Seminary_Life_Prep
យុវមជ្ឈិមវ័យមួយក្រុមរីករាយនឹងគ្នាទៅវិញទៅមក ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានអនុវត្តមេរៀននៃការរៀបចំជីវិតថ្មីទៅក្នុងកម្មវិធីសិក្សាថ្នាក់សិក្ខាសាលា ដែលមានបំណងពង្រឹងគ្រប់ផ្នែកនៃជីវិតរបស់សិស្ស ដោយជួយពួកគេឲ្យមើលឃើញពីតម្លៃខាងវិញ្ញាណនៃជំនាញជីវិតសំខាន់ៗ ។© 2024 by Intellectual Reserve, Inc. All rights reserved.ថ្នាក់សិក្ខាសាលា និងថ្នាក់វិទ្យាស្ថានសាសនា ( ស.&វ. ) នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានដាក់ចេញនូវមេរៀននៃការរៀបចំជីវិតថ្មីនៅក្នុងកម្មវិធីសិក្សាសម្រាប់សិស្សថ្នាក់សិក្ខាសាលានៅទូទាំងពិភពលោក ។ ការផ្លាស់ប្តូរជាប្រវត្តិសាស្ត្រនេះនៅក្នុងកម្មវិធីថ្នាក់សិក្ខាសាលាដែលមានភាគរយខ្ពស់បំផុតនៃការចុះឈ្មោះរបស់សិស្សដែលមិនធ្លាប់មានពីមុនមក មានបំណងពង្រឹងគ្រប់ផ្នែកនៃជីវិតរបស់សិស្ស ដោយជួយពួកគេឲ្យមើលឃើញពីតម្លៃខាងវិញ្ញាណនៃជំនាញជីវិតសំខាន់ៗ ។
មេរៀនទាំងនេះនឹងបំពេញបន្ថែមដល់សិស្សថ្នាក់សិក្ខាសាលានូវការសិក្សាព្រះគម្ពីរជាបន្តបន្ទាប់ដែលធ្លាប់ដឹងច្បាស់ ជាធម្មតាវាត្រូវបានបង្រៀនពីមួយថ្ងៃទៅពីរថ្ងៃក្នុងមួយសប្តាហ៍ ។
កម្មវិធីសិក្សាថ្មីនេះនឹងគ្របដណ្តប់លើប្រធានបទដូចជា ៖
- ការរៀបចំខ្លួនទៅព្រះវិហារបរិសុទ្ធ
- ការរៀបចំខ្លួនបម្រើបេសកកម្ម
- ភាពជោគជ័យនៅក្នុងសាលា
- ការស្ថាបនាភាពខ្លួនទីពឹងខ្លួន
- ដើម្បីកម្លាំងនៃយុវជន
- សុខភាពខាងផ្លូវកាយ និងផ្លូវចិត្ត
- ការបង្រៀនរបស់ថ្នាក់ដឹកនាំសាសនាចក្ររបស់យើង
- ការរៀបចំខ្លួនសម្រាប់ការអប់រំ និងការងារនាពេលអនាគត
បងប្រុស ឆាដ អេច វិប ដែលជាអ្នកគ្រប់គ្រងថ្នាក់សិក្ខាសាលា និងថ្នាក់វិទ្យាស្ថាននៃសាសនា បានប្រកាសពីគំនិតផ្តួចផ្តើមថ្មីនេះនៅក្នុងកម្មវិធីថ្នាក់សិក្ខាសាលា អំឡុងពេល ការចាក់ផ្សាយវគ្គបណ្តុះបណ្តាលប្រចាំឆ្នាំរបស់ថ្នាក់សិក្ខាសាលា និងថ្នាក់វិទ្យាស្ថាន នៅថ្ងៃសុក្រ ទី២៦ ខែមករា ឆ្នាំ២០២៤ ។
