ព្រះវិហារបរិសុទ្ធភ្នំពេញកម្ពុជា បានបើកទ្វាររបស់ខ្លួនដើម្បីអបអរពិធីបើកសម្ពោធព្រះវិហារបរិសុទ្ធ នាថ្ងៃពុធ ទី១២ ខែសីហា ឆ្នាំ២០២៦ ។ មន្ត្រីជាន់ខ្ពស់កម្ពុជា មេដឹកនាំអន្តរជំនឿសាសនា និងឥស្សរជនដទៃទៀតបានចូលរួមជាមួយអែលឌើរ ហ្គើរីត ដបុលយូ ហ្គង ក្នុងកូរ៉ុមនៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដើម្បីធ្វើទស្សនកិច្ចព្រះវិហារបរិសុទ្ធដែលទើបសាងសង់រួចជាស្ថាពរ ។ ភ្ញៀវដែលត្រូវបានអញ្ជើញនឹងធ្វើដំណើរទស្សនកិច្ចនៅថ្ងៃទី១៣ និងទី១៤ ខែសីហា ព្រមជាមួយនឹងការបើកឲ្យទស្សនាជាសាធារណៈចាប់ពីថ្ងៃទី១៥-២២ ខែសីហា លើកលែងតែថ្ងៃអាទិត្យ ។

ថ្ងៃសម្រាប់ប្រព័ន្ធផ្សព្វផ្សាយ ៖

អែលឌើរ ហ្គើរីត ដបុលយូ ហ្គុង ក្នុងកូរ៉ុមនៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានមានប្រសាសន៍ទៅកាន់អ្នកចូលរួមជាងប្រមាណ៦០០នាក់ រួមមាន អ្នកសារព័ត៌មាន ថ្នាក់ដឹកនាំរដ្ឋាភិបាលកម្ពុជា សមាជិកពួកបរិសុទ្ធថ្ងៃចុងក្រោយ និងមិត្តភក្តិនៃជំនឿផ្សេងៗ ដែលបានជួបជុំគ្នានៅក្នុងបរិវេណនៃព្រះវិហារបរិសុទ្ធ ។ លោកថ្លែងថា « កម្ពុជាគឺជាប្រទេសមួយដែលគោរព និងឲ្យតម្លៃដល់ប្រាសាទនានា ។ មានប្រាសាទជាច្រើននៅទូទាំងប្រទេសកម្ពុជា ។ ប្រាសាទទាំងនោះក៏ពិសេសចំពោះយើងផងដែរ ។ យើងសូមសម្តែងការដឹងគុណចំពោះការអនុញ្ញាត និងការគាំទ្រដែលយើងបានទទួល ដើម្បីសាងសង់ព្រះវិហារបរិសុទ្ធនេះនៅក្នុងរាជធានីភ្នំពេញ » ។

1 / 2

Download Photos

អញ្ជើញចូលរួមក្នុងពិធីនេះ រួមមានអែលឌើរ ហ្គង និងឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា តំណាងដ៏ខ្ពង់ខ្ពស់សម្តេចនាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់កិត្តិយសចូលរួមក្នុងព្រឹត្តិការណ៍នេះ ។

អែលឌើរ ហ្គង បានមានប្រសាសន៍ថា « ពួកយើងមានកិត្តិយសយ៉ាងជ្រាលជ្រៅដែល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកព្រឹត្តិការណ៍នេះជាព្រឹត្តិការណ៍ផ្លូវការមួយរបស់សម្តេចនាយករដ្ឋមន្ត្រី » ។

នៅក្នុងសុន្ទរកថារបស់លោក ឯកឧត្តមបណ្ឌិត ចាយ បូរិន បានមានប្រសាសន៍ថា លោកមាន « កិត្តិយស និងសេចក្តីសោមនស្សយ៉ាងខ្លាំង » ក្នុងនាមជាតំណាងដ៏ខ្ពង់ខ្ពស់សម្តេចនាយករដ្ឋមន្ត្រី និងរាជរដ្ឋាភិបាលកម្ពុជា ចូលរួមនៅក្នុងព្រឹត្តិការណ៍នេះ ។ ឯកឧត្តមរដ្ឋមន្ត្រី បូរិន បានមានប្រសាសន៍សំដៅទៅកាន់អែលឌើរ ហ្គង និងថ្នាក់ដឹកនាំទាំងអស់ដែលបានចូលរួមក្នុងព្រឹត្តិការណ៍នេះថា « វត្តមានរបស់លោកអ្នក បានធ្វើឲ្យការទស្សនាព្រះវិហារបរិសុទ្ធភ្នំពេញដ៏អស្ចារ្យនៅថ្ងៃនេះ កាន់តែមានអត្ថន័យ និងមានសារៈសំខាន់ជាប្រវត្តិសាស្ត្រសម្រាប់សហគមន៍ពួកបរិសុទ្ធថ្ងៃចុងក្រោយនៅកម្ពុជា » ។

