សមាគមសង្គ្រោះដឹកនាំកិច្ចខិតខំប្រឹងប្រែងជាសកលដើម្បីកែលម្អសុខភាព និងសុខ

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ កំពុងពង្រីកកិច្ចខិតខំប្រឹងប្រែងរបស់ខ្លួនដើម្បីជួយដល់ស្ត្រី និងកុមារអាយុក្រោម ៥ ឆ្នាំនៅជុំវិញពិភពលោក ។

គោលបំណងដែលដឹកនាំដោយគណៈប្រធានសមាគមសង្គ្រោះទូទៅនៃសាសនាចក្រ គឺដើម្បីពង្រឹងកម្មវិធីសុខភាព និងអាហារូបត្ថម្ភ ដោយការចូលរួមជាមួយអង្គការមិនស្វែងរកប្រាក់ចំណេញចំនួនប្រាំបី ។ កម្មវិធីទាំងនេះនឹងផ្តល់អត្ថប្រយោជន៍ដល់កុមាររាប់លាននាក់នៅទូទាំងពិភពលោក ។ អង្គការមិនស្វែងរកប្រាក់ ចំណេញទាំងនោះ រួមមាន ៖

អង្គការ CARE International
អង្គការ Catholic Relief Services
អង្គការ Helen Keller Intl
អង្គការ iDE
អង្គការ MAP International
អង្គការ Save the Children
អង្គការ The Hunger Project
អង្គការ Vitamin Angels

ការរួមចំណែក និងផលប៉ះពាល់

1 / 2

Download Photos

Downloadable b-roll and SOTs

ខណៈពេលនៅអាមេរិកកណ្តាលសង្កេតមើលការងារមួយចំនួនដែលបានផ្តួចផ្តើមកាលពីឆ្នាំមុនដើម្បីជួយដល់ ស្រ្តី និងកុមារ ប្រធានសមាគមសង្រ្គោះទូទៅ ខាំមៀល អិន ចនសុន បានប្រកាសពីរបៀបដែលកិច្ចខិតខំប្រឹងប្រែងនេះនឹងពង្រីក ។ សាសនាចក្របរិច្ចាគទឹកប្រាក់ចំនួន ៥៥.៨ លានដុល្លារអាមេរិកដល់អង្គការទាំងឡាយខាងលើ ។ អង្គការទាំងនេះនឹងប្រើប្រាស់មូលនិធិនេះដើម្បីផ្តល់ពរជ័យដល់ស្ត្រី និងកុមារក្នុងប្រទេសចំនួន ១២ ដែលមានតម្រូវការខ្ពស់ ។

ទឹកប្រាក់នេះនឹងជួយដល់កុមារដែលមានអាយុក្រោម ៥ ឆ្នាំ ចំនួន ១២ លាននាក់ និងស្រ្តីមានផ្ទៃពោះចំនួន ២.៧ លាននាក់ និងម្តាយវ័យក្មេងនៅទីតាំងដូចខាងក្រោម ៖ ប្រទេសបង់ក្លាដែស, ប្រទេសកម្ពុជា, សាធារណរដ្ឋប្រជាធិបតេយ្យកុងហ្គោ, ប្រទេសហ្គាណា, ប្រទេសកេនយ៉ា, ប្រទេសម៉ាលី, ប្រទេសនេប៉ាល់, ប្រទេសនីហ្សេរីយ៉ា, ប្រទេសហ្វីលីពីន, ប្រទេសសេណេហ្គាល់, ប្រទេសសេរ៉ាឡេអូន និងប្រទេសសំប៊ី ។

ប្រធាន ចនសុន បានមានប្រសាសន៍ថា « ការរីកចម្រើនជាសកលចាប់ផ្តើមដោយការចិញ្ចឹមកូន និងការពង្រឹងដល់ស្ត្រីទាំងឡាយ ។ នៅពេលយើងផ្ដល់ពរជ័យដល់ស្រ្តីម្នាក់ នោះអ្នកផ្ដល់ពរជ័យដល់ក្រុមគ្រួសារមួយ សហគមមួយ និងប្រជាជាតិមួយ ។ នៅពេលអ្នកផ្ដល់ពរជ័យដល់កុមារម្នាក់ អ្នកកំពុងវិនិយោគលើអនាគត » ។

ទីប្រឹក្សារបស់ប្រធាន ចនសុន បានទៅទស្សនកិច្ចទីតាំងផ្សេងៗទៀត ដែលសាសនាចក្រកំពុងពង្រីក និងពន្លឿនជំនួយរបស់ខ្លួនសម្រាប់ស្ត្រី និងកុមារដែលងាយរងគ្រោះ ។

