យុវវ័យកម្ពុជាប្រមូលផ្តុំគ្នាដោយសេចក្តីជំនឿ និងការរាប់អាន នៅក្នុងកម្មវិ

នៅក្នុងការបង្ហាញនៃសេចក្តីជំនឿ និងការរាប់អានដ៏គួរឲ្យកត់សម្គាល់ យុវវ័យជាង ៤០០ នាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មកពីទូទាំងប្រទេសកម្ពុជាជួបជុំគ្នានៅខេត្តសៀមរាប នៅឯសណ្ឋាគារសុខា ចាប់ពីថ្ងៃទី ២៧ ខែវិច្ឆិកា ដល់ថ្ងៃទី ១ ខែធ្នូ ដើម្បីចូលរួមក្នុងកម្មវិធីដើម្បីកម្លាំងនៃយុវជន ( ដ.ក.យ ) ។ ព្រឹត្តិការណ៍នេះគឺជាកម្មវិធីពេញមួយសប្តាហ៍ដែលពេញទៅដោយសិក្ខាសាលា ការធ្វើបទបង្ហាញពីការទាក់ទង ឱកាសនៃការបម្រើ និងសកម្មភាពដែលត្រូវបានរៀបចំឡើងដើម្បីជួយយុវវ័យឲ្យយល់កាន់តែច្បាស់អំពីព្រះយេស៊ូវគ្រីស្ទ និងស្ថាបនាជីវិតរបស់ពួកគេលើការបង្រៀនរបស់ទ្រង់ ។ ប្រធានបទរួមមាន ពង្សប្រវត្តិ ការរៀបចំខ្លួនធ្វើជាអ្នកផ្សព្វផ្សាយសាសនា ការចូលព្រះវិហារបរិសុទ្ធ ការសិក្សាព្រះគម្ពីរ និងជាច្រើនទៀត ។

1 / 2

Download Photos

បាវចនា ៖ « ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទ »

យុវវ័យដែលចូលរួមមានអាយុចាប់ពី ១៣ ទៅ ១៨ ឆ្នាំបានពាក់អាវយឺតពណ៌ភ្លឺឆើតឆាយព្រមជាមួយបាវចនានាឆ្នាំនេះ ៖ « ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចម្រើនកម្លាំងដល់ខ្ញុំ » ( ភីលីព ៤:១៣ ) ។ ការរួបរួមក្នុងសម្លៀកបំពាក់របស់ពួកគេឆ្លុះបញ្ចាំងពីគោលបំណងរួម និងភក្តីភាពរបស់ពួកគេចំពោះព្រះគ្រីស្ទ ។ ពួកគេត្រូវបានដឹកនាំដោយអ្នកប្រឹក្សា និងអ្នកសម្របសម្រួលដែលជាយុវមជ្ឈិមវ័យចំនួន ៧២ នាក់ ដែលអាចសម្គាល់បានដោយអាវប៉ូឡូដែលមានពណ៌ខុសៗគ្នា ។

ការលើកឧទាហរណ៍នៃគំរូនៃភាពជាសិស្ស ក្នុងនាមជាអ្នកដឹកនាំ

បងប្រុស អ៊ុក សុផល និងបងស្រី សុខ បូលីនដា ដែលបម្រើជាគូស្វាមីភរិយាដឹកនាំសន្និសីទ ដ.ក.យ. នេះ បានផ្តល់ការណែនាំ និងការបំផុសគំនិតដល់ព្រឹត្តិការណ៍នេះទាំងមូល ។ នៅក្នុងការប្រជុំមួយក្នុងចំណោមការប្រជុំជាច្រើនដែលស្វាមីភរិយានេះបានថ្លែងទៅកាន់យុវវ័យគ្រប់ក្រុមទាំងអស់ បងស្រី បូលីនដា បានរំឭកពួកគេអំពីសេចក្តីស្រឡាញ់ដ៏ជ្រាលជ្រៅរបស់ព្រះអង្គសង្គ្រោះចំពោះពួកគេទាំងអារម្មណ៍ក្ដុកក្ដួល ។ នៅពេលគាត់និយាយ យើងអាចមើលឃើញថា ក្មេងៗមានអារម្មណ៍រំជួលចិត្ត ដោយទទួលអារម្មណ៍នៃភាពកក់ក្ដៅនៃព្រះវិញ្ញាណ ។

