យុគសម័យថ្មីនៃការថែទាំសុខភាពទារក និងមាតាបានចាប់ផ្តើមហើយនៅឯមន្ទីរពេទ្យបង្អែកព្រះនរោត្តមសីហនុ ក្រុងសួង បន្ទាប់ពីការប្រគល់ជាផ្លូវការនូវអគារសម្ភពថ្មីដែលមានលក្ខណៈទំនើបទាន់សម័យ ។
គម្រោងនេះត្រូវបានសាងសង់ និងបានបំពាក់គ្រឿងបរិក្ខារទាំងឡាយតាមរយៈការបរិច្ចាគមកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលផ្ដល់ការសន្យានូវលក្ខខណ្ឌដែលមានសុវត្ថិភាពប្រសើរជាងមុនចំពោះមាតា និងទារកនៅក្នុងខេត្តត្បូងឃ្មុំ ។
គ្រឿងបរិក្ខារមន្ទីរពេទ្យថ្មីត្រូវបានប្រារព្ធនៅក្នុងពិធីប្រគល់គម្រោងនាថ្ងៃទី១១ ខែកញ្ញា ឆ្នាំ២០២៥ ។ ព្រឹត្តិការណ៍នេះមានការចូលរួមពីសំណាក់វេជ្ជបណ្ឌិត គិលានុបដ្ឋាយិកា និងថ្នាក់ដឹកនាំក្នុងមូលដ្ឋាន និងថ្នាក់ដឹកនាំខេត្តជាច្រើនរូប រួមទាំងឯកឧត្តមអភិបាលខេត្ត ប៉ែន កុសល្យ ផងដែរ ។ អ្នកតំណាងនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ក៏បានចូលរួមក្នុងការកាត់ខ្សែបូដែលជាជំហានឆ្ពោះទៅមុខដ៏សំខាន់ សម្រាប់ការថែទាំសុខភាពនៅក្នុងតំបន់ផងដែរ ។
មន្ទីរពេទ្យបង្អែកព្រះនរោត្តមសីហនុ គឺជាមន្ទីរពេទ្យបង្អែកដ៏សំខាន់សម្រាប់ស្រុកនេះ ដែលបម្រើដល់ប្រជាជនប្រមាណជា ២៤២,០០០ នាក់ ។ ដោយមានទារកប្រមាណជា៣៥០នាក់ បានកើតជារៀងរាល់ឆ្នាំ នោះអគារសម្ភពថ្មីនេះកំពុងធ្វើឲ្យមានភាពខុសប្លែកយ៉ាងខ្លាំង ។ ទារកដំបូងបានកើតនៅក្នុងអគារថ្មីនេះកាលពីថ្ងៃទី៩ ខែកញ្ញា ឆ្នាំ២០២៥ គឺនៅពីរថ្ងៃមុនពិធីប្រគល់អគារនេះ ។
ឯកឧត្តមអភិបាលខេត្ត ប៉ែន កុសល្យ បានថ្លែងអំណរគុណចំពោះការបរិច្ចាគនេះ ដោយថ្លែងអំណរគុណដល់អ្នកគ្រប់គ្នាដែលបានចូលរួមចំណែក និងបានថ្លែងអំណរគុណដល់បុគ្គលិកផ្នែកមនុស្សធម៌របស់សាសនាចក្រ និងពួកអ្នកផ្សព្វផ្សាយសាសនារៀមច្បងដែលមើលការខុសត្រូវលើគម្រោងនេះ ។ លោកបានមានប្រសាសន៍អំពីតម្លៃនៃការចែករំលែករវាងគ្រិស្តបរិស័ទ និងពុទ្ធបរិស័ទក្នុងការចង់បម្រើ និងជួយអ្នកដទៃដែលខ្វះខាត ។ លោកអភិបាលក៏បានលើកទឹកចិត្តដល់បុគ្គលិករបស់មន្ទីរពេទ្យឲ្យថែទាំអគារថ្មីនេះឲ្យបានល្អ និងរក្សាស្តង់ដារសណ្ដាប់ធ្នាប់ និង
