នៅក្នុងសិក្ខាសាលាសម្រាប់ថ្នាក់ដឹកនាំបេសកកម្មថ្មីនៅឆ្នាំ២០២៦ ប្រធាន ដាល្លិន អេក អូក បានគូសបញ្ជាក់ពីការកើនឡើងជាបន្តបន្ទាប់នៃចំនួនពួកអ្នកផ្សព្វផ្សាយសាសនាពេញម៉ោងកំពុងបម្រើនៅជុំវិញពិភពលោក ។ ថ្នាក់ដឹកនាំសាសនាចក្ររំពឹងទុកថា ក្នុងរយៈពេលប៉ុន្មានសប្តាហ៍ខាងមុខនេះ ចំនួនសរុបរបស់ពួកអ្នកផ្សព្វផ្សាយសាសនានឹងឈានដល់កម្រិតមួយដែលមិនធ្លាប់មានពីមុន — ដោយលើសពីចំនួនមុនៗនៅក្នុងប្រវត្តិសាស្ត្ររបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
នៅពេលដែលព្រឹត្តិការណ៍ជាប្រវត្តិសាស្ត្រនេះខិតជិតមកដល់ យុវជន និងយុវនារីកាន់តែច្រើនកំពុងរៀបចំខ្លួនដើម្បីចាប់ផ្តើមការបម្រើរបស់ពួកគេ ។ ដោយមានការរំពឹងទុកអំពីការរីកចម្រើនជាបន្តបន្ទាប់នេះ ថ្នាក់ដឹកនាំសាសនាចក្រកំពុងផ្តល់នូវការណែនាំ និងព័ត៌មានដ៏មានប្រយោជន៍សម្រាប់អស់អ្នកទាំងឡាយដែលកំពុងរៀបចំខ្លួនដើម្បីបម្រើ ឬកំពុងពិចារណាអំពីការបម្រើជាអ្នកផ្សព្វផ្សាយសាសនានាពេលអនាគត ។
តើអ្នកបានដឺងដែរឬទេ ? ពួកអ្នកដែលមានបំណងក្លាយជាអ្នកផ្សព្វផ្សាយសាសនាអាចដាក់ពាក្យស្នើសុំរបស់ពួកគេតាមរយៈថ្នាក់ដឹកនាំសាសនាចក្រក្នុងមូលដ្ឋានរហូតដល់១៥០ថ្ងៃមុនថ្ងៃដែលពួកគេចេញបាន។
ពេលវេលាដែលបានពង្រីកនេះអាចជាពរជ័យដ៏មានអត្ថន័យសម្រាប់ពួកអ្នកដែលមានបំណងក្លាយជាអ្នកផ្សព្វផ្សាយសាសនា និងក្រុមគ្រួសាររបស់ពួកគេ ។ ការដាក់ពាក្យស្នើសុំពីមុនអាចផ្តល់ពេលវេលាបន្ថែមទៀតដើម្បីធ្វើផែនការជីវិតសំខាន់ៗ បំពេញតម្រូវការវេជ្ជសាស្រ្ត ធ្មេញ លិខិតឆ្លងដែន ឬទិដ្ឋាការដែលត្រូវការ និងរៀបចំខ្លួនខាងវិញ្ញាណ និងខាងអារម្មណ៍សម្រាប់ការបម្រើ ។ ថ្នាក់ដឹកនាំសាសនាចក្រលើកទឹកចិត្តដល់ពួកអ្នកដែលមានបំណងក្លាយជាអ្នកផ្សព្វផ្សាយសាសនាឲ្យចាប់ផ្តើមធ្វើការជាមួយប៊ីស្សព ឬប្រធានសាខារបស់ពួកគេរយៈពេល ១៥០ ថ្ងៃមុន ដើម្បីផ្តល់ពេលវេលាគ្រប់គ្រាន់រៀបចំពាក្យស្នើសុំដែលបានបំពេញរួច ។
តើអ្នកបានដឺងដែរឬទេ ? ពួកអ្នកដែលមានបំណងក្លាយជាអ្នកផ្សព្វផ្សាយសាសនា ត្រូវបានអញ្ជើញឲ្យធ្វើការពិនិត្យសុខភាព និងធ្មេញ ក្នុងការរៀបចំខ្លួនសម្រាប់ការបម្រើរបស់ពួកគេ។
ជាផ្នែកមួយនៃដំណើរការនេះ តម្រូវឲ្យមានការពិនិត្យសុខភាពដោយគ្រូពេទ្យ និងទន្តពេទ្យជាចាំបាច់។ អ្នកជំនាញទាំងនេះអាចកំណត់អត្តសញ្ញាណលក្ខខណ្ឌណាមួយដែលគួរត្រូវបានដោះស្រាយមុនពេលបម្រើជាអ្នកផ្សព្វផ្សាយសាសនាចាប់ផ្តើម ហើយផ្តល់ការណែនាំដ៏មានប្រយោជន៍សម្រាប់ការថែទាំសុខភាពនៅក្នុងបេសកកម្ម ។ ប្រទេសជាច្រើនតម្រូវឲ្យពួកអ្នកផ្សព្វផ្សាយសាសនាទទួលការចាក់វ៉ាក់សាំងមួយចំនួនដើម្បីការពារប្រឆាំងនឹងជំងឺ ។