នៅទីក្រុងអាក្រា ប្រទេសហ្គាណា ទីប្រឹក្សាទីមួយ ចេ អាណែត ដិននីស បានមានប្រសាសន៍ថា គាត់សង្ឃឹមថាកិច្ចសហការនេះក្លាយទៅជាគំរូដល់អ្នកដទៃឲ្យធ្វើតាម ។ គាត់បានបន្តថា ៖ « វាពិតជាមិនគួរឲ្យជឿដែលបានឃើញអង្គការទាំងនេះបានបណ្តាក់ទុនជាច្រើនលើអាហារូបត្ថម្ភកុមារ និងសុខុមាលភាពរបស់ម្តាយ » ។

នៅទីក្រុងហ្គូដាឡាហារ៉ា ប្រទេសម៉ិកស៊ិក ទីប្រឹក្សាទីពីរ គ្រីស្ទីន អិម យី បានធ្វើជាសាក្សីអំពីអំណាចនៃការលះបង់ខ្លួនឯង ។

ស៊ីស្ទើរ យី បានមានប្រសាសន៍ថា ៖ « ខ្ញុំបានឃើញបងប្អូនស្រ្តីជាច្រើនថ្វាយអស់ពីសមត្ថភាពរបស់ពួកគេដល់ព្រះអម្ចាស់ ។ ពួកគេមើលថែអ្នកដែលនៅក្នុងផ្ទះរបស់ពួកគេផ្ទាល់ សហគមន៍របស់ពួកគេ និងអ្នកជិតខាងរបស់ពួកគេ » ។

1 / 2

Download Photos

មូលនិធិថ្មីនេះនឹងគាំទ្រដល់កម្មវិធីសុខភាពផ្អែកលើជាក់ស្តែង រួមទាំង ៖

ការព្យាបាល និងបង្ការកង្វះអាហារូបត្ថម្ភចំពោះស្ត្រី ទារក និងកុមារតូចៗ
ផ្តល់ការថែទាំសុខភាពខាងសតិអារម្មណ៍របស់ម្តាយ និង
ការពង្រឹងប្រព័ន្ធអាហារ

ធនធានទាំងនេះនឹងធ្វើឲ្យលទ្ធភាពទទួលបានអាហារូបត្ថម្ភ ពង្រឹងប្រព័ន្ធសុខភាព និងផ្តោតលើសុខុមាលភាពរបស់ស្ត្រី និងកុមារមានភាពប្រសើរឡើង ។

សារ៉ា ប៊ូជី នាយកប្រតិបត្តិនៃអង្គការហេឡែន ខេលល័រអន្តរជាតិ បានមានប្រសាសន៍ថា ជំនួយមកពីសាសនាចក្រនៃព្រះយេស៊ូវគ្រីស្ទគឺមានតម្លៃណាស់ ។

ប៊ូជី បានមានប្រសាសន៍ថា « ការបង្កើនការចំណាយប្រកបដោយប្រសិទ្ធភាព សេវាអាហារូបត្ថម្ភដែលបានបញ្ជាក់គឺមានសារៈសំខាន់ក្នុងការកែប្រែជីវិតរបស់ម្តាយ និងកុមារនៅទូទាំងពិភពលោក ។ យើងមានអំណរគុណចំពោះការវិនិយោគដ៏អស្ចារ្យលើអាហារូបត្ថម្ភរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដោយសហការជាមួយអង្គការផ្សេងៗទៀត ការវិនិយោគនេះនឹងជួយសហគមន៍បង្កើតការផ្លាស់ប្តូរយូរអង្វែងដើម្បីឲ្យកុមារគ្រប់រូបមានឱកាសធំឡើងដោយមានសុខភាពល្អ » ។

លោក ធីម ព្រីវីត្ត ប្រធាន និងជានាយកប្រតិបត្តិនៃគម្រោងបញ្ចប់ការស្រេកឃ្លាន បានមានប្រសាសន៍ថា លោកមានកិត្តិយសដែលជាផ្នែកមួយនៃក្រុមដែលធ្វើការដើម្បី « នាំយកនូវចក្ខុវិស័យនៃអនាគតដែលគ្មានការស្រេកឃ្លាន ដែលម្តាយ កុមារ និងសហគមន៍របស់ពួកគេមានឱកាសរីកចម្រើន » ។

**carousel-contain**

1 / 2

Download Photos

ប្រធាន ចនសុន បានមានប្រសាសន៍ថា អង្គការទាំងប្រាំបីមាន « កំណត់ត្រាពិសេស » នៃការសហការគ្នាដើម្បីកែលម្អសុខភាពមាតា និងទារក ។

ប្រធាន ចនសុន បានបន្តថា « គោលដៅរបស់យើងគឺជួយពួកគេក្នុងការបង្កើនការងាររបស់ពួកគេ ដើម្បីផ្ដល់ឲ្យស្ត្រី និងកុមារនូវសេវាសុខភាព និងអាហារូបត្ថម្ភដែលពួកគេត្រូវការជាចាំបាច់ ។ យើងមានទំនុកចិត្តលើសមត្ថភាពរបស់ពួកគេ និងលទ្ធផលដែលបង្ហាញឲ្យឃើញនៅជុំវិញពិភពលោក » ។

ហេតុអ្វីបានជារឿងនេះមានសារៈសំខាន់ ?

មនុស្សប្រមាណ ៣ ពាន់លាននាក់ នៅទូទាំងពិភពលោកខ្វះលទ្ធភាពក្នុងការទទួលរបបអាហារដែលមានសុខភាពល្អ និងប្រឈមនូវកង្វះអាហារូបត្ថម្ភ ។ ក្នុងចំណោមកុមារអាយុក្រោម ៥ ឆ្នាំ ចំនួន ១៤៨ លាននាក់មានភាពក្រិន ( មិនលូតលាស់ត្រឹមត្រូវ ) និងចំនួន ៤៥ លាននាក់ខ្វះការថែទាំ ( ស្គម ) ។

សុខភាពរបស់ម្តាយមានសារៈសំខាន់ណាស់សម្រាប់អាហាររូបត្ថម្ភរបស់កុមារ ។ អាហារូបត្ថម្ភត្រឹមត្រូវអំឡុងពេលមានផ្ទៃពោះ និងបំបៅដោះកូនជួយឲ្យម្តាយ និងកូនមានសុខភាពល្អ ។ ដោយទទួលបានតួលេខគួរឲ្យព្រួយបារម្ភទាំងនេះ ការសហការនេះមានសារៈសំខាន់ណាស់ក្នុងការធ្វើឲ្យមានការរីកចម្រើន ។

ប្រធាន ចនសុន បានបន្ថែមថា « ម្តាយគឺជាបុគ្គលដ៏សំខាន់នៅក្នុងផ្ទះ និងសហគមន៍ជុំវិញពិភពលោក ។ នៅពេលម្តាយមានសុខភាពល្អ និងអាចផ្តល់អាហារមានជីវជាតិដល់កូនៗ ពួកគេក៏រីកចម្រើនដែរ ។ នៅពេលខ្ញុំធ្វើដំណើរជុំវិញពិភពលោក ខ្ញុំបានឃើញផ្ទាល់ភ្នែកថាតើភាពពិតរបស់មនុស្សស្រីមានភាពវិសេសវិសាល និងខុសប្លែកពីគេប៉ុនណា ។ ទោះជាយ៉ាងណាក៏ដោយ ម្តាយគ្រប់រូបមានយ៉ាងហោចណាស់រឿងមួយដូចគ្នា ៖ ពួកគេចង់ចិញ្ចឹមកូនរបស់ពួកគេដើម្បីពួកគេអាចទំនុកបម្រុងដល់អនាគត » ។

អង្គការទាំងនេះបានសហការគ្នារួចហើយ ។ បន្ទាប់ពីការប្រជុំនាពេលថ្មីៗនេះនៅទីក្រុងអាក្រា អ្នកតំណាងរបស់ពួកគេកំពុងរៀបចំចែកចាយព័ត៌មានថ្មីៗនៅក្នុងការប្រជុំកំពូលអំពីអាហារូបត្ថម្ភសម្រាប់ការលូតលាស់នៅទីក្រុងប៉ារីស ប្រទេសបារាំង ដែលគ្រោងធ្វើនៅខែមីនា ឆ្នាំ២០២៥ ។

គណៈប្រធានសមាគមសង្គ្រោះទូទៅ

គណៈប្រធានសមាគមសង្គ្រោះទូទៅត្រូវបានហៅឲ្យដឹកនាំសមាគមសង្គ្រោះ ជាអង្គការសម្រាប់ស្ត្រីរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលមានសមាជិករាប់លាននាក់នៅទូទាំងពិភពលោក ។ គណៈប្រធានមានប្រធានមួយរូប និងទីប្រឹក្សាពីរនាក់ ដែលត្រូវបានហៅដោយប្រធានសាសនាចក្រ ។ ស្ត្រីបីរូបនេះធ្វើដំណើរជុំវិញពិភពលោកដើម្បីសួរសុខទុក្ខ បង្រៀន និងផ្ដល់ការងារបម្រើដល់ស្ត្រីនៃសាសនាចក្រ ។ ពួកគាត់ក៏ប្រឹក្សាជាមួយថ្នាក់ដឹកនាំសាសនាចក្រទូទៅផ្សេងទៀតទាក់ទងនឹងកិច្ចខិតខំប្រឹងប្រែងផ្នែកមនុស្សធម៌ជាសាកល ព្រមទាំងពង្រឹងស្ត្រី និងក្រុមគ្រួសារគ្រប់មជ្ឈដ្ឋានផងដែរ ។