សមាជិកវ័យក្មេងប្រហែលមួយលាននាក់នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែលមានអាយុពី ១១ ដល់ ១៨ ឆ្នាំនៅទូទាំងពិភពលោកកំពុងប្រមូលផ្តុំគ្នាចាប់ផ្តើមពីថ្ងៃអាទិត្យ ទី៥ ខែមករា ឆ្នាំ២០២៥ ដើម្បីស្វែងយល់បន្ថែមអំពី បាវចនាយុវវ័យឆ្នាំ២០២៥ « មើលទៅព្រះគ្រីស្ទ » ។
ជារៀងរាល់ឆ្នាំ បាវចនាយុវវ័យមួយត្រូវបានជ្រើសរើសដើម្បីជួយលើកទឹកចិត្ត បំផុសគំនិត និងបង្រួបបង្រួមយុវវ័យជុំវិញពិភពលោក ដែលខិតខំដើរតាមព្រះយេស៊ូវគ្រីស្ទ ។ ជាធម្មតា បាវចនាគឺជាប្រធានបទ ឬឃ្លាដែលផ្អែកលើវគ្គបទគម្ពីរ ។ ជារៀងរាល់ឆ្នាំ បទចម្រៀងថ្មីៗ ស្នាដៃសិល្បៈ និងសម្ភារផ្សេងទៀតជួយយុវវ័យ និងថ្នាក់ដឹកនាំរបស់ពួកគេក្នុងការបញ្ចូលបាវចនានោះទៅក្នុងសកម្មភាពរបស់ពួកគេ ការប្រជុំព្រះវិហារ និងជីវិតផ្ទាល់ខ្លួន ។
បាវចនាយុវវ័យឆ្នាំ២០២៥ គឺផ្អែកលើបទគម្ពីរ « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ ចូរកុំខ្លាចឡើយ » ( គោលលទ្ធិ និងសេចក្តីសញ្ញា ៦:៣៦ ) ។
យុវវ័យកំពុងប្រមូលផ្ដុំគ្នាក្នុងមូលដ្ឋាន ដើម្បីមើលវីដេអូរយៈពេល ២៥ នាទីនៃសារលិខិត និងតន្ត្រីដែលបង្ហាញពីប្រធានយុវជនទូទៅ ស្ទីវីន ជេ ឡាន់ ប្រធានយុវនារីទូទៅ អេមីលី បេលី ហ្វ្រីមែន និងអែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ ហើយពិភាក្សាអំពីអត្ថន័យនៃការមករកព្រះគ្រីស្ទ ។
បានថតកាលពីរដូវផ្ការីកឆ្នាំមុននៅឯកន្លែងប្រវត្តិសាស្ត្រ ព្រៃពិសិដ្ឋ ក្នុងទីក្រុងប៉ាលម៉ៃរ៉ា រដ្ឋញូវយ៉ក ប្រធានទូទៅទាំងពីររូបបានទាញយកភាពស្រដៀងគ្នារវាង យ៉ូសែប ស្ម៊ីធ ដែលមានអាយុ ១៤ ឆ្នាំ—ដែលបានអធិស្ឋាននៅក្នុងព្រៃនោះអំពីអ្វីដែលលោកគួរដឹង និងអ្វីដែលលោកគួរធ្វើបន្ទាប់ទៀត — និងយុវវ័យសព្វថ្ងៃនេះ ។
ប្រធាន ហ្វ្រីមែន បានសួរថា « តើយើងប៉ុន្មាននាក់មានសំណួរ ? តើយើងប៉ុន្មាននាក់មានការសង្ស័យ ? តើយើងប៉ុន្មាននាក់មានការភ័យខ្លាច ? ហើយតើយើងប៉ុន្មាននាក់ត្រូវស្វែងរក … ព្រៃផ្ទាល់របស់យើងជាកន្លែងដែលយើងអាចលុតជង្គង់ចុះ ហើយមើលទៅព្រះគ្រីស្ទ និងមើលទៅព្រះវរបិតារបស់យើងសម្រាប់សំណួរទាំងនោះដែលយើងកំពុងសួរ … ហើយដឹងថារស្មីមួយ បង្គោលពន្លឺមួយនឹងចូលមកក្នុងចលនានោះ ? »
January-2025-youth-discussion