បងប្រុស វិប បានមានប្រសាសន៍ថា « មេរៀនទាំងនេះនឹងលើកឡើងអំពីតម្រូវការជាក់លាក់របស់សិស្សថ្នាក់សិក្ខាសាលា តាមរបៀបដែលនឹងបន្តផ្តោតសំខាន់លើព្រះគ្រីស្ទ ដោយផ្អែកលើព្រះគម្ពីរ និងការផ្ដោតរបស់សិស្ស » ។ « យើងសង្ឃឹមថានឹងបើកអាងស្តុកទឹកខាងវិញ្ញាណដែលយើងមិនធ្លាប់បានឃើញពីមុនមក តាមរយៈការដាក់បញ្ចូលវិធីសាស្ត្រការសិក្សាព្រះគម្ពីរតាមលំដាប់លំដោយ និងជាអត្ថបទខ្លីៗនេះ » ។
ទាំងបងប្រុស វិប និងអែលឌើរ ក្លាក ជី ហ្គីលប៊ឺត ជាអភិបាលនៃប្រព័ន្ធអប់រំសាសនាចក្រ បានទន្ទឹងរង់ចាំដោយសេចក្តីសង្ឃឹមសម្រាប់យុវវ័យជំនាន់ក្រោយដ៏រឹងមាំ ។
អែលឌើរ ហ្គីលប៊ឺត បានមានប្រសាសន៍ « ពេលពឹងផ្អែកលើព្រះយេស៊ូវគ្រីស្ទ ហើយបោះយុថ្កានៅក្នុងបទគម្ពីរ ខ្ញុំមើលឃើញយុវជន និងយុវនារីបានត្រៀមខ្លួនកាន់តែប្រសើរសម្រាប់ការបម្រើបេសកកម្ម ព្យាយាមនៅក្នុងសេចក្តីសញ្ញាព្រះវិហារបរិសុទ្ធរបស់ពួកគេ កាន់តែរឹងមាំខាងផ្លូវចិត្ត និងភាពខ្លួនទីពឹងខ្លួន ហើយត្រៀមខ្លួនកាន់តែប្រសើរដើម្បីចូលមហាវិទ្យាល័យ » ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានសម្ដែងការរំភើបចិត្តយ៉ាងខ្លាំងចំពោះមេរៀនថ្មីទាំងនេះ ។
លោកបានមានប្រសាសន៍ថា « ចំពោះខ្ញុំ ការណ៍នេះវាហាក់ដូចជាការថែមផ្លែឈើ និងគ្រឿងទេសស្រស់ៗទៅក្នុងនំផាយ ។ វាប្រាកដជាឆ្ងាញ់ណាស់ » ។ « ខ្ញុំអន្ទះសាចង់រៀនពីវិធីសាស្ត្រនេះជាមួយបងប្អូន ហើយខ្ញុំរីករាយដែលអាចផ្តល់អ្វីមួយបន្ថែមទៀតដល់បងប្អូនដែលប្រឹងប្រែង និងជាការលះបង់ដើម្បីចូលរៀនថ្នាក់សិក្ខាសាលា » ។
ឥទ្ធិពលនៃថ្នាក់សិក្ខាសលា និងវិទ្យាស្ថាន
ប្រធានសាសនាចក្រ រ័សុល អិម ណិលសុន ថ្មីៗនេះ បានធ្វើការអញ្ជើញមួយ ឲ្យយុវវ័យចូលរួមថ្នាក់សិក្ខាសាលា ។
លោកបានមានប្រសាសន៍ ៖ « នៅពេលអ្នក[ ចូលរួមថ្នាក់សិក្ខាសាលា ] ខ្ញុំសន្យាថា អ្នកនឹងទទួលបានចម្លើយចំពោះសំណួរពិបាកបំផុតមួយចំនួនរបស់អ្នក » ។ « អ្នកនឹងរកឃើញមិត្តភក្តិដែលអ្នកអាចទុកចិត្តបាន ។ អ្នកនឹងក្លាយជាសិស្សដ៏ពិតរបស់ព្រះអម្ចាស់ ព្រះយេស៊ូវគ្រីស្ទ » ។
