ក្រុមរបាំ BYU Ballroom ធ្វើឲ្យទស្សនិកជនរំភើបរីករាយនៅក្នុងប្រទេសកម្ពុជា និង

នាល្ងាចថ្ងៃទី០៧ ខែឧសភា ឆ្នាំ២០២៥ នៅសាលមហោស្រព កោះពេជ្រ ក្នុងរាជធានីភ្នំពេញនៃព្រះរាជាណាចក្រកម្ពុជា ទស្សនិជនគ្រប់វ័យជាង ២,០០០ នាក់មានសេចក្តីរំភើបរីករាយ ហើយបានជាប់ចិត្តនឹងក្រុមសម្តែង Ballroom Dance មកពីសាកលវិទ្យាល័យ ព្រិកហំា យ៉ង់ ( ប៊ី.វ៉ាយ.យូ ) ។ នាឱកាសដ៏ពិសេសនេះ សម្តេចរាជបុត្រី ព្រះអនុជ នរោត្តម អរុណរស្មី បានផ្តល់មហាកិត្តយសយាងអញ្ជើញចូលរួម ។

1 / 2

Download Photos

មានសមាជិកព្រះញាតិវង្សានុវង្សជាច្រើនព្រះអង្គ និងថ្នាក់ដឹកនាំជាន់ខ្ពស់រួមមាន ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ព្រមទាំងថ្នាក់ដឹកនាំធុរកិច្ចក្នុងសហគមន៍ជាច្រើនរូបទៀត ក៏បានអញ្ជើញចូលរួមទស្សនាផងដែរ ។

ការសម្តែងដែលមានរយៈពេល ៩០ នាទីរបស់សាកលវិទ្យាល័យ ប៊ី.វ៉ាយ.យូ. ក្រោមចំណងជើងថា « Rhythm » បានធ្វើឲ្យមហោស្រពទាំងមូលឮសូរកងរំពង ជាមួយនឹងការបង្ហាញបច្ចេកទេសដ៏រស់រវើកនៃស្តង់ដារបាំ Ballroom Dance និង ឡាតាំង រួមមានចង្វាក់រាំស្លូ រាំតាំងហ្គោ រាំបោះជំហានលឿនៗ រាំឆាត់ឆា និងរាំសាំបា ។ នេះមិនត្រឹមតែជាការសម្តែងលើកទីមួយរបស់ក្រុមរបាំនេះនៅក្នុងប្រទេសកម្ពុជាទេ ប៉ុន្តែសម្រាប់ទស្សនិកជនជាច្រើន នោះក៏ជាលើកទីមួយដែលបានស្គាល់របាំ Ballroom Dance ។

1 / 2

Download Photos

អែលឌើរ អេង ប៊ុនហួច ជាក្រុមចិតសិបនាក់ប្រចាំប្រទេសកម្ពុជា ពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលជាសាសនាចក្រដែលបានឧបត្ថម្ភដល់ ប៊ី.វ៉ាយ.យូ. បានកត់សម្គាល់ឃើញថា « របាំនេះទាំងមានភាពថ្លៃថ្នូរ និងពោរពេញដោយថាមពល ។ យើងមានអំណរគុណចំពោះក្រុមរាំនិស្សិតទាំងនេះ ដែលបានធ្វើដំណើរយ៉ាងឆ្ងាយដើម្បីចែកចាយទេពកោសល្យជាមួយប្រជាជនកម្ពុជា ហើយយើងសង្ឃឹមដោយអស់ពីចិត្តថា ពួកគេនឹងត្រឡប់មកវិញម្តងទៀត ! »

ព្រឹត្តិការណ៍ដែលបានរៀបចំឡើងដោយសាកលវិទ្យាល័យ ប៊ី.វ៉ាយ.យូ. និងសាសនាចក្រនេះ ក៏មានវត្តមានរបស់សាលារបាំព្រះនាងបុប្ផាទេវី និងសហព័ន្ធកីឡារាំកម្ពុជា បានចូលរួមសម្តែងចែកចាយទេពកោសល្យគ្នា នៅពេលចាប់ផ្ដើមការសម្តែងផងដែរ ។ ក្រុមទាំងបីនេះបានជួបគ្នាមួយថ្ងៃមុននៅឯអាហារពេលល្ងាចជាមួយគ្នា និងក្នុងការហាត់សម ដែលបានភ្ជាប់ទំនាក់ទំនងគ្នាតាមរយៈការផ្លាស់ប្តូរការសម្តែងរបាំ Ballroom Dance និងរបាំប្រពៃណីខ្មែរ ។

