ម៉ម សុម៉ាលី ជាអ្នករួចជីវិតពីទាសភាពផ្លូវភេទ ។ គាត់ត្រូវបានគេលក់តាំងពីក្មេងឲ្យទៅផ្ទះបនក្នុងរាជធានីភ្នំពេញ ហើយបានស៊ូទ្រាំនឹងការកេងប្រវ័ញ្ច និងការរំលោភបំពានជាច្រើនឆ្នាំ ។ សព្វថ្ងៃនេះ គាត់គឺជាអ្នកដឹកនាំដ៏មានកេរ្តិ៍ឈ្មោះមួយរូប ដែលត្រូវបានទទួលស្គាល់ទូទាំងពិភពលោកសម្រាប់កិច្ចខិតខំប្រឹងប្រែងរបស់គាត់ក្នុងការជួយដល់កុមារី និងស្ត្រីវ័យក្មេងកម្ពុជា ដែលរងគ្រោះដោយការចាប់រំលោភ ការជួញដូរផ្លូវភេទ និងការរំលោភបំពាន ។
សមាគមនិកាយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានគាំទ្រដល់បេសកកម្មរបស់ សុម៉ាលី ជាមួយនឹងការបរិច្ចាគសំខាន់ៗជាច្រើនដល់មជ្ឈមណ្ឌល និងអគារស្នាក់នៅរបស់គាត់ សម្រាប់ជនរង គ្រោះវ័យក្មេងដោយសារការរំលោភបំពានផ្លូវភេទនៅក្នុងទីក្រុងភ្នំពេញ ។ មជ្ឈមណ្ឌលនេះត្រូវបានបង្កើតឡើងដោយសុម៉ាលី ក្នុងឆ្នាំ១៩៩៦ ហើយបានដាក់ឈ្មោះថា « AFESIP Cambodia ៖ ការជួយដល់ស្ត្រីក្នុងស្ថានភាពលំបាក » ។
DOWNLOADមជ្ឈមណ្ឌលនេះបានផ្តល់ជំនួយដល់ស្ត្រីវ័យក្មេងរាប់ពាន់នាក់ជាមួយនឹងការព្យាបាល កន្លែងស្នាក់នៅ អាហារ ការអប់រំ ការណែនាំអំពីអាជីព និងសូម្បីតែជួយនៅតុលាការ ដើម្បីនាំជនរំលោភបំពានមកកាន់តុលាការ ។ មជ្ឈមណ្ឌលផ្តល់ជំនួយចាំបាច់ទាំងអស់ដើម្បីផ្តល់ឱកាសដល់ស្ត្រីវ័យក្មេងក្នុងការព្យាបាល ចូលសាលារៀន ទទួលបានការងារ និងធ្វើជាសមាជិកប្រកបដោយផលិតភាពក្នុងសង្គម ។ វាបង្រៀនក្មេងស្រីៗថា ពួកគេមិនមែនជាជនរងគ្រោះនោះទេ ប៉ុន្តែជាអ្នករស់រានមានជីវិត ហើយពួកគេមានសមត្ថភាពជាសះស្បើយពីការរំលោភបំពានរបស់ពួកគេ និងដឹកនាំជីវិតដោយជោគជ័យ ។
អែលឌើរ និង ស៊ីស្ទើរ នីល និង ខារ៉ូល អាន ឃ្លីងហ្គឺ ដែលជាពួកអ្នកផ្សព្វផ្សាយសាសនាផ្នែកមនុស្សធម៌នៅក្នុងប្រទេសកម្ពុជា សម្រាប់សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានមានប្រសាសន៍ថា សាសនាចក្របានជួយគាំទ្រដល់ AFESIP ជាមួយនឹងគម្រោងជាច្រើនក្នុងរយៈពេលប៉ុន្មានឆ្នាំចុងក្រោយនេះ ។
ក្នុងអំឡុងពេលនៃដំណើរទស្សនកិច្ចទៅកាន់ AFESIP នាពេលថ្មីៗនេះ អែលឌើរ ឃ្លីងហ្គឺ បានមានប្រសាសន៍ថា « វាគឺជាចំណុចសំខាន់នៃបេសកកម្មរបស់យើងក្នុងការមកទស្សនកិច្ចនៅមជ្ឈមណ្ឌលនេះ ហើយផ្តល់ជំនួយដល់ពួកគេ ។ នេះពិតជាកម្មវិធីដ៏ល្អមួយ ។ វាដំណើរការបានល្អ និងមានវិជ្ជាជីវៈខ្ពស់ ។ មជ្ឈមណ្ឌល និងបុគ្គលិករបស់ខ្លួនកំពុងធ្វើឲ្យមានការផ្លាស់ប្តូរយ៉ាងពិតប្រាកដនៅក្នុងជីវិតរបស់កុមារ និងស្ត្រីវ័យក្មេងទាំងនេះ » ។
ក្មេងស្រីៗខ្លះស្ថិតនៅក្នុងកម្មវិធី AFESIP អស់រយៈពេលជាច្រើនឆ្នាំ ។ បុគ្គលិក AFESIP ប្រហែល ៨០ ភាគរយគឺជាជនរងគ្រោះពីការរំលោភបំពានខ្លួនឯងផ្ទាល់ ហើយឥឡូវនេះធ្វើការនៅមជ្ឈមណ្ឌលដែលគាំទ្រដល់ជនរងគ្រោះវ័យក្មេងផ្សេងទៀត ។
កម្មវិធីនេះបច្ចុប្បន្នកំពុងជួយក្មេងស្រីៗចំនួន ១៦៨ នាក់ ដែលត្រូវបានរំលោភបំពានផ្លូវភេទ រំលោភសេពសន្ថវ: ឬជួញដូរ ។ ក្មេងស្រីប្រហែល ៩០ នាក់ដែលមានអាយុពី ៦ ទៅ ១៨ ឆ្នាំកំពុងរស់នៅក្នុងកន្លែងស្នាក់នៅរបស់មជ្ឈមណ្ឌល ។ យុវនារីធំៗមួយចំនួនបានបញ្ចប់ការសិក្សានៅវិទ្យាល័យរដ្ឋរួចហើយ ហើយត្រូវបានផ្តល់ជំនួយគាំទ្ររយៈពេលវែងរស់នៅខាងក្រៅមជ្ឈមណ្ឌលក្នុងអាផាតមិន ជាធម្មតាជាមួយនឹងនិស្សិតបញ្ចប់ការសិក្សាផ្សេងទៀត ។ ពួកគេចូលរៀននៅមហាវិទ្យាល័យ ឬទទួលការបណ្តុះបណ្តាលជំនាញវិជ្ជាជីវៈផ្សេងៗ ។ ថែមទាំងមានថវិកាបន្តិចបន្តួចសម្រាប់ជួយដល់ស្ត្រីវ័យក្មេងចាប់ផ្តើមអាជីវកម្មខ្នាតតូចបន្ទាប់ពីពួកគេទទួលបានការបណ្តុះបណ្តាលរួចហើយ ។
ការវាយតម្លៃផ្នែកវេជ្ជសាស្រ្តត្រូវបានធ្វើឡើងនៅពេលដែលក្មេងស្រីៗមកដល់សាលាភ្លាមៗ ដើម្បីកំណត់ពីទំហំនៃរបួសដែលពួកគេអាចទទួលរងពីការរំលោភបំពាន ។ ក្មេងស្រីៗចូលរៀននៅសាលារដ្ឋ និងទទួលការថែទាំសុខភាព និងការព្យាបាលជាក្រុម និងជាបុគ្គល ។ ពួកគេមានមេធាវី និងត្រូវបានគាំទ្រក្នុងការឡើងតុលាការ និងផ្តល់សក្ខីកម្ម ប្រសិនបើចាំបាច់ក្នុងការកាត់ទោសជនល្មើស ។
DOWNLOADគោលបំណងរបស់ AFESIP គឺផ្តល់ការលើកកម្ពស់ដល់ក្មេងស្រីៗឲ្យធ្វើជាជនរស់រានមានជីវិត មិនមែនជាជនរងគ្រោះទេ ។ គោលដៅក៏ដើម្បីបង្រួបបង្រួមក្មេងស្រីជាមួយក្រុមគ្រួសាររបស់ពួកគេឡើងវិញ ប្រសិនបើសមរម្យ ។
អគាររបស់ AFESIP រួមមាន គ្លីនិកសុខភាពដែលមានវេជ្ជបណ្ឌិតក្រៅម៉ោង និងគិលានុបដ្ឋាយិកាពេញម៉ោង ។ មានអ្នកប្រឹក្សាយោបល់ និងអ្នកព្យាបាលដើម្បីធ្វើការជាមួយក្មេងស្រីៗ ។ បន្ទប់មួយត្រូវបានប្រើសម្រាប់ការវាយ តម្លៃ និងបន្ទប់មួយទៀតនៅដាច់ដោយឡែក ប្រសិនបើក្មេងស្រីៗមានជំងឺឆ្លង ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានជួយចំណាយសម្រាប់ការជួសជុលគ្លីនិកសុខភាព ហើយបានបរិច្ចាគឧបករណ៍សម្រាប់វាស់កម្រិតជាតិស្ករក្នុងឈាម A1C ឧបករណ៍ចាប់សញ្ញា និងឧបករណ៍ចាំបាច់ផ្សេងទៀតសម្រាប់គ្លីនិក ។
ការចូលរួមរបស់សាសនាចក្របានចាប់ផ្តើមនៅឆ្នាំ២០២៣ ។ ការបរិច្ចាគដំបូងរួមមាន កុំព្យូទ័រយួរដៃថ្មី កង់ ៣០ គ្រឿង ឯកសណ្ឋានសិស្ស ១០០កំប្លេ រទេះរុញ និងតុក្បែរគ្រែ ម៉ាស៊ីនអេម៉ូក្រាមនិងជីវគីមីសាស្រ្ត សម្ភារសិក្សាផ្សេងៗ សម្ភារបណ្ណាល័យ រួមទាំងសៀវភៅ ២០០ក្បាល ទូសៀវភៅ តុ និងកៅអី គ្រឿងសង្ហារិមផ្សេងទៀត គំនូរបិទលើជញ្ជាំង និងផែនទីពិភពលោក និងកាមេរ៉ាសុវត្ថិភាព ។
ចាប់តាំងពីពេលនោះមក សាសនាចក្របានបរិច្ចាគកុំព្យូទ័រយួរដៃ និងម៉ាស៊ីនបោះពុម្ពថ្មីបន្ថែម ការជួសជុលដំបូលលេច និងម៉ាស៊ីនបូមទឹកធុនធ្ងន់ ដើម្បីការពារទឹកជំនន់នៅកណ្តាលទីធ្លា ។
នៅថ្ងៃទី១៥ ខែមករា ឆ្នាំ២០២៥ ចុះធ្វើទស្សនកិច្ចនៅមជ្ឈមណ្ឌលដើម្បីប្រគល់កុំព្យូទ័រយួរដៃ និងម៉ាស៊ីនបោះពុម្ពបន្ថែមទៀត អែលឌើរ និងស៊ីស្ទើរ ឃ្លីងហ្គឺ និងអ្នកចូលរួមផ្សេងទៀតត្រូវបានស្វាគមន៍យ៉ាងកក់ក្ដៅជាមួយនឹងកម្មវិធី « អរគុណ » ដ៏ធំមួយពីក្មេងស្រីៗ និងអ្នកដឹកនាំមជ្ឈមណ្ឌល ។
លីន ស៊ីឡរ ជាអគ្គនាយកអង្គការ AFESIP Cambodia និង សៅ ឈឿត នាយកសហកម្មវិធី បានផ្តល់ដំណើរនៃទស្សនកិច្ចនេះទៅកាន់មជ្ឈមណ្ឌល និងគ្លីនិកសុខភាព ដោយបង្ហាញពីអំណោយជាច្រើនរបស់សាសនាចក្រ ។ ម៉ម សុម៉ាលី ស្ថាបនិកមជ្ឈមណ្ឌលនេះ មិនបាននៅមជ្ឈមណ្ឌលនោះទេ ខណៈដែលគាត់កំពុងធ្វើដំណើរទៅខេត្តផ្សេង ដើម្បីតាមដានអតីតសិស្ស និងទៅសួរសុខទុក្ខសិស្សដែលឈឺ ។
ភ្ញៀវដែលចូលរួមបានទស្សនាបណ្ណាល័យ និងថ្នាក់រៀនដែលបង្រៀនជំនាញភាសាអង់គ្លេស និងកុំព្យូទ័រ ។ ពួកគេបានឃើញពីរបៀបដែលក្មេងស្រីៗកំពុងប្រើកុំព្យូទ័រដើម្បីបង្កើតវីដេអូប្រាប់ពីដំណើររឿងផ្ទាល់ខ្លួនរបស់ពួកគេជាផ្នែកនៃការព្យាបាលរបស់ពួកគេ ។ ក្មេងស្រីៗទាំងនោះរស់នៅជាន់ទីពីរនៃមជ្ឈមណ្ឌលនេះក្នុងបន្ទប់រួមមានក្មេងស្រី ៥-៦ នាក់ក្នុងមួយបន្ទប់ ។ នៅថ្ងៃអាទិត្យ ក្មេងស្រីៗទាំងនេះត្រូវបានបង្រៀនឲ្យរាំរបាំប្រពៃណីខ្មែរ ។ ពួកគេរីករាយនឹងពេលវេលាសមាធិជារៀងរាល់ថ្ងៃ ។
លីន ស៊ីឡរ បានប្រាប់ទៅភ្ញៀវថា « AFESIP Cambodia សូមកោតសរសើរដល់សមាគមនិកាយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដោយសារឧបករណ៍ដែលមានគុណភាពខ្ពស់ៗត្រូវបានបរិច្ចាគ ហើយពួកអ្នកផ្សព្វផ្សាយសាសនាបានស្វែងយល់ពីនាយកនូវអ្វីដែលចាំបាច់ មុនពេលពួកគាត់សម្រេចចិត្តធ្វើការការបរិច្ចាគ ។
ក្មេងស្រីៗដែលទទួលបានកុំព្យូទ័រយួរដៃបានសម្តែងការដឹងគុណ និងរៀបរាប់អំពីវគ្គសិក្សារបស់ពួកគេ ។ ពួកគេមួយចំនួនបាននិយាយថាពួកគេចង់ធ្វើជាមេធាវី ហើយក្មេងស្រីម្នាក់បាននិយាយថា នាងចង់ធ្វើជាអ្នកចិត្តសាស្រ្តគ្លីនិក ។
ក្មេងស្រីតូចៗបំផុតមួយក្រុមនៅមជ្ឍមណ្ឌលបានឈរនៅចំពោះមុខភ្ញៀវមកពីសាសនាចក្រ ហើយប្រាប់ឈ្មោះ អាយុ និងអ្វីដែលពួកគេចង់ធ្វើ ពេលពួកគេធំឡើង ។ បន្ទាប់មក ពួកគេសូត្រកំណាព្យដ៏អស្ចារ្យក្នុងសំឡេងតែមួយ ។
ពួកអ្នកផ្សព្វផ្សាយសាសនាមកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ រួមទាំងពួកអែលឌើរ និងស៊ីស្ទើរវ័យក្មេងជាច្រើននាក់ បានទៅលេងមជ្ឈមណ្ឌលកាលពីថ្ងៃទី២៥ ខែធ្នូ កន្លងទៅ សម្រាប់ពិធីជប់លៀងបុណ្យណូអែល ។ ពួកអ្នកផ្សព្វផ្សាយសាសនាវ័យក្មេងបានយកនំឃុកឃីមកបរិភោគ និងគ្រាប់អង្កាំសម្រាប់ធ្វើខ្សែដៃជាមួយក្មេងស្រីៗ ។ ពួកគេទាំងអស់គ្នាបានចូលរួមពិធីជប់លៀងដ៏រីករាយ ។ ក្មេងស្រីៗបានចងចាំការមកលេងក្នុងថ្ងៃបុណ្យណូអែល ហើយរីករាយដែលបានឃើញពួកអ្នកផ្សព្វផ្សាយសាសនារៀមច្បងម្តងទៀត ។
DOWNLOADដំណើរទស្សនកិច្ចនេះបានបញ្ចប់ដោយការថតរូបជាក្រុមជាមួយក្មេងស្រីៗ គ្រូបង្រៀន និងនាយក – និងការឱបដ៏រំជួលចិត្តក្រៃលែង ។ ស៊ីស្ទើរ ឃ្លីងហ្គឺ បានមានប្រសាសន៍ថា « យើងពិតជាមានអារម្មណ៍កោតសរសើរ និងក្តីស្រឡាញ់ដែលពួកយើងបានមកទីនេះ និងការគាំទ្ររបស់សាសនាចក្រសម្រាប់មជ្ឈមណ្ឌលនេះ ។ នេះគឺជាគម្រោងមួយក្នុងចំណោមគម្រោងដែលយើងចូលចិត្តបំផុត » ។
ពួកអ្នកផ្សព្វផ្សាយសាសនាបានថ្លែងថា ពួកគេបានកោតសរសើរចំពោះការបរិច្ចាគដ៏សប្បុរសធម៌របស់សមាជិកសាសនាចក្រទូទាំងពិភពលោក ដែលធ្វើការបរិច្ចាគដល់ AFESIP និងបុព្វហេតុដ៏ស័ក្តិសមផ្សេងទៀតដែលអាចធ្វើទៅបាន ។