ពួកចិតសិបនាក់ពីររូបទៀតត្រូវបានហៅសម្រាប់តំបន់អាស៊ី
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានទទួលកម្លាំងបន្ថែមទៀតដែលមានថ្នាក់ដឹកនាំក្នុងតំបន់របស់ខ្លួននៅប្រទេសអាស៊ី ដោយមានការតែងតាំងពួកចិតសិបនាក់ប្រចាំតំបន់ចំនួនពីររូប ។
អែលឌើរ អេង ប៊ុន ហួច គឺជាពួកចិតសិបនាក់ប្រចាំតំបន់ដំបូងគេដែលបានហៅពីប្រទេសកម្ពុជា ខណៈដែលការហៅរបស់អែលឌើរ នីធីយ៉ា សាន់ឌឺរ៉ាច បង្កើនចំនួនពួកចិតសិបនាក់ប្រចាំតំបន់នៅប្រទេសឥណ្ឌាចំនួនពីរនាក់ ។
ពួកលោកទាំងពីរនឹងបម្រើនៅប្រទេសកំណើតរៀងៗខ្លួន ដើម្បីបំពេញតម្រូវការដែលកំពុងរីកចម្រើននៃសាសនាចក្រ និងសមាជិកនៅទីនោះ ។
ពួកចិតសិបនាក់គឺជាអ្នកធ្វើការងារបម្រើធ្វើដំណើរដែលត្រូវបានហៅឲ្យប្រកាសដំណឹងល្អ ហើយបម្រើជា « សាក្សីពិសេស » របស់ព្រះគ្រីស្ទទៅកាន់ពិភពលោក ។
ពួកលោកជួប និងបង្រៀនថ្នាក់ដឹកនាំសាសនាចក្រ ពួកអ្នកផ្សព្វផ្សាយសាសនា និងសមាជិកនៃសាសនាចក្រនៅក្នុងក្រុមជំនុំប្រចាំមូលដ្ឋាន ។
សិទ្ធិអំណាចរបស់ពួកលោកជាទូទៅមានដែនកំណត់ត្រឹមតំបន់ដែលពួកលោកបម្រើ ហើយពួកលោកស្ម័គ្រចិត្តលះបង់ពេលវេលា និងការខិតខំប្រឹងប្រែងរបស់ពួកគេដើម្បីបម្រើសាសនាចក្រ បន្ថែមពីលើការប្រកបរបរការងារប្រចាំថ្ងៃរបស់ពួកលោកផ្ទាល់ ។
31bfe071d77411ed8289eeeeac1e7b23bd3c724d.jpeg
រូបថតពាក់កណ្តាលខ្លួនរបស់អែលឌើរ អេង ប៊ុនហួចក្នុងឆ្នាំ ២០២៣ ។© 2023 by Intellectual Reserve, Inc. All rights reserved.អែលឌើរ អេង បើកអាជីវកម្មអចលនទ្រព្យផ្ទាល់ខ្លួននៅទីក្រុងភ្នំពេញ ប្រទេសកម្ពុជា ដែលលោករស់នៅជាមួយភរិយារបស់លោក ប៉ែន ដានី និងកូនប្រុសប្រាំនាក់អាយុពី ៤ ឆ្នាំដល់ ១៦ ឆ្នាំ ។
បន្ទាប់ពីបម្រើបេសកកម្មផ្ទាល់ខ្លួនរៀងៗខ្លួន ពួកលោកបានរៀបការក្នុងឆ្នាំ ២០០៥ ហើយបានផ្សាភ្ជាប់នៅក្នុងព្រះវិហារបរិសុទ្ធចិនហុងកុង ។
មុនការហៅនេះ លោកកំពុងបម្រើជាប្រធានស្តេកភ្នំពេញខាងជើង ។
