ការជួសជុលកែលម្អជីវិតសិក្សានៅសាលាសុធារស

កាលពីថ្ងៃទី១៤ ខែសីហា ឆ្នាំ២០២៤ ពិធីប្រគល់-ទទួលអគារសិក្សាថ្មីនេះ បានធ្វើឡើងនៅសាលាបឋមសិក្សា និងអនុវិទ្យាល័យសុធារស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នៃប្រទេសកម្ពុជា ។ ថ្នាក់ដឹកនាំសាលារៀន និងប្រជាពលរដ្ឋ ព្រមទាំងអ្នកតំណាងនៃសមាគមនិកាយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានឧបត្ថម្ភការជួសជុលកែលម្អនោះ បានជួបជុំគ្នាដើម្បីប្រារព្ធធ្វើព្រឹត្តិការណ៍នេះ ។

អ្នកចូលរួមក្នុងពិធីនោះមានលោក សែម មុនីជោត អនុប្រធានមន្ទីរអប់រំ យុវជន និងកីឡា ខណ្ឌចំការមន នាយកសាលាបឋមសិក្សាសុធារស លោក ឃិន សុផាន នាយកអនុវិទ្យាល័យសុធារស លោក វ៉េ សុចាន់ និងប្រធានសមាគមនិកាយ រ័ត្ន ច័ន្ទសុភា ។

ក្នុងពិធីសំណេះសំណាលនោះ លោកនាយកសាលា សុផាន បានថ្លែងអំណរគុណចំពោះសមាគមនិកាយ « សម្រាប់ជំនួយនេះ ដែលបានធ្វើឲ្យសាលារបស់យើងរីកចម្រើន » ។ អ្នករួមការងាររបស់លោកនាយកសាលា សុចាន់ បានចែកចាយថា ឥឡូវនេះ « សាលារបស់យើងមានការផ្លាស់ប្ដូរយ៉ាងសំខាន់ ដោយអគារសិក្សាថ្មីអនុញ្ញាតឲ្យសិស្សសិក្សា ក៏ដូចជា [ ផ្តល់ ] បន្ទប់ទឹកស្អាត និងអនាម័យសម្រាប់សិស្សានុសិស្ស … គ្រូបង្រៀន និងអាណាព្យាបាលផងដែរ » ។

មានសិស្សថ្នាក់មត្តេយ្យសិក្សាចំនួន ៤៧ នាក់ សិស្សថ្នាក់បឋមសិក្សាចំនួន ៥៧០ នាក់ និងសិស្សថ្នាក់អនុវិទ្យាល័យចំនួន ២០០ នាក់ ចូលរៀននៅសាលាសុធារសទាំងពីរ ។ សរុបមានសិស្សានុសិស្សចំនួន ៨១៧ នាក់ ដោយមានបុគ្គលិកសាលា និងឪពុកម្តាយបន្ថែម នឹងទទួលបានអត្ថប្រយោជន៍ពីគម្រោងជួសជុលកែលម្អនេះ ។ ប្រធានសមាគមនិកាយ រ័ត្ន ច័ន្ទសុភា ពន្យល់ថា « សមាគមនិកាយមានកិត្តិយសដែលបានចូលរួមជាចំណែកមួយក្នុងការជួយដល់សាលាបឋមសិក្សា និងអនុវិទ្យាល័យសុធារស ។ យើងជឿថា វិស័យអប់រំនឹងជួយមនុស្សគ្រប់គ្នាទទួលបានចំណេះដឹង និងការងារល្អនៅក្នុងពេលអនាគត ក៏ដូចជាកាត់បន្ថយ [ ចំនួននៃ ] ភាពក្រីក្រនៅក្នុងប្រទេសកម្ពុជាផងដែរ » ។

photo_10_2024-09-17_09-03-36.jpg
សាលាសុធារស ក្នុងរាជធានីភ្នំពេញ ប្រទេសកម្ពុជា បានទទួលអំណោយពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដើម្បីកែលម្អសម្ភារសិក្សា និងអ្វីៗជាច្រើនទៀត ។ រូបភាពនេះបង្ហាញពីស្ថានភាពរបស់សាលា មុនពេលការជួសជុលកែលម្អត្រូវបានបញ្ចប់ និងពិធីប្រគល់-ទទួលដែលបានធ្វើឡើងសម្រាប់សិស្សានុសិស្សនៅសាលារៀន ឪពុកម្តាយ និងបុគ្គលិក នាថ្ងៃទី១៤ ខែសីហា ឆ្នាំ២០២៣ ។2024 by Intellectual Reserve, Inc. All rights reserved.

