យើងមានទុក្ខដ៏ក្រៀមក្រំក្នុងការប្រកាសថា ប្រធាន អិម រ័សុល បាឡឺដ ជាប្រធានស្តីទីក្នុងកូរ៉ុមនៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានទទួលមរណភាពហើយ ។ ក្រោយពីការសម្រាកព្យាបាលនៅមន្ទីរពេទ្យមួយរយៈខ្លី លោកបានត្រឡប់ទៅផ្ទះវិញ ដើម្បីបំពេញភារកិច្ចតាមលទ្ធភាព មុនពេលទទួលមរណភាពនៅម៉ោងប្រមាណ ១១:១៥ នាទីយប់ នាថ្ងៃអាទិត្យ ទី ១២ ខែ វិច្ឆិកា ឆ្នាំ ២០២៣ ដែលហ៊ុំព័ទ្ធដោយមនុស្សជាទីស្រឡាញ់ ។ លោកមានជន្មាយុ ៩៥ វស្សា ។
ប្រធាន បាឡឺដ បានក្លាយជាសាវកនៅថ្ងៃទី ៦ ខែតុលា ឆ្នាំ ១៩៨៥ ។ លោកត្រូវបានប្រកាសជាប្រធានស្តីទីក្នុងកូរ៉ុមនៃពួកសាវកដប់ពីរនាក់នៅថ្ងៃទី ១៦ ខែមករា ឆ្នាំ ២០១៨ ។ ក៏ដូចជាពួកសាវកនៅក្នុងសម័យព្រះគម្ពីរសញ្ញាថ្មីដែរ ពួកសាវកនៅសព្វថ្ងៃនេះត្រូវបានហៅឲ្យធ្វើជាសាក្សីពិសេសនៃព្រះយេស៊ូវគ្រីស្ទ ។ ប្រធាន បាឡឺដ គឺជាបុរសម្នាក់ក្នុងចំណោមបុរស ១៥ នាក់ ដែលមើលការខុសត្រូវលើការរីកចម្រើន និងការអភិវឌ្ឍន៍នៃសាសនាចក្រទូទាំងពិភពលោក ដែលឥឡូវនេះមានសមាជិកជាង ១៧ លាននាក់ហើយ ។
ប្រធានសាសនាចក្រ រ័សុល អិម ណិលសុន បានមានប្រសាសន៍ថា « ប្រធាន បាឡឺដ មិនដែលធ្វើអ្វីមិនច្បាស់លាស់ឡើយ ។ លោកបានដឹងយ៉ាងច្បាស់នូវអ្វីដែលព្រះអម្ចាស់បានបង្រៀន និងរបៀបដែលការបង្រៀននោះអាចអនុវត្តក្នុងជីវិតផ្ទាល់ខ្លួនរបស់មនុស្សម្នាក់ ហើយនាំមកនូវអំណរ និងសុភមង្គល » ។
| ប្រធាន រ័សុល អិម ណិលសុន និងប្រធាន អិម រ័សុល បាឡឺដ បានទៅជួបជាមួយសម្តេចប៉ាប ហ្វ្រង់ស៊ីស នៅវ៉ាទីកង់ កាលពីថ្ងៃសៅរ៍ ទី ៩ ខែ មីនា ឆ្នាំ ២០១៩ ។ អែលឌើរ ម៉ាស៊ីម៉ូ ឌី ហ្វីអូ ( ខាងឆ្វេង ) និង អាឡិចសាន់ដ្រូ ឌីនី-ស៊ីកាស៊ី ( ខាងស្តាំ ) នៃពួកចិតសិបនាក់បានអមដំណើរពួកលោកនៅពេលដំណើរទស្សនកិច្ចនេះ ។ Photo courtesy of the Vatican. | 1 / 34 |
.jpg)
.jpg)
.jpg)
.jpg){kind=link}
.jpg){kind=link}
.jpg){kind=link}
ប្រធាន ដាល្លិន អេក អូក នៃគណៈប្រធានទីមួយ ដែលអង្គុយក្បែរប្រធាន បាឡឺដ ក្នុងកូរ៉ុមនៃពួកសាវកដប់ពីរនាក់ អស់រយៈពេលជាងបីទសវត្សរ៍ បានមានប្រសាសន៍ថា « យើងធ្វើការជាមួយគ្នាយ៉ាងជិតស្និទ្ធ ហើយខ្ញុំតែងតែចូលចិត្តអាកប្បកិរិយាដ៏កក់ក្តៅរបស់លោក ។ លោកជាបុរសដែលគួរឲ្យទុកចិត្ត ។ ហើយលោកជាបុរសម្នាក់ដែលទុកចិត្តអ្នក » ។
សព្វថ្ងៃនេះ ប្រធាន បាឡឺដ មានកូនប្រាំពីរនាក់ ចៅ ៤៣ នាក់ ចៅទួត ១០៥ នាក់ និងចៅលួតម្នាក់ ។
ព័ត៌មានលម្អិតអំពីពិធីបុណ្យសពកំពុងរង់ចាំ ។