ប្រធានយុវជនទូទៅ ស្ទីវីន ជេ ឡាន់ និងប្រធានយុវនារីទូទៅ អេមីលី បេលី ហ្វ្រីមែន កាន់បង្អួចកញ្ចក់ពណ៌ពិពណ៌នាពីរស្មីព្រះអាទិត្យ ពេលកំពុងឈរនៅក្នុងព្រៃពិសិដ្ឋ អំឡុងពេលថតសម្រាប់កិច្ចពិភាក្សាទូទាំងពិភពលោកសម្រាប់យុវវ័យខែមករា ឆ្នាំ២០២៥ ៖ វីដេអូមើលទៅព្រះគ្រីស្ទ ។© 2025 by Intellectual Reserve, Inc. All rights reserved.ប្រធាន ឡាន់ បានមានប្រសាសន៍ថា ថ្នាក់ដឹកនាំសង្ឃឹមថា យុវវ័យនឹងមើលទៅព្រះគ្រីស្ទជារៀងរាល់ថ្ងៃ « មិនមែនម្តងក្នុងមួយជីវិតទេ ប៉ុន្តែជារៀងរាល់ថ្ងៃ ដើម្បីទៅលុតជង្គង់អធិស្ឋាននៅកន្លែងពិសិដ្ឋ និងកន្លែងស្ងប់ស្ងាត់ ហើយអធិស្ឋាន ។ ... ប៉ុន្តែនិយាយជាមួយព្រះវរបិតាសួគ៌អំពីរបៀបដែលយើងអាចក្លាយជាមនុស្សល្អជាងមុន » ។
ដូចដែលព្រះបានឆ្លើយតបនឹងការអធិស្ឋានរបស់ យ៉ូសែប ស្ម៊ីធ ដែលបានពិពណ៌នាខ្លួនលោកថាជា « ក្មេងម្នាក់ដែលមិនសូវមានគេឯងស្គាល់ មិនជាអ្វីឲ្យពិភពលោកអើពើ » យើងដឹងថា « ទ្រង់នឹងឆ្លើយតបដល់ខ្ញុំ ហើយទ្រង់ ក៏នឹងឆ្លើយតបនឹងដល់ក្មួយៗដែរ » ប្រធាន ហ្វ្រីមែន បានមានប្រសាសន៍ ។ « ហើយនៅពេលយើងម្នាក់ៗមើលទៅព្រះគ្រីស្ទនៅឆ្នាំនេះ ... សេចក្ដីជំនឿនឹងកើតមាន រីឯបទពិសោធន៍ដ៏អស្ចារ្យក៏កើតមានផងដែរ ហើយយើងនឹងធ្វើសកម្មភាពដ៏ខ្លាំងក្លា » ។
ប្រធាន ឡាន់ បានបន្ថែមថា « ប្រសិនបើយើងស្តាប់ប្រធាន [ រ័សុល អិម ] ណិលសុន នោះយើងដឹងថាយើងកើតមកក្នុងគោលបំណងមួយ ហើយថាយើងត្រូវបានបញ្ជូនមកទីនេះជាមួយនឹងអំណោយទាន នៅពេលអំណោយទាំងនោះនឹងរកឃើញកន្លែងមួយ ហើយធ្វើឲ្យមានភាពខុសគ្នាយ៉ាងសំខាន់ក្នុងការនាំមកនូវភាពរុងរឿងនៃនគរព្រះ » ។
អែលឌើរ អុជដូហ្វ ក៏បានលើកឡើងពី យ៉ូសែប ស្ម៊ីធ ផងដែរ ។ លោកបានមានប្រសាសន៍ថា « ខ្ញុំសង្ឃឹមថា ក្មួយៗអាចឃើញផ្នែកតូចមួយនៃខ្លួនឯងនៅក្នុងយ៉ូសែបដ៏វ័យក្មេង » ។ « នៅឆ្នាំ១៨២០ លោកមានអាយុស្របាលនឹងក្មួយៗ ។ លោកមានសំណួរអំពីសាសនា ។ លោកមានការសង្ស័យអំពីជំហររបស់លោកនៅចំពោះព្រះ ។ លោកមានការព្រួយបារម្ភ និងការភ័យខ្លាច ដូចក្មួយៗភាគច្រើនដែរ ។ ហើយលោកមានសេចក្ដីជំនឿលើព្រះយេស៊ូវគ្រីស្ទ ។ សេចក្ដីជំនឿនោះបានដឹកនាំលោកឲ្យអធិស្ឋាន ។ លោកបានមើលទៅព្រះគ្រីស្ទ ដែលទ្រង់បានលើកលោកឲ្យលើសពីការសង្ស័យ និងការភ័យខ្លាច » ។
អែលឌើរ អុជដូហ្វ បានផ្តោតលើវិធីជាក់លាក់ពីរយ៉ាងដែលយុវវ័យអាចមើលទៅព្រះគ្រីស្ទ ដែលតំណាងដោយវត្ថុពីរដែលលោកតែងតែយកតាមខ្លួន ៖ ប័ណ្ណចូលព្រះវិហារបរិសុទ្ធ របស់លោក និងសៀវភៅណែនាំ « ដើម្បីកម្លាំងនៃយុវជន » ។
January-2025-youth-event