1 / 2

Download Photos

ឯឧត្តម អ៊ិត វិចិត្រ ជាថ្នាក់ដឹកនាំប្រឹក្សាផ្នែកអាជីវកម្មដែលជាសមាជិកនៃសាសនាចក្រនេះ ហើយរូបលោកក៏បានជួយរៀបចំព្រឹត្តិការណ៍នេះផងដែរ បានមានប្រសាសន៍ថា « [ គោលបំណងដែលនាំពួកគេឲ្យជួបគ្នា ] គឺដើម្បីគាំទ្រលើការផ្លាស់ប្តូរវប្បធម៌ និងស្នាដៃនៃសិល្បៈកម្រិតអន្តរជាតិ ទន្ទឹមនឹងនោះក៏បានផ្តល់នូវការលើកទឹកចិត្តជំរុញដល់សិល្បៈករដ៏មានទេពកោសល្យរបស់កម្ពុជាផងដែរ » ។

លោក ឃឺត ហូលមេន ជានាយកក្រុមសម្តែងសិល្បៈ បានមានប្រសាសន៍ថា « បទពិសោធន៍បែបនេះហើយដែលយើងចង់រស់នៅមើលឃើញ » ។

វាមិនត្រឹមតែជាការផ្លាស់ប្តូរទេពកោសល្យប៉ុណ្ណោះទេ ប៉ុន្តែវាគឺជាការចែករំលែកនូវអ្វីដែលជំរុញទឹកចិត្តពួកយើងផងដែរ ។ ក្រុមរបាំប្រពៃណីបានបង្រៀនយើងអំពីក្បាច់រាំនានាដែលបានបន្តជាច្រើនជំនាន់ ហើយយើងបានចែករំលែកចង្វាក់រាំផ្ទាល់ខ្លួនខ្លះជាមួយពួកគេវិញ ។ យើងពុំត្រូវការអ្នកបកប្រែទេ—យើងគ្រាន់តែស្តាប់ភ្លេង ក្បាច់រាំ និងបំណងប្រាថ្នាពិតប្រាកដដើម្បីភ្ជាប់ទំនាក់ទំនងគ្នាប៉ុណ្ណោះ » ។

នៅពេលលោកខាងលិចជួបនឹងលោកខាងកើត នោះការសម្តែងរបស់ពួកគេនឹងធ្វើឲ្យទស្សនិកជនស្ញប់ស្ញែងយ៉ាងខ្លាំង ។

byu_dance25_Inline-Media_Group-Picture.jpg
2025 by Intellectual Reserve, Inc. All rights reserved.

ចាប់តាំងពីការបង្កើតឡើងក្នុងឆ្នាំ១៩៦០ ក្រុមសម្តែង Ballroom Dance ប៊ី.វ៉ាយ.យូ. បានសម្តែងជូនទស្សនិកជន
ទស្សនារាប់លាននាក់ នៅក្នុងប្រទេសជាង ៣៥ ប្រទេស ។ ក្រុមរបាំនេះគឺជាក្រុមសិល្បៈសម្តែងដ៏ល្បីល្បាញលំដាប់អន្តរជាតិ ដែលបានឈ្នះពាន់រង្វាន់ជើងឯកនៅសហរដ្ឋអាមេរិក និងអង់គ្លេស ។

ក្រុមអ្នករបាំទាំង ៣២ រូបនេះជានិស្សិតរៀនពេញម៉ោង ហើយបើនិយាយទៅ ពួកគេគឺជាអ្នកដែលស្ម័គ្រចិត្ត ប៉ុន្តែពួកគេបានទទួលបានកេរ្តិ៍ឈ្មោះសម្រាប់ភាពឥតខ្ចោះ និងសិល្បៈ ដែលបានជំរុញឲ្យលោក ប្រាយអិន ម៊េកដូណល ជាប្រធានក្រុមប្រឹក្សារបាំជាតិរបស់អាមេរិក ហៅក្រុមរបាំ Ballroom Dance នេះថា « កំណប់ដ៏អស្ចារ្យបំផុតរបស់ពិភពលោក » ។