អែលឌើរ ហ្គង បានថ្លែងនៅក្នុងពិធីថា « យើងខ្ញុំសូមអរគុណយ៉ាងជ្រាលជ្រៅចំពោះការអនុញ្ញាតឲ្យយើងខ្ញុំបានចែករំលែកអំពីព្រះវិហារបរិសុទ្ធរបស់យើងជាមួយលោកអ្នកនៅថ្ងៃនេះ ។ សម្រាប់យើងខ្ញុំ ព្រះវិហារបរិសុទ្ធនេះគឺជាទីកន្លែងដ៏បរិសុទ្ធនិងពិសិដ្ឋ ដែលស្ថានសួគ៌និងផែនដីមករួមគ្នាប្រកបដោយភាពស្ងប់ស្ងាត់ និងសុខដុមរមនា ។ នៅក្នុងព្រះវិហារបរិសុទ្ធ យើងថ្វាយបង្គំព្រះ ហើយទទួលបានពរជ័យរបស់ទ្រង់ » ។

ឯកឧត្តមរដ្ឋមន្ត្រី បូរិន បានបន្ថែមថា « ខ្ញុំជឿជាក់យ៉ាងមុតមាំថា ទីកន្លែងបរិសុទ្ធថ្មីនេះ នឹងក្លាយជាទីកន្លែងដែលសេចក្តីស្រឡាញ់ និងភាពសុខសាន្តត្រូវបានលូតលាស់ឡើង ជាទីកន្លែងដែលមនុស្សអាចទុកចោលនូវអំពើខុសឆ្គង និងអំពើបាបនៅពីក្រោយ ហើយជាទីកន្លែងដែលរួមចំណែកក្នុងការបណ្តុះសីលធម៌ គុណធម៌ និងការប្រព្រឹត្តល្អ ក្នុងចំណោមអ្នកទាំងអស់ដែលមកទីនេះដើម្បីថ្វាយបង្គំ » ។

លោក អ៊ិត វិជិត សមាជិកដំបូងគេនៃសាសនាចក្រនៅប្រទេសកម្ពុជា ដែលបានដើរតួនាទីយ៉ាងសំខាន់ក្នុងការជួយសម្រេចឲ្យសាសនាចក្រទទួលបានការទទួលស្គាល់ជាផ្លូវការពីរដ្ឋាភិបាលកម្ពុជា ក្នុងឆ្នាំ១៩៩៤ ក៏បានថ្លែងសុន្ទរកថានៅក្នុងព្រឹត្តិការណ៍នេះផងដែរ អំពីរបៀបដែលការទទួលស្គាល់នេះបានអនុញ្ញាតឲ្យសាសនាចក្ររីកចម្រើននៅក្នុងប្រទេសកម្ពុជា ដោយមានព្រះវិហារបរិសុទ្ធដំបូងរបស់សាសនាចក្រនៅក្នុងប្រទេសនេះ ។

លោក អ៊ិត បានមានប្រសាសន៍ថា «ព្រះវិហារបរិសុទ្ធនេះ មិនត្រឹមតែឈរជានិមិត្តរូបនៃសេចក្តីជំនឿរបស់យើងប៉ុណ្ណោះទេ ប៉ុន្តែថែមទាំងជាសំណង់ដ៏លេចធ្លោរំឭកដល់មិត្តភាពដ៏យូរអង្វែង និងការគោរពគ្នាទៅវិញទៅមករវាងសាសនាចក្ររបស់យើង និងព្រះរាជាណាចក្រកម្ពុជា » ។

