នៅក្នុងសារលើប្រព័ន្ធផ្សព្វផ្សាយសង្គមនៅថ្ងៃចូលឆ្នាំថ្មី ប្រធាន រ័សុល អិម ណិលសុន នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានរំឭកខួបលើកទី២៥ នៃសេចក្ដីប្រកាស « ព្រះគ្រីស្ទដ៏មានព្រះជន្មរស់ ៖ ទីបន្ទាល់របស់ពួកសាវក » ។ ដោយជញ្ជឹងគិតពីឥទ្ធិពលនៃឯកសារដ៏សំខាន់នេះ ព្យាការីបានអញ្ជើញពួកបរិសុទ្ធថ្ងៃចុង ក្រោយឲ្យខិតទៅកានតែជិតព្រះយេស៊ូវគ្រីស្ទ ដោយការអញ្ជើញទៅព្រះវិហារបរិសុទ្ធជាញឹកញាប់ ។
កាលពី ២៥ ឆ្នាំមុន នៅថ្ងៃទី១ ខែមករា ឆ្នាំ២០០០ គណៈប្រធានទីមួយ និងកូរ៉ុមនៃពួកសាវកដប់ពីរនាក់បានបោះពុម្ពផ្សាយសេចក្តីប្រកាស « ព្រះគ្រីស្ទដ៏មានព្រះជន្មរស់ ៖ ទីបន្ទាល់របស់ពួកសាវក » ។ នេះគឺជាឯកសារច្បាប់ដើម ៖ https://www.ChurchofJesusChrist.org/.../the-living-christ... ។ ខ្ញុំជាសាវកម្នាក់ក្នុងចំណោមសាវកបួនរូបដែលមានជីវិតដែលបានចុះហត្ថលេខា និងឈ្មោះរបស់ខ្ញុំនៅលើឯកសារដ៏សំខាន់នេះ រួមជាមួយប្រធាន ដាល្លិន អេក អូក ហែនរី ប៊ី អាវរិង និង ជែហ្វ្រី អ័រ ហូឡិន ។
ក្នុងរយៈពេលមួយសតវត្សរ៍ចុងក្រោយនេះ ទីបន្ទាល់នេះត្រូវបានអាន សិក្សា ព្រមទាំងទន្ទេញចាំដោយសិស្សរាប់មិនអស់របស់ព្រះយេស៊ូវគ្រីស្ទ ។ ការសិក្សារបស់ខ្ញុំអំពីទីបន្ទាល់នេះបង្កើនបំណងប្រាថ្នារបស់ខ្ញុំជារៀងរាល់ថ្ងៃ ដើម្បីក្លាយកាន់តែដូចទ្រង់ ។
នៅពេលខ្ញុំប្រារព្ធពិធីបុណ្យចូលឆ្នាំថ្មីលើកទី ១០១ របស់ខ្ញុំ ខ្ញុំនៅតែបន្តចូលចិត្តនូវឱកាសដែលសេចក្តីប្រកាសនេះផ្តល់ឲ្យសម្រាប់ការចាប់ផ្តើមថ្មី ទស្សនៈវិស័យថ្មី និងដំណោះស្រាយថ្មីៗផងដែរ ។
តើខ្ញុំអាចធ្វើការអញ្ជើញមួយនេះទៅកាន់បងប្អូនបានទេ ពេលបងប្អូនពិចារណាថា តើបងប្អូននឹងមានការតាំងចិត្តអ្វីខ្លះនៅក្នុងឆ្នាំនេះ ? ខ្ញុំសូមអញ្ជើញបងប្អូនឲ្យមកកាន់ព្រះវិហារបរិសុទ្ធឲ្យបានញឹកញាប់ទៅតាមកាលៈទេសៈរបស់បងប្អូនអនុញ្ញាតឲ្យ ។
នៅក្នុងព្រះដំណាក់របស់ព្រះអម្ចាស់ យើងផ្ដោតលើព្រះយេស៊ូវគ្រីស្ទ ។ យើងរៀនអំពីទ្រង់ និងដំណឹងល្អរបស់ទ្រង់ ។ យើងធ្វើសេចក្ដីសញ្ញាដែលចងភ្ជាប់យើងទៅនឹងទ្រង់ និងព្រះវរបិតាសួគ៌របស់យើង ។ តាមរយៈបទពិសោធន៍នៅក្នុងព្រះវិហារបរិសុទ្ធទាំងនេះ និងផ្សេងៗទៀត យើងត្រូវបានពង្រឹងដើម្បីសម្រេចបាននូវការតាំងចិត្តរបស់យើងសម្រាប់ឆ្នាំថ្មី ។
មិត្តជាទីស្រឡាញ់របស់ខ្ញុំអើយ សូមឲ្យឆ្នាំថ្មីនេះពោរពេញទៅដោយពន្លឺ សេចក្តីស្រឡាញ់ អំណរ និងព្រះចេស្ដានៃព្រះអង្គសង្គ្រោះ និងព្រះប្រោសលោះរបស់យើង ដែលជាព្រះគ្រីស្ទដ៏មានព្រះជន្មរស់ ។
នៅថ្ងៃទី២ ខែមករា ឆ្នាំ២០២៥ ប្រធាន ដាល្លិន អេក អូក នៃគណៈប្រធានទីមួយបានចែកចាយការចុះផ្សាយមួយដែលគូសបញ្ជាក់អំពីសារៈសំខាន់នៃបុណ្យគ្រីស្ទម៉ាស់ និងបុណ្យអ៊ីស្ទើរ ។ លោកបានលើកទឹកចិត្តមនុស្សគ្រប់គ្នាឲ្យទន្ទឹងរង់ចាំបុណ្យអ៊ីស្ទើរ