ដូច្នេះ វាមិនមែនជាការភ្ញាក់ផ្អើលទេ ដែលក្រុមរាំនិស្សិតទាំងនោះត្រូវបានអញ្ជើញឲ្យសម្តែងថ្វាយព្រះមហាក្សត្រ មហា វ៉ាជីរ៉ាឡុងកន (Maha Vajiralongkorn) និងម្ចាស់ក្សត្រី សុធីតា (Suthida) និងភ្ញៀវកិត្តយសផ្សេងទៀតទស្សនានៅ ទីក្រុងបាំងកក ដែលជាផ្នែកមួយនៃទស្សនកិច្ចក្នុងតំបន់អាស៊ីអាគ្នេយ៍ មុនទស្សនកិច្ចមកកាន់ប្រទេសកម្ពុជា ។

ក្រៅពីការសម្តែងនៅលើវេទិកាដ៏ធំដែលមានវត្តមានរបស់ព្រះញាតិវង្សានុវង្ស នោះក្រុមរាំនិស្សិតទាំងនេះក៏បានធ្វើការសម្តែងនៅសាលាអន្តរជាតិ ហ្សាយអិន ភ្នំពេញផងដែរ ហើយបានបង្រៀនរាំដល់សិស្សានុសិស្សវ័យជំទង់ជាង ២០០ នាក់ផងដែរ ។ ជាថ្មីម្តងទៀតនៅខេត្តសៀមរាប ពួកគេក៏បានផ្ដល់ការងារបម្រើដល់សមាជិក និងមិត្តភក្កិរបស់សាសនាចក្រជាង ២០០ នាក់នៅក្នុងសាលាជំនុំតូចមួយ តាមរយៈការសម្តែងរបស់ពួកគេ ។ បន្ទាប់ពីការសម្តែងនៅប្រទេសកម្ពុជា ពួកគេបានបន្តសម្តែងនៅទីក្រុងហូជីមិញ និងទីក្រុងហាន់ណូយ នៅទីនោះពួកគេផ្តល់ការកម្សាន្តជូនទស្សនិកជនសរុបប្រមាណជា ១៤០០នាក់ ។ មានមន្រ្តីរាជការ និងក្រុមគ្រួសាររបស់ពួកលោកជាច្រើនបានមកអមដំណើរជាមួយដើម្បីធ្វើការគាំទ្រ ។

ក្រុមរបាំដ៏ជំនាញទាំងនេះជាទូទៅមិនបានឃើញវេទិកាសម្តែងរបស់ពួកគេរហូតដល់ថ្ងៃដែលព្រឹត្តិការណ៍នេះមកដល់ ប៉ុន្តែពួកគេចេះបត់បែន ហើយអាចកែតម្រូវការរាំរបស់ពួកគេទៅតាមទីកន្លែង ឬស្ថានភាពដែលពួកគេ
សម្តែង ។ ភាពក្លៀវក្លា និងសមត្ថភាពឆ្លើយតបយ៉ាងរហ័សរហួននោះ គឺជាលទ្ធផលដែលបានមកពីការហាត់រៀនជាច្រើនឆ្នាំនៅខាងក្រោយឆាក ។ មិនថាពួកគេសម្តែងនៅសាលមហោស្រពដ៏ធំនៅក្នុងប្រទេស ឬនៅក្នុងក្រុមតូចមួយនៅកន្លែងហាត់សមនោះទេ ពួកគេបានប្រឹងអស់ពីសមត្ថភាព ។

1 / 2

Download Photos

លោក ចនណាថាន់ ថាំង មកពីទីក្រុងហូជីមិញ បានមានប្រសាសន៍ថា « ខ្ញុំបានជាប់ចិត្តដោយការសម្តែងរបស់ពួកគេ ។ ភរិយារបស់ខ្ញុំបានយំមិនឈប់ ហើយគាត់និយាយថា គាត់ទទួលអារម្មណ៍ដឹងពីការខិតខំប្រឹងប្រែងសម្តែងរបស់ពួកគេ ។

បងស្រី រឿន ធារី មកពីខេត្តសៀមរាប បានមានប្រសាសន៍ថា « ខ្ញុំអស់កម្លាំង និងធុញថប់ពីព្រោះតែការងារ និងបញ្ហាគ្រួសារ ហើយខ្ញុំស្ទើរតែមិនបានមកចូលរួមសកម្មភាពនេះ ប៉ុន្តែខ្ញុំរីករាយណាស់ដែលខ្ញុំបានមកចូលរួម ។ ការរាំដ៏ឥតខ្ចោះរបស់ពួកគេបក់ផាត់កង្វល់របស់ខ្ញុំចេញទៅឆ្ងាយ ។ ចាប់តាំងពីរបាំទីមួយរហូតរបាំចុងបញ្ចប់ ខ្ញុំមានអារម្មណ៍រីករាយ និងសុខសាន្តណាស់ ! » ។