បងប្រុស អ៊ុក និងបងស្រី សុខ ចែកចាយចំណេះដឹង និងការណែនាំ ។© 2023 by Intellectual Reserve, Inc. All rights reserved.

អ្នកសម្របសម្រួលយុវមជ្ឈិមវ័យនៅលីវ បូ ឆៃដែន និងទេព មុន្នីរ័ត្ន ព្រមជាមួយជំនួយការអ្នកសម្របសម្រួលចំនួន ១២ នាក់ គឺជាឧបករណ៍ដ៏សំខាន់ក្នុងការណែនាំដល់ពួកអ្នកប្រឹក្សា ។ ទៀង ចាស្មីន ជាជំនួយការម្នាក់ក្នុងចំណោមអ្នកសម្របសម្រួលជាច្រើនបានចែកចាយបទពិសោធន៍ដែលពង្រឹងជំនឿរបស់នាងក្នុងការយកឈ្នះលើឧបសគ្គខាងផ្នែកភស្តុភារតាម រយៈការអធិស្ឋាន និងការទុកចិត្តលើផែនការរបស់ព្រះអម្ចាស់ ។ « ទោះបីជាយើងបានរៀបចំកាលវិភាគយ៉ាងលម្អិតក៏ដោយ ពេលខ្លះអ្វីៗផ្លាស់ប្តូរដោយមិនបានរំពឹងទុក ។ វាអាចជាការ តានតឹងខ្លាំងនៅពេលយើងព្យាយាមដោះស្រាយបញ្ហា ។ យើងមានអារម្មណ៍តានតឹងណាស់ក្នុងនាមជាអ្នកដឹកនាំ ។ ប៉ុន្តែបន្ទាប់មកអ្វីៗប្រែទៅជាល្អ ហើយយើងទទួលអារម្មណ៍នៃព្រះវិញ្ញាណ » ។

1 / 2

Download Photos

ការនាំយកគោលលទ្ធិនៃព្រះគ្រីស្ទមកក្នុងជីវិត

ប្រធានតំបន់អាស៊ី បេនយ៉ាមីន អិម ហ្ស៊ី តៃ និងភរិយារបស់គាត់ គឺស៊ីស្ទើរ ណាអូមី តូម៉ា តៃ បានចូលរួមព្រឹត្តិការណ៍ពាក់កណ្តាលសប្តាហ៍ ដោយផ្តោតលើគោលលទ្ធិនៃព្រះគ្រីស្ទ ។ ដោយសង្កត់ធ្ងន់លើសារៈសំខាន់នៃគោលលទ្ធិរបស់ព្រះគ្រីស្ទក្នុងការដឹកនាំការសម្រេចចិត្តដ៏សំខាន់ៗក្នុងជីវិត អែលឌើរ តៃ បានលើកទឹកចិត្តយុវវ័យឲ្យស្រមៃមើលពីអនាគតរបស់ពួកគេ ៖ គាត់បានផ្ដល់ដំបូន្មានថា « សូមបិទភ្នែករបស់ក្មួយៗ ហើយព្យាយាមស្រមៃថា តើក្មួយៗនឹង ទៅទីណាក្នុងរយៈពេល ១០ ឆ្នាំទៀត ។ ក្មួយៗមានការសម្រេចចិត្តជាច្រើនដែលត្រូវធ្វើក្នុងរយៈពេល ១០ ឆ្នាំខាងមុខដែលនឹងជះឥទ្ធិពលដល់ជីវិតរបស់ក្មួយៗតទៅមុខទៀត ។ ឧបករណ៍ដ៏ល្អបំផុតដែលយើងត្រូវធ្វើការសម្រេចចិត្តទាំងនេះ គឺធ្វើតាមគោលលទ្ធិរបស់ព្រះ គ្រីស្ទ » ។

