« នេះគឺជាការបរិច្ចាគចេញពីដួងចិត្តរបស់យើងទៅកាន់ដួងចិត្តរបស់បងប្អូន » ។ នោះគឺជាអ្វីដែលអែលឌើរ បេនយ៉ាមីន អិម ហ្ស៊ី តៃ បានបង្ហាញពីអំណោយសម្រាប់មជ្ឈមណ្ឌលព្យាបាលជំងឺបេះដូងថ្មីសម្រាប់មន្ទីរពេទ្យបង្អែកខេត្តសៀមរាប នៅភាគពាយ័ព្យនៃប្រទេសកម្ពុជា ។
មន្ត្រីផ្នែកសុខាភិបាល និងរដ្ឋាភិបាលខេត្តសៀមរាបបានមានប្រសាសន៍ថា ការបរិច្ចាគមកពីសមាគមនិកាយនៃសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយនេះ នឹងជួយ សង្រ្គោះជីវិត និងផ្តល់អត្ថប្រយោជន៍ដល់ប្រជាជនកម្ពុជារាប់ពាន់នាក់ដែលមានជំងឺបេះដូង ។
ឯកឧត្តម ឌី រ៉ាដូ អភិបាលរងខេត្តសៀមរាប បានថ្លែងអំណរគុណដល់សាសនាចក្រសម្រាប់ការបរិច្ចាគ និងមានប្រសាសន៍ថា ការបរិច្ចាគនេះនឹងពង្រឹងមន្ទីរពេទ្យខេត្ត និងផ្តល់អត្ថប្រយោជន៍ដល់អ្នកជំងឺមកពីតំបន់ផ្សេងៗជាច្រើន ។ លោកបានលើកឡើងផងដែរថា មន្ទីរពេទ្យនេះក៏បម្រើដល់ភ្ញៀវទេសចរណ៍ជាច្រើនដែលមកទស្សនាប្រាសាទអង្គរវត្តដែលនៅជិតនេះ និងកន្លែងទាក់ទាញផ្សេងទៀតផងដែរ ។
| អ្នកតំណាងមកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានទទួលស្វាគមន៍យ៉ាងកក់ក្តៅពីប្រជាជនខេត្តសៀមរាប ខណៈដែលពួកគេបានមកដល់មន្ទីរពេទ្យបង្អែកក្រុងសម្រាប់ធ្វើពិធីបើកការដ្ឋានសាងសង់មជ្ឈមណ្ឌលសម្រាប់ព្យាបាលជំងឺបេះដូង នាថ្ងៃទី១៣ ខែកុម្ភៈ ឆ្នាំ២០២៥ ។ 2025 by Intellectual Reserve, Inc. All rights reserved. | 1 / 4 |
នៅថ្ងៃទី១៣ ខែកុម្ភៈ ឆ្នាំ២០២៥ នៅឯពិធីបើកការដ្ឋានសាងសង់ អែលឌើរ តៃ ដែលបម្រើជាប្រធានតំបន់អាស៊ីរបស់សាសនាចក្របានមានប្រសាសន៍ថា ការបរិច្ចាគដល់មជ្ឈមណ្ឌលសម្រាប់ព្យាបាលជំងឺបេះដូងនេះធ្វើឡើងទៅបានតាមរយៈការបរិច្ចាគសប្បុរសធម៌បន្តិចបន្តួចពីសមាជិកធម្មតានៃសាសនាចក្រនៅទូទាំងពិភពលោក ។ លោកបានមានប្រសាសន៍ថា « សមាជិករបស់យើងនឹងរីករាយដែលដឹងថា ការបរិច្ចាគរបស់ពួកគេនឹងឆ្ពោះទៅរកបុព្វហេតុដ៏អស្ចារ្យ ដែលនឹងធ្វើឲ្យជីវិតមិត្តរបស់យើងនៅក្នុងប្រទេសកម្ពុជាកាន់តែបានប្រសើរឡើង » ។
គម្រោងនេះបានដំណើរការអស់រយៈពេលជាច្រើនឆ្នាំ ។ គូស្វាមីភរិយាជាអ្នកផ្សព្វផ្សាយសាសនាផ្នែកមនុស្សធម៌របស់សាសនាចក្រ អាចមើលឃើញពីតម្រូវការដ៏ខ្លាំងនៃមជ្ឈមណ្ឌលមួយសម្រាប់ព្យាបាលជំងឺបេះដូងដែលមាននៅទីតាំងនៅក្រៅទីក្រុងភ្នំពេញ ដែលជារាជធានីរបស់ប្រទេសកម្ពុជា ។ នៅខែកុម្ភៈ ឆ្នាំ២០២៤ អែលឌើរ ឌែល ជី រិនឡាន់ សមាជិកក្នុងកូរ៉ុមនៃពួកសាវកដប់ពីរនាក់ បានអញ្ជើញធ្វើទស្សនកិច្ចនៅខេត្តសៀមរាប ហើយបានប្រកាសថា សាសនាចក្រនឹងសាង សង់មជ្ឈមណ្ឌលសម្រាប់ព្យាបាលជំងឺបេះដូងនៅមន្ទីរពេទ្យបង្អែកខេត្តសៀមរាប ។ ចាប់តាំងពីពេលនោះមក ក្រុមការងារនៅក្នុងមូលដ្ឋាន និងពួកអ្នកផ្សព្វផ្សាយសាសនាបានបញ្ចប់ដំណើរការការអនុម័តដ៏យូរនោះ ហើយជ្រើសរើសអ្នកប្រឹក្សាយោបល់ និងអ្នកម៉ៅការ ។ គម្រោងនេះនឹងត្រូវចំណាយពេលប្រហែលមួយឆ្នាំដើម្បីសាងសង់ និងបំពាក់គ្រឿងបរិក្ខារ ។ វាជាគម្រោងមនុស្សធម៌ដ៏ធំបំផុតរបស់សាសនាចក្ររហូតមកដល់បច្ចុប្បន្ននៅក្នុងប្រទេសកម្ពុជា ។
ពិធីបើកការដ្ឋានសាងសង់មជ្ឈមណ្ឌលព្យាបាលជំងឺបេះដូងថ្មីនេះ មានភាពអធិកអធមជាខ្លាំង រួមមានការថ្លែងសុន្ទរកថាដោយឥស្សរជន និងពិធីក្រុងពាលីដែលមានផ្កាចម្រុះពណ៌ ដែលជាពិធីបុណ្យប្រពៃណីព្រះពុទ្ធសាសនាខ្មែរ ដែលប្រសិទ្ធពរដល់គម្រោងសំខាន់មួយនៅពេលដែលគម្រោងនោះចាប់ផ្ដើម ។
| នៅថ្ងៃទី១៣ ខែកុម្ភៈ ឆ្នាំ២០២៥ អែលឌើរ បេនយ៉ាមីន អិម ហ្ស៊ី តៃ នៃគណៈប្រធានតំបន់អាស៊ីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានចូលរួមជាមួយឯកឧត្តម ឌី រ៉ាដូ អភិបាលរងខេត្តសៀមរាប ដើម្បីបើកការដ្ឋានសាងសង់មជ្ឈមណ្ឌលសម្រាប់ព្យាបាលជំងឺបេះដូងថ្មីរបស់មន្ទីរពេទ្យបង្អែកខេត្តសៀមរាប ។ 2025 by Intellectual Reserve, Inc. All rights reserved. | 1 / 4 |
លក្ខណៈពិសេសនៃមជ្ឈមណ្ឌលសម្រាប់ព្យាបាលជំងឺបេះដូងនេះនឹងជាបន្ទប់ពិសោធន៍ព្យាបាលជំងឺបេះដូងដ៏ទំនើប ដែលជាកន្លែងដំបូងគេក្នុងប្រទេសក្រៅពីទីក្រុងភ្នំពេញ ។ ការផ្លាស់ប្តូរបច្ចេកវិទ្យាទំនើបនឹងអនុញ្ញាតឲ្យអ្នកជំងឺបេះដូងនៅក្នុងខេត្តសៀមរាប និងខេត្តជុំវិញនោះ បានទទួលការព្យាបាលក្នុងមូលដ្ឋានជំនួសឲ្យការធ្វើដំណើរជាច្រើនម៉ោងទៅកាន់ទីក្រុងភ្នំពេញនៅលើផ្លូវដែលមានការកកស្ទះ ។ បច្ចុប្បន្ននេះ អ្នកជំងឺជាច្រើនដែលមានជំងឺបេះដូងមិនអាចរស់រានមានជីវិតបានឡើយ ។
លោកវេជ្ជបណ្ឌិត ចិន ណារ៉ុង ជាគ្រូពេទ្យឯកទេសជំងឺបេះដូង ដែលរួមជាមួយនឹងសហការីរបស់លោកកំពុងទទួលការបណ្ដុះបណ្ដាលដើម្បីព្យាបាលអ្នកជំងឺនៅឯមន្ទីរពិសោធន៍បានមានប្រសាសន៍ថា « គម្រោងនេះនឹងជួយសង្រ្គោះជីវិតមនុស្សជាច្រើននាក់ ។ វានឹងផ្លាស់ប្តូរមុខមាត់នៃការព្យាបាលជំងឺបេះដូងនៅក្នុងតំបន់របស់យើង » ។