អែលឌើរ អេង បានបន្ថែមថា « ពីព្រោះតែការសម្តែងរបស់ពួកគេ មនុស្សចាប់ផ្តើមស្គាល់សាសនាចក្រប្រសើរជាងមុន ទោះបីជាក្រុមសម្តែងមិនបាននិយាយអំពីសាសនាចក្រនៅក្នុងការសម្តែងនេះក្តី ។ [ វត្តមានរបស់ក្រុមនិស្សិតនេះ ] នាំមកនូវក្តីរំភើបដល់យុវវ័យ យុវមជ្ឈិមវ័យ និងដល់ទស្សនិកជនទាំងអស់ ។ ទន្ទឹមនឹងនោះ ពួកគេក៏បានបញ្ចេញពន្លឺនៃភាពសុខសាន្ត មិត្តភាព និងសេចក្តីស្រឡាញ់ដល់មនុស្សគ្រប់គ្នាផងដែរ » ។

ការស្ដាប់ឮមតិឆ្លើយតបទាំងនេះពីទស្សនិកជនធ្វើឲ្យនិស្សិតទាំងនោះមានក្តីរីករាយក្រៃលែង ។ ខារ៉ូលីន ម៉ាន់នី អាយុ២០ឆ្នាំ សិក្សាជំនាញផ្នែកទំនាក់ទំនង បាននិយាយថា « ខ្ញុំរីករាយណាស់ដែលខ្ញុំអាចផ្ដល់ការងារបម្រើដល់ប្រជាជនពាសពេញពិភពលោកតាមរយៈទេពកោសល្យរាំរបស់យើង ។ វាបាននាំមកនូវអត្ថន័យ និងគោលបំណងបន្ថែមនៅក្នុងការសម្តែងរបស់យើង ដែលយើងមកទីនេះមិនត្រឹមតែជាការផ្ដល់ការកម្សាន្តសប្បាយប៉ុណ្ណោះទេ ប៉ុន្តែបានស្ថាបនាទំនាក់ទំនងរវាងសហគមន៍ផ្សេងគ្នា » ។

1 / 2

Download Photos

ក្រៅពីការសម្តែងរបស់ពួកគេ ក្រុមនិស្សិតទាំងនេះក៏មានឱកាសបានចូលរួមជាមួយនឹងវប្បធម៌ដ៏សម្បូរបែបនៃតំបន់អាស៊ីអាគ្នេយ៍ផងដែរ ។ ពួកគេស្ញប់ស្ញែងដោយភាពស្រស់ស្អាតនៃប្រាសាទអង្គរវត្តពីបុរាណ ហើយបានចាប់អារម្មណ៍ចំពោះទេសភាពដ៏អស្ចារ្យនៃឈូងសមុទ្រ ហៅឡុង ។ បទពិសោធន៍របស់ពួកគេរួមមាន ការកាន់សត្វកណ្ដុររាវរកគ្រាប់មីនរបស់អង្គការ Apopo នាខេត្តសៀមរាប ការទស្សនាប្រវត្តិសាស្រ្តដ៏ឈឺចាប់នៃរបបខែ្មរក្រហម នៅសារមន្ទីប្រល័យពូជសាសន៍ក្នុងទីក្រុងភ្នំពេញ និងដំណើររុករករូងក្រោមដី Cu Chi ក្នុងទីក្រុងហូជីមិញ ។

បទពិសោធន៍ទាំងនេះធ្វើឲ្យពួកគេមានទស្សនវិស័យទូលំទូលាយអំពីពិភពលោក និងយល់ដឹងអំពីជីវប្រត្តិផ្សេងគ្នានៃទស្សនិកជនរបស់ពួកគេ ។

byu_dance25_0_Inline-Media.jpg
2025 by Intellectual Reserve, Inc. All rights reserved.