នៅចុងបញ្ចប់នៃកម្មវិធី អែលឌើរ ហ្គង បានប្រគល់ជូនរូបគំនូរជូនដល់ឯកឧត្តមរដ្ឋមន្ត្រី បូរិន ដែលបង្ហាញអំពីរូបលោកឈរនៅពីមុខព្រះវិហារបរិសុទ្ធ ។

អែលឌើរ ហ្គង ដែលជាសាវក ក៏បានជួបនិងធ្វើដំណើរទស្សនកិច្ចនៅក្នុងព្រះវិហារបរិសុទ្ធជូនដល់ ឯកឧត្តមឧបនាយករដ្ឋមន្ត្រី ស៊ុន ចាន់ថុល ដោយមានអមដំណើរដោយ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងឯកឧត្តមរដ្ឋលេខាធិការ និងជាអនុប្រធានខុទ្ទកាល័យ លោកសាស្ត្រាចារ្យ កុយ វ៉ាន់នី ។

អែលឌើរ ហ្គង បានផ្តល់នូវការគោរពចំពោះប្រពៃណីខ្មែរ ដោយពាក់ក្រវាត់កពណ៌ស៊ីលៀប ដែលជាពណ៌តំណាងសម្រាប់ថ្ងៃពុធ ។

អែលឌើរ ខេលី ចនសុន ប្រធានតំបន់អាស៊ីនៃសាសនាចក្រ បានមានប្រសាសន៍ថា « ថ្ងៃនេះពិតជាថ្ងៃដ៏ពិសេសអស្ចារ្យមួយ ។ ដោយមានវត្តមានឥស្សរជនជាន់ខ្ពស់ជាច្រើនរូបពីរាជរដ្ឋាភិបាល និងឥស្សរជនជំនឿសាសនាផ្សេងៗជាច្រើនរូប ដែលបានចូលរួមក្នុងព្រឹត្តិការណ៍បើកសម្ពោធនេះ ។ នេះគឺជាការបង្ហាញនូវការគោរពយ៉ាងខ្លាំងពីសំណាក់រាជរដ្ឋាភិបាលចំពោះសាសនាចក្រ » ។

អែលឌើរ ហ្គង មានអារម្មណ៍រំភើបចិត្តយ៉ាងខ្លាំងចំពោះពាក្យស្វាគមន៍ដែលបានសរសេរនៅលើបដាដែលចងនៅឯកន្លែងរៀបចំព្រឹត្តិការណ៍សម្រាប់សារព័ត៌មាន ។

អែលឌើរ ហ្គង បានមានប្រសាសន៍ថា « បដាដែលនៅខាងក្រៅបានសរសេរថា ‹ សាមគ្គីភាពក្នុងសាសនា នាំមកនូវសុខសន្តិភាព និងការអភិវឌ្ឍ ។ សូមអបអរសាទរចំពោះព្រះវិហារបរិសុទ្ធភ្នំពេញកម្ពុជា របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ › ។ តើមានអ្វីអាចផ្តល់នូវភាពកក់ក្តៅ និងការស្វាគមន៍ជាងនេះទៀត ? »

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាក្រុមជំនឿគ្រិស្តសាសនានៅទូទាំងពិភពលោក ដែលមានសមាជិកជិត១៨លាននាក់ ដែលផ្តោតលើជំនឿថា មនុស្សទាំងអស់គឺជាបុត្រាបុត្រីរបស់ព្រះជាទីស្រឡាញ់ ហើយថាព្រះយេស៊ូវគ្រីស្ទគឺជាព្រះអង្គសង្គ្រោះរបស់មនុស្សជាតិ ។ បេសកកម្មរបស់សាសនាចក្រគឺ ដើម្បីនាំមនុស្សមករកព្រះគ្រីស្ទ តាមរយៈការរៀនដំណឹងល្អរបស់ទ្រង់ ការធ្វើការសន្យាពិសេសៗ និងការអនុវត្តសេចក្តីស្រឡាញ់ និងការបម្រើ ។