វេជ្ជបណ្ឌិត ណារ៉ុង និងសហការីរបស់លោកនឹងអាចធ្វើរោគវិនិច្ឆ័យ និងព្យាបាលបញ្ហាបេះដូងជាច្រើនដោយបញ្ចូលទុយោ ( បំពង់ស្តើងវែង ) ចូលទៅក្នុងសរសៃឈាមធំមួយ ហើយបញ្ជូនវាទៅកាន់បេះដូង ។ កាមេរ៉ា និងឧបករណ៍ផ្សេងៗអាចដាក់នៅខាងចុងទុយោ ដើម្បីរកមើលបញ្ហាបេះដូង និងអនុវត្តនីតិវិធីសង្គ្រោះជីវិត ដើម្បីស្តារលំហូរឈាមឡើងវិញ ដោយសម្អាតសរសៃឈាមរួមតូច ឬស្ទះ ឬពង្រីករន្ធសន្ទះបេះដូងដែលរួមតូច ។
ក្រៅពីការសាងសង់មជ្ឈមណ្ឌលសម្រាប់ព្យាបាលជំងឺបេះដូងដែលមានពីរជាន់ នៅខាងលើអគារផ្ដល់ឈាមមួយជាន់ដែលមានស្រាប់ សាសនាចក្រកំពុងបរិច្ចាគឧបករណ៍ឯកទេសដែលមានបច្ចេកវិទ្យាខ្ពស់ទាំងអស់ដែលត្រូវការសម្រាប់មន្ទីរពិសោធន៍កាត់តបំពង់បេះដូង ។
| លោកវេជ្ជបណ្ឌិត ប៉ែន ផល្គុន ប្រធានមន្ទីរពេទ្យបង្អែកខេត្តសៀមរាប បានអញ្ជើញចុះពិនិត្យគ្រឿងបរិក្ខារជូនដល់អ្នកចូលរួមសំខាន់ៗ ក្នុងពិធីបើកការដ្ឋានសាងសង់ នាថ្ងៃទី១៣ ខែកុម្ភៈ ឆ្នាំ២០២៥ ។ 2025 by Intellectual Reserve, Inc. All rights reserved. | 1 / 5 |
អែលឌើរ តៃ បានជម្រាបដល់ភ្ញៀវកិត្តិយស វេជ្ជបណ្ឌិត និងបុគ្គលិកមន្ទីរពេទ្យថា គម្រោងមជ្ឈមណ្ឌលសម្រាប់ព្យាបាលជំងឺបេះដូងនេះ « នៅជិតបេះដូងខ្ញុំ » ដោយសាររូបលោកជាអតីតអ្នកជំងឺបេះដូងខ្លួនឯង ហើយលោកយល់ពីសារៈសំខាន់នៃវេជ្ជបណ្ឌិតជំនាញផ្នែកបេះដូង និងបច្ចេកវិទ្យាព្យាបាលដ៏ទំនើប ។
លោកបានបន្តថា សាសនាចក្របានស្ថិតក្នុងសហគមន៍សៀមរាបប្រហែល ២០ ឆ្នាំមកហើយ ហើយបានទទួលពរ និងការស្វាគមន៍ពីប្រជាពលរដ្ឋ ។ « យើងសូមស្វាគមន៍ចំពោះឱកាសនេះក្នុងការផ្តល់ត្រឡប់ទៅឲ្យសហគមន៍វិញនូវមណ្ឌលសុខភាពនេះ ។ យើងជឿថា យើងបង្ហាញថាយើងស្រឡាញ់ព្រះ ដោយការស្រឡាញ់ និងការបម្រើអ្នកជិតខាង » ។
លោកវេជ្ជបណ្ឌិត ប៉ែន ផល្គុន ប្រធានមន្ទីរពេទ្យបង្អែកខេត្តសៀមរាប បានមានប្រសាសន៍ថា មន្ទីរពេទ្យបម្រើអ្នកជំងឺរាប់ពាន់នាក់ក្នុងមួយឆ្នាំៗ ដែលភាគច្រើនមានបញ្ហាសុខភាពពិបាកព្យាបាល ដែលមិនអាចព្យាបាលបាននៅក្នុងមន្ទីរពេទ្យតូចៗ និងមណ្ឌលសុខភាពក្នុងតំបន់ ។
ប្រធានមន្ទីរពេទ្យបានមានប្រសាសន៍ថា ជំងឺបេះដូងគឺជាបញ្ហាដែលកំពុងកើនឡើង ។ ដោយមាននូវមជ្ឈមណ្ឌលព្យាបាលជំងឺបេះដូងថ្មីនេះ វេជ្ជបណ្ឌិតឯកទេសផ្នែកជំងឺបេះដូងនឹងអាចព្យាបាលអ្នក ជំងឺបេះដូង ដែលគំរាមកំហែងដល់អាយុជីវិតនៅក្នុងមូលដ្ឋានបាន ។ លោកបានថ្លែងអំណរគុណជាតំណាងឲ្យអ្នកជំងឺ វេជ្ជបណ្ឌិត គិលានុបដ្ឋាក និងបុគ្គលិកមន្ទីរពេទ្យដទៃទៀតទាំងអស់ ដល់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។