និងសារលិខិតនៃការរស់ឡើងវិញជាសកល នៅពេលយើងចូលឆ្នាំថ្មី ។
អស់អ្នកដែលថ្វាយបង្គំព្រះយេស៊ូវគ្រីស្ទអបអរប្រារព្ធពិធីពីរនៃការងារបម្រើរបស់ទ្រង់នៅលើផែនដី គឺបុណ្យគ្រីស្ទម៉ាស់ និងបុណ្យអ៊ីស្ទើរ ។ បុណ្យគ្រីស្ទម៉ាស់ ដែលយើងទើបតែបានប្រារព្ធរួចហើយនោះ ផ្ដល់កិត្តិយសថ្វាយចំពោះការប្រសូតរបស់ទ្រង់ ។ ការយល់ដឹងអំពី « ការប្រសូត្រ » គឺជារឿងទូទៅទូទាំងសកលលោក ។ ផ្ទុយទៅវិញ សារៈសំខាន់នៃ « ការរស់ឡើងវិញ » ដែលត្រូវបានស្គាល់ថាបុណ្យអ៊ីស្ទើរ មិនត្រូវបានយល់ដឹងជាសកលនោះទេ ។
ព្យាការី និងការបង្រៀនរបស់សាសនាចក្រដែលបានស្ដារឡើងវិញនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបញ្ជាក់ថា ព្រះយេស៊ូវគ្រីស្ទបានយាងចេញពីផ្នូរ ហើយមានព្រះជន្មរស់នៅថ្ងៃនេះ ជាអង្គដែលមានព្រះជន្មរស់ឡើងវិញ ។ ស្រដៀងគ្នានេះផងដែរ ដោយសារដង្វាយធួនរបស់ព្រះគ្រីស្ទ អស់អ្នកដែលធ្លាប់រស់នៅលើផែនដីនេះក៏នឹងត្រូវបានរស់ឡើងវិញផងដែរ ដើម្បីអាចរស់ជារៀងរហូត ជាតួអង្គដែលរស់ឡើងវិញ ( សូមមើល កូរិនថូសទី ១ ១៥:២២; អាលម៉ា ៤០:២៣ ) ។
នៅពេលយើងទន្ទឹងរង់ចាំឆ្នាំថ្មីនេះ សូមឲ្យយើងចាប់ផ្តើមទន្ទឹងរង់ចាំបុណ្យអ៊ីស្ទើរ និងការរស់ឡើងវិញរបស់ព្រះយេស៊ូវគ្រីស្ទ—ជាសារលិខិតដ៏រុងរឿងបំផុតដល់មនុស្សជាតិ ។
ការសាកល្បងដែលព្រះជាទីស្រឡាញ់បានកំណត់នៅចំពោះមុខយើង មិនមែនដើម្បីដឹងថាយើងអាចស៊ូទ្រាំនឹងការលំបាកបានឬអត់នោះទេ ។ វាគឺដើម្បីមើលថាតើយើងអាចស៊ូទ្រាំវាបានល្អឬអត់ ។
នៅក្នុងចំណោមពាក្យដ៏ជាទីស្រឡាញ់ និងលើកទឹកចិត្តបំផុតសម្រាប់ខ្ញុំ គឺពាក្យរបស់នីហ្វៃ ៖
« អ្នករាល់គ្នាត្រូវតែឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប។ … បើសិនជាអ្នករាល់គ្នាខិតខំជឿនទៅមុខ … ហើយកាន់ខ្ជាប់ដរាបដល់ចុងបំផុត មើលចុះ នោះព្រះវរបិតា ទ្រង់មានព្រះបន្ទូលដូច្នេះថា ៖ អ្នករាល់គ្នានឹងមានជីវិតដ៏នៅអស់កល្បជានិច្ច » ( នីហ្វៃទី ២ ៣១:២០ ) ។ នោះគឺជាជីវិតជារៀងរហូតជាមួយនឹងព្រះវរបិតា និងព្រះរាជបុត្រាជាក្រុមគ្រួសារ … និងដោយអំណរជារៀងរហូត ។
យើងឆ្លងកាត់ការសាកល្បងរបស់យើង នៅពេលយើងបង្ហាញថាយើងចងចាំព្រះអង្គសង្គ្រោះ ហើយរក្សាបទបញ្ញត្តិរបស់ទ្រង់តាមរយៈគ្រប់ការសាកល្បង និងឱកាសទាំងអស់នៅក្នុងជីវិតរបស់យើង ។ ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោក ។ ព្រះគម្ពីរមរមនគឺជាសាក្សីដ៏ពិតប្រាកដដែលថាទ្រង់មានព្រះជន្មរស់—ថាទ្រង់គឺជាព្រះអង្គសង្គ្រោះរបស់យើងដែលបានរស់ឡើងវិញ ហើយមានព្រះជន្មរស់ ។ ខ្ញុំសូមថ្លែងទីបន្ទាល់ថា ការធានាអះអាងដែលព្រះអង្គសង្គ្រោះបានប្រទានដល់ពួកសិស្សរបស់ទ្រង់ គឺមានភាពប្រាកដចំពោះយើង « ខ្ញុំមិនចោលអ្នករាល់គ្នាឲ្យនៅកំព្រាទេ » ( យ៉ូហាន ១៤:១៨ ) ។