មុនពេលគម្រោងនេះចាប់ផ្តើម សាលារៀននេះមានកង្វល់លើការលិចទឹក បង្គន់មិនអាចប្រើប្រាស់បាន និងស្ថានភាពមិនមានសុវត្ថិភាពផ្សេងៗទៀត ។ អ្នកគ្រប់គ្រងផ្នែកមនុស្សធម៌ប្រចាំភូមិភាគ លោកយ៉ារេឌ វង់ មកពីតំបន់អាស៊ីរបស់សាសនាចក្រដែលជាអ្នកមើលការខុសត្រូវលើគម្រោងនេះបានថ្លែងថា « បញ្ហាគឺធ្ងន់ធ្ងរ ដោយសារអគារនេះអាចបង្កជាគ្រោះថ្នាក់ បើសិននៅតែបន្តប្រើប្រាស់អគារនេះជាសាលារៀនដោយបែបនេះ ។ សិស្សានុស្សិសមិនអាចបន្តការសិក្សារបស់ពួកគេបានទេ ដោយសារកន្លែងលិចទឹក និងគ្មានសុវត្ថិភាព » ។

វិសាលភាពនៃគម្រោងនេះ រួមមានការផ្តល់ឧបករណ៍សាលារៀនលើសពីការជួសជុលកែលម្អ ។ សមាគមនិកាយបានផ្តល់សម្ភារសិក្សា និងប្រអប់ដាក់អាហារថ្ងៃត្រង់ដល់សាលាបឋមសិក្សាសុធារស និងបានជួសជុលបង្គន់អនាម័យពីរកន្លែងដែលមួយកន្លែងៗមានបង្គន់ចំនួនប្រាំ ។ អនុវិទ្យាល័យសុធារស មានបន្ទប់រៀននៅជាន់ផ្ទាល់ដី លាបថ្នាំខាងក្នុង និងខាងក្រៅ ហើយបង្គន់ក៏ត្រូវបានជួសជុលកែលម្អផងដែរ ។

សាលាបានជួយគម្រោងនេះ ដោយយកមែកឈើដែលជ្រុះចេញពីជុំវិញកន្លែងបង្គន់ ដើម្បីរៀបចំជួសជុល ។ សមាជិកនៃក្រុមយុវមជ្ឈិមវ័យនៅលីវរបស់សមាគមនិកាយ បានជួយរៀបចំដាក់សម្ភារសិក្សាជាមួយកាបូបស្ពាយ និងប្រអប់ដាក់អាហារថ្ងៃត្រង់ ។

តាមរយៈការជួសជុលការ៉ូឥដ្ឋដែលខូច នោះសិស្សានុសិស្សមានបរិយាកាសសាលារៀនកាន់តែមានសុវត្ថិភាព ។ អគារបង្គន់ដែលបានជួសជុលកែលម្អរួចផ្តល់នូវអនាម័យកាន់តែប្រសើរ ។ សម្ភារសិក្សាដែលផ្តល់ជូននឹងគ្របដណ្តប់ការសិក្សាបានពេញមួយឆ្នាំ ដោយអនុញ្ញាតឲ្យគ្រួសាររបស់សិស្សដែលជាអ្នកទទួលទាំងនេះទុកប្រាក់របស់ពួកគេប្រើប្រាស់លើតម្រូវការចាំបាច់របស់ពួកគេផ្សេងទៀតនៅឯផ្ទះ ។ ប្រអប់ដាក់អាហារថ្ងៃត្រង់អាចប្រើបានច្រើនដងសម្រាប់សិស្សានុសិស្សក្នុងការយកអាហាររបស់ពួកគេទៅសាលារៀនជារៀងរាល់ថ្ងៃ ។

អនុប្រធានមន្ទីរ លោក មុនីជោត បានមានប្រសាសន៍ថា « បន្ទាប់ពីខ្ញុំបានដឹងពីរបៀបដែលសមាគមនិកាយអាចមានថវិកាដើម្បីធ្វើ … គម្រោងនេះ ខ្ញុំពិតជាស្ញប់ស្ញែង … [ ចំពោះ ] សេចក្តីស្រឡាញ់ចេញពីចិត្តរបស់សមាជិកម្នាក់ៗរបស់ [ សមាគមនិកាយ ] ដែលបានតមអាហារពីរពេលដើម្បីបរិច្ចាគសម្រាប់គម្រោងទាំងនេះ ។ យើងរំភើប និងដឹងគុណចំពោះការលះបង់របស់សមាគមនិកាយ និងសមាជិក [ របស់សមាគមនិកាយ ] … ដើម្បីជួយដល់សាលាបឋមសិក្សា និងអនុវិទ្យាល័យសុធារស… » ។ គាត់បានលើកទឹកចិត្តសិស្សឲ្យមើលថែសាលារៀននេះ ។

1 / 2

Download Photos

ការជួសជុល​កែលម្អ​ជីវិត​សិក្សា​នៅ​សាលា​សុធារស

photo_10_2024-09-17_09-03-36.jpg

ការជួសជុលកែលម្អជីវិតសិក្សានៅសាលាសុធារស