រៀនក្រមសីលធម៌ការងារនៅពីក្មេង
មែលវិន រ័សុល បាឡឺដ ជុញ្ញ័រ កើតនៅទីក្រុងសលត៍ លេក រដ្ឋយូថាហ៍ នៅថ្ងៃទី ៨ ខែ តុលា ឆ្នាំ ១៩២៨ ជាកូនរបស់លោក មែលវិន អរ និងលោកស្រី ហ្គេរ៉ាឌីន ស្ម៊ីធ បាឡឺដ ។ លោកបានរៀនពីក្រមសីលធម៌ការងាររបស់លោកតាំងពីនៅវ័យក្មេង—នៅហាងលក់រថយន្ត ។ ឪពុករបស់គាត់បានបង្កើតក្រុមហ៊ុនមួយហៅថា Ballard Motor Company ហើយអ្នកកំលោះ រ័សុល ជាកូនប្រុសតែម្នាក់គត់ក្នុងគ្រួសារដែលមានកូន ៤ នាក់ បានធ្វើការនៅគ្រប់ផ្នែកនៅក្នុងក្រុមហ៊ុននេះ រួមទាំងការបើកបររថយន្តជជុះចាស់ៗកាលនៅវ័យជំទង់ ។
ballard_passing_02.jpeg
អិម រ័សុល បាឡឺដ ដែលមានអាយុ ១ ខួប នៅឆ្នាំ ១៩២៩ ។ © រូបថតរបស់ អិម រ័សុល បាឡឺដ2023 by Intellectual Reserve, Inc. All rights reserved.បទពិសោធន៍ទាំងនេះបានបង្កើតជាគំរូមួយសម្រាប់ការងារដែលបានជួយដល់ប្រធាន បាឡឺដ បានយ៉ាងល្អនៅក្នុងគ្រប់ផ្នែកទាំងអស់នៃជីវិតរបស់លោក ។ លោកបានមានប្រសាសន៍ថា « ខ្ញុំបានរៀនពីឳពុករបស់ខ្ញុំថា នៅពេលយើងចាប់ផ្តើមធ្វើកិច្ចការអ្វីមួយ យើងត្រូវតែបញ្ចប់កិច្ចការនោះ ។ នៅទីបំផុត យើងបានយកឈ្នះលើកិច្ចការនោះដោយការពេញចិត្ត ហើយវាអាចមានផលចំណេញ ឬយើងអាចរៀនពីវាថាវាមិនដំណើរការទេ ហើយយើងត្រូវដើរចេញពីវា ប៉ុន្តែយើងមិនដែលងឿងឆ្ងល់ថាតើយើងសុខចិត្តនៅជាមួយវាឬអត់នោះទេ » ។
អាកប្បកិរិយាតស៊ូបែបនេះបានក្លាយជាគុណប្រយោជន៍ពេញមួយជីវិតរបស់លោក—រួមទាំងកាលលោកនៅសាកលវិទ្យាល័យយូថាហ៍ អាជីពការងារក្នុងជីវិតរបស់លោកនៅក្នុងឧស្សាហកម្មរថយន្ត អចលនទ្រព្យ និងវិនិយោគ និងកិច្ចការសាសនាចក្រផ្សេងៗរបស់លោក ។
« បទពិសោធន៍អាជីវកម្មរបស់លោកបានជួយដល់លោកជាច្រើនក្នុងការសួរសំណួរពិចារណា ដែលចាំបាច់ត្រូវសួរនៅពេលអ្នកដាក់ស្នើកម្មវិធីមួយ ឬនៅពេលអ្នកសួរថា ‹ តើយើងប្រើប្រាស់ធនធានប្រកបដោយប្រសិទ្ធភាពដែរឬអត់នោះ ? › » ប្រធាន អូកបានមានប្រសាសន៍ ។
ជាអ្នកដឹកនាំសាសនាចក្រដែលជាប់ខ្សែលោហិតនឹងពួកព្យាការី
ប្រធាន បាឡឺដជាប់ខ្សែលោហិតនឹងថ្នាក់ដឹកនាំសាសនាចក្រដ៏ល្បីបីរូបដែលមានរូបនៅក្នុងការិយាល័យរបស់លោករួមមាន ៖ យ៉ូសែប ស៊្មីធ ជាស្ថាបនិកសាសនាចក្រ និងបងប្រុសរបស់លោកគឺ ហៃរុម ( ជាជីតាលួតរបស់ប្រធាន បាឡឺដ ) ព្រមទាំងកូនប្រុសរបស់ហៃរ៉ុម ប្រធាន យ៉ូសែប អេហ្វ ស៊្មីធ ដែលជាប្រធានទីប្រាំមួយនៃសាសនានេះ ។ កេរដំណែលរបស់ពួកលោកនៃភាពជាសិស្សរបស់ព្រះគ្រីស្ទ ដែលជាការពិតណាស់ រួមមានទាំងការធ្វើទុក្ករកម្មចំពោះយ៉ូសែប និង ហៃរ៉ុម ក្នុងឆ្នាំ ១៨៤៤ បានជំរុញទឹកចិត្តប្រធាន បាឡឺដ រហូតដល់ថ្ងៃដែលលោកបានចែកឋានទៅ ។
