មណ្ឌលសុខភាពតូចមួយក្នុងខេត្តត្បូងឃ្មុំ នៅតំបន់ជនបទនៃប្រទេសកម្ពុជា ឥឡូវនេះមានបន្ទប់សម្ភពថ្មី ដែលទារកអាចសម្រាលមកក្នុងស្ថានភាពដែលមានសុវត្ថិភាព មានអនាម័យ ជាមួយនឹងឧបករណ៍ទំនើបថ្មីៗ ។
លើសពីនេះ មន្ទីរពេទ្យថ្មីចំនួនពីរក្នុងខេត្តនេះ ឥឡូវមានឧបករណ៍ថ្មីៗដើម្បីលើកកម្ពស់សេវាកម្មយ៉ាងល្អជូនដល់អ្នកជំងឺ ។ គ្រប់យ៉ាងទំាងនេះអរគុណចំពោះការបរិច្ចាគ និងការងាររបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
នៅក្នុងពិធីមួយនៅឯស្រុកតំបែរនៃខេត្តនេះ នាថ្ងៃទី៧ ខែមិថុនា ឆ្នាំ២០២៥ រាជរដ្ឋាភិបាល សាសនាចក្រ និងមន្ត្រីសុខាភិបាលបានជួបជុំគ្នាដើម្បីអបអរសាទរ « ពិធីប្រគល់-ទទួល » ឧបករណ៍ និងបន្ទប់សម្ភពថ្មី រួមជាមួយនឹងគម្រោងជួសជុលកែលម្អថ្មីនៅសាលាបឋមសិក្សាចំនួនប្រាំមួយ ( សូមមើលដំណើររឿងដែលទាក់ទង ) ។
Seda-Senchey-equip.jpg
បរិក្ខាពេទ្យនៅមណ្ឌលសុខភាពសេដាសែនជ័យ © 2025 by Intellectual Reserve, Inc. All rights reserved.ឯកឧត្តមបណ្ឌិត ឆាយ បូរិន រដ្ឋមន្ត្រីក្រសួងធម្មការ និងសាសនានៅកម្ពុជា ដែលបានអញ្ជើញជាអធិបតីនៅក្នុងពិធីនេះ បានមានប្រសាសន៍ថា « ខ្ញុំមានសុទិដ្ឋិនិយមថា ការបញ្ចប់គម្រោងទាំងនេះនឹងចូលរួមចំណែកក្នុងការលើកកម្ពស់គុណភាព និងប្រសិទ្ធភាពនៃការថែទាំសុខភាពសម្រាប់អ្នកស្រុកនៅទីនេះ » ។ អែលឌើរ បេនយ៉ាមីន អិម ហ្ស៊ី តៃ ប្រធានតំបន់អាស៊ី ជាតំណាងឲ្យសាសនាចក្រ ។
ដំណើរការនៃការគាំទ្រដល់តម្រូវការនៃការអប់រំ និងការថែទាំសុខភាពរបស់ខេត្តត្បូងឃ្មុំ បានចាប់ផ្តើមនៅខែមករា ឆ្នាំ២០២៤ នៅពេលដែលអែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់បានជួបជាមួយនាយករដ្ឋមន្ត្រីនៃប្រទេសកម្ពុជា សម្តេចមហាបវរធិបតី ហ៊ុន ម៉ាណែត ។ នៅក្នុងការប្រជុំនោះ អែលឌើរ រិនឡាន់ បានសន្យានឹងសាងសង់មជ្ឈមណ្ឌលសម្រាប់ព្យាបាលជំងឺបេះដូងនៅខេត្តសៀមរាប ហើយក៏បានពិភាក្សាពីតម្រូវការផ្សេងទៀតផងដែរ ។ នៅក្នុងខេត្តត្បូងឃ្មុំដែលស្ថិតនៅភាគខាងកើតនៃប្រទេសកម្ពុជា ជាប់នឹងព្រំដែនប្រទេសវៀតណាម តម្រូវការផ្នែកថែទាំសុខភាពសំខាន់ៗត្រូវបានកំណត់ ។
ក្នុងការរំឭកដល់ការបញ្ចប់ការងារនេះ អែលឌើរ តៃ បានមានប្រសាសន៍ថា « យើងជឿថារូបកាយរបស់យើងគឺជាអំណោយទានមកពីព្រះ ហើយដូចជាព្រះវិហារបរិសុទ្ធដ៏ពិសិដ្ឋ ចាំបាច់ត្រូវថែទាំដោយការយកចិត្តទុកដាក់ និងការគោរពយ៉ាងខ្លាំង ។ នោះមន្ទីរពេទ្យ និងបរិក្ខារពេទ្យមានសារៈសំខាន់ណាស់សម្រាប់យើង ដូចជាសុខភាពខាងរាងកាយ និងខាងវិញ្ញាណគឺមានសារៈសំខាន់ផងដែរ » ។
ពួកអ្នកផ្សព្វផ្សាយសាសនារៀមច្បងផ្នែកមនុស្សធម៌ អែលឌើរ ម៉ាក និងស៊ីស្ទើរ ម៉ាវេល អ៊ើនសរ បានជួយមើលការខុសត្រូវលើគម្រោងការបរិច្ចាគផ្នែកថែទាំសុខភាពនេះ ។
បន្ទប់សម្ភពថ្មីនៅមណ្ឌលសុខភាពសេដាសែនជ័យ ពីមុនបានសាងសង់ផ្នែកខ្លះៗ ប៉ុន្តែមិនមានថវិកាគ្រប់គ្រាន់ដើម្បីបញ្ចប់គម្រោងនេះនោះទេ ។ សាសនាចក្រក៏បានយកមកបន្ត និងបញ្ចប់ការសាងសង់នេះ ហើយបានផ្តល់ឧបករណ៍ OB-GYN ។ មណ្ឌលសុខភាពសហគមន៍នេះបម្រើដល់ប្រជាជនចំនួន១០,៤០០នាក់ នៅក្នុងភូមិចំនួន១៣ និងទារកទើបកើតពី៨ ទៅ ១០នាក់ក្នុងមួយខែៗ ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
ស៊ីស្ទើរ អ៊ើនសរ បានមានប្រសាសន៍ ៖ « ការឃើញទឹកមុខរបស់ប្រជាជន និងទឹកភ្នែកនៃអំណរ បានធ្វើឲ្យកិច្ចខិតខំទាំងអស់កាន់តែមានអត្ថន័យ ។ យើងទទួលបានរូបថតទារកដំបូងដែលសម្រាលនៅក្នុងបន្ទប់សម្ភពថ្មីនេះ ។ វាពិតជាកន្លែងដ៏ល្អ » ។
អែលឌើរ អ៊ើនសរ បានមានប្រសាសន៍ថា មានតែគ្រូពេទ្យផ្នែកខាងភ្នែកដែលមានឯកទេសខ្ពស់ម្នាក់ប៉ុណ្ណោះដែលបម្រើដល់ប្រជាជនជិតមួយលាននាក់នៅក្នុងខេត្តនេះ ។ វាជាការកម្រណាស់ដែលមានគ្រូពេទ្យជំនាញចេញពីទីក្រុងភ្នំពេញ ពីព្រោះពួកគេមិនទទួលបានប្រាក់កម្រៃល្អនៅតំបន់ជនបទនេះទេ ។ ប៉ុន្តែវេជ្ជបណ្ឌិតម្នាក់នេះបានធ្វើការវះកាត់ជំងឺភ្នែកឡើងបាយពី៨ ទៅ ១០ដងក្នុងមួយថ្ងៃៗអស់រយៈពេល២០ឆ្នាំមកហើយ ។ យើងអាចទទួលបានឧបករណ៍ភ្នែកដែលមានគុណភាពខ្ពស់ពីប្រទេសជប៉ុន រួមទាំងមីក្រូទស្សន៍វះកាត់ថ្មី និងអំពូលឆ្លុះភ្នែក ហើយតាំងពីពេលនោះមក គាត់ញញឹមមិនឈប់សោះ » ។
ការបរិច្ចាគសម្ភារសំខាន់ៗក៏ត្រូវបានធ្វើឡើងដល់មន្ទីរពេទ្យចំនួនពីរផងដែរ គឺមន្ទីរពេទ្យបង្អែកស្រុកក្រូចឆ្មារ បម្រើដល់ប្រជាជនចំនួន១០៦,០០០នាក់ និងមន្ទីរពេទ្យបង្អែកតំបែរ បម្រើដល់ប្រជាជនចំនួន៨៥,០០០នាក់ ។ មន្ទីរពេទ្យទាំងពីរនេះគឺជាមន្ទីរពេទ្យថ្មីគួរសម ប៉ុន្តែត្រូវការឧបករណ៍វេជ្ជសាស្ត្រថ្មីៗដើម្បីព្យាបាលអ្នកជំងឺឲ្យបានគ្រប់គ្រាន់ជាមួយនឹងលក្ខខណ្ឌវេជ្ជសាស្ត្រផ្សេងៗគ្នា ។
គ្រឿងបរិក្ខារដែលបានបរិច្ចាគរួមមាន ម៉ាស៊ីនកាំរស្មីអ៊ិច C-arm ម៉ាស៊ីនកាំរស្មីអ៊ិចធ្មេញ ម៉ាស៊ីនតាមដានចង្វាក់បេះដូងអ្នកជំងឺ ម៉ាស៊ីនលាងឧកបរណ៍ ឧបករណ៍មន្ទីរពិសោធន៍ ឧបករណ៍វាស់ជីពចរ កុំព្យូទ័រ និងម៉ាស៊ីនបោះពុម្ព ប្រព័ន្ធអុកស៊ីសែន ម៉ាស៊ីនអេកូ គ្រែសម្រាល ម៉ាស៊ីនតាមដានចង្វាក់បេះដូងគភ៌ និងឧបករណ៍ផ្សេងៗទៀត ។