ពួកបរិសុទ្ធត្រួសត្រាយផ្លូវ និងអព្ភូតហេតុនៃព្រះវិហារបរិសុទ្ធ

ប្រធាន នាង គួនណូវាសនា ជាថ្នាក់ដឹកនាំសាសនាចក្រម្នាក់ក្នុងមូលដ្ឋាន ដែលជាសមាជិកនៅក្នុងប្រទេសកម្ពុជាអស់រយៈពេលជិតបីទសវត្សរ៍ និងជាជនជាតិខ្មែរដំបូងគេដែលបានបម្រើជាប្រធានបេសកកម្មភ្នំពេញកម្ពុជា បានមានប្រសាសន៍ថា « ព្រះវិហារបរិសុទ្ធគឺជាផ្លូវដែលភ្ជាប់ទំនាក់ទំនងរបស់យើងជាមួយបុព្វការីជនរបស់យើង ។ នេះជាពេលវេលាដែលប្រជាជនកម្ពុជាអាចបង្ហាញពីរបៀបដែលយើងស្រឡាញ់ដល់បុព្វការីជនរបស់យើង » ។

1 / 2

Download Photos

លោកបានមានប្រសាសន៍បន្តថា ការភ្ជាប់ទំនាក់ទំនងជាមួយបុព្វការីជនគឺមានសារៈសំខាន់ជាពិសេសនៅក្នុងទឹកដីមួយដែលមានមនុស្សរហូតដល់២.៥លាននាក់ ត្រូវបានសម្លាប់ដោយរបបប្រល័យពូជសាសន៍ខ្មែរក្រហមនៅចន្លោះឆ្នាំ១៩៧៥ និងឆ្នាំ១៩៧៩ ។

ប្រធាន នាង បានបន្តទៀតថា « ប្រទេសកម្ពុជាបានឆ្លងកាត់ពេលវេលាដ៏ខ្មៅងងឹតមួយ ។ វិញ្ញាណទាំងនោះកំពុងរង់ចាំយើងនៅក្នុងពិភពវិញ្ញាណដើម្បីធ្វើអ្វីមួយសម្រាប់ពួកគាត់ » ។

លោក អ៊ិត វិជិត ជាសមាជិកជនជាតិខ្មែរដំបូងគេដែលបានទទួលបុណ្យជ្រមុជទឹក ។ ចំពោះលោក ព្រះវិហារបរិសុទ្ធនេះនៅក្នុងរដ្ឋធានីនៃប្រទេស តំណាងឲ្យព្រឹត្តិការណ៍ដ៏សំខាន់មួយក្នុងប្រវត្តិសាស្ត្ររបស់ប្រទេស ដែលសាសនាចក្របានរីកចម្រើនជាបន្តបន្ទាប់ ចាប់តាំងពីទទួលបានការទទួលស្គាល់ជាផ្លូវការពីរាជរដ្ឋាភិបាលក្នុងឆ្នាំ១៩៩៤—ជាសមិទ្ធផលមួយដែលលោក អ៊ិត បានដើរតួនាទីយ៉ាងសំខាន់ក្នុងការជួយឲ្យសម្រេចបាន ។

លោក អ៊ិត បានមានប្រសាសន៍ថា « [ ព្រះវិហារបរិសុទ្ធនេះ ] ពិតជាមានអត្ថន័យខ្លាំងណាស់ ពីព្រោះខ្ញុំមិនដែលគិតថាក្នុងមួយជីវិតរបស់ខ្ញុំ នឹងមានព្រះវិហារបរិសុទ្ធនៅទីនេះនោះទេ ។ ការមានព្រះវិហារបរិសុទ្ធនៅទីនេះក្នុងរយៈពេលត្រឹមតែ៣២ឆ្នាំ — វាគឺជាអព្ភូតហេតុមួយ » ។

ក្នុងរយៈពេលបីទសវត្សរ៍កន្លងមកនេះ សមាជិកភាពសាសនាចក្របានពង្រីកពីចំនួនតិចទៅដល់ចំនួន១៨,០០០នាក់ ។

អែលឌើរ ចនសុន បានមានប្រសាសន៍ថា « [ ព្រះវិហារបរិសុទ្ធ ] នេះគឺជាឱកាសដ៏អស្ចារ្យមួយសម្រាប់កិច្ចការរបស់ព្រះអម្ចាស់ ឲ្យបន្តរីកចម្រើនទៅមុខនៅទីនេះក្នុងប្រទេសកម្ពុជា » ។

ក្នុងចំណោមអ្នកដែលបានឃើញផ្ទាល់ភ្នែកពីការរីកចម្រើននោះ បងស្រី សួន ចាន់ម៉ូលីស ដែលបានចូលរួមក្នុងសាសនាចក្រក្នុងឆ្នាំ២០០១ បន្ទាប់ពីបានជួបជាមួយពួកអ្នកផ្សព្វផ្សាយសាសនាជាលើកដំបូងតាមរយៈថ្នាក់ភាសាអង់គ្លេស ។ ដោយបានទទួលយកគំរូពីពួកបរិសុទ្ធថ្ងៃចុងក្រោយក្នុងមូលដ្ឋាន និងបំណងប្រាថ្នាចង់ស្វែងយល់បន្ថែមអំពីព្រះយេស៊ូវគ្រីស្ទ គាត់បានទទួលបុណ្យជ្រមុជទឹក ។

ជាងពីរទសវត្សរ៍ក្រោយមក គាត់បាននិយាយថា គាត់មានអំណរគុណចំពោះឥទ្ធិពលដែលសាសនាចក្រនៃព្រះយេស៊ូវគ្រីស្ទមាននៅក្នុងជីវិតរបស់គាត់ និងនៅក្នុងជីវិតរបស់ប្រជាជនកម្ពុជាដូចគ្នា ។

បងស្រី ម៉ូលីស បានមានប្រសាសន៍ថា « ខ្ញុំមានមោទនភាពចំពោះសាសនាចក្ររបស់យើងដែលបានមកដល់ប្រទេសកម្ពុជា ហើយបានជួយប្រជាជនកម្ពុជា ។ ហើយខ្ញុំបានឃើញគំរូរបស់សមាជិកទាំងអស់នៅក្នុងសាសនាចក្រ ។ ពួកគេចិត្តល្អ និងរាក់ទាក់ណាស់ ។ ខ្ញុំបានចាប់ផ្ដើមរៀនអំពីសាសនាចក្រ ហើយបានសម្រេចចិត្តទទួលបុណ្យជ្រមុជទឹក » ។

សម្រាប់ស៊ីស្ទើរ អ៊ៀវ ដែលជាអ្នកផ្សព្វផ្សាយសាសនា ព្រះវិហារបរិសុទ្ធតំណាងឲ្យការរីកចម្រើនយ៉ាងឆាប់រហ័សរបស់សាសនាចក្រ ។

ស៊ីស្ទើរ អ៊ៀវ ជាអ្នកផ្សព្វផ្សាយសាសនាវ័យក្មេងបម្រើនៅប្រទេសកម្ពុជា ដែលជីដូនជីតារបស់នាងបានរួចផុតពីរបបខ្មែរក្រហម ហើយក្រោយមកបានរស់នៅសហរដ្ឋអាមេរិក បាននិយាយថា « សាសនាចក្រនៅថ្មីនៅឡើយនៅទីនេះ ខ្ញុំគិតថាមនុស្សជាច្រើនភ្លេចរឿងនោះ ។ គ្រួសារជាច្រើននឹងត្រូវបានពង្រឹងដោយព្រះវិហារបរិសុទ្ធនៅទីនេះក្នុងប្រទេសកម្ពុជា » ។

ស៊ីស្ទើរ អ៊ៀវ គឺជាចៅទីប្រាំរបស់ស៊ីស្ទើរ សារឿន និងប្រធាន លាង ដែលកំពុងបម្រើបេសកកម្មនៅក្នុងប្រទេសកម្ពុជា ។ កេរដំណែលគ្រួសារ អ៊ៀវ ឥឡូវនេះបានវិលត្រឡប់មកដល់ចំណុចដ៏មានអត្ថន័យមួយ ។ គូស្វាមីភរិយា អ៊ៀវ ឥឡូវគឺជាសមាជិកគណៈប្រធានព្រះវិហារបរិសុទ្ធថ្មី នៃព្រះវិហារបរិសុទ្ធភ្នំពេញកម្ពុជា ។

1 / 2

Download Photos

ព្រះវិហារបរិសុទ្ធនេះស្ថិតនៅលើផ្ទៃដីទំហំ ៣.១៦ ហិចតាតាមបណ្តោយមហាវិថីសហព័ន្ធរុស្ស៊ីក្នុងរាជធានីភ្នំពេញ ។ អគារនេះមានកម្ពស់ប្រហែល៣៥ម៉ែត្រ( ១១៥ហ្វីត ) គិតដល់ត្រឹមកំពូលព្រះវិហារបរិសុទ្ធ និងមានផ្ទៃក្រឡាប្រហែល៩២៤ម៉ែត្រការ៉េ ( ជិត១០,០០០ហ្វីត )។

ស្ថាបត្យកម្ម និងការរចនាផ្នែកខាងក្នុងរបស់ព្រះវិហារបរិសុទ្ធបានមកពីការទាញយកនូវការបំផុសគំនិតពីវប្បធម៌ និងប្រពៃណីសិល្បៈដ៏ផូរផង់របស់កម្ពុជា ។ លំនាំរចនាផ្ទៃខាងក្នុងទទួលបានការបំផុសគំនិតពីគំរូបែបប្រពៃណីខ្មែរដែលហៅថា ក្បាច់ ដែលមាននៅលើគ្រឿងប្រាក់ គ្រឿងសង្ហារិម គំនូរនៅលើជញ្ជាំង និងស្មូននៅក្នុងស្រុក ។ ការជ្រើសរើសពណ៌ឆ្លុះបញ្ចាំងពីគ្រឿងតម្បាញរបស់ប្រពៃណីខ្មែរ ផ្កាតំណាងប្រទេស និងនិមិត្តរូបនៃវប្បធម៌ ។

ស្នាដៃសិល្បៈដើមនៅខាងក្នុងព្រះវិហារបរិសុទ្ធរួមមានការពណ៌នាអំពីទេសភាព និងទស្សនីយភាពដែលឆ្លុះបញ្ចាំងពីជំនឿ និងបេតិកភណ្ឌរបស់ប្រជាជនកម្ពុជា ។

ការរីកចម្រើនរបស់សាសនាចក្រនៅកម្ពុជា ត្រូវបានអមដោយការផ្តល់សេវាកម្មផ្នែកមនុស្សធម៌ និងសហគមន៍រាប់ទសវត្សរ៍ ។ ចាប់តាំងពីពាក់កណ្តាលទសវត្សរ៍ឆ្នាំ១៩៨០ សាសនាចក្របានគាំទ្រគម្រោងផ្នែកមនុស្សធម៌រាប់រយនៅទូទាំងប្រទេស រួមទាំងជំនួយសម្រាប់សាលារៀន មន្ទីរពេទ្យ មណ្ឌលសុខភាព គំនិតផ្តួចផ្តើមផ្នែកអនាម័យ កិច្ចខិតខំសម្រាប់ការជួយសង្គ្រោះបន្ទាន់ និងកម្មវិធីអប់រំ ។

ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា តំណាងផ្លូវការដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា « ក្នុងនាមខ្ញុំតំណាងឲ្យរាជរដ្ឋាភិបាលកម្ពុជា ខ្ញុំសូមសម្តែងនូវអំណរគុណដ៏ស្មោះស្ម័គ្ររបស់យើងចំពោះសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ចំពោះជំនួយនិងការគាំទ្ររបស់សាសនាចក្រដល់ប្រជាជនកម្ពុជា ។ ក្នុងរយៈពេលប៉ុន្មានឆ្នាំមកនេះ សាសនាចក្របានសាងសង់សាលារៀន ផ្តល់ទឹកស្អាត ផ្តល់រទេះរុញ និងបញ្ជូនជំនួយសង្គ្រោះបន្ទាន់ដល់ប្រជាជនដែលរងផលប៉ះពាល់ដោយគ្រោះមហន្តរាយធម្មជាតិ ។ ការគាំទ្រនេះបានធ្វើឲ្យជីវិតរបស់មនុស្សជាច្រើននៅក្នុងប្រទេសកម្ពុជាកាន់តែប្រសើរឡើង ។ សេចក្តីសប្បុរស និងការបម្រើរបស់អ្នក បានបង្ហាញឲ្យឃើញតាមរយៈមនុស្សធម៌ និងចំណងមិត្តភាព » ។

អែលឌើរ ហ្គង បានមានប្រសាសន៍ថា សាសនាចក្រមានអំណរគុណដែលបានចូលរួមក្នុងកិច្ចការមនុស្សធម៌នេះ ដែលផ្តល់អត្ថប្រយោជន៍ដល់ « បងប្អូនប្រុសស្រីជនជាតិកម្ពុជារបស់យើង ដោយមិនប្រកាន់សាសនា » ។

ថ្នាក់ដឹកនាំសាសនាចក្រក៏បានបង្កើតទំនាក់ទំនងយូរអង្វែងជាមួយរដ្ឋាភិបាលកម្ពុជា និងថ្នាក់ដឹកនាំសហគមន៍ផងដែរ ។ នៅខែមករា ឆ្នាំ២០២៤ អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានជួបជាមួយសម្តេចមហាបវរធិបតី ហ៊ុន ម៉ាណែត និងបានប្រកាសគាំទ្រចំពោះគំនិតផ្តួចផ្តើមថែទាំផ្នែកសុខភាព រួមទាំងការបរិច្ចាគដើម្បីជួយបង្កើតមជ្ឈមណ្ឌលបេះដូងនៅមន្ទីរពេទ្យបង្អែកសៀមរាប ។

ប្រធាន ណិលសុន បានអញ្ជើញមកធ្វើទស្សនកិច្ចនៅព្រះរាជាណាចក្រកម្ពុជាកាលពីឆ្នាំ២០១៩ ហើយបានបង្ហាញរូបភាពព្រះវិហារបរិសុទ្ធដែលនឹងត្រូវសាងសង់ ។ ពិធីបើកការដ្ឋាន និងសម្ពោធទីតាំងបានធ្វើឡើងនៅថ្ងៃទី១៨ ខែកញ្ញា ឆ្នាំ២០២១ ។

ព្រះវិហារបរិសុទ្ធភ្នំពេញកម្ពុជា គឺជាព្រះវិហារបរិសុទ្ធដំបូងគេនៅក្នុងប្រទេសកម្ពុជា ហើយបន្ទាប់ពីបានឧទ្ទិសឆ្លងរួច នោះនឹងក្លាយជាព្រះវិហារបរិសុទ្ធទី ២១២ របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលនឹងដាក់ឲ្យដំណើរការ ។

អែលឌើរ ផាទ្រីក ខៀរ៉ុន ក្នុងកូរ៉ុមនៃពួកសាវកដប់ពីរនាក់នឹងធ្វើជាអធិបតីនៅក្នុងពិធីឧទ្ទិសឆ្លងនៅថ្ងៃអាទិត្យ ទី៣០ ខែសីហា ឆ្នាំ២០២៦ វេលាម៉ោង ១០:០០ ព្រឹក ( ចាក់ផ្សាយឡើងវិញនៅវេលាម៉ោង ២:០០ រសៀល ) ។ សម័យប្រជុំនៃពិធីឧទ្ទិសឆ្លងនឹងចាក់ផ្សាយទៅកាន់អង្គភាពទាំងអស់នៅក្នុងមណ្ឌលព្រះវិហារបរិសុទ្ធភ្នំពេញកម្ពុជា ។

ប្រធាន រ័សុល អិម ណិលសុន បានប្រកាសអំពីព្រះវិហារបរិសុទ្ធភ្នំពេញកម្ពុជា នៅឆ្នាំ២០១៨ ។

លោក អ៊ិត បានលើកទឹកចិត្តដល់ប្រជាជននៅទូទាំងប្រទេសកម្ពុជាឲ្យចូលមកទស្សនាក្នុងអំឡុងពេលបើកសម្ពោធព្រះវិហារបរិសុទ្ធ ដោយកត់សម្គាល់ពីអំណាចដែលផ្តោតលើព្រះគ្រីស្ទនៃព្រះវិហារបរិសុទ្ធក្នុងការនាំមកនូវការព្យាបាលដល់ព្រលឹងទាំងឡាយដែលឈឺចាប់។

លោកបានមានប្រសាសន៍ថា « សូមមកស្វែងយល់ពីយើងថា យើងជានរណា យើងជឿលើអ្វី ហើយសូមទទួលយកនូវបទពិសោធន៍នៃភាពសុខសាន្ត និងសេចក្ដីស្រឡាញ់នៅក្នុងបរិវេណព្រះវិហារបរិសុទ្ធនេះ ។ ទឹកដីនេះរងទុក្ខច្រើនណាស់ ។ ព្រះវិហារបរិសុទ្ធមិនត្រឹមតែនាំមកនូវនិមិត្តរូបប៉ុណ្ណោះទេ ប៉ុន្តែថែមទាំងនាំមកនូវសេចក្តីសុខសាន្ត និងសេចក្ដីស្រឡាញ់នៅលើផែនដីទៀតផង ។