ក្នុងរយៈពេលបីឆ្នាំកន្លងមកនេះ ថ្នាក់សិក្ខាសាលា និងថ្នាក់វិទ្យាស្ថាននៃសាសនាបានបន្ថែមសិស្សច្រើនជាង ១២៥,០០០ នាក់ ។ នៅឆ្នាំ២០២៤ កម្មវិធីថ្នាក់សិក្ខាសាលាបានឃើញភាគរយខ្ពស់បំផុតដែលមិនធ្លាប់មាននៃមនុស្សវ័យជំទង់ដែលមានសិទ្ធិចុះឈ្មោះចូលរៀនថ្នាក់សិក្ខាសាលា ។
បងប្រុស វិប បាននិយាយអំពីការពង្រីកលទ្ធភាព និងឥទ្ធិពលនៃកម្មវិធីថ្នាក់ ស.&វ. ក្នុងអំឡុង សន្និសីទអ្នកអប់រំសាសនាក្នុងប្រព័ន្ធអប់រំសាសនាចក្រឆ្នាំ២០២៤ ។
លោកបានមានប្រសាសន៍ថា « ជាឧទាហរណ៍ កាលពីឆ្នាំមុនគ្រាន់តែនៅអាមេរិកកណ្តាលតែមួយ គ្រូបង្រៀន[ ថ្នាក់សិក្ខាសាលា និងវិទ្យាស្ថាន ]របស់យើងផ្ទាល់ បានអញ្ជើញយុវវ័យ និងយុវមជ្ឈិមវ័យជាង ២៥,០០០0 នាក់ឲ្យចូលរួមរៀន ។ យើងក៏បានសុំឲ្យសិស្សរបស់យើងអញ្ជើញមិត្តភក្តិរបស់ពួកគេមកដែរ ។ ជាលទ្ធផល មានមិត្តភក្តិច្រើនជាង ៣០០០០ នាក់ដែលមានជំនឿផ្សេងៗបានចូលរួម ដែលបណ្តាលឲ្យមានបុណ្យជ្រមុជទឹកជាង ៩០០០ នាក់ ។
ការស្រាវជ្រាវរបស់សាសនាចក្របានបង្ហាញថា យុវវ័យដែលចូលរៀនថ្នាក់សិក្ខាសាលាទំនងជារក្សាទំនាក់ទំនងជាមួយនឹងសាសនាចក្រនាពេលអនាគតរហូតដល់ទៅទីបួនដង ។ ការស្រាវជ្រាវក៏រកឃើញថា យុវវ័យដែលចូលរៀនថ្នាក់វិទ្យាស្ថានទទួលបានអត្ថប្រយោជន៍ជាច្រើន ៖ ភាពសកម្មក្នុងសាសនាចក្រពេញមួយជីវិត ទីបន្ទាល់ អារម្មណ៍នៃការមានចំណែក អារម្មណ៍នៃព្រះវិញ្ញាណ ការលះបង់ផ្ទាល់ខ្លួន និងការលះបង់ជាគ្រួសារ ។
បងប្រុស វិប បានបន្ថែមថា « ការកើនឡើងនូវការចុះឈ្មោះ គឺជាផ្នែកមួយនៃដំណើររឿង ។ គ្រប់ទីកន្លែងដែលខ្ញុំទៅ ខ្ញុំឮរឿងអំពីជីវិតមនុស្សបានមានការផ្លាស់ប្តូរ ។ នៅពេលយុវវ័យបានចាប់ផ្ដើមការសិក្សាដ៏ម៉ត់ចត់មួយអំពីព្រះគម្ពីរ ពួកគេនឹងបានពរជ័យ ហើយទទួលការបំផុសគំនិត និងក្តីសង្ឃឹម ។ ហើយការណ៍នេះកំពុងកើតឡើងនៅក្នុងថ្នាក់របស់យើងជារៀងរាល់ថ្ងៃ ។
សមាជិកយុវវ័យ និងមិត្តភក្តិរបស់ពួកគេម្នាក់ៗត្រូវបានអញ្ជើញឲ្យទទួលបានអត្ថប្រយោជន៍ពីមេរៀនទាំងនេះ ។
សូមរៀនបន្ថែម នៅទីនេះ ។