អនាម័យខ្ពស់ ។
អគារសម្ភពថ្មីនេះ ដំបូងឡើយជាអគារដែលគ្មានអ្វីសោះនៅក្នុងបរិវេណមន្ទីរពេទ្យ ហើយអគារនេះត្រូវបានជួសជុលទាំងស្រុង ឥឡូវអគារនេះមាននូវបន្ទប់វះកាត់ពិសេសសម្រាប់ការសម្រាលកូន ។ កាលពីមុន អ្នកជំងឺដែលត្រូវការការវះកាត់បន្ទាន់ត្រូវផ្លាស់ទៅបន្ទប់វះកាត់ចម្ងាយជាង១០០ម៉ែត្រ ដែលជាការពន្យារពេលដ៏គ្រោះថ្នាក់ក្នុងគ្រាដ៏សំខាន់ ។
វេជ្ជបណ្ឌិត រ័ត្ន ពុទ្ធិកា ប្រធានមន្ទីរពេទ្យ បានមានប្រសាសន៍ថា « ឥឡូវនេះអ្វីគ្រប់យ៉ាងគឺនៅក្នុងអគារតែមួយ ។
វាពិតជានឹងជួយសង្គ្រោះដល់ជីវិតមាតា និងទារក ។ អ្នកជំងឺរបស់យើងសប្បាយចិត្តខ្លាំងណាស់ » ។ អគារសម្ភពថ្មីនេះមានឧបករណ៍ និងគ្រឿងសង្ហារិមទំនើបៗសម្រាប់បន្ទប់ឈឺពោះសម្រាល បន្ទប់សម្រាល និងបន្ទប់សម្រាកព្យាបាល ព្រមជាមួយនឹងកន្លែងសម្រាប់ការថែទាំពិសេសដល់ទារកទើបនឹងកើតផងដែរ ។
វេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានហៅឱកាសនេះថា « ថ្ងៃដ៏រីករាយ » ។ លោកក៏បានលើកឡើងពីការរួមចំណែកយ៉ាងច្រើនរបស់សាសនាចក្រនៅក្នុងខេត្តរបស់លោក ដែលបានផ្តល់ឧបករណ៍មានគុណភាពខ្ពស់ និងជួសជុលអគារថ្មីដោយបំពាក់គ្រឿងបរិក្ខារថ្មីៗដូចជា ម៉ាស៊ីនត្រជាក់ និងប្រព័ន្ធអគ្គិសនីជាដើម ។ លោកបានមានប្រសាសន៍ថា ឧបករណ៍ និងគ្រឿងបរិក្ខារដែលបំពាក់នៅក្នុងមន្ទីរពេទ្យនេះនឹងជួយវេជ្ជបណ្ឌិត គិលានុបដ្ឋាយិកា និងពេទ្យឆ្មបផ្តល់ការថែទាំសង្គ្រោះបន្ទាន់ទៅដល់ទារក ដែលទើបនឹងកើតបានកាន់តែប្រសើរជាងមុន ។
វេជ្ជបណ្ឌិត កែវ បានមានប្រសាសន៍ថា ពួកអ្នកផ្សព្វផ្សាយសាសនា និងបុគ្គលិកសាសនាចក្រ « រស់នៅតាមគោលការណ៍សាសនារបស់ពួកគេ ដោយមានដួងចិត្តសប្បុរស » ។ លោកបានលើកឡើងថា ពួកអ្នកផ្សព្វផ្សាយសាសនាក៏បានផ្ដល់ការបំពាក់បំប៉ន ដើម្បីកែលម្អសេវាកម្មសង្គ្រោះបន្ទាន់ផងដែរ ។
លោក រ័ត្ន ច័ន្ទសុភា ប្រធានសមាគមនិកាយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅក្នុងប្រទេសកម្ពុជា បានមានប្រសាសន៍ថា វាជាកិត្តិយសណាស់ដែលបានចូលរួមនៅក្នុងពិធីប្រគល់អគារនេះ ។
