សាសនាចក្រជួយជួសជុលមន្ទីរពេទ្យដែលរងការខូចខាតដោយអគ្គីភ័យនៅក្នុងប្រទេសកម្ពុជា

សមាជិកសហគមន៍ជនបទតូចមួយដែលមានប្រជាជនជាង ១០០ នាក់ ក្នុងស្រុកសង្កែ ខេត្តបាត់ដំបងក្នុងប្រទេសកម្ពុជា បានជួបជុំគ្នាដោយក្តីរីករាយ និងស្នាមញញឹម ដើម្បីអបអរការជួសជុលរួចជាស្ថាពរនៃមន្ទីរពេទ្យបង្អែករកា ។ នៅក្នុងពិធីប្រគល់មន្ទីរពេទ្យក្រោមវត្តមានសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងភ្ញៀវកិត្តិយសដែលបានចូលរួមដោយមានការថ្លែងសុន្ទរកថា ការចុះហត្ថលេខាប្រគល់ និងពិធីកាត់ខ្សែបូនៅថ្ងៃទី ១០ ខែកុម្ភៈ ឆ្នាំ ២០២៣ ។

IMG_5285.PNG
សមាជិកសហគមន៍ជនបទក្នុងស្រុកសង្កែ ខេត្តបាត់ដំបងក្នុងប្រទេសកម្ពុជា បានជួបជុំគ្នាដោយស្នាមញញឹម ដើម្បីអបអរការជួសជុលរួចជាស្ថាពរនៃមន្ទីរពេទ្យបង្អែករកា ។ ពិធីប្រគល់មន្ទីរពេទ្យដែលបានប្រារព្ធឡើងនៅថ្ងៃទី ១០ ខែកុម្ភៈ ឆ្នាំ ២០២៣ ដែលមានវត្តមានអ្នកតំណាងខាងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ រដ្ឋាភិបាល និងកិច្ចខិតខំរបស់សហគមន៍សម្រាប់ការជួសជុលនេះ ។© 2023 by Intellectual Reserve, Inc. All rights reserved.

ការជួសជុលមន្ទីរពេទ្យរកាចប់ជាស្ថាពរ តំណាងឲ្យព្រឹត្តិការណ៍ដ៏រីករាយជាពិសេសសម្រាប់សហគមន៍នេះ ។ កាលពីថ្ងៃទី ៩ ខែមករា ឆ្នាំ ២០១៨ នៅបីថ្ងៃមុនពេលវេជ្ជបណ្ឌិត អេង សំណាង ចូលកាន់តំណែងជាប្រធានមន្ទីរពេទ្យរកា ដែលទើបជួសជុលថ្មីនោះ មន្ទីរពេទ្យនេះបានត្រូវបានភ្លើងឆាបឆេះយ៉ាងសន្ធោសន្ធៅ ។ អគ្គីភ័យនេះបង្កឲ្យមានការខូចខាតមន្ទីរពេទ្យយ៉ាងធ្ងន់ធ្ងរ និងបានបំផ្លាញអគារមួយខ្នង ឧបករណ៍មន្ទីរពិសោធន៍ កំណត់ត្រាមន្ទីរពេទ្យ និងថ្នាំវ៉ាក់សាំង ។

1 / 2

Download Photos

ពួកអ្នកផ្សព្វផ្សាយសាសនាផ្នែក កិច្ចខិតខំលើកកម្ពស់សុខភាពកម្ពុជា (CHIE) និងស្វាមីភរិយា វេជ្ជបណ្ឌិត រ៉ន ឡាសេន និង ខេធីរិន ