សន្និសីទសាសនាចក្រពង្រឹងយុវមជ្ឈិមវ័យនៅលីវនៅប្រទេសកម្ពុជា

យុវមជ្ឈិមវ័យនៅលីវ (YSA) មកពីសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយនៅទូទាំងប្រទេសកម្ពុជា បានជួបជុំគ្នានៅក្នុងសន្និសីទមួយដែលមានរយៈពេលបីថ្ងៃ ចាប់ពីថ្ងៃទី ៦-៨ ខែមករា ឆ្នាំ ២០២៣ ។ សន្និសីទនេះបានផ្តល់ឱកាសឲ្យ YSA ជាង ៣០០ នាក់បានជួបជុំគ្នាមកពីទូទាំងប្រទេសនៅរមណីយដ្ឋាន ហ្គាឌិន ស៊ីធី ជិតទីក្រុងភ្នំពេញ ដើម្បីធ្វើសិក្ខាសាលា ថ្វាយបង្គំ ល្បែងកម្សាន្ត សកម្មភាពលេងទឹក និងកម្មវិធីសាក្រាម៉ង់ថ្ងៃអាទិត្យពិសេស ។

1 / 2

Download Photos

អ្នកចូលរួមសន្និសីទត្រូវបានទទួលការស្វាគមន៍ដោយមានបដារូបភាព ប៉េងប៉ោងសម្រាប់ថតរូប និងបន្ទប់ធ្វើសន្និសីទដែលបានតុបតែងយ៉ាងស្រស់ស្អាត ។ សន្និសីទនេះបានចាប់ផ្ដើមដោយមានការច្រៀងបទចម្រៀង និងការអធិស្ឋាន ។ បន្ទាប់ពីមានការប្រកាសមួយចំនួន និងការស្វាគមន៍ដោយប្រធាន អេង ប៊ុនហួច នៃស្តេកខាងជើងប្រទេសកម្ពុជារួចហើយ YSA បានចូលរួមក្នុងការលែងល្បែងដើម្បីរៀនស្គាល់គ្នា ។ អ្នកចូលរួមត្រូវបានបែងចែកទៅជាក្រុមៗចំនួន ៣០ ហើយបន្ទាប់មកបានឆ្លើយសំណួរអំពីខ្លួនពួកគេ ។

បន្ទាប់ពីការលែងល្បែង ថ្នាក់រៀនផ្សេងៗត្រូវបានរៀបចំឡើងនៅក្នុងមជ្ឈមណ្ឌលសន្និសីទដោយមានអ្នកឡើងនិយាយដែលជ្រើសរើសដោយគណៈកម្មាធិការ YSA រួមទាំងថ្នាក់ដឹកនាំសាសនាចក្រ និងយុវមជ្ឈិមវ័យផងដែរ ។

1 / 2

Download Photos

ការងារ និងការអប់រំ គឺជាប្រធានបទដំបូងដែល ឡុង សារ៉េត នៃគណៈប្រធានបេសកកម្មភ្នំពេញកម្ពុជាបានធ្វើបទបង្ហាញ ។ គាត់បានចែកចាយដំណើររឿងមួយតាំងពីគាត់នៅក្មេង ហើយចាប់ផ្តើមធ្វើការ ។ គាត់បាននិយាយថា ខណៈពេលដែលគាត់កំពុងព្យាយាមបញ្ចប់ការរៀនសូត្រ គាត់បានចាប់ផ្តើមធ្វើការជាមគ្គុទ្ទេសក៍ ប៉ុន្តែនៅតែត្រូវការលុយបន្ថែមទៀត ដូច្នេះគាត់បានចាប់យកការងារទីពីរគឺខាត់ស្បែកជើង ។ គាត់បាននិយាយថា យើងគួរតែចាប់ផ្តើមពីការងារតូចមួយ ប្រហែលជាមិនមែនជាការងារដែលយើងចង់បានជាអាជីពរបស់យើងជារៀងរហូតនោះ ប៉ុន្តែវាគឺជាការចាប់ផ្តើមការងារដែលប្រសើរជាង ។ យើងគួរតែធ្វើការ និងខិតខំសិក្សា ។ បងប្រុស សារ៉េត បាននិយាយថា ទោះបីជាគាត់មានការងារធ្វើតាំងពីក្មេងក៏ដោយ ក៏គាត់បានបន្តការសិក្សា និងអភិវឌ្ឍដើម្បីឲ្យគាត់អាចផ្គត់ផ្គង់គ្រួសាររបស់គាត់កាន់តែប្រសើរដែរ ។

អ្នកឡើងនិយាយទីពីរគឺប្រធាន សៀ សំណាង ។ ប្រធាន សំណាងបាននិយាយអំពីការអប់រំ ហើយបាននិយាយថា យើងមិនគួរពន្យារពេលការអប់រំរបស់យើងទេ ។ គាត់បានពិភាក្សាអំពីរបៀបដែលការអប់រំបើកឱកាសឲ្យយើងមានការងារកាន់តែប្រសើរ ។ គាត់បានពិភាក្សាអំពីរបៀបស្វែងរកចម្លើយចំពោះសំណួរទាំងឡាយពីរបៀបដែលយើងដឹងពីកន្លែងដែលយើងគួរទៅ និងអ្វីដែលយើងគួរធ្វើ ។ គាត់បានមានប្រសាសន៍ថា ព្រះវរបិតាសួគ៌ញាណដឹងពីអ្វីដែលយើងត្រូវការ ហើយអាចដឹកនាំយើងក្នុងការសម្រេចចិត្តរបស់យើង ។ គាត់បានចែកចាយសម្រង់មួយដែលគាត់ធ្លាប់ឮពីជីតារបស់គាត់ពេលជួបបញ្ហា ។ គាត់និយាយថា ៖ « ក្រោយភ្លៀងមេឃស្រឡះ » ។ គាត់បានស្នើឲ្យ YSA ពិចារណាថាតើពួកគេជានរណា និងអ្វីដែលពួកគេចង់ប្រែក្លាយ ហើយដាក់គោលដៅ និងផ្តោតលើអ្វីដែលពួកគេចង់សម្រេចបាន ហើយនៅពេលដែលជួបការលំបាក ពួកគេនឹងកាន់តែប្រសើរឡើង ។

អ្នកឡើងនិយាយពីរនាក់ទៀតគឺជា YSA ។ ឱអ៊ុម ចៅបូរាណ បាននិយាយអំពីរបៀបដែល BYU Pathways Worldwide បានផ្លាស់ប្តូរជីវិតរបស់គាត់ ។ គាត់បានចាប់ផ្តើមរៀន Pathway បន្ទាប់មករៀន BYU អៃដាហូ ហើយឥឡូវនេះគាត់នឹងចូលរៀននៅសាកលវិទ្យាល័យ BYU-ហាវៃ ។ គាត់បាននិយាយថា « សូមទីពឹងលើព្រះអម្ចាស់ សូមបន្តរៀន Pathway ដើម្បីយើងអាចបន្តការអប់រំបាន » ។

Devona Jackson បាននិយាយអំពីការអប់រំ និង BYU Pathways Worldwide ។ Devona គឺជា YSA ហើយមានសញ្ញាបត្រ ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតផ្នែកកម្មវិធីអប់រំ ។ នាងបាននិយាយថា ការអប់រំគឺជាច្រកទៅកាន់អនាគតដ៏ល្អភ្លឺស្វាង និងជារបៀបមួយក្នុងការផ្គត់ផ្គង់គ្រួសារបានកាន់តែប្រសើរ ហើយធ្វើជាអ្នកបម្រើកាន់តែប្រសើរក្នុងសាសនាចក្រ ។ BYU Pathways Worldwide ផ្តល់ជាជំនួយនូវឧបករណ៍ទាំងនោះ ។

ប្រធាន យ៉ិន ផល្លា និយាយអំពីអាពាហ៍ពិពាហ៍ និងការរកគូ ។ គាត់បាននិយាយថា យើងគួរដាក់គោលដៅ និងនៅក្នុងបរិយាកាសល្អ ។ គាត់បានណែនាំយើងថាយើងគួរតែខិតខំ និងចំណាយពេលរបស់យើងដោយឈ្លាសវៃ ហើយមិនត្រូវផ្ដោតលើសម្ភារនិយមទេ ។

ព្រះវិហារបរិសុទ្ធគឺជាប្រធានបទពិភាក្សាដោយ ប្រធាន ទូច សោភ័ណ្ឌ ។ គាត់បាននិយាយអំពីតម្រូវការ និងគោលបំណងដើម្បីរៀបការនៅក្នុងព្រះវិហារបរិសុទ្ធ ។ គាត់បាននិយាយថា ការរៀបអាពាហ៍ពិពាហ៍ក្នុងព្រះវិហារបរិសុទ្ធ គឺចាំបាច់ដើម្បីទទួលបានពរជ័យដ៏អស្ចារ្យបំផុតនៃដំណឹងល្អ ។

បងស្រី ម៉ារី ណា ដែលជាអ្នកប្រឹក្សាពង្សប្រវត្តិមកពីស្តេកខាងជើង បានចែកចាយជំនាញរបស់គាត់ពី ពង្សប្រវត្តិ និងតម្រូវការក្នុងការរៀបចំខ្លួនទៅព្រះវិហារបរិសុទ្ធ ដោយទាញយកកម្មវិធីពង្សប្រវត្តិ និងបញ្ចូលឈ្មោះគ្រួសារទៅក្នុងគណនីផ្ទាល់ខ្លួន ។ គាត់បានសុំឲ្យ YSA ប្រើទូរសព្ទដៃរបស់ពួកគេ ហើយទាញយកកម្មវិធីនេះ ហើយចូលក្នុងគណនីរបស់ពួកគេ ។

ថ្នាក់រៀននៅថ្ងៃសុក្រមានអ្នកចូលរួមជិត ២៥០ នាក់ ហើយមាន YSA ជាង ៣០០ នាក់នៅសន្និសីទនាថ្ងៃសៅរ៍ និងថ្ងៃអាទិត្យ ។ ពេលបញ្ចប់ថ្នាក់ ពួកគេបានផ្អាកទទួលទានអាហារពេលល្ងាចនៅក្នុងសណ្ឋាគារ ដែលជាអាហារបែបប៊ូហ្វេដ៏ឆ្ងាញ់ពិសារ ។ សន្និសីទថ្ងៃដំបូងបានបញ្ចប់ដោយវគ្គសំណួរ-ចម្លើយ ជាមួយសមាជិកក្រុម ដែលរួមមានអ្នកឡើងនិយាយក្នុងសន្និសីទមួយចំនួន និងថ្នាក់ដឹកនាំសាសនាចក្រ និងស្តេក ។

សន្និសីទថ្ងៃទីពីរ YSA ចូលរួមនៅសួនទឹកក្បែរនោះ ដែលមានកន្លែងរអិលលើទឹក អាងទឹករលក និងក្ដារជិះលើរលក ។ អាកាសធាតុមានសភាពត្រជាក់ និងមានភ្លៀងធ្លាក់ខ្លាំង ប៉ុន្តែកត្តាទាំងនេះមិនបានរារាំងថ្ងៃដ៏រីករាយនៅក្នុងទឹក និងបានជួបមិត្តភក្តិថ្មីៗមកពីទូទាំងប្រទេសកម្ពុជានោះទេ ។

1 / 2

Download Photos

អាហារពេលល្ងាចត្រូវបានធ្វើឡើងនៅភោជនីយដ្ឋាន ស៊ូ ស៊ូគីស៊ុប ក្នុងរាជធានីភ្នំពេញ ។ ភោជនីយដ្ឋាននេះមានទំហំធំ ហើយអាចផ្ទុកឡានក្រុង និង YSA និងអ្នកដឹកនាំទាំងអស់ ហើយគ្រប់គ្នាចូលចិត្តអាហារនៅទីនេះ ។

សន្និសីទថ្ងៃទីពីរបានបញ្ចប់ដោយមានពិធីជប់លៀងនៅអាងហែលទឹកដែលមានការរាំ ច្រៀង និងលេងជុំវិញតំបន់អាងរយៈពេលបីម៉ោង ។

1 / 2

Download Photos

ព្រឹកថ្ងៃអាទិត្យបានប្រារព្ធឡើងនៅក្នុងបន្ទប់សន្និសីទដ៏ធំ ដែល YSA រីករាយនឹងការប្រជុំសាក្រាម៉ង់ខាងវិញ្ញាណដ៏ពិសេស ដែលធ្វើឡើងដោយ YSA ម្នាក់ ។ អ្នកកាន់បព្វជិតភាពមកពីស្តេក និងមណ្ឌលនីមួយៗបានប្រសិទ្ធពរ និងចែកសាក្រាម៉ង់ ។ បុគ្គលម្នាក់បានពិពណ៌នាថាវាជា « ព្រឹត្តិការណ៍ដ៏ពិសេស និងបរិសុទ្ធពោរពេញដោយព្រះវិញ្ញា » ។ អំឡុងពេលផ្នែកប្រជុំសាក្រាម៉ង់ វាស្ងប់ស្ងាត់ខ្លាំងណាស់ដែលអ្នកអាចឮសំឡេងអ្វីធ្លាក់បាន ។

ប្រធាន អេង បានមានប្រសាសន៍ថា « វាជាអព្ភូតហេតុមួយ ដែលគិតថា យុវមជ្ឈិមវ័យ ៣០០ នាក់ បានជួបជុំគ្នាមកពីទូទាំងប្រទេស នៅកន្លែងតែមួយដូច្នេះ ។ ខ្ញុំជឿថា មនុស្សស្ទើរតែគ្រប់គ្នានៅក្នុងបន្ទប់នោះត្រូវបានរំជួលចិត្តដោយគារវភាព និងព្រះវិញ្ញាណដែលគង់នៅ នៅពេលយើងបន្តសេចក្តីសញ្ញារបស់យើងជាមួយគ្នា ហើយវាជាលើកទីមួយហើយ ដែលសមាជិកមកពីគ្រប់តំបន់នៃប្រទេសកម្ពុជាបានជួបជុំគ្នាដើម្បីទទួលទានសាក្រាម៉ង់ជាមួយគ្នាជា YSA បែបនេះ » ។

បន្ទាប់ពីផ្នែកសាក្រាម៉ង់នៃកិច្ចប្រជុំ សមាជិក YSA ប្រមាណ ៣០ នាក់បានឈរ ហើយចែកចាយទីបន្ទាល់ និងបទពិសោធន៍របស់ពួកគេអំពីសន្និសីទ និងពីរបៀបដែលពួកគេឥឡូវនេះយល់ពីសារៈសំខាន់នៃអាពាហ៍ពិពាហ៍ក្នុងព្រះវិហារបរិសុទ្ធ ហើយមិនពន្យារពេលទៀតឡើយ ហើយអ្នកខ្លះថែមទាំងបានចែកចាយថា ពួកគេនឹងទៅបម្រើបេសកកម្មដោយសារតែ អ្វីដែលពួកគេបានរៀន និងទទួលអារម្មណ៍ពេញមួយសកម្មភាពនេះ ។ YSA មួយចំនួនបានបង្ហាញអារម្មណ៍ថា ពួកគេមិនត្រឹមតែរីករាយនឹងសកម្មភាពនេះប៉ុណ្ណោះទេ ប៉ុន្តែពួកគេស្ម័គ្រចិត្តធ្វើការផ្លាស់ប្តូរសំខាន់ៗក្នុងជីវិតដោយសារតែសកម្មភាពនេះ ។

1 / 2

Download Photos

នៅចុងបញ្ចប់នៃការប្រជុំរបស់យើង ប្រធានបេសកកម្មកម្ពុជា ប្រធាន នាង គួនណូវាសនា បានថ្លែងទីបន្ទាល់ថា YSA គឺជាជំនាន់ដែលព្រះអម្ចាស់បានរៀបចំសម្រាប់ថ្ងៃចុងក្រោយ ហើយថា « អ្នកដែលនៅក្នុងការប្រជុំនេះនឹងក្លាយជាអ្នកដឹកនាំនៃសាសនាចក្រដែលបានស្ដារឡើងវិញរបស់ព្រះគ្រីស្ទ នាពេលអនាគត » ។ គាត់បានមានប្រសាសន៍ថា « ប្អូនៗគឺជាបុត្រាបុត្រីរបស់ព្រះ មុនពេលដែលពិភពលោកផ្តល់ឲ្យប្អូនៗ ហើយប្អូនៗត្រូវជឿលើសក្តានុពលរបស់ប្អូនៗ » ។

សន្និសីទនេះបានបញ្ចប់ដោយមានអាហារថ្ងៃត្រង់នៅសណ្ឋាគារ មុនពេលចេញដំណើរទៅកាន់គោលដៅជាច្រើនរបស់ពួកគេ ។ មនុស្សជាច្រើនបានធ្វើដំណើរមកពីខេត្តដើម្បីរីករាយនឹងវត្តមានរបស់គ្នាទៅវិញទៅមក ។ YSA ខ្លះបានធ្វើដំណើរច្រើនជាងប្រាំពីរម៉ោងដើម្បីជួបជាមួយ YSA ផ្សេងទៀតដែលចែកចាយជំនឿដូចគ្នា ។ សន្និសីទ YSA ទូទាំងប្រទេស ជារឿយៗជាឱកាសតែមួយគត់ដែល YSA ត្រូវជួបជាមួយអ្នកផ្សេងទៀតដែលមានជំនឿដូចគ្នា ។

ភាពជោគជ័យនៃសន្និសីទនេះកើតចេញពីគណៈកម្មាធិការរៀបចំផែនការ YSA ប្រជុំរួមគ្នានៅដើមរដូវក្តៅ ដើម្បីចាប់ផ្តើមការរៀបចំ ។ ការពិភាក្សាអំពីប្រធានបទសម្រាប់សន្និសីទបានចាប់ផ្តើមនៅខែសីហា និងខែកញ្ញា ឆ្នាំ ២០២២ ។ នៅប៉ុន្មានសប្តាហ៍ចុងក្រោយមុនពេលសន្និសីទធ្វើឲ្យគណៈកម្មាធិការរៀបចំផែនការ YSA ប្រញាប់ប្រញាល់ដើម្បីបញ្ចប់ការរៀបចំចុងក្រោយ ។ សមាជិកគណៈកម្មាធិការបានមកដល់សន្និសីទមុនកាលកំណត់ ដើម្បីតុបតែង និងរៀបចំសម្រាប់ការមកដល់របស់ភ្ញៀវ ។

YSA ត្រូវបានសួរថាតើពួកគេចូលចិត្តអ្វីជាងគេអំពីសន្និសីទ ។ រដ្ឋា ថានាងចូលចិត្តការនិយាយអំពី Pathways និងការអប់រំព្រោះ Pathways បានផ្លាស់ប្តូរជីវិតរបស់នាង ។ ឆាងលីម បាននិយាយថា នាងចូលចិត្តសន្និសីទ និងចូលចិត្តការពិភាក្សាអំពីអាពាហ៍ពិពាហ៍ និងព្រះវិហារបរិសុទ្ធបំផុត ។ នាងក៏បាននិយាយដែរថា នាងមានមិត្តភក្តិដែលប្រាប់នាងថាដោយសារសន្និសីទនេះពួកគេនឹងធ្វើការផ្លាស់ប្តូរជាវិជ្ជមានក្នុងជីវិតរបស់ពួកគេ ។ មនុស្សជាច្រើនទៀតចូលចិត្តថ្នាក់រៀន និងការប្រជុំសាក្រាម៉ង់ ។

សន្និសីទ​សាសនាចក្រ​ពង្រឹង​យុវមជ្ឈិមវ័យ​នៅលីវ​នៅ​ប្រទេស​កម្ពុជា

សន្និសីទសាសនាចក្រពង្រឹងយុវមជ្ឈិមវ័យនៅលីវនៅប្រទេសកម្ពុជា