b945bf93091811ecbb5eeeeeac1e9b2a290ec82a.png
ពួកអ្នកផ្សព្វផ្យាយសាសនាបង្រៀនដល់គ្រួសារមួយនៅប្រទេសហ្គាណា ។© 2026 by Intellectual Reserve, Inc. All rights reserved.តើអ្នកបានដឺងដែរឬទេ ? មិនតម្រូវឲ្យដកធ្មេញទាល់ដែលមានសុខភាពល្អចេញឡើយ ។
ការណែនាំរបស់សាសនាចក្របានវិវត្តទាក់ទងទៅនឹងការថែទាំធ្មេញ ។ ការដកធ្មេញទាល់ដែលមានសុខភាពល្អលែងជាតម្រូវការមុនចេញបម្រើជាអ្នកផ្សព្វផ្សាយទៀតហើយ ។ ផ្ទុយទៅវិញ ការដកធ្មេញចេញគួរតែត្រូវបានពិចារណានៅពេលដែលធ្មេញមានបញ្ហា ឬបង្កហានិភ័យគួរឲ្យកត់សម្គាល់ណាមួយ ។ ចំណុចនេះជួយចៀសវាងចំពោះនីតិវិធីមិនចាំបាច់ ដោយកាត់បន្ថយលើការចំណាយសម្រាប់ពួកអ្នកដែលមានបំណងក្លាយជាអ្នកផ្សព្វផ្សាយសាសនា និងក្រុមគ្រួសាររបស់ពួកគេ ។
តើអ្នកបានដឺងដែរឬទេ ? ការចាត់តាំងអ្នកផ្សព្វផ្សាយសាសនាម្នាក់ៗនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានធ្វើឡើងដោយផ្ទាល់ពីសមាជិកម្នាក់ក្នុងកូរ៉ុមនៃពួកសាវកដប់ពីរនាក់ ។
អ្នកផ្សព្វផ្សាយសាសនាគ្រប់រូបត្រូវបានហៅដោយព្យាការី ហើយត្រូវបានចាត់តាំងឲ្យទៅបេសកកម្មមួយ តាមរយៈការបំផុសគំនិត ដោយសមាជិកម្នាក់ក្នុងកូរ៉ុមនៃពួកសាវកដប់ពីរនាក់ ។
សំខាន់ណាស់ចំពោះការផ្តល់ឲ្យនូវព័ត៌មានគ្រប់គ្រាន់ខាងវេជ្ជសាស្ត្រ សុខភាពផ្លូវចិត្ត និងប្រវត្តិពេញលេញ ។ ព័ត៌មានត្រឹមត្រូវ និងពេញលេញនឹងប្រទានពរដល់អ្នកផ្សព្វផ្សាយសាសនាក្នុងអំឡុងពេលការបម្រើរបស់ពួកគេ ។
តើអ្នកបានដឺងដែរឬទេ ? ពួកអ្នកផ្សព្វផ្សាយសាសនាវ័យក្មេងផ្នែកសេវាកម្មទទួលការហៅរបស់ពួកគេមកពីប្រធានសាសនាចក្រ ។
ពួកអ្នកផ្សព្វផ្សាយសាសនាវ័យក្មេងផ្នែកសេវាកម្ម គឺត្រូវបានហៅដោយព្យាការី ហើយបានចាត់តាំងដោយសមាជិកម្នាក់ក្នុងកូរ៉ុមនៃពួកសាវកដប់ពីរនាក់ ។ ការចាត់តាំងការបម្រើរបស់ពួកគេត្រូវបានរៀបចំឡើងសម្រាប់តម្រូវការផ្ទាល់ខ្លួនរបស់ពួកគេ ។ ពួកគេរស់នៅក្នុងគេហដ្ឋាន ជាសមាជិកនៃបេសកកម្មមួយ ហើយត្រូវបានអញ្ជើញឲ្យចូលរួមសន្និសីទតំបន់ និងការជួបជុំផ្សេងទៀតដែលទាក់ទងនឹងបេសកកម្ម ។ បន្ថែមពីលើការចាត់តាំងឲ្យបម្រើ ពួកគេក៏អាចចូលរួមក្នុងការបង្រៀនជាមួយនឹងពួកអ្នកផ្សព្វផ្សាយសាសនាដទៃទៀតនៅក្រោមការដឹកនាំរបស់ប្រធានបេសកកម្មផងដែរ ។