ក្នុងឆ្នាំ ២០១៩ ប្រធាន បាឡឺដ បានមានប្រសាសន៍ថា « នៅពេលខ្ញុំដឹងថាពួកលោកជានរណា ហើយខ្ញុំជានរណា វាគឺជារឿងមិនគួរឲ្យជឿទេ » ។ « ខ្ញុំដឹងជានិច្ចថា ខ្ញុំមានកាតព្វកិច្ច ដោយសារតែគុណធម៌នៃការពិតថាខ្ញុំជាប់ខ្សែលោហិត ។ ខ្ញុំឮពួកគាត់និយាយគ្រប់ពេលវេលាថា ‹ ទៅធ្វើវា ធ្វើអ្វីមួយដែលមានតម្លៃ ។ ចេញទៅ អ្នកកំលោះ កុំអង្គុយតែនៅទីនេះ › ។ ពួកគាត់គឺជាអ្នកធ្វើកិច្ចការ ។ ពួកគាត់ត្រូវតែជាអ្នកធ្វើកិច្ចការនោះ » ។
លោកចង់ឲ្យពួកបរិសុទ្ធថ្ងៃចុងក្រោយទាំងអស់ រួមទាំងកូនៗរបស់គាត់ ឲ្យគិតពិចារណាដោយស៊ីជម្រៅអំពីជីវិតនៃសេចក្តីជំនឿ ដែលថ្នាក់ដឹកនាំសាសនាចក្រជំនាន់ដើមបានរស់នៅតាម ។ លោកបានប្រាប់កូនប្រុសរបស់លោកថា ក្រេហ្គ ដែលជាអ្នកផ្សព្វផ្សាយសាសនាអាយុ ១៩ ឆ្នាំនៅពេលនោះថា « ចូរចាំថា លោហិតរបស់ព្យាការីហូរតាមសរសៃរបស់កូន » ។
ក្រេហ្គ កំពុងពិចារណាអំពីអ្វីដែលគាត់បានចងចាំថា « មែនហើយវាគ្មានសម្ពាធអ្វីនោះទេ » ។ « [ ឪពុកខ្ញុំ ] បានមើលពី [ ខ្សែលោហិតទាំងនោះ ] ជារៀងរាល់ថ្ងៃក្នុងការិយាល័យរបស់លោក… ហើយខ្ញុំគិតថាលោកមានអារម្មណ៍ថាលោកត្រូវតែខិតខំឲ្យអស់ពីសមត្ថភាពរបស់លោក ។ លោកបានបណ្តុះបណ្តាលវានៅក្នុងខ្លួនពួកយើងទាំងអស់គ្នា » ។
ប្រធាន ណិលសុន បានមានប្រសាសន៍ពីការជឿជាក់ ការប្តេជ្ញាចិត្ត និងការឧទ្ទិសថ្វាយថា « មាននៅក្នុងលោហិតរបស់ [ ប្រធាន បាឡឺដ ] ។ បងប្អូនអាចស្រមៃបានទេថា — យើងមានអភ័យឯកសិទ្ធិអង្គុយនៅជិតបុរសដែលជាចៅទួតរបស់ហៃរុម ស៊្មីធ ។ ហើយយ៉ូសែប ស្ម៊ីធជា‑លោកពូ‑របស់លោក ។ ជារៀងរាល់ថ្ងៃ ខ្ញុំមានអារម្មណ៍ដឹងគុណចំពោះអភ័យឯកសិទ្ធិនៃការមានទំនាក់ទំនងផ្ទាល់ជាមួយកូនចៅជំនាន់ក្រោយរបស់ថ្នាក់ដឹកនាំដែលគួរឲ្យគោរព និងកោតសរសើរទាំងនោះ ។ លោកមានសេចក្ដីទៀងត្រង់ដូចពួកគាត់ដែរ » ។
នៅក្នុងសុន្ទរកថាសន្និសីទទូទៅចុងក្រោយរបស់លោក ដែលបានថ្លែងនៅថ្ងៃទី ១ ខែ តុលា ឆ្នាំ ២០២៣ លោកបានមានប្រសាសន៍អំពីព្យាការី យ៉ូសែប ស្ម៊ីធ និងអំពីតួនាទីសំខាន់របស់លោកក្នុងការស្ដារឡើងវិញនូវដំណឹងល្អ នៃព្រះយេស៊ូវគ្រីស្ទ និងអំពីពរជ័យនៅក្នុងនោះ ។
ballard_passing_03.jpeg
