ប្រធាន ដាល្លិន អេក អូក នៃគណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានជំរុញយុវមជ្ឈិមវ័យទូទាំងពិភពលោកឲ្យរក្សាទស្សនវិស័យអស់កល្បជានិច្ច នៅពេលពួកគេឆ្លងកាត់ « ពេលដ៏តានតឹង » នាពេលបច្ចុប្បន្ននេះ ។
ទោះជាមជ្ឈិមវ័យពុះពារនឹងឧបសគ្គក៏ដោយ សាវកបានមានប្រសាសន៍ថា ពួកគេអាចមាន « សេចក្តីសង្ឃឹម » ដោយសារព្រះយេស៊ូវគ្រីស្ទ « បានឈ្នះលើលោកិយ » ហើយ « យើងក៏អាចធ្វើបានដែរ » ។
ប្រធាន អូក បានបន្ថែមថា « សូមចងចាំថា ផែនការរបស់ព្រះវរបិតាសួគ៌របស់យើង គឺជាផែនការនៃសុភមង្គល » ។
| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
ទីប្រឹក្សាទីមួយក្នុងគណៈប្រធានទីមួយត្រូវបានចូលរួមដោយភរិយារបស់លោក ស៊ីស្ទើរ គ្រីស្ទីន អំឡុងពេលការប្រជុំធម្មនិដ្ឋាន ដែលបានចាក់ផ្សាយជាសកលពីមជ្ឈមណ្ឌលមហោស្រពសន្និសីទទូទៅនៃវិសាលដ្ឋានព្រះវិហារបរិសុទ្ធ ក្នុងទីក្រុងសលត៍ លេក រដ្ឋយូថាហ៍ នៅថ្ងៃអាទិត្យ ទី ២១ ខែឧសភា ឆ្នាំ ២០២៣ ។
ប្រធាន អូក បានមានប្រសាសន៍ថា « មិនថាមានអ្វីក៏ដោយដែលជាការប្រែប្រួលរបស់យើងនៅក្នុងភាពចម្រុះផ្ទាល់នៃការបង្កបង្កើតរបស់ព្រះវរបិតាសួគ៌ ទ្រង់ស្រឡាញ់យើងទាំងអស់គ្នា ហើយផែនការនៃសុភមង្គលដ៏ល្អឥតខ្ចោះរបស់ទ្រង់មានកន្លែងសម្រាប់មនុស្សទាំងអស់ ។ យើងបង្ហាញសេចក្ដីស្រឡាញ់របស់យើងចំពោះទ្រង់ដោយការរក្សាបទបញ្ញត្តិរបស់ទ្រង់ រួមទាំងសេចក្ដីស្រឡាញ់ចំពោះបុត្រាបុត្រីរបស់ទ្រង់ផងដែរ » ។
ប្រធាន អូក បានបង្ហាញការព្រួយបារម្ភអំពីចំនួនមនុស្សជាច្រើនដែលមិនទាន់រៀបការ ឬកំពុងជ្រើសរើសមិនយកកូន ក៏បុរស និងស្ត្រីនៃពួកបរិសុទ្ធថ្ងៃចុងក្រោយសម្រេចចិត្តរៀបការនៅវ័យច្រើន ។ លោកបានលើកឡើងពីកត្តានៃការខ្វះខាតផ្ទះ និងការកើនឡើងនៃបំណុលសិស្សនៅក្នុងការសម្រេចចិត្តទាំងនេះ ។
ទោះជាយ៉ាងនេះក្ដី លោកបានលើកទឹកចិត្តយុវមជ្ឈិមវ័យឲ្យ « ឆ្ពោះទៅមុខដោយសេចក្តីជំនឿ » ដោយសារតែ « អាពាហ៍ពិពាហ៍គឺជាចំណុចសំខាន់នៃគោលបំណងនៃជីវិតរមែងស្លាប់ និងអ្វីដែលមានបន្ទាប់មកទៀត » ។ លោក និងស៊ីស្ទើរ អូក បានលើកទឹកចិត្តយុវមជ្ឈិមវ័យឲ្យណាត់ជួប និងមានកូន—ហើយចងចាំគំរូនៃពួកបរិសុទ្ធថ្ងៃចុងក្រោយ ។