Inspired-Leadership
អែលឌើរ អេង ប៊ុនហួច ( ឆ្វេង ) ពួកចិតសិបនាក់ប្រចាំតំបន់ អែលឌើរ បេនយ៉ាមីន អិម ហ្ស៊ី តៃ ( កណ្តាល ) ប្រធានតំបន់អាស៊ី និងភរិយារបស់លោក ស៊ីស្ទើរ ណាអូមី តូម៉ា តៃ (ស្តាំ) បង្រៀនយុវវ័យអំពីគោលលទ្ធិនៃព្រះគ្រីស្ទក្នុងកម្មវិធី ដ.ក.យ. នៅប្រទេសកម្ពុជាឆ្នាំ ២០២៣ ។© 2023 by Intellectual Reserve, Inc. All rights reserved.

បន្ទាប់ពីបង្រៀនអំពីសេចក្ដីជំនឿ និងការប្រែចិត្ត នោះអែលឌើរ តៃ បានសុំឲ្យក្មេងៗរំឭក ហើយចែកចាយបទពិសោធន៍នៃពិធីបុណ្យជ្រមុជទឹករបស់ពួកគេ ។ មានសមាជិកថ្មីម្នាក់បានលើកដៃឡើង ហើយបានរាយការណ៍ថាគាត់បានទទួលបុណ្យជ្រមុជទឹកនៅ « ថ្ងៃទី ១៧ ខែកញ្ញា ម៉ោង ១០ ព្រឹក ។ បន្ទុករបស់ខ្ញុំត្រូវបានលើកឡើង ! » គ្រប់គ្នាបានទះដៃអបអរជាខ្លាំង ។ អ្នកចូលរួមជាច្រើនបានបង្ហាញថា ពួកគេក៏ជាសមាជិកថ្មីនៃសាសនាចក្រដែរ ពេលអែលឌើរ តៃ សុំឲ្យលើកដៃឡើង ។ អ្នកចូលរួមជាងពាក់កណ្តាលបានបង្ហាញថា ពួកគេបានចូលរួម ដ.ក.យ ជាលើកដំបូង ។

ការប្រារព្ធវប្បធម៌ខ្មែរ

កម្មវិធីបង្ហាញទេពកោសល្យផ្សេងៗនៅពាក់កណ្តាលសប្តាហ៍នេះ បានបង្ហាញទាំងការសម្ដែង ការច្រៀង និងការរាំតាមបែបប្រពៃណី និងបែបសម័យទំនើប ដើម្បីអបអរសាទរនូវបេតិកភណ្ឌប្រវត្តិសាស្ត្រ និងវប្បធម៌សហសម័យដ៏សម្បូរបែបរបស់កម្ពុជា ។ មាស ម៉ានីពិសី អាយុ ១៨ ឆ្នាំ ជាអ្នកដឹកនាំការសម្តែងដ៏អស្ចារ្យបានចែកចាយថា « ខ្ញុំមិនមានគម្រោងចូលរួម ដ.ក.យ. ទេ ប៉ុន្តែខ្ញុំបានអធិស្ឋានអំពីកម្មវិធីនេះ ហើយព្រះវិញ្ញាណបរិសុទ្ធបានប្រាប់ខ្ញុំថា ខ្ញុំត្រូវតែទៅ ព្រោះវាពិតជាមានសារៈសំខាន់សម្រាប់ជីវិតរបស់ខ្ញុំណាស់ ។ ខ្ញុំបានរៀនថា តាមរយៈព្រះចេស្តានៃការពលិកម្មរបស់ព្រះយេស៊ូវគ្រីស្ទ ខ្ញុំអាចរៀនគ្រប់គ្រងអារម្មណ៍របស់ខ្ញុំ ។ វាពិតជាបានពង្រឹងទីបន្ទាល់របស់ខ្ញុំណាស់ ។ ខ្ញុំរីករាយណាស់ដែលខ្ញុំសម្រេចចិត្តចូលរួម » ។