ពួកអ្នកប្រឹក្សាអ្នកផ្សព្វផ្សាយសាសនាផ្នែកសេវាកម្មដើរតួយ៉ាងសំខាន់ក្នុងការផ្តល់នូវការគាំទ្រ និងការណែនាំប្រចាំថ្ងៃ ដោយធានាថាអ្នកផ្សព្វផ្សាយសាសនាផ្នែកសេវាកម្មម្នាក់ៗមានអារម្មណ៍ថាបានចូលរួមចំណែកក្នុងការហៅរបស់ពួកគេ ។
តើអ្នកបានដឺងដែរឬទេ ? តម្រូវការពួកអ្នកផ្សព្វផ្សាយសាសនារៀមច្បងពេញម៉ោងនៅទូទាំងពិភពលោក ។
គូស្វាមីភរិយា និងបុរសនិងស្រ្តីនៅលីវដែលមានអាយុ ៤០ ឆ្នាំឡើង អាចត្រូវបានហៅធ្វើជាពួកអ្នកផ្សព្វផ្សាយសាសនារៀមច្បង ប្រសិនបើពួកគេមិនមានកូនក្នុងបន្ទុកនោះទេ ។ ពួកអ្នកផ្សព្វផ្សាយសាសនារៀមច្បងពេញម៉ោងទាំងអស់ត្រូវបានហៅដោយព្យាការី និងត្រូវបានចាត់តាំងដោយសមាជិកម្នាក់ក្នុងកូរ៉ុមនៃពួកសាវកដប់ពីរនាក់ ហើយជាធម្មតាបម្រើនៅឆ្ងាយពីគេហដ្ឋានសម្រាប់រយៈពេល ៦-២៣ ខែ ។ ពួកអ្នកផ្សព្វផ្សាយសាសនារៀមច្បងគឺជាពរជ័យមួយចំពោះកិច្ចការរបស់ព្រះអម្ចាស់ ។ ចំពោះអស់អ្នកដែលកំពុងពិចារណាលើការបម្រើជាអ្នកផ្សព្វផ្សាយសាសនារៀមច្បង អាចចូលទៅកាន់គេហទំព័រ SeniorMissionary.ChurchofJesusChrist.org ដើម្បីស្វែងយល់បន្ថែមអំពីឱកាស និងតម្រូវការទាំងឡាយដែលមាន ។
តើអ្នកបានដឺងដែរឬទេ ? នៅទូទាំងមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា ចំនួន ១១ កន្លែងរបស់សាសនាចក្រ មាន៥០ភាសាជាងត្រូវបានបង្រៀន ។
មជ្ឈមណ្ឌលបំពាក់បំប៉នអ្នកផ្សព្វផ្សាយសាសនាសម្រាប់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានទីតាំងនៅជុំវិញពិភពលោក ដោយផ្តល់ការបំពាក់បំប៉នក្នុងភាសាជាច្រើន និងបម្រើដល់ពួកអ្នកផ្សព្វផ្សាយសាសនាដែលត្រូវបានចាត់តាំងឲ្យទៅកាន់តំបន់ជាច្រើន ។ មជ្ឈមណ្ឌលបំពាក់បំប៉នអ្នកផ្សព្វផ្សាយសាសនាមានទីតាំងនៅប្រទេសប្រេស៊ីល អង់គ្លេស ហ្គាណា សាធារណរដ្ឋប្រជាធិបតេយ្យកុងហ្គោ ម៉ិកស៊ិក នូវែលសេឡង់ ប៉េរូ ហ្វីលីពីន អាហ្វ្រិកខាងត្បូង ថៃ និងទីក្រុងប្រូវ៉ូ រដ្ឋយូថាហ៍ សហរដ្ឋអាមេរិក ។ មជ្ឈមណ្ឌលបំពាក់បំប៉នអ្នកផ្សព្វផ្សាយសាសនាទាំងនេះឆ្លុះបញ្ចាំងពីវិសាលភាពកាន់តែទូលំទូលាយនៃកម្មវិធីអ្នកផ្សព្វផ្សាយសាសនារបស់សាសនាចក្រ ។
ការបម្រើបេសកកម្មនឹងនាំមកនូវពរជ័យដល់អ្នក និងអស់អ្នកដែលអ្នកបម្រើ ។ សម្រាប់ព័ត៌មានបន្ថែម សូមចូលទៅកាន់ទំព័រសំណួរដែលសួរជាញឹកញាប់នេះ ដើម្បីជួយអ្នករៀបចំខ្លួនបម្រើព្រះអម្ចាស់ និងចែកចាយដំណឹងល្អរបស់ទ្រង់ ។