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ កាន់សៀវភៅណែនាំ ‹ ដើម្បីកម្លាំងនៃយុវជន › ដែលរួមបញ្ចូលនូវការណែនាំសំខាន់ៗ ដែលលើកទឹកចិត្តយុវវ័យឲ្យធ្វើការសម្រេចចិត្តដោយសុចរិត ។© 2024 by Intellectual Reserve, Inc. All rights reserved.បានថតនៅក្បែរព្រះវិហារបរិសុទ្ធ សលត៍ លេក ដែលបច្ចុប្បន្នកំពុងស្ថិតក្នុងការសាងសង់ជាថ្មី អែលឌើរ អុជដូហ្វ បានមានប្រសាសន៍ថា « ក្នុងន័យមួយ ក្មួយៗ និងខ្ញុំប្រៀបដូចជាព្រះវិហារបរិសុទ្ធនេះដែរ ។ យើងទាំងអស់គ្នាគឺជាការងារដែលកំពុងដំណើរការ នៅពេលយើងមើលទៅព្រះគ្រីស្ទ ហើយធ្វើតាមទ្រង់ ។ យើងអាចធ្វើឲ្យប្រសើរឡើងជារៀងរាល់ថ្ងៃ ឬហៅម្យ៉ាងទៀតថា ការប្រែចិត្ត ហើយតាមរយៈការណ៍នេះ យើងពង្រឹងគ្រឹះខាងវិញ្ញាណរបស់យើង និងបង្កើនសមត្ថភាពរបស់យើងដើម្បីបម្រើ ។ ហើយយើងនឹងត្រៀមខ្លួនជាស្រេចសម្រាប់អ្វីដែលអាចកើតមាននាពេលអនាគត » ។
អែលឌើរ អុជដូហ្វ បានមានប្រសាសន៍អំពីវត្ថុទីពីរ ៖ « សៀវភៅណែនាំដ៏បំផុសគំនិតសម្រាប់ការធ្វើការជ្រើសរើសនេះធានាថាក្មួយៗទទួលស្គាល់ព្រះយេស៊ូវគ្រីស្ទជាកម្លាំងរបស់ក្មួយៗ » ។
« នៅពេលក្មួយៗមានជម្រើសសំខាន់ៗដែលត្រូវធ្វើ សូមមើលទៅព្រះគ្រីស្ទ ។ នៅពេលក្មួយៗធ្វើខុស ចូរមើលទៅព្រះគ្រីស្ទ ។ នៅពេលក្មួយៗមានអារម្មណ៍តានតឹងជាមួយនឹងសំណួរ ឬការសង្ស័យ សូមមើលទៅព្រះគ្រីស្ទ ។ នៅពេលក្មួយៗភ័យខ្លាច ចូរមើលទៅព្រះគ្រីស្ទ ។ មែនហើយ យើងកំពុងរស់នៅក្នុងពិភពលោកមួយដែលអាចមានបញ្ហា និងគួរឲ្យភ័យខ្លាច » ។ « តែកុំខ្លាចអី ត្រូវមានចិត្តក្លាហាន ។ ក្មួយៗមានព្រះយេស៊ូវគ្រីស្ទនៅខាងក្មួយៗ ជាពន្លឺនៃពិភពលោក ជាព្រះអង្គសង្គ្រោះនៃពិភពលោក ។ ទ្រង់ត្រៀមខ្លួនជាស្រេចដើម្បីជួយក្មួយៗ » ។
នៅក្នុងការប្រជុំតាមមូលដ្ឋាននីមួយៗ យុវវ័យត្រូវបានលើកទឹកចិត្តឲ្យផ្អាកវីដេអូម្ដងម្កាល ដើម្បី « ជញ្ជឹងគិតដោយស្ងៀមស្ងាត់នូវពេលវេលាមួយក្នុងជីវិតរបស់ក្មួយៗ នៅពេលក្មួយៗបានទទួលពន្លឺពីស្ថានសួគ៌ » ហើយពិភាក្សាអំពីពេលវេលាដែលពួកគេជួបប្រទះនឹងការសង្ស័យ ឬការភ័យខ្លាច និងរបៀបដែលពួកគេមើលទៅព្រះគ្រីស្ទ ។
វីដេអូទាំងមូលអាចត្រូវបានមើលតាមតម្រូវការពី Media Library, YouTube និងកម្មវិធី Gospel Stream ។
សាសនាចក្រក៏បានចេញផ្សាយវីដេអូបាវចនាយុវវ័យខាងក្រោមនេះជាលើកដំបូងក្នុងអំឡុងពេលព្រឹត្តិការណ៍នោះផងដែរ ។ វាក៏មាននៅលើគេហទំព័រ Youth.ChurchofJesusChrist.org រួមជាមួយនឹងធនធានផ្សេងទៀត ដូចជានិមិត្តសញ្ញា អាល់ប៊ុមចម្រៀង និងស្នាដៃសិល្បៈដែលអាចទាញយកបាន ។
( វីដេអូនេះត្រូវបានថតនៅប្រទេសឥណ្ឌូនេស៊ី ) ។