1 / 2

Download Photos

ការរៀនបម្រើតាមរយៈជំនួយមនុស្សធម៌

នៅថ្ងៃចុងក្រោយនៃព្រឹត្តិការណ៍នេះ រួមមាននូវគម្រោងផ្តល់ការបម្រើជាការផ្ដល់សម្ភារសិក្សាពេញកាបូបដល់សិស្សថ្មីចំនួន ១,០០០ នាក់នៅតាមសាលារៀននានាក្នុងខេត្តសៀមរាប និងក្នុងរាជធានីភ្នំពេញ ។ យុវវ័យមួយក្រុមតូចបានស្ម័គ្រចិត្តដោយឯកឯងដើម្បីបម្រើឲ្យបានល្អលើសពីពេលវេលាដែលបានកំណត់ ដោយលើកជាឧទាហរណ៍អំពីសារលិខិតសន្និសីទទូទៅខែតុលា ឆ្នាំ ២០២៣ របស់អែលឌើរ ដេវីឌ អេ បែដណា អំពីអ្នកដែលដើរឆ្ពោះទៅមុខ« តាមគន្លងនៃករណីយកិច្ចរបស់ពួកគេ » ។ រីឆាដ ហ្គឺឡាក់ អ្នកផ្សព្វផ្សាយសាសនារៀមច្បងផ្នែកមនុស្សធម៌ ដែលមើលការខុសត្រូវគម្រោងនេះបានសរសើរពួកអ្នកស្ម័គ្រចិត្តដោយនិយាយថា « យុវវ័យទាំងនេះគឺជាអនាគតអ្នកដឹកនាំសាសនាចក្រក្នុងប្រទេសនេះ » ។

1 / 2

Download Photos

ការនាំយកបទពិសោធន៍ ដ.ក.យ. ត្រឡប់ទៅផ្ទះ

នៅក្នុងការប្រជុំធម្មនិដ្ឋានចុងបញ្ចប់ បងប្រុស អ៊ុក និងបងស្រី សុខ បានផ្តល់វិធីអនុវត្តជាក់ស្តែងដែលយុវវ័យអាចយកបទពិសោធន៍ និងការរីកចម្រើនរបស់ពួកគេត្រឡប់ទៅផ្ទះជាមួយពួកគេ ។ អែលឌើរ អេង ប៊ុនហួច ពួកចិតសិបនាក់ប្រចាំតំបន់ បានបិទបញ្ចប់សប្តាហ៍នោះជាមួយនឹងសំណួរ និងចម្លើយយ៉ាងស៊ីជម្រៅដូចតទៅនេះ ៖ « តើអ្វីជាទីបន្ទាល់ពិត ? ទីបន្ទាល់ពិតជាអ្វីដែលអ្នកដឹងអំពីព្រះយេស៊ូវគ្រីស្ទនៅក្នុងចិត្តរបស់យើង » ។

Final-Guidance
នៅពេលកម្មវិធី ដ.ក.យ. ឆ្នាំ ២០២៣ បានខិតដល់ទីបញ្ចប់ អែលឌើរ អេង ប៊ុនហួច ( ឆ្វេង ) ពួកចិតសិបនាក់ប្រចាំតំបន់ ផ្តល់ពាក្យចុងក្រោយនៃការបំផុសគំនិត ។© 2023 by Intellectual Reserve, Inc. All rights reserved.