លោកបានពន្យល់ថា ការងារមនុស្សធម៌របស់សាសនាចក្របានទទួលមូលនិធិពីការបរិច្ចាគដោយសមាជិកសាសនាចក្រនៅទូទាំងពិភពលោក ហើយជាការបង្ហាញពីបំណងប្រាថ្នារបស់សាសនាចក្រ ដើម្បីជួយមនុស្សទាំងអស់ដែលខ្វះខាត ។
លោកបានមានប្រសាសន៍ថា « គម្រោងនេះធ្វើឡើងក្នុងគោលបំណងជួយដល់ប្រជាជនទាំងអស់ឲ្យទទួលបានសុខភាពល្អ ។ យើងសង្ឃឹមថា គម្រោងនេះបង្ហាញពីសេចក្តីស្រឡាញ់របស់យើងចំពោះប្រជាជននៅក្នុងខេត្តនេះទាំងអស់ » ។ សាសនាចក្របានចូលរួមក្នុងគម្រោងមនុស្សធម៌ជាង៦៥០នៅក្នុងប្រទេសកម្ពុជា ចាប់តាំងពីឆ្នាំ១៩៩៨ មកម្ល៉េះ ។
ការបរិច្ចាគនេះក៏រួមបញ្ចូលនូវគ្រឿងបរិក្ខារមន្ទីរពេទ្យសំខាន់ៗផ្សេងទៀតដែររួមមាន ម៉ាស៊ីនថតកាំរស្មីអ៊ិចទំនើប ឧបករណ៍ និងសម្ភារថ្មីៗសម្រាប់គ្រូពេទ្យភ្នែក ដែលមានតែមួយគត់នៅក្នុងខេត្តនេះ ដែលបម្រើដល់ប្រជាជននៅក្នុងខេត្តទាំងមូល ប្រមាណជា១លាននាក់ ។
អ្នកជំនាញវិជ្ជាជីវៈវេជ្ជសាស្រ្តមានសេចក្តីរំភើបជាមួយនឹងការផ្លាស់ប្តូរនេះ ។ វេជ្ជបណ្ឌិត ស៊ីម សុខម៉ាន ជាវេជ្ជបណ្ឌិតគ្រួសារបានពិពណ៌នាអំពីអគារថ្មីនេះថា « ស្អាត និងមានផាសុកភាពសម្រាប់អ្នកជំងឺ » ។
លោក អ៊េង ចេង អ្នកម៉ៅការទូទៅសម្រាប់គម្រោងនេះ បានកោតសរសើរចំពោះការតាំងចិត្តរបស់សាសនាចក្រទាក់ទងនឹងគុណភាពសាងសង់ ។ គាត់បានមានប្រសាសន៍ថា « ពួកគេតែងតែចង់បានអ្វីដែលមានគុណភាពល្អជានិច្ច ពួកគេមិនចង់បានគុណភាពថោកៗនោះទេ ។ ពួកយើងធ្វើការងារប្រកបដោយគុណភាពដោយប្រើសម្ភារដែលមានគុណភាពល្អៗ ដែលសម្ភារទាំងអស់នោះនឹងប្រើបានយូរអង្វែង ។ ខ្ញុំរីករាយណាស់ដែលបានធ្វើការជាមួយសាសនាចក្រនេះ » ។
ពួកអ្នកផ្សព្វផ្សាយសាសនាផ្នែកមនុស្សធម៌បានមានប្រសាសន៍ថា មន្ទីរពេទ្យបង្អែកព្រះនរោត្តមសីហនុ ត្រូវបានជ្រើសរើសដោយសារបុគ្គលិកដ៏មានសមត្ថភាព និងការប្តេជ្ញាចិត្តរបស់ពួកគេដើម្បីថែរក្សាអនាម័យ និងការមើលថែដល់អ្នកជំងឺ ។ ពួកគាត់បានលើកឡើងពីភាពរីករាយ « លើសពីធម្មតា » របស់ប្រធានមន្ទីរពេទ្យ និងក្រុមរបស់គាត់ ដោយមានអារម្មណ៍ថា ស្ថាប័ននេះមិនត្រឹមតែប្រើប្រាស់ជំនួយដែលបានផ្តល់ឲ្យប៉ុណ្ណោះទេ ប៉ុន្តែថែមទាំងនឹងរក្សាអគារនេះឲ្យនៅគង់វង្សយូរអង្វែងផងដែរ ។
<
