ប្រធាន ផតធ័រ អញ្ជើញទៅទស្សនកិច្ចមន្ទីរពេទ្យកុមារជាតិក្នុងអំឡុងពេលផ្ដល់

ប្រធានអង្គការបឋមសិក្សា ស៊ូសាន អេច ផតធ័រ បានអញ្ជើញទៅទស្សនកិច្ចជាលើកដំបូងនៅតំបន់អាស៊ី នាចុងខែឧសភា ឆ្នាំ២០២៥ ក្នុងដំណើរផ្ដល់ការងារបម្រើនៅទីតាំងចំនួនប្រាំមួយ ជាពិសេសនៅក្នុងសហគមន៍ដែលកំពុង អភិវឌ្ឍនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ចំណុចពិសេសមួយចេញពីដំណើរទស្សនកិច្ចរបស់គាត់ទៅមន្ទីរពេទ្យកុមារជាតិ និងមជ្ឈមណ្ឌលជាតិគាំពារមាតា និងទារក នៅក្នុងរាជធានីភ្នំពេញ នៃប្រទេសកម្ពុជា នោះគឺដើម្បីធ្វើទស្សនកិច្ចដោយផ្ទាល់អំពីសក្តានុពលនៃកិច្ចសហការផ្នែកមនុស្សធម៌របស់មន្ទីរពេទ្យជាមួយសាសនាចក្រ ។

ដំណើរទស្សនកិច្ចនៅមន្ទីរពេទ្យជាតិ

ប្រធាន ផតធ័រ ដែលអមដំណើរដោយប្រធានតំបន់អាស៊ី អែលឌើរ បេនយ៉ាមីន អិម ហ្ស៊ី តៃ និងភរិយារបស់លោក ស៊ីស្ទើរ ណាអូមី បានទទួលស្វាគមន៍ពីសំណាក់លោកវេជ្ជ. ញឹប អង្គារបុស្ស ប្រធានមន្ទីរពេទ្យ និងក្រុមគ្រូពេទ្យរបស់លោក កាលពីថ្ងៃទី២៩ ខែឧសភា ឆ្នាំ២០២៥ ។ ពួកគាត់ត្រូវបានជម្រាបជូនជាសង្ខេបៗអំពីប្រវត្តិ និងការអភិវឌ្ឍនៃមន្ទីរពេទ្យនេះ ព្រមទាំងតម្រូវការរបស់មន្ទីរពេទ្យនេះផងដែរ ហើយពួកគាត់ក៏បានធ្វើដំណើរទៅមើលអគារផ្នែកវះកាត់ ដែលសាសនាចក្របានបរិច្ចាគ ។

លោកវេជ្ជ. អង្គារបុស្ស បានមានប្រសាសន៍ថា « កិច្ចសហការរវាងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងមន្ទីរពេទ្យកុមារជាតិបានបន្តអស់រយៈពេលប្រាំឆ្នាំមកហើយ ។ សាសនាចក្របានបរិច្ចាគសម្ភារបរិក្ខារមួយចំនួនសម្រាប់គ្រូពេទ្យវះកាត់ ។ កិច្ចការនេះបានផ្តល់លទ្ធភាពឲ្យមន្ទីរពេទ្យកុមារជាតិអាចអភិវឌ្ឍបានទាំងផ្នែកបច្ចេកទេស និងផ្នែកសេវាកម្មដើម្បីជួយដល់កុមាររបស់យើង … ដើម្បីទទួលបានការថែទាំគ្រប់គ្រាន់ និងមានគុណភាពខ្ពស់ » ។