អ្នកចូលរួមជាច្រើននាក់បានបង្ហាញពីរបៀបដែលបទពិសោធន៍ ដ.ក.យ. របស់ពួកគេបានបង្កើតនូវបំណងប្រាថ្នាដែលបានរកឃើញថ្មី ដើម្បីបម្រើជាអ្នកផ្សព្វផ្សាយសាសនាពេញម៉ោងនាពេលអនាគត ។ បណ្ឌិត បញ្ញា បានថ្លែងថា « ខ្ញុំបានរៀនពីរបៀបរៀបចំផែនការដើម្បីក្លាយជាអ្នកផ្សព្វផ្សាយសាសនា ។ ខ្ញុំបានពុះពារជាមួយនឹងជំងឺធ្លាក់ទឹកចិត្តកាលពីអតីតកាល ប៉ុន្តែការជួបអ្នកផ្សព្វផ្សាយសាសនា និងការរៀនអំពីព្រះយេស៊ូវគ្រីស្ទ ពិតជាបានជួយខ្ញុំឲ្យមានសុភមង្គលជាង ។ ខ្ញុំចង់ជួយអ្នកដទៃឲ្យធ្វើដូចគ្នា » ។

ង៉ែត កានីកា បាននិយាយថា « ខ្ញុំបានរៀនថាព្រះយេស៊ូវគ្រីស្ទមានផែនការសម្រាប់មនុស្សគ្រប់គ្នា រួមទាំងខ្ញុំផង ។ ខ្ញុំបានគិតថាខ្ញុំខ្សោយពេកក្នុងការបម្រើបេសកកម្ម ។ ថ្ងៃនេះ ខ្ញុំបានរៀនពីរបៀបដែលព្រះយេស៊ូវគ្រីស្ទអាចធ្វើឲ្យខ្ញុំរឹងមាំ ។ វាផ្តល់ឲ្យខ្ញុំនូវទំនុកចិត្តក្នុងការសម្រេចចិត្តដើម្បីបម្រើ » ។

1 / 2

Download Photos

អ្នកដឹកនាំនៅក្នុងព្រឹត្តិការណ៍នោះបានជំរុញយុវវ័យឲ្យចែកចាយទីបន្ទាល់របស់ពួកគេនៅក្នុងការប្រជុំតមអាហារ និងទីបន្ទាល់នៅក្នុងវួដ និងសាខារបស់ពួកគេនៅថ្ងៃអាទិត្យបន្ទាប់ ។ គៀត សុគន្ធា មកពីមណ្ឌលសៀមរាប បានថ្លែងទីបន្ទាល់ទៅកាន់ក្រុមជំនុំក្នុងសាខារបស់នាងថា « ខ្ញុំជាមនុស្សអៀនខ្លាំងណាស់ ។ នៅពេលពួកគាត់បានសុំឲ្យយើងចែកចាយបទពិសោធន៍ ឬទីបន្ទាល់ ខ្ញុំមិនគិតថាខ្ញុំអាចធ្វើវាបានទេ ។ ប៉ុន្តែខ្ញុំបានធ្វើការអធិស្ឋានតូចមួយ ហើយបានទទួលនូវភាពក្លាហានក្នុងការនិយាយ ។ ខ្ញុំមានទីបន្ទាល់ដ៏រឹងមាំមួយអំពី យ៉ូសែប ស្ម៊ីធ ។ លោកអាចសុំជំនួយពីព្រះ ហើយអាចមើលឃើញព្រះ ។ ខ្ញុំក៏អាចមានទីបន្ទាល់កាន់តែខ្លាំងអំពីព្រះគ្រីស្ទតាមរយៈការអធិស្ឋាន និងបទគម្ពីរផងដែរ » ។

សប្តាហ៍នៃការលូតលាស់ខាងវិញ្ញាណ និងសាមគ្គីភាពរៀបចំអ្នកដឹកនាំ នាពេលអនាគតសម្រាប់ជីវិតនៃភាពជាសិស្ស

Inspired-Leadership

Final-Guidance

FSY-Cambodia-2023-Group-Portrait