្គការអតីតយុទ្ធជនអន្តរជាតិកម្ពុជា(VIC)  សមាគមសម្រាប់ជំនួយ និងជំនួយសង្គ្រោះ (AAR)និងរទេះជនពិការសម្រាប់ការអភិវឌ្ឍ(WCD)ដែលបានជួយពួកគេ ផលិតនិងចែកចាយប្រភេទរទេះជនពិការផ្សេងៗគ្នាទៅជនពិការ”។

ពិធីនេះបានរៀបចំឡើងដោយមានក្រុមរបាំជូនពរដែលសម្តែងដោយយុវនារីពិការចំនួនប្រាំបួននាក់ ដែលជាសមាជិកអង្គការជនពិការស្រ្ដីនៅខេត្ដព្រៃវែងនិងជាសមាជិកដែល​កំពុងស្នាក់នៅក្នុងមជ្ឈមណ្ឌលស្ដារនីតិសម្បទានៃខេត្ដព្រៃវែង​ នាពេលបច្ចុប្បន្ន។ភ្ញៀវកិត្តិយស និងអ្នកចូលរួមបានទស្សនា​ទីតាំង និងបាន​ជួយ​អ្នកដែលរស់នៅក្នុងមជ្ឈ​មណ្ឌ​ល និងអ្នក​ដែល​មក​ទទួលបានការស្តារលទ្ធភាពពលកម្ម​ប្រចាំថ្ងៃ។ លោក កែវ អ្នកតំណាងក្នុងប្រទេសនៃអង្គការ VIC មានប្រសាសន៍​ថា “មជ្ឈមណ្ឌលនេះទាក់ទាញជនពិការមកពីគ្រប់ទិសទីទាំងអស់ក្នុងប្រទេសកម្ពុជា”។ លោកមានប្រសាសន៍ថា “មជ្ឈមណ្ឌលនេះមានសាលារៀននៅនឹងកន្លែង ដែលបង្រៀននូវជំនាញ​មូលដ្ឋានដូចជា ​ ជំនាញកុំព្យូទ័រ និងភាសាអង់គ្លេស ។ សាលារៀននេះត្រូវបានសាងសង់ឡើងដោយមានជំនួយពីសិស្សរបស់ខ្លួន និងអង្គការ VIC” ។

លោក អ៊ុល ម៉េងហួរ ដែលជាប្រធានគម្រោង​នៃមជ្ឈមណ្ឌលអង្គការ VIC បានមានប្រសាសន៍​ថា  “កាលពីមុន ជនពិការជាញឹកញាប់ពួនលាក់ខ្លួនពីសង្គម ហើយមានចំនួន80%មិនបានចូលរៀន ។ ឥឡូវនេះ ជនពិការនៅមជ្ឈមណ្ឌលស្ដារនីតិសម្បទានៃខេត្ដព្រៃវែង​អាចចូលរៀនបាន ។   មានជនពិការចំនួន 120 នាក់ដែលរៀននៅថ្នាក់វិទ្យាល័យ និងសាកលវិទ្យាល័យ” ។

អង្គការសប្បុរសធម៌​នៃពួកបរិសុទ្ធ​ថ្ងៃចុងក្រោយត្រូវបានឧបត្ថម្ភគាំទ្រដោយសាសនាចក្រ​នៃព្រះ​យេស៊ូវ​គ្រីស្ទ​នៃ​ពួក​បរិសុទ្ធ​ថ្ងៃ​ចុងក្រោយ និងសមាជិក 15 លាននាក់របស់ខ្លួនដែល​ចូលរួមចំណែកបរិច្ចាកជំនួយសប្បុរសធម៌ដល់ជនក្រីក្រនៅជុំវិញពិភពលោក ។ អង្គការសប្បុរសធម៌​នៃពួកបរិសុទ្ធ​ថ្ងៃចុងក្រោយបានប្រតិបត្ដិការនៅប្រទេសកម្ពុជាអស់រយៈពេល 20 ឆ្នាំ និងបានជួយជនក្រីក្រកម្ពុជាជាង 5 លាននាក់។