ម៉ៃឃល ម័រហ្គេន អាយុ២៤ឆ្នាំ សិក្សាជំនាញផ្នែកវិទ្យាសាស្រ្តសេដ្ឋកិច្ច និងនយោបាយ ដែលចូលចិត្តផ្នែកប្រវត្តិសាស្រ្តជាខ្លាំង បាននិយាយថា « ការមើលឃើញកន្លែងប្រវត្តិសាស្រ្តទាំងនេះដោយផ្ទាល់ភ្នែក គឺជាបទពិសោធន៍ដ៏
អស្ចារ្យខ្លាំងណាស់ ។ មេរៀនដែលខ្ញុំបានរៀននៅក្នុងសៀវភៅសិក្សាប្រែក្លាយជាជីវិតពិត ហើយខ្ញុំចូលចិត្តរាល់វិនាទីនៅទីនេះ » ។”

ខាធីលីន ឡ័សុន អាយុ២២ឆ្នាំ សិក្សាជំនាញផ្នែកសុវត្ថិភាពបច្ចេកវិទ្យា ដែលមិនធ្លាប់បានចេញក្រៅពីសហរដ្ឋអាមេរិកឡើយ មុនដំណើរទស្សនកិច្ចនេះ បាននិយាយថា « ខ្ញុំពេញចិត្តណាស់ដែលដំណើរនេះបានបង្ហាញដល់ខ្ញុំជាច្រើនអំពីប្រជាជន និងវប្បធម៌ផ្សេងៗគ្នា ។ វាគួរឲ្យចាប់អារម្មណ៍ណាស់ដែលបានមើលឃើញថា ប្រវត្តិសាស្រ្តរបស់ប្រទេសនីមួយៗមានឥទ្ធិពលយ៉ាងខ្លាំងទៅលើវប្បធម៌របស់ប្រជាជន មិនថាវាជាការផ្លាស់ប្តូរទីលំនៅ ឬសង្គ្រាមនោះទេ ។ វាជារឿងដ៏ពិសេសសដែលបាននាំយកក្តីរីករាយជូនទស្សនិកជន ជាពិសេសទៅកាន់ប្រជាជនវ័យចំណាស់ ដែលបានស៊ូទ្រាំនឹងការលំបាក និងការឈឺចាប់ជាច្រើន » ។

នាយក ហូលមេន បានកត់សម្គាល់ឃើញថា បទពិសោធន៍នេះនឹងផ្លាស់ប្តូរជីវិតរបស់និស្សិតទាំងនេះជារៀងរហូត ហើយលោកសង្ឃឹមថាសេចក្តីស្រឡាញ់ចំពោះរបាំរបស់ពួកគេបានដក់ជាប់ក្នុងដួងចិត្ត និងក្នុងជីវិតរបស់ពួកគេរហូតតទៅ ។

កាលក្រុមអ្នករបាំ Ballroom Dance ប៊ី.វ៉ាយ.យូ. បានបញ្ចប់ដំណើរទស្សនកិច្ចរបស់ពួកគេនៅ ភីសានុលក ប្រទេសថៃ ពួកគេនឹងនៅតែបន្តជំរុញ និងទទួលបានការបំផុសគំនិតជានិច្ច ។

ក្រុមរបាំ BYU Ballroom ធ្វើឲ្យទស្សនិកជនរំភើបរីករាយនៅក្នុង
ប្រទេសកម្ពុជា និងប្រទេសរៀតណាម

ក្រុមរាំនិស្សិតបានផ្សព្វផ្សាយឥទ្ធិពលនៅគ្រប់ទីកន្លែងដែលពួកគេទៅដល់ក្នុងតំបន់អាស៊ីអាគ្នេយ៍

byu_dance25_Inline-Media_Group-Picture.jpg

byu_dance25_0_Inline-Media.jpg

ក្រុមរបាំ BYU Ballroom ធ្វើឲ្យ​ទស្សនិកជន​រំភើបរីករាយ​នៅក្នុង​ ប្រទេស​កម្ពុជា និងប្រទេសរៀតណាម

ក្រុមរាំនិស្សិតបានផ្សព្វផ្សាយឥទ្ធិពលនៅគ្រប់ទីកន្លែងដែលពួកគេទៅដល់ក្នុងតំបន់អាស៊ីអាគ្នេយ៍

byu_dance25_Inline-Media_Group-Picture.jpg

byu_dance25_0_Inline-Media.jpg

ក្រុមរបាំ BYU Ballroom ធ្វើឲ្យទស្សនិកជនរំភើបរីករាយនៅក្នុង
ប្រទេសកម្ពុជា និងប្រទេសរៀតណាម