ពិធីសម្ពោធបើកការដ្ឋានសាងសង់ឡើងវិញនៅសាលាបឋមសិក្សាសារាយអណ្តែត

សិស្សានុសិស្ស ឪពុកម្តាយ អ្នកដឹកនាំសហគមន៍ និងសង្គមស៊ីវិលក្នុងមូលដ្ឋាន ព្រមទាំងបុគ្គលិកសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានប្រារព្ធពិធីសម្ពោធអគារដែលបានសាងសង់ និងជួសជុលកែលម្អឡើងវិញនៅសាលាបឋមសិក្សាសារាយអណ្តែត នៅស្រុកថ្មគោល ខេត្តបាត់ដំបង នៃប្រទេសកម្ពុជា នាថ្ងៃទី២៦ ខែកក្កដា ឆ្នាំ២០២៤ ។ ការប្រារព្ធពិធីនេះគឺជាចំណុចសំខាន់នៃកិច្ចខិតខំប្រឹងប្រែង និងកិច្ចសហប្រតិបត្តិការរួមគ្នារវាងសហគមន៍មូលដ្ឋាន ថ្នាក់ដឹកនាំរបស់ពួកគេ និងសមាគម ។

អ្នកចូលរួមក្នុងពិធីនេះរួមមាន លោក សឿ ណាតប្បត្តិ អភិបាលខេត្ត លោក សេង សុខា ប្រធានការិយាល័យអប់រំយុវជន និងកីឡាស្រុក លោក អេង សារ៉ា មេឃុំ និងលោក ណឹម ណុន នាយកសាលាបឋមសិក្សាសារាយអណ្តែត ។ គ្រូបង្រៀនដទៃទៀតដែលមានវត្តមានគឺ អ្នកគ្រូ គង់ សូរិយា អ្នកគ្រូ ឈឿម និមល លោក ជា ប៉ូ និងលោក ផុន សុភឿន ។ សមាជិកសមាគមដែលចូលរួមរួមមាន អែលឌើរ ប៊ែរី និងស៊ីស្ទើរ ខារិន អូតស៍ ព្រមទាំងអែលឌើរ ឃឹមបឹល និងស៊ីស្ទើរ ស៊ូសាន ហារីស ដែលជាអ្នកស្ម័គ្រចិត្តផ្នែកមនុស្សធម៌ និងអ្នកស្ម័គ្រចិត្តផ្នែកទំនាក់ទំនង ។ អ្នកម៉ៅការគម្រោង យន់ មុនីស័ក្ដ និងភរិយា អ៊ុំ ដូឡែន ក៏បានចូលរួមផងដែរ ។

1 / 2

Download Photos

លោកនាយកសាលា ណឹម ថ្លែងសុន្ទរកថា និងចំណាប់អារម្មណ៍ក្នុងពិធីបើកកម្មវិធី « សាលានេះគឺជាសាលាដ៏ស្រស់ស្អាត មានគុណភាពខ្ពស់ សម្រាប់សិស្សានុសិស្សបានសិក្សា និងរៀនសូត្រ ដើម្បីជួយអភិវឌ្ឍសហគមន៍ និងសង្គមកម្ពុជានាពេលអនាគត » ។ គាត់បានចែកចាយថា សិស្សានុសិស្សចំនួន ២១៨ នាក់ ស្រី ៩០ នាក់ និងប្រុស ១២៨ នាក់ បានចុះឈ្មោះចូលរៀនក្នុងសាលាដែលមានចំនួន ៧ ថ្នាក់ ។

លោក សេង ប្រធានការិយាល័យអប់រំ បានមានប្រសាសន៍ថា « សមាគមបានជួយផ្តល់អគារ និងបន្ទប់រៀនដ៏ស្រស់ស្អាតមួយ ដើម្បីជួយសិស្សានុសិស្សបានសិក្សា និងរៀនសូត្រ » ។ គាត់បានលើកទឹកចិត្តសិស្សឲ្យមើលថែសាលារៀននេះ ។

ស៊ីស្ទើរ ខារិន អូតស៍ មកពីសមាគមបានចែកចាយថា « យើងជឿថា យើងទាំងអស់គ្នាជាបងប្អូនប្រុសស្រីនឹងគ្នា ជាបុត្រាបុត្រីរបស់ព្រះវរបិតាសួគ៌យើង ។ សមាជិកជាច្រើននៃសមាគមជុំវិញពិភពលោកបានបរិច្ចាគប្រាក់ដើម្បីផ្តល់អគារសិក្សាទាំងនេះ » ។

1 / 2

Download Photos

មុនពេលគម្រោងចាប់ផ្តើម មានការព្រួយបារម្ភអំពីគ្រូបង្រៀន និងកុមារដែលរៀននៅក្នុងថ្នាក់រៀនដែលត្រូវការការជួសជុល ។ អគារឈើចាស់ត្រូវបានរុះរើ ហើយជំនួសដោយអគារថ្ម និងដំបូលក្បឿងថ្មី ដែលមានបន្ទប់សិក្សាចំនួនប្រាំ ។ បង្គន់ថ្មីចំនួនបួន និងកន្លែងលាងដៃថ្មីមួយក៏ត្រូវបានសាងសង់ផងដែរ ។ បង្គន់ និងកន្លែងលាងដៃចាស់ត្រូវបានជួសជុលឡើងវិញ ហើយឡដុតសំរាមថ្មីត្រូវបានសាងសង់ឡើង ។ សហគមន៍បានផ្តល់មូលនិធិក្នុងការទិញដីចាក់រាប់តោនដើម្បីដោះស្រាយបញ្ហាទឹកលិច ។ សហគមន៍ក៏បានជួសជុលតុ និងជួយទិញឧបករណ៍ និងសម្ភារសិក្សាផ្សេងៗដែលត្រូវការ ។

ក្នុងពិធីនោះ សិស្សានុសិស្សបានតម្រង់ជួរដើម្បីស្វាគមន៍ប្រជាពលរដ្ឋ សហគមន៍ និងថ្នាក់ដឹកនាំសមាគម ជាមួយនឹងការច្រៀងបទចម្រៀងនិងការទះដៃតាមចង្វាក់ច្រៀង វាគឺជាការប្រារព្ធពិធីដ៏អស្ចារ្យសម្រាប់អ្នកទាំងអស់គ្នាដែលបានចូលរួម ។

អភិបាលខេត្ត លោក សឿ បានថ្លែងអំណរគុណចំពោះសមាគម និងសហគមន៍ដែលបានសហការគ្នា និងធ្វើឲ្យគម្រោងនេះប្រព្រឹត្តទៅបាន ។ គាត់បានមានប្រសាសន៍ថា « ខ្ញុំសូមលើកទឹកចិត្តឪពុកម្តាយឲ្យបញ្ជូនកូនរបស់ពួកគេមករៀន » ។

1 / 2

Download Photos

ពិធី​សម្ពោធ​បើក​ការដ្ឋាន​សាងសង់​ឡើងវិញ​នៅ​សាលា​បឋមសិក្សា​សារាយ​អណ្តែត

ពិធីសម្ពោធបើកការដ្ឋានសាងសង់ឡើងវិញនៅសាលាបឋមសិក្សាសារាយអណ្តែត