លោកបានចែកចាយថា មនុស្សគ្រប់គ្នាក្នុងគ្រួសាររបស់លោកមានការភ្ញាក់ផ្អើលនៅពេលបានដឹងអំពីការហៅរបស់លោក និងរំភើបចំពោះឱកាសដែលលោកត្រូវបានផ្តល់ឲ្យ ។
លោកបានមានប្រសាសន៍ថា៖ «នៅពេលដែលយើងស្រឡាញ់ក្នុងការបម្រើមនុស្សដទៃ ព្រះអម្ចាស់នឹងតែងតែប្រទានឱ្យយើងនូវសមត្ថភាព និងឱកាសដើម្បីធ្វើដូច្នេះជានិច្ច » ។
« នៅពេលព្រះអម្ចាស់បានដាក់ព្រះទ័យទុកចិត្តរបស់ទ្រង់មកលើខ្ញុំ នោះខ្ញុំនឹងថ្លែងជាសាក្សីអំពីទ្រង់ និងរបៀបដែលដំណឹងល្អរបស់ទ្រង់អាចប្រទានពរដល់ជីវិតមនុស្ស និងជំនាន់ជាច្រើនរបស់ពួកគេ » ។
cd8a3e72d77811ed84aeeeeeac1e568be0b743e2.jpeg
រូបគំនូររបស់អែលឌើរ នីធីយ៉ា សាន់ឌឺរ៉ាច ថតនៅឆ្នាំ ២០២៣ ។© 2023 by Intellectual Reserve, Inc. All rights reserved.នៅទីក្រុង បែងហ្គាលូរូ ប្រទេសឥណ្ឌា គ្រួសាររបស់អែលឌើរ សាន់ដឺរ៉ាច ក៏មានការភ្ញាក់ផ្អើល និងរំភើបផងដែរពេលដែលបានដឹងអំពីការហៅបម្រើរបស់លោក ។
កូនស្រីបីនាក់របស់លោកដែលមានអាយុពី ៥ ទៅ ១៥ ឆ្នាំបានមើលសន្និសីទទូទៅដែលផ្សាយផ្ទាល់ ហើយបន្តនៅមើលរហូតដល់ម៉ោង ២ ទៀបភ្លឺនៅប្រទេសឥណ្ឌា ដើម្បីគាំទ្រដល់លោក ។
លោកបាននិយាយ ដោយឆ្លុះបញ្ចាំងពីដំណើរក្នុងដំណឹងល្អរបស់លោកតាំងពីឆ្នាំ ២០០០ ថា៖ «ពួកគេគឺជាកម្លាំង និងការគាំទ្រដ៏អស្ចារ្យសម្រាប់ខ្ញុំ » ។
ភរិយារបស់លោក គ្រីស្ទីណា និងលោកបានរៀបការ និងផ្សាភ្ជាប់ក្នុងព្រះវិហារបរិសុទ្ធសលត៍ លេក ក្នុងឆ្នាំ ២០០៦ ។
អែលឌើរ សាន់ឌឺរ៉ាច ធ្លាប់បម្រើជាប្រធានសាខា ប្រធានមណ្ឌល និងថ្មីៗនេះ ជាប្រធាននៃ ស្តេកបេងហ្គាលូរូ ឥណ្ឌា ខណៈពេលដែលលោកក៏ជាម្ចាស់ និងជានាយកគ្រប់គ្រងក្រុមហ៊ុនបច្ចេកវិទ្យាព័ត៌មានចំនួនពីរទៀតផង ។
« ឥឡូវនេះ ខ្ញុំឃើញយ៉ាងច្បាស់ថា ជំនាន់របស់ខ្ញុំត្រូវបានប្រទានពរតាមរយៈដំណឹងល្អនៃព្រះយេស៊ូវគ្រីស្ទ ។
ខ្ញុំជាសាក្សីដ៏មានជីវិត ដើម្បីថ្លែងទីបន្ទាល់អំពីរបៀបដែលជីវិតរបស់ខ្ញុំបានផ្លាស់ប្តូរតាំងពីខ្ញុំបានព្យាយាមរស់នៅតាមដំណឹងល្អនៃព្រះយេស៊ូវគ្រីស្ទ » ។