ប្រធាន អិម រ័សុល បាឡឺដ ជាអ្នកផ្សព្វផ្សាយសាសនាបម្រើនៅបេសកកម្មចក្រភពអង់គ្លេស ពីឆ្នាំ ១៩៤៨ ដល់ឆ្នាំ ១៩៥០ ។2023 by Intellectual Reserve, Inc. All rights reserved.ការបម្រើខាងសាសនារបស់ប្រធាន បាឡឺដ រួមមានកាលលោកបម្រើជាអ្នកផ្សព្វផ្សាយសាសនាវ័យក្មេងនៅប្រទេសអង់គ្លេស ប៊ីស្សព ប្រធានបេសកកម្មតូរ៉ុនតូ កាណាដា សមាជិកនៃគណៈប្រធាននៃពួកចិតសិបនាក់ និងជាសាវកជាងបីទសវត្សរ៍ ។
ប្រធាន បាឡឺដ បានមានប្រសាសន៍ថា « ខ្ញុំមិនធ្វើកិច្ចការនេះដើម្បីទទួលកម្រៃនោះទេ ។ អ្នកមិនអាចយកប្រាក់មកជួលខ្ញុំ ឲ្យធ្វើអ្វីដែលខ្ញុំត្រូវបានសុំឲ្យធ្វើក្នុងនាមជាសមាជិកក្នុងកូរ៉ុមនៃពួកដប់ពីរនាក់នោះទេ ។ ប៉ុន្តែចំពោះព្រះអម្ចាស់ វាជាអភ័យឯកសិទ្ធិដ៏អស្ចារ្យបំផុតដែលមនុស្សម្នាក់មិនធ្លាប់មាន ។ យើងជាសាក្សីអំពីការពិតនៃព្រះជន្ម និងការងារបម្រើរបស់ព្រះអម្ចាស់យេស៊ូវគ្រីស្ទ » ។
ប្រធាន បាឡឺដ បានចាប់យកឱកាសនេះយ៉ាងម៉ត់ចត់មិនថា ជាអតីតប្រធានក្រុមប្រឹក្សាអ្នកផ្សព្វផ្សាយសាសនា ( ដែលរួមទាំងកិច្ចការអភិវឌ្ឍ « ប្រកាសដំណឹងល្អរបស់យើង » សៀវភៅណែនាំអ្នកផ្សព្វផ្សាយសាសនាទាំងអស់ ) ដែលនៅពេលនោះមានពួកអ្នកផ្សព្វផ្សាយសាសនាចំនួន ៥០,០០០ នាក់ នៅក្រោមការគ្រប់គ្រងរបស់លោក ឬជាឪពុកនៃកូនស្រីប្រាំនាក់ និងកូនប្រុសពីរនាក់នោះទេ ។
ជាសាក្សីពិសេស ជាឪពុកពិសេស
ប្រធាន បាឡឺដ បានមានប្រសាសន៍ថា បទពិសោធន៍ដ៏អស្ចារ្យបំផុតមួយចំនួនរបស់លោកបានមកពីការបង្រៀនកូនៗរបស់លោកអំពីដំណឹងល្អនៃព្រះយេស៊ូវគ្រីស្ទ ។ « អ្នករៀនចាប់យកឱកាសបង្រៀន ហើយបើអ្នកភ្ញាក់រលឹក និងយកចិត្តទុកដាក់ នោះអ្នកទទួលបានបទពិសោធន៍ ហើយខណៈពេលនោះដែរក៏ជាការអាម៉ាស់ សម្រាប់ឪពុកណាដែលខកខានឱកាសបង្រៀនគោលការណ៍មួយដល់កូនរបស់ខ្លួន » ។
ឱកាសមួយក្នុងចំណោមឱកាសទាំងនោះបានកើតឡើងនៅចុងទសវត្សរ៍ឆ្នាំ ១៩៨០ បន្ទាប់ពីប្រធាន បាឡឺដ បានក្លាយជាសាវក ។ ក្រេហ្គ ជាកូនពៅរបស់លោក សារភាពថាមានភាព « ជូរចត់បន្តិច » ពីព្រោះឪពុករបស់គាត់តែងតែនៅឆ្ងាយពីផ្ទះដើម្បីបំពេញភារកិច្ច ។ វាមិនងាយស្រួលទេក្នុងការចែកចាយបុរសដែលគាត់ហៅថា « ប៉ា » ជាមួយនឹងពួកបរិសុទ្ធថ្ងៃចុងក្រោយជុំវិញពិភពលោក ។ ក្រេហ្គ បាននិយាយថា « កាលខ្ញុំនៅក្មេង ខ្ញុំមិនយល់ទេ » ។ ជាសំណាងដែលប្រធាន បាឡឺដ បានយល់ពីការយល់ខុសនោះ ។ ដោយមើលឃើញពីឱកាសបង្រៀនមួយ ប្រធាន បាឡឺដ បាននាំក្រេហ្គទៅជាមួយនៅក្នុងការចាត់តាំងរបស់សាសនាចក្រមួយនៅប្រទេសតុងហ្គា និងសាម័រ ។
ក្រេហ្គ បាននិយាយថា « នៅពេលដែលយើងចុះពីលើយន្តហោះនោះ ជាលើកដំបូងដែលខ្ញុំបានដឹងថាអ្នកដទៃបានមើលមកលោករបៀបណា ។ មនុស្សជាច្រើនបានដើរអស់រយៈពេលពីរថ្ងៃដើម្បីមក ហើយដើម្បីគ្រាន់តែចង់ឃើញសាវកម្នាក់ ។ នោះហើយជាពេលដែលវាបានប្តូរពីបន្ទុកទៅជាពរជ័យសម្រាប់ខ្ញុំដើម្បីស្គាល់មនុស្សម្នាក់នេះយ៉ាងស្និទ្ធស្នាល » ។
នេះជាពាក្យសម្តីរបស់ ក្រេហ្គ នៅពេលជញ្ជឹងគិតពីអំណោយទានរបស់ប្រធានបាឡឺដ ដែលមិនគ្រាន់តែអាច ប្រាប់ មនុស្សអំពីអ្វីមួយនោះទេ ប៉ុន្តែក៏ដើម្បី បង្រៀន ពួកគេផងដែរ ។
ក្រេហ្គ បាននិយាយថា « លោកមិនបានមានប្រសាសន៍ថា ‹ មែនហើយ ទ្រាំទៅ › នោះទេ ។ លោកដឹងថាខ្ញុំត្រូវតែយល់ពីបញ្ហានេះ ហើយខ្ញុំត្រូវតែជាផ្នែកនៃការគាំទ្រការហៅរបស់លោក ។ នោះគឺជាបទពិសោធន៍ដ៏ល្អសម្រាប់ខ្ញុំក្នុងការរៀន ហើយគាត់បានធ្វើវាច្រើនដងតាមរបៀបពិសេសៗ ។ លោកមិនត្រឹមតែជាសាក្សីពិសេសប៉ុណ្ណោះទេ លោកជាឪពុកដ៏ពិសេសផងដែរ » ។
ឱកាសបង្រៀនមួយទៀតបានកើតឡើងបន្ទាប់ពី តាំមី កូនស្រីរបស់លោកនៅក្នុងវ័យសិក្សា កំពុងលេងជាមួយមិត្តភក្តិនៅក្នុងរថយន្ត ដែលមិនដឹងយ៉ាងមិច វាបានបើកថយក្រោយបុកនឹងទ្វារ ។ តាំមីបាននិយាយថា នាងភ័យណាស់ ពេលដឹងថារថយន្តដែលនាងគិតថាជារបស់ឪពុកនាង តាមពិតជារថយន្តរបស់អ្នកផ្សេងទេ ។ ប្រធាន បាឡឺដ បានមានប្រសាសន៍ថា នៅពេលលោកត្រឡប់មកផ្ទះវិញ ហើយបានឃើញទឹកមុខកូនស្រីរបស់លោក លោកដឹងថា កូនស្រីរបស់លោកមានរឿងចង់ប្រាប់ហើយ ។ « ខ្ញុំបានបង្រៀននាងថា នាងមានតម្លៃជាងរថយន្ត កាឌីឡាក ដែលនាងបានធ្វើឲ្យខូចនោះទៅទៀត ហើយអ្វីដែលបានកើតឡើងក្នុងជីវិតរបស់នាង និងតម្លៃរបស់នាងចំពោះខ្ញុំគឺសំខាន់ជាងនោះឆ្ងាយណាស់ ។ យើងអាចជួសជុលរថយន្តបាន ប៉ុន្តែប្រសិនបើនាងធ្វើអ្វីខុសក្នុងជីវិតរបស់នាង នោះនឹងពិបាកក្នុងការជួសជុលឆ្ងាយណាស់ » ។
ballard_passing_04.jpeg
ប្រធាន អិម រ័សុល បាឡឺដ និងភរិយារបស់លោក បាបារ៉ា ។2023 by Intellectual Reserve, Inc. All rights reserved.ប្រធាន ណិលសុន បានមានប្រសាសន៍ថា ៖ « លោកនឹងស្ថិតនៅក្នុងការចងចាំថាជាស្វាមី និងជាឪពុកដ៏អស្ចារ្យជានិច្ច ។ នេះគឺជាការណ៍ដ៏អាទិភាពខ្ពស់បំផុតរបស់លោក ។ លោកបានធ្វើជាគំរូដ៏ល្អសម្រាប់យើងអំពីរឿងនោះ ទោះបីជាលោកមមាញឹកយ៉ាងណាក៏ដោយ ។ គ្រួសារលោកតែងតែជាអាទិភាពជានិច្ច » ។
ជាច្រើនឆ្នាំមកនេះ កូនចៅរបស់ប្រធានបាឡឺដ បានពឹងផ្អែកលើកម្លាំងខាងវិញ្ញាណរបស់លោក ។ បាបារ៉ា ជាភរិយារបស់លោកដែលបានចែកឋានទៅ បានមានប្រសាសន៍ថា « នៅពេលយើងនៅកាណាដា បម្រើបេសកកម្មរបស់យើង កូនប្រុសពៅរបស់យើងទើបតែចាប់ផ្តើមថ្នាក់មត្តេយ្យ ហើយមិនស្គាល់នរណានោះទេ ។ គាត់មានការភ័យខ្លាច ។ ស្វាមីរបស់ខ្ញុំបាននាំគាត់ទៅការិយាល័យ លុតជង្គង់ជាមួយគាត់ ហើយអធិស្ឋានទូលសុំឲ្យព្រះវរបិតាសួគ៌ជួយគាត់ឲ្យមានមិត្តភក្តិ ។ ពួកគាត់បានអធិស្ឋានជាមួយគ្នាជាច្រើនថ្ងៃជាប់ៗគ្នា ។ លោកបានជួយកូនៗរបស់យើងជាច្រើននាក់តាមវិធីនោះ ពេលពួកគេមានតម្រូវការពិសេស » ។
គ្រួសារបាឡឺដ មិនត្រឹមតែបានអធិស្ឋានជាមួយគ្នាជាទៀងទាត់ប៉ុណ្ណោះទេ ថែមទាំងបានលេងជាមួយគ្នានៅវិស្សមកាលគ្រួសារបែបផ្សងព្រេងផងដែរ ។ ប្រធាន បាឡឺដ បានរំឮកពីដំណើរមួយដែលពួកគេបានធ្វើដំណើរទៅកាន់រដ្ឋកាលីហ្វ័រញ៉ា នៅក្នុងផ្ទះចល័តដំបូងគេបង្អស់ ដើម្បីរំកិលពីខ្សែដំឡើង ។ លោកបានមានប្រសាសន៍ថា « ខ្ញុំបានបើកវាទៅទីក្រុងចិន ហើយមនុស្សគ្រប់គ្នានៅទីក្រុងសាន់ហ្វ្រាន់ស៊ីស្កូ បានមើលផ្ទះដ៏ធំនោះ ហើយចង្អុលទៅផ្ទះនោះ ហើយសើចចំអកផ្ទះនោះ ។ ខ្ញុំមិនអាចរកកន្លែងចតឡានបានទេ ដូច្នេះហើយខ្ញុំដាក់គ្រប់គ្នាចុះនៅទីក្រុងចិននោះ ហើយបន្តបើកជុំវិញជើងភ្នំនៅ សាន់ហ្រ្វាន់ស៊ីស្កូ ហើយទីបំផុតបានធានារកកន្លែងឲ្យពួកគេត្រឡប់មកវិញម្តងទៀត » ។
ការរៀបការជាមួយបាបារ៉ា ជា « ទេវតា » របស់លោក
ប្រធាន បាឡឺដ មិនអាចនិយាយអំពីគ្រួសាររបស់លោកដោយមិនសរសើរដល់ បាបារ៉ា នោះទេ ។ លោកបានមានប្រសាសន៍ថា « គាត់ជាមនុស្សល្អណាស់ ។ វាពិតជាលំបាកណាស់ក្នុងការរស់នៅជាមួយនរណាម្នាក់ដែលល្អស្ទើរតែឥតខ្ចោះនោះ ។ ពួកលោកបានជួបគ្នានៅ « Hello Day Dance » នៅសាកលវិទ្យាល័យ យូថាហ៍ ។ « គាត់មិនត្រឹមតែស្អាតនោះទេ ប៉ុន្តែមានបុគ្គលិកលក្ខណៈដែលមានពន្លឺចែងចាំងទៀតផង ។ ខ្ញុំដឹងតាំងពីដំបូងថាខ្ញុំចង់រៀបការជាមួយគាត់ ប៉ុន្តែគាត់មិនមានអារម្មណ៍ដូច្នេះទេ ។ វាពិបាកបន្តិចក្នុងការបញ្ចុះបញ្ចូលគាត់ ។ ខ្ញុំបានប្រាប់គាត់ថា ការបញ្ចុះបញ្ចូលគាត់ឲ្យយល់ព្រមរៀបការជាមួយខ្ញុំ គឺជាការប្រើជំនាញផ្នែកលក់ដ៏អស្ចារ្យបំផុតដែលខ្ញុំមិនធ្លាប់ធ្វើ » ។
ប្រធាន បាឡឺដ បានសរសើរ បាបារ៉ា ថាជាម្តាយដ៏អស្ចារ្យម្នាក់ ដែលវិធីសាស្រ្តស្ងប់ស្ងាត់របស់គាត់ធ្វើឲ្យជីវិតក្នុងគេហដ្ឋានកាន់តែដូចស្ថានសួគ៌ ។ « កូនៗរបស់យើងទាំងប្រាំពីរនាក់ ប្រសិនបើអ្នកចង់នាំពួកគេមកទីនេះ ហើយសួរពួកគេថាតើពួកគេធ្លាប់ឮម្តាយរបស់ពួកគេស្រែកទេ ចម្លើយរបស់ពួកគេនឹងមិនធ្លាប់ទេ គាត់មិនដែលធ្វើដូច្នេះទេ ។ គាត់មាននិស្ស័យអាចធ្វើការនៅគ្រាលំបាកបានដោយមិនឆេវឆាវ និងដោយស្ងប់ស្ងាត់ ។ គាត់ជាមនុស្សទន់ភ្លន់ គាត់ពេញដោយក្តីស្រឡាញ់ គាត់ខ្វល់ខ្វាយ គាត់មើលថែ ហើយកូនៗស្រឡាញ់គាត់ណាស់ ។ គ្មាននរណាម្នាក់នៅលើលោកនេះដែលដូចជាម្តាយរបស់ពួកគេឡើយ នេះជាអ្វីដែលកូនៗរបស់យើងមានអារម្មណ៍ចំពោះម្តាយរបស់ពួកគេ » ។
កូនទីពីររបស់ពួកលោក ហូលី បានយល់ស្រប ។ នាងបាននិយាយថា សេចក្តីស្រឡាញ់ និងការគោរពរបស់ឪពុកម្តាយនាងចំពោះគ្នាទៅវិញទៅមកបានជះឥទ្ធិពលដល់នាង និងបងប្អូនរបស់នាងក្នុងការធំលូតលាស់ឡើងរបស់ពួកគេ ។
នាងបាននិយាយថា ៖ « យើងមានអារម្មណ៍ថាកន្លែងដែលល្អបំផុតដែលត្រូវទៅគឺផ្ទះ ហើយដើម្បីនៅទីនោះក្នុងបរិយាកាសមួយដែលឪពុកម្តាយយើងធ្វើល្អដាក់គ្នាជានិច្ច ។ ខ្ញុំបានរៀនថាយើងត្រូវគោរពមនុស្សគ្រប់គ្នា ។ ហើយពួកលោកជាមនុស្សល្អណាស់ក្នុងការធ្វើបែបនោះជាមួយយើងក្នុងនាមជាកូនៗ » ។
ប្រធាន អូក ដែលត្រូវបានហៅបម្រើនៅក្នុងកូរ៉ុមនៃពួកសាវកដប់ពីរនាក់មួយឆ្នាំមុនប្រធាន បាឡឺដ បានមានប្រសាសន៍ថា លោក « កោតសរសើរយ៉ាងខ្លាំងចំពោះរបៀបដែលប្រធាន បាឡឺដ បានប្រព្រឹត្តចំពោះដៃគូដ៏អស់កល្បជានិច្ចរបស់លោក គឺ បាបារ៉ា ។ គាត់ទើបតែបានធ្វើជាស្វាមីគំរូ ពេលពួកគាត់ចាស់ៗរៀងខ្លួនប៉ុណ្ណោះ ។ ដោយចេះគិតគូរ ។ និងជាសុភាពបុរស » ។
បាបារ៉ា បានទទួលមរណភាពនៅថ្ងៃទី ១ ខែ តុលា ឆ្នាំ ២០១៨ នៅអាយុ ៨៦ ឆ្នាំ ។ គាត់បានប្រឈមមុខនឹងការប្រយុទ្ធដ៏យូរជាមួយនឹងបញ្ហាសុខភាពមួយចំនួន រួមទាំងជំងឺភ្លេចភ្លាំង ព្រមជាមួយចរិតលក្ខណៈ និងអារម្មណ៍កំប្លែងរបស់គាត់ផងដែរ ។
ប្រធាន បាឡឺដ បានមានប្រសាសន៍នៅក្នុងសន្និសីទទូទៅ ប្រាំថ្ងៃបន្ទាប់ពីមរណភាពរបស់បាបារ៉ា ថា « ខ្ញុំមានអំណរគុណណាស់ដែលខ្ញុំដឹងអំពីទីកន្លែងដែលបាបារ៉ាជាទីស្រឡាញ់របស់ខ្ញុំបានទៅ និងថាយើងនឹងរួមរស់ជាមួយគ្នាម្ដងទៀតជាមួយគ្រួសារយើងដ៏អស់កល្បជានិច្ច » ។
ការងារបម្រើម្នាក់ទល់ម្នាក់
អារម្មណ៍ដ៏ទន់ភ្លន់របស់ប្រធានបាឡឺដចំពោះគ្រួសាររបស់លោកបាននាំទៅកាន់ដួងចិត្តរបស់បុគ្គលទាំងឡាយដែលលោកបានបង្រៀននៅលើវេទិកា ។ នៅអំឡុងថ្លែងសុន្ទរកថានៅក្នុង សន្និសីទទូទៅខែ មេសា ឆ្នាំ ១៩៨០ របស់សាសនាចក្រ លោកបានអញ្ជើញពួកបរិសុទ្ធថ្ងៃចុងក្រោយឲ្យផ្ញើឈ្មោះអ្នកដែលខ្វះខាតមកលោក ។ លោកបានសន្យាថានឹងត្រឡប់ទៅសរសេរសំបុត្រលើកទឹកចិត្តដល់មនុស្សទាំងនោះវិញ ។ សំបុត្ររាប់រយបានផ្ញើទៅជុំវិញពិភពលោក ។ នៅទីបំផុត ប្រធាន បាឡឺដ បានសរសេរសំបុត្រលើកទឹកចិត្តផ្ទាល់ខ្លួនជាង ៦០០ ដល់មនុស្សដែលត្រូវការជំនួយខាងវិញ្ញាណ ។ អ្នកទទួលម្នាក់បានសរសេរថា « ខ្ញុំមានអារម្មណ៍ថា សំបុត្ររបស់លោកគឺជាការចាប់ផ្តើមពិតប្រាកដនៃការផ្លាស់ប្តូរដ៏អស្ចារ្យនៅក្នុងជីវិតរបស់ខ្ញុំ ហើយខ្ញុំសូមអរគុណលោកអស់ពីដួងចិត្ត » ។
Ballard-India
ប្រធាន អិម រ័សុល បាឡឺដ បានអញ្ជើញទស្សនកិច្ចពួកបរិសុទ្ធថ្ងៃចុងក្រោយនៅប្រទេសឥណ្ឌា នាខែ ឧសភា ឆ្នាំ ២០១៩ ។2023 by Intellectual Reserve, Inc. All rights reserved.ប្រធាន បាឡឺដ មានប្រសាសន៍ថា « យើងគួរតែឈោងទៅជួយគ្នា ។ យើងគួរតែស្វែងរកគ្រប់មធ្យោបាយដែលយើងអាចជួយគ្នាទៅវិញទៅមកតាមរយៈដំណើរនៃជីវិតរមែងស្លាប់នេះ ។ ខ្ញុំគិតថា ក្នុងជម្រៅចិត្តរបស់មនុស្ស មនុស្សគឺជាមនុស្សល្អ ហើយខ្ញុំគិតថាពួកគេចង់ដឹងថាអ្វីជាការពិត ប៉ុន្តែពួកគេមិនដឹងថាត្រូវរកនៅឯណានោះទេ ។ ពួកគេសួរថា ‹ តើខ្ញុំជានរណា ? តើខ្ញុំមកពីណា ? ហេតុអ្វីបានជាខ្ញុំនៅទីនេះ ? តើខ្ញុំទៅណា ? តើអ្វីៗទាំងអស់នេះនាំទៅរកអ្វី ? តើការណ៍នេះនាំខ្ញុំទៅណា ?
ប្រធានបាឡឺដ លើកប៊ិចឡើងសរសេរចម្លើយចំពោះសំណួរទាំងនោះនៅក្នុងសៀវភៅមួយដែលមានចំណងជើងថា « Our Search for Happiness » [ ការស្វែងរកសុភមង្គលរបស់យើង ] ( ឆ្នាំ ១៩៩៣ ), ដែលជួយបង្រៀនអ្នកដទៃអំពីសាសនាចក្រ និងគោលបំណងរបស់ពួកគេនៅក្នុងជីវិត ។ សិទ្ធិអំណាចក្នុងជីវិតរបស់ប្រធាន បាឡឺដ ក៏រួមបញ្ចូលទាំង « ការប្រឹក្សាជាមួយក្រុមប្រឹក្សារបស់យើង » ( ឆ្នាំ ១៩៩៧ ) ដែលប្រើដោយថ្នាក់ដឹកនាំក្នុងតំបន់ជាច្រើនទូទាំងសាសនាចក្រ ។
តាមរយៈបទពិសោធន៍ទាំងអស់របស់លោកក្នុងនាមជាស្វាមី ជាឪពុក និងជាសាវក ប្រធាន បាឡឺដ បានស្វែងរកព្រះយេស៊ូវគ្រីស្ទសម្រាប់ការបំផុសគំនិត និងការធានានៅក្នុងគ្រប់ការណ៍ទាំងអស់ ។ តាមពិត ជារឿយៗ លោកកាន់រូបភាពព្រះអង្គសង្គ្រោះតូចមួយនៅក្នុងហោប៉ៅខោរបស់លោក ដើម្បីលើកទឹកចិត្តនៅថ្ងៃដែលជួបការលំបាក ។
ហូលី បាននិយាយថា « នៅពេលណាដែលលោកបាក់ទឹកចិត្ត លោកនឹងទាញរូបនោះចេញមក ហើយសម្លឹងមើល [ រូបភាពព្រះយេស៊ូវគ្រីស្ទ ] ហើយគិតថា ‹ ខ្ញុំអាចធ្វើបាន ។ ខ្ញុំអាចធ្វើអ្វីៗគ្រប់យ៉ាងសម្រាប់ទ្រង់ ›» ។
ប្រធាន បាឡឺដ បានដឹងថា ដំណឹងល្អនៃព្រះយេស៊ូវគ្រីស្ទ គឺជាយុថ្កាមួយនៅក្នុងពិភពនៃការផ្លាស់ប្តូរតម្លៃជានិច្ច ។ « ខ្ញុំជឿជាក់យ៉ាងមុតមាំថា អស់អ្នកដែលត្រូវបានបោះយុថ្កាយ៉ាងរឹងមាំក្នុងសេចក្ដីជំនឿរបស់ពួកគេលើការស្ដារឡើងវិញនៃដំណឹងល្អនៃព្រះយេស៊ូវគ្រីស្ទ និងបេសកកម្មរបស់ព្យាការីយ៉ូសែប និងនៅក្នុងវិវរណៈដែលបានផ្ដល់ដល់សាសនាចក្រតាមរយៈលោក ដែលបញ្ជាក់ និងប្រកាសថា ព្រះយេស៊ូវគ្រីស្ទ គឺជាព្រះរាជបុត្រានៃព្រះ ហើយថាដំណឹងល្អមាននៅលើផែនដី នឹងអាចជួយដល់គ្រប់យ៉ាងដែលជីវិតឆ្លងកាត់ » ។