លោកបានមានប្រសាសន៍ថា ៖ « ពួកអ្នកត្រួសត្រាយពីដំបូងរបស់យើងបានចាកចេញពីផ្ទះសម្បែង និងទ្រព្យសម្បត្តិរបស់ពួកគាត់ ដើម្បីនាំគ្រួសាររបស់ពួកគាត់ទៅកាន់ទីសុវត្ថិភាពខាងវិញ្ញាណនៅភ្នំនាទិសភាគខាងលិច ។ ថ្ងៃនេះ យើងសូមដាស់តឿនក្មួយៗកុំឲ្យចាកចេញពីទីសុវត្ថិភាពខាងវិញ្ញាណ និងគ្រួសារដើម្បីទទួលបានទ្រព្យសម្បត្តិនានាឡើយ » ។
ស៊ីស្ទើរ អូក បានបន្ថែមសម្រាប់ស្ត្រីនៅក្នុងការប្រជុំនេះថា « ប្រសិនបើក្មួយៗឃើញខ្លួនឯងគូសចំណាំពេលវេលា ហើយរង់ចាំឲ្យអាពាហ៍ពិពាហ៍មួយកើតឡើង នោះសូមឈប់រង់ចាំទៀតទៅ ហើយត្រូវចាប់ផ្ដើមរៀបចំខ្លួនវិញ ។ សូមរៀបចំខ្លួនក្មួយៗសម្រាប់ជីវិត—ដោយការអប់រំ បទពិសោធន៍ និងគម្រោងការ ។ កុំចាំឲ្យសុភមង្គលរត់មករកក្មួយៗឡើយ ។ សូមស្វែងរកឱកាសធ្វើការបម្រើ និងការរៀនសូត្រ ។ ហើយសំខាន់បំផុតនោះ គឺទុកចិត្តលើព្រះអម្ចាស់ » ។
បន្ទាប់មក ប្រធាន អូក បានថ្លែងសុន្ទរកថាមួយចំនួនរបស់លោកទៅកាន់សិស្សានុសិស្សថ្នាក់វិទ្យាល័យដែលកំពុងចូលរួម ។ លោកបានលើកឡើងពីការពុះពារទូទៅរបស់ជំនាន់ពួកគេជាមួយនឹងការថប់បារម្ភ គ្រឿងញៀន និងប្រព័ន្ធផ្សព្វផ្សាយសង្គម ។ លោកបានចែកចាយមួយផ្នែកនៃសំបុត្រមួយដែលលោកបានទទួលពីយុវនារីម្នាក់អំពីបញ្ហាភេទ ។
យុវនារីរូបនេះបានសរសេរថា « ខ្ញុំពិតជាមិនយល់ទេថា ហេតុអ្វីបានជាយុវវ័យជាច្រើននៅក្នុងព្រះវិហាររបស់យើងមិនឃើញមានបញ្ហាពីមនុស្សផ្លាស់ប្តូរភេទរបស់ពួកគេជារៀងរាល់ថ្ងៃ ណាត់ជួបមនុស្សភេទដូចគ្នា ឬកំណត់ថា គ្មានភេទនោះទេ ។ ខ្ញុំដឹងថា យើងគួរតែស្រឡាញ់មនុស្សគ្រប់គ្នា ហើយបង្ហាញការគោរពដល់ពួកគេ ហើយខ្ញុំតែងតែធ្វើដូច្នោះ ។ ខ្ញុំ [ គ្រាន់តែ ] មានអារម្មណ៍ថា មនុស្សកំពុងឆ្លងហួសបន្ទាត់ហើយ » ។
ប្រធាន អូក បានឆ្លើយតបដោយការបង្ហាញពីរបៀបដែលព្រះយេស៊ូវធ្វើឲ្យសេចក្តីស្រឡាញ់របស់ទ្រង់មានតុល្យភាព ខណៈដែលការបញ្ជាក់ពីសារៈសំខាន់នៃក្រឹត្យវិន័យនៅក្នុង យ៉ូហាន ៨ នៅក្នុងព្រះគម្ពីរសញ្ញាថ្មី ។ នៅពេលថ្នាក់ដឹកនាំសាសនានៅសម័យនោះនាំស្ត្រីម្នាក់មកឲ្យទ្រង់កាត់ទោសពីបទផិតក្បត់ នោះព្រះយេស៊ូវមានព្រះបន្ទូលឆ្លើយថា ៖ « អ្នកណាដែលគ្មានបាបសោះ ចូរឲ្យអ្នកនោះចោលនាងនឹងថ្មជាមុនគេចុះ » ។ ក្រោយមក ព្រះយេស៊ូវបានឆ្លើយតបដោយព្រះចេស្តានៃសេចក្ដីស្រឡាញ់ ដោយបដិសេធមិនដាក់ទោសនាង ហើយបានបញ្ជាក់ពីក្រឹត្យវិន័យដោយមានព្រះបន្ទូលថានាងមិនគួរ « ធ្វើបាបទៀតឡើយ » ។
ប្រធាន អូក បានជំរុញអ្នកចូលរួមរបស់លោកឲ្យរស់នៅតាមបទបញ្ញត្តិ និងក្រឹត្យវិន័យនៃសេចក្ដីស្រឡាញ់ « តាមរបៀបដែលកាន់តែពេញលេញជាងនេះ ។ អ្នកណាក៏ដោយដែលមិនប្រព្រឹត្តចំពោះបុគ្គលដែលប្រឈមមុខនឹងឧសបគ្គពីអត្តសញ្ញាណភេទដោយសេចក្តីស្រឡាញ់ និងសេចក្តីថ្លៃថ្នូរ គឺមិនបានធ្វើតាមការបង្រៀននៃបទបញ្ញត្តិធំទីមួយ និងបទបញ្ញត្តិទីពីរឡើយ ។ ដូច្នេះ លើប្រធានបទនៃក្រឹត្យវិន័យរបស់ព្រះ យើងត្រូវចាំថា ព្រះបានបើកសម្តែងម្តងហើយម្តងទៀតថា ទ្រង់បានបង្កើតមនុស្សប្រុស និងស្រី ។ ហើយនៅលើប្រធានបទនៃកាតព្វកិច្ចរបស់យើងក្នុងការស្រឡាញ់អ្នកជិតខាងយើង យើងត្រូវចាំថា ព្រះបានបញ្ជាយើងឲ្យស្រឡាញ់សូម្បីតែអ្នកដែលមិនបានកាន់តាមបទបញ្ញត្តិទាំងអស់ក៏ដោយ ។
លោកបានបន្តថា « បើក្មួយ សមាជិកគ្រួសារម្នាក់ ឬមិត្តម្នាក់ កំពុងពុះពារនឹងបញ្ហានៃការភាន់ច្រឡំអត្តសញ្ញាណទាំងនេះ ខ្ញុំសូមជំរុញក្មួយៗឲ្យអនុវត្តតាមច្បាប់នៃដំណឹងល្អផង និងសេចក្ដីស្រឡាញ់ និងសេចក្ដីមេត្តាករុណារបស់ព្រះអង្គសង្គ្រោះ និងព្រះប្រោសលោះផង ដែលវានឹងជួយ ហើយណែនាំក្មួយៗ ប្រសិនបើក្មួយៗដើរនៅលើផ្លូវរបស់ទ្រង់ដោយអំណត់ » ។
ចំពោះអ្នកទាំងឡាយណាដែលឆ្លងកាត់នឹងការប្រតិព័ទ្ធភេទដូចគ្នា ប្រធាន អូក បានបង្រៀនថា ព្រះស្រឡាញ់រាល់ការបង្កបង្កើតរបស់ទ្រង់ ហើយមានកន្លែងសម្រាប់មនុស្សគ្រប់គ្នានៅក្នុងផែនការនៃសុភមង្គលដ៏ទេវភាព ។
ប្រធាន អូក ក៏បានដកស្រង់ចេញពីការបង្រៀនរបស់ ប្រធាន រ័សុល អិម ណិលសុន ដើម្បីប្រយ័ត្នពីរបៀបដែលយើងដាក់ស្លាកខ្លួនយើង ។
« មានអាទិភាពខ្លាំងជាង ងារដ៏និរន្តរ៍ទាំងបីនេះឡើយ រួមមាន ៖ ប្រធាន ណិលសុន បានមានប្រសាសន៍ថា ‹ បុត្រនៃព្រះ › ‹ បុត្រនៃសេចក្ដីសញ្ញា › និង ‹ សិស្សនៃព្រះយេស៊ូវគ្រីស្ទ › ។ « អត្តសញ្ញាណណាមួយដែលមិនសមស្របជាមួយនឹងងារជាគោលទាំងបីនេះ នឹងធ្វើឲ្យក្មួយអស់សង្ឃឹមនៅទីបំផុត ។ ងារផ្សេងទៀតនឹងធ្វើឲ្យក្មួយខកចិត្តនៅពេលណាមួយ ដោយសារវាគ្មានអំណាចដឹកនាំក្មួយទៅរកជីវិតដ៏នៅអស់កល្បជានិច្ចនៅក្នុងនគរសេឡេស្ទាលរបស់ព្រះបានឡើយ» ។
ប្រធាន អូក បានមានប្រសាសន៍ថា អ្វីដែលមានអំណាចដើម្បីដឹកនាំយើងទៅកាន់ជីវិតដ៏នៅអស់កល្បជានិច្ចគឺសេចក្ដីសញ្ញា ។
លោកបានមានប្រសាសន៍ជាថ្មីម្តងទៀត ដោយដកស្រង់សម្រង់របស់ប្រធាន ណិលសុនថា « កាលបងប្អូន និងខ្ញុំបានចុះសេចក្ដីសញ្ញាជាមួយព្រះ នោះទំនាក់ទំនងរបស់យើងជាមួយទ្រង់ ប្រែកាន់តែជិតស្និទ្ធជាងពីមុនសេចក្ដីសញ្ញារបស់យើងទៅទៀត ។ ។ ឥឡូវយើងបានចងភ្ជាប់ជាមួយគ្នា ។ ដោយសារតែសេចក្តីសញ្ញារបស់យើងជាមួយព្រះ នោះទ្រង់ពុំដែលនឿយហត់ក្នុងការជួយយើងឡើយ ហើយយើងនឹងទទួលបានការអត់ធ្មត់ដ៏មេត្តារបស់ទ្រង់ជាមួយយើងជានិច្ច ។ យើងម្នាក់ៗមានកន្លែងពិសេសនៅក្នុងព្រះទ័យរបស់ព្រះ » ។
សរុបសេចក្តី ប្រធាន និងស៊ីស្ទើរ អូក បានលើកទឹកចិត្តយុវមជ្ឈិមវ័យឲ្យរកមើល និងពឹងផ្អែកលើព្រះដើម្បីទទួលបានការណែនាំ ។
ស៊ីស្ទើរ អូក បានមានប្រសាសន៍ថា « មើលទៅព្រះ ហើយរស់នៅចូរមើលទៅព្រះ ហើយរស់នៅ ។ សូមរកមើលពាក្យដែលបាននិយាយនៅយប់នេះ ប្រសាសន៍របស់ព្យាការីរបស់យើង ព្រះគម្ពីរ ផែនការនៃសេចក្តីសង្គ្រោះ និងពររបស់លោកអយ្យកោរបស់ក្មួយៗ ។ សូមអធិស្ឋាន ហើយព្រះអម្ចាស់នឹងគង់នៅជាមួយក្មួយៗ ។ នោះមិនមានន័យថា ពួកយើងនឹងរស់នៅដោយមិនមានការឈឺចាប់នោះទេ ប៉ុន្តែវាមានន័យថា យើងនឹងមិនឯកោ ហើយយើងនឹងឆ្ពោះទៅមុខដោយមានការដឹកនាំ និងការការពារពីអំពើអាក្រក់នៅជុំវិញយើង » ។
ប្រធាន អូក បានមានប្រសាសន៍ថា « យើងគួរតែឧស្សាហ៍ ហើយខិតខំស្គាល់ព្រះយេស៊ូវគ្រីស្ទ ទទួលអារម្មណ៍នៃសេចក្តីស្រឡាញ់របស់ទ្រង់ ហើយមានសេចក្តីជំនឿលើទ្រង់ និងការណែនាំដ៏ពេញដោយក្តីស្រឡាញ់របស់ទ្រង់តាមផ្លូវនៃសេចក្តីសញ្ញាទៅកាន់ជោគវាសនាដ៏អស់កល្បជានិច្ចរបស់យើង » ។