1 / 2

Download Photos

ប្រធាន ផតធ័រ បានអញ្ជើញទៅទស្សនកិច្ចមជ្ឈមណ្ឌលជាតិគាំពារមាតា និងទារក ដែលបានសហការជាមួយសាសនាចក្រតាំងពីឆ្នាំ២០២២ មកម្ល៉េះ ។ លោក ង៉ែត ទិត្យា នាយករងនៃមជ្ឈមណ្ឌលបានដឹកនាំក្រុមគ្រូពេទ្យរបស់លោកទទួលស្វាគមន៍ប្រធាន ផតធ័រ ហើយក៏បានអញ្ជើញគាត់ឲ្យធ្វើទស្សនកិច្ចក្នុងអគារដើម្បីជួបសួរសុខទុក្ខអ្នកជំងឺ និងដើម្បីបានឃើញផ្ទាល់នូវភាពធូរស្បើយពីអាការរោគពីមួយថ្ងៃទៅមួយថ្ងៃរបស់អ្នកជំងឺ ។

លោកវេជ្ជ. ទិត្យា បានមានប្រសាសន៍ថា « មជ្ឈមណ្ឌល និងសាសនាចក្រមានគោលបំណងស្រដៀងគ្នា … គឺមានបំណងធ្វើឲ្យអ្នកជំងឺសប្បាយចិត្ត និងព្យាបាលពួកគេដោយស្មើភាពគ្នា នេះជាមូលហេតុដែលយើងធ្វើការជាមួយគ្នាដើម្បីបង្កើនគុណភាពនៃសេវាព្យាបាលនៅទីនេះ ។ មិនត្រឹមតែទទួលបានសម្ភារបរិក្ខារទំនើបៗប៉ុណ្ណោះទេ ប៉ុន្តែយើងក៏បានទទួលការបំពាក់បំប៉នពីគ្រូពេទ្យស្ម័គ្រចិត្តមកពី [ សាសនាចក្រ ] ក្នុងជំនាញឯកទេសផ្សេងៗទៀត » ។ សមត្ថភាពដ៏ប្រសើរទាំងនេះបានជំរុញឲ្យមជ្ឈមណ្ឌលទទួលបាននូវអត្រានៃការពេញចិត្តពីអតិថិជន រហូតដល់ទៅ ៩៤% ចេញពីការស្ទង់មតិនាពេលថ្មីៗនេះ ដែលធ្វើឡើងដោយក្រសួងសុខាភិបាល ។

គម្រោងសេវាកម្មបឋម

1 / 2

Download Photos

ស្ថិតនៅឯមន្ទីរពេទ្យ ប្រធាន ផតធ័រ បានប្រគល់អំណោយជាសម្ភារសិក្សាចំនួន២០០កញ្ចប់ ដែលកុមារៗនៃសាសនាចក្រនៃពួកបរិសុទ្ធថ្ងៃចុងក្រោយនៅក្នុងមូលដ្ឋានបានវេចខ្ចប់យ៉ាងពិសេសមួយថ្ងៃមុន ។ កុមារអង្គការបឋមសិក្សាមកពីមណ្ឌល អ៊ូដន ប្រទេសថៃ ក៏បានរៀបចំកញ្ចប់ស្រដៀងគ្នាសម្រាប់មជ្ឈមណ្ឌល យូដន ថៃនី សម្រាប់កុមារី និងស្តេកខាងកើត តៃជុង តៃវ៉ាន់ សម្រាប់មូលនិធិសប្បុរសធម៌សុខុមាលភាពសង្គមស៊ីហ្វាងផងដែរ ។ កិច្ចខិតខំប្រឹងប្រែងទាំងនេះគឺឆ្លើយតបទៅនឹងគំនិតផ្តួចផ្តើមឆ្នាំ២០២៥របស់អង្គការបឋមសិក្សា ដែលមានគោលបំណងរៀបចំគម្រោងបម្រើប្រចាំឆ្នាំ ដើម្បីជួយកុមារឲ្យបម្រើកុមារដទៃទៀត ។

ប្រធាន ផតធ័រ បានមានប្រសាសន៍ថា « កុមារមានចិត្តរំភើបនៅពេលពួកគេគិតអំពីកុមារផ្សេងទៀតដែលមានសេចក្តីត្រូវការ ហើយដឹងថាពួកគេអាចធ្វើអ្វីដែលមានប្រយោជន៍ដើម្បីជួយដល់កុមារដទៃទៀតបាន » ។ ផាឌី រីយ៉ានុត អាយុប្រាំបីឆ្នាំ មកពីមណ្ឌលខាងកើតភ្នំពេញកម្ពុជា បាននិយាយថា « ខ្ញុំចង់ជួយមនុស្សគ្រប់គ្នានៅមន្ទីរពេទ្យ ដើម្បីធ្វើឲ្យពួកគេសប្បាយចិត្ត » ។ មិត្តភក្តិរបស់នាងមានឈ្មោះថា រ៉េត និម្មានរតី អាយុប្រាំបីឆ្នាំបានបន្ថែមថា « ខ្ញុំមានអារម្មណ៍ល្អដែលខ្ញុំអាចធ្វើល្អដល់ពួកគេ ហើយខ្ញុំសង្ឃឹមថាពួកគេក៏សប្បាយចិត្តផងដែរ » ។

នៅពេលដែលប្រធាន ផតធ័រ បានចែកកញ្ចប់អំណោយដល់កុមារនៅមជ្ឈមណ្ឌល យូដន ថៃនី សម្រាប់កុមារី គាត់ប្រាកដក្នុងចិត្តថាគាត់សម្លឹងមើលកែវភ្នែកក្មេងៗដែលជាអ្នកទទួលបានអំណោយឲ្យបានគ្រប់ៗគ្នា ហើយ « គ្រាន់តែសង្ឃឹមថា ដោយមើលទៅកែវភ្នែករបស់ពួកគេពីរបីនាទី នោះពួកគេនឹងទទួលបានអារម្មណ៍នៃសេចក្តីស្រឡាញ់ និងដឹងថាព្រះស្គាល់ពួកគេ » ។ គាត់បានមានប្រសាសន៍ថា ៖ « យើងធ្វើការបម្រើដោយចេញពីសេចក្ដីស្រឡាញ់ចំពោះព្រះ ហើយយើងបម្រើដោយសារយើងស្រឡាញ់បុត្រាបុត្រីរបស់ទ្រង់ » ។

ការផ្ដល់ការងារបម្រើដល់សមាជិក

1 / 2

Download Photos

សមាជិកទាំងឡាយក៏ទទួលបានអារម្មណ៍មើលមកដោយសេចក្តីស្រឡាញ់ដូចគ្នានោះដែរ នៅពេលដែលមានសមាជិកផ្សេងទៀតនិយាយថាពួកគេក៏ទទួលបានអារម្មណ៍នៃក្ដីស្រឡាញ់ពីគាត់ផងដែរ ។ ប្រធាន ផតធ័រ បានប្រាប់ពួកគេនៅពេលគាត់បានថ្លែងសារលិខិតអំពីការបម្រើប្រកបដោយអំណរ ការអធិស្ឋានអស់ពីដួងចិត្ត និងពរជ័យនៃព្រះវិហារបរិសុទ្ធ ដោយមានប្រសាសន៍ថា « អ្វីមួយដែលខ្ញុំមានអារម្មណ៍ពិសេសចំពោះបងប្អូនម្នាក់ៗ គឺខ្ញុំទទួលអារម្មណ៍នៃអំណរពីបងប្អូន ។ នោះជាអំណោយទានខាងវិញ្ញាណដ៏ស្រស់ស្អាតមួយ » ។

នៅក្នុងប្រទេសថៃ ប្រធាន ផតធ័រ ក៏បានផ្ដល់ការងារបម្រើដល់សមាជិកជនជាតិភូមា ដែលរស់នៅក្នុងទីក្រុងបាងកក ក្នុងអំឡុងពេលធ្វើរាត្រីជួបជុំគ្រួសារផងដែរ ។ អុង ធូ យ៉ មកពីប្រទេសមីយ៉ាន់ម៉ា ដែលចូលរួមនៅក្នុងស្តេកខាងជើងបាងកក ប្រទេសថៃ បានរៀបរាប់ថា « បន្ទាប់ពីការប្រជុំនេះ ខ្ញុំមានអារម្មណ៍ថា ទោះបីយើងរស់នៅក្រៅប្រទេសដែលជាប្រទេសថៃនេះ ក៏ខ្ញុំមិនឯកាដែរ ។ ខ្ញុំមានមិត្តភក្តិ និងសមាជិកដែលដូចជាគ្រួសាររបស់ខ្ញុំនៅទីនេះ ហើយពួកគេកាន់តែមានចំនួនច្រើនឡើងៗនៅក្នុងជីវិតរបស់ខ្ញុំ » ។

នៅប្រទេសឡាវ ដែលមានតែសាខាមួយគត់នៅក្នុងទីក្រុងវៀងច័ន្ទ សមាជិកបានចេញពីសាលាប្រជុំដើម្បីតម្រង់ជួរគ្រវីដៃលាប្រធាន ផតធ័រ នៅពេលយានយន្តរបស់គាត់ចាកចេញទៅ ។ សាខានេះមានសមាជិករបស់គ្រួសារ អ៊ីនថាវង្ស បួនជំនាន់មកហើយ ដែលពួកគាត់បានផ្ដល់ក្តីស្រឡាញ់ឲ្យដល់សមាជិកថ្មីៗនៅក្នុងសាខា ហើយរាប់ពួកគេដូចជាគ្រួសាររបស់គាត់ដែរ ដែលនាំឲ្យសាខានេះមានអត្រាសមាជិកនៅតែសកម្មដល់ទៅជិត ១០០% ។

សមាជិកនៅក្នុងសាខាម្នាក់ដែលមានឈ្មោះថា វុទ្ធីសក្ដិ សិរីសោក អាយុ១៩ឆ្នាំបាននិយាយថា « ខ្ញុំមានការរំពឹងទុកខ្ពស់ ពីព្រោះខ្ញុំពិតជាចង់ជួបគាត់ដោយផ្ទាល់ ។ « គាត់បានមានប្រសាសន៍អំពីជីវិតកាលនៅរៀនរបស់គាត់ ដែលគាត់គឺជាសមាជិកនៃសាសនាចក្រតែម្នាក់ឯងគត់ ហើយវាជារឿងដែលពិបាកជាខ្លាំង … វាមានន័យណាស់សម្រាប់ខ្ញុំ ពេលដែលស្ដាប់ឮរឿងគាត់បែបនេះ ព្រោះខ្ញុំក៏ជាសមាជិកតែម្នាក់ឯងដែរ នៅសាលាដែលខ្ញុំទៅរៀន … ខ្ញុំធ្លាប់ជាសមាជិកអសកម្ម ជារឿយៗត្រូវបានល្បួងតាមរបៀបជាច្រើន … ប៉ុន្តែបន្ទាប់ពីបានឮគាត់មានប្រសាសន៍មក ខ្ញុំមានអារម្មណ៍ថា ខ្ញុំគួរតែព្យាយាមបន្ថែមទៀត ព្រោះខ្ញុំជាកូនរបស់ព្រះ » ។

1 / 2

Download Photos

នៅក្នុងប្រទេសកម្ពុជា ប៉ុន សុបញ្ញា អាយុ១៦ឆ្នាំ មកពីខេត្តសៀមរាបបាននិយាយថា « នៅពេលខ្ញុំបានស្តាប់ពីការបង្រៀនរបស់គាត់ ខ្ញុំបានចាប់ផ្តើមផ្លាស់ប្តូរការគិត ។ ពីមុន ខ្ញុំមិនយល់ពីសារៈសំខាន់នៃការអធិស្ឋាន ឬរបៀបដែលការអធិស្ឋានជួយយើងនោះទេ ។ ប៉ុន្តែ តាមអ្វីដែលខ្ញុំបានរៀនពីគាត់ ខ្ញុំបានដឹងថា ពេលយើងអធិស្ឋាន យើងគួរតែទូលសូមព្រះដោយស្មោះអស់ពីចិត្ត » ។

ហើយនៅតៃវ៉ាន់ ប្រធាន ផតធ័រ បានអញ្ជើញសមាជិកទាំងបីស្ដេក តៃជុង ឲ្យដាក់ព្រះជាមុន ហើយស្វែងរកព្រះហស្តរបស់ទ្រង់ក្នុងជីវិតរបស់ពួកគេ ។ ក្នុងអំឡុងពេលនៃដំណើរទស្សនកិច្ចដ៏ភ្ញាក់ផ្អើលមួយ គាត់ក៏បានលើកទឹកចិត្តដល់យុវមជ្ឈិមវ័យនៅលីវ ( យ.ម.ល. ) នៅពេលបិទសន្និសីទ យ.ម.ល. ទូទាំងប្រទេសតៃវ៉ាន់ប្រចាំឆ្នាំ២០២៥ ឲ្យទៅព្រះវិហារបរិសុទ្ធជាញឹកញាប់ដើម្បីស្វែងរកអំណាចបព្វជិតភាពរបស់ព្រះដើម្បីពង្រឹងពួកគេ ។

1 / 2

Download Photos

ឥទ្ធិពលជាព្រះ

ប្រធាន ផតធ័រ បានបញ្ជាក់ថា ព្រះវិហារបរិសុទ្ធដែលកំពុងសាងសង់គឺជា « ទីសម្គាល់មួយថាព្រះជ្រាបដឹងថា សមាជិកទាំងនេះស្មោះត្រង់ប៉ុនណា ហើយថាពួកគេនឹងក្លាយជាឧបករណ៍ក្នុងការនាំយកមនុស្សជាច្រើនបន្ថែមទៀតមកកាន់ដំណឹងល្អ » ។ គាត់ក៏បានមានប្រសាសន៍អំពីព្រះវិហារបរិសុទ្ធភ្នំពេញកម្ពុជា ដែលកំពុងសាងសង់នៅទល់មុខមន្ទីរពេទ្យកុមារជាតិ ហើយបានធានាប្រាប់បុគ្គលិកក្រុមគ្រូពេទ្យថា ពួកគេនឹងទទួលបានលិខិតអញ្ជើញឲ្យចូលរួមនៅក្នុងពិធីបើកសម្ពោធ ។

ក្នុងដំណើរទស្សនកិច្ចរយៈពេលប្រាំបួនថ្ងៃនេះ ប្រធាន ផតធ័រ ក៏បានចូលរួមក្នុងការប្រជុំធម្មនិដ្ឋានរបស់អង្គការបឋមសិក្សាចំនួនបី ការប្រជុំធម្មនិដ្ឋានសមាជិកចំនួនបី ការប្រជុំបំពាក់បំប៉នបងប្អូនស្រ្តីជាថ្នាក់ដឹកនាំចំនួនបី ដែលរួមមានអង្គការបឋមសិក្សា ក្រុមយុវនារី និងសមាគមសង្រ្គោះ និងការចុះសួរសុខទុក្ខរបស់អង្គការបឋមសិក្សាចំនួនបី ឬក្រុមពិភាក្សាអំពីថ្នាក់ដឹកនាំ ។

ប្រធាន ផតធ័រ បានចែកចាយថា « ខ្ញុំសង្ឃឹមថា សមាជិកទាំងអស់ក្នុងតំបន់អាស៊ីបានដឹងថាព្រះមានព្រះទ័យទុកដាក់ចំពោះពួកគេ ។ ពួកគេអាចមានអារម្មណ៍ថា សមាជិកសាសនាចក្រមានតិចតួចបំផុតនៅក្នុងប្រទេសរបស់ពួកគេ ឬពួកគេអាចជាសមាជិកតែម្នាក់ឯងនៅសាលាដែលគេទៅរៀន ឬនៅកន្លែងដែលពួកគេធ្វើការ ។ ប៉ុន្តែព្រះទ្រង់ស្គាល់ពួកគេ ទ្រង់ស្រឡាញ់ពួកគេ ហើយពួកគេមានកិច្ចការដ៏សំខាន់មួយដែលត្រូវធ្វើសម្រាប់ទ្រង់ … ពួកគេជាបុត្រាបុត្រីនៃសេចក្តីសញ្ញា … ហើយពួកគេអាចនាំមកនូវរឿងដ៏មហិមា និងអស្ចារ្យបាន » ។