![Area-Presidency-20230727_kh.jpg](/media/960x540/Area-Presidency-20230727_kh.jpg)
ការរៀបចំគណៈប្រធានតំបន់អាស៊ីជាថ្មីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនឹងមានប្រសិទ្ធភាពនៅថ្ងៃទី ១ ខែ សីហា ឆ្នាំ ២០២៣ នេះ ។ អែលឌើរ បេនយ៉ាមីន អិម ហ្ស៊ី ថៃ នឹងធ្វើជាប្រធានតំបន់បន្ទាប់ពីការបម្រើជាទីប្រឹក្សាចាប់តាំងពីឆ្នាំ ២០២១ មក ។ អែលឌើរ ខេលី អរ ចនសុន ដែលបានចូលរួមនៅក្នុងគណៈប្រធាននេះក្នុងឆ្នាំ ២០២២ ឥឡូវធ្វើជាទីប្រឹក្សាទីមួយ និងអែលឌើរ មីហ្គែល ចន យូ ថេ ឥឡូវនេះគឺជាទីប្រឹក្សាទីពីរ ។
អែលឌើរ ដេវីឌ ភី. ហូម័រ ដែលបម្រើជាប្រធានតំបន់ និងភរិយារបស់លោក ណេនស៊ី បានទទួលការចាត់តាំងថ្មីទៅបម្រើនៅទីស្នាក់ការកណ្ដាលនៃសាសនាចក្រក្នុងទីក្រុងសលត៌ លេក រដ្ឋយូថាហ៍ នៅសហរដ្ឋ ហេតុដូច្នោះហើយ ទើបចាំបាច់ត្រូវមានការផ្លាស់ប្តូរនៅក្នុងគណៈប្រធានតំបន់នេះ ។ អែលឌើរ ថេ និងភរិយារបស់លោក ហ្គ្រេស៍ ទើបតែប្តូរមកហុងកុង ពីទីក្រុងសតល៍ លេក ដែលកាលពីមុនលោកបម្រើជាជំនួយការប្រតិបត្តិនាយកនៅក្នុងនាយកដ្ឋានព្រះវិហារបរិសុទ្ធ ។
អែលឌើរ ថេ ត្រូវបានគាំទ្រជាពួកចិតសិបនាក់ដែលមានសិទ្ធិអំណាចទូទៅកាលពីថ្ងៃទី ៣១ ខែ មីនា ឆ្នាំ ២០០៧ ហើយបាននាំមកនូវបទពិសោធន៍ដ៏មានតម្លៃក្នុងនាមជាសមាជិកគណៈប្រធានតំបន់នៅប្រទេសហ្វីលីពីនពីរលើក ។ នៅគ្រានៃការបម្រើពេញម៉ោងរបស់លោកនៅក្នុងសាសនាចក្រ លោកបានធ្វើការជាអ្នកកត់ត្រានៃព្រះវិហារបរិសុទ្ធម៉ានិល ប្រទេសហ្វីលីពីន ។ ក្នុងចំណោមការចាត់តាំងផ្សេងៗទៀតនៅក្នុងនាយកដ្ឋានព្រះវិហារបរិសុទ្ធ និងតំបន់អាមេរិកខាងជើងភាគនិរតីក្នុងសហរដ្ឋអាមេរិក អែលឌើរ ថៃ ក៏បានបម្រើជាប្រធានបេសកកម្ម តៃជុង តៃវ៉ាន់ ពីឆ្នាំ ២០១៦ ដល់ឆ្នាំ ២០១៨ ផងដែរ ។
តំបន់ អាស៊ី គឺមានប្រទេស និងដែនដីចំនួន ២២ ស្មើនឹងពាក់កណ្តាលនៃចំនួនប្រជាជនក្នុងពិភពលោក ។ សមាជិកនៃគណៈប្រធានតំបន់មានការទទួលខុសត្រូវក្នុងការមើលការខុសត្រូវកិច្ចការសាសនាចក្រ និងដើម្បីពង្រឹង បំពាក់បំប៉ន និងលើកស្ទួយសមាជិកសាសនាចក្រ ថ្នាក់ដឹកនាំ និងពួកអ្នកផ្សព្វផ្សាយសាសនាទូទាំងតំបន់ ។
ប្រធាន ថៃ បានមានប្រសាសន៍ថា « យើងមានអំណរគុណណាស់ដែលមានឯកសិទ្ធិបម្រើប្រជាជននៅតំបន់អាស៊ី ជាប្រជាជនដែលយើងស្រឡាញ់ និងគោរព ។ ប្រជាជននៅតំបន់អាស៊ីគឺពោរពេញដោយសក្ដានុពល និងការសន្យា ។ យើងសូមអញ្ជើញបងប្អូនទាំងអស់គ្នាឲ្យរៀនអំពីព្រះអង្គសង្រ្គោះព្រះយេស៊ូវគ្រីស្ទ សូមឲ្យទទួលយកការអញ្ជើញរបស់ទ្រង់ដើម្បីធ្វើតាមទ្រង់ និងដកពិសោធន៍អំណរ និងសេចក្តីសុខសាន្តដោយផ្ទាល់ ដែលទ្រង់ប្រទានឲ្យដល់មនុស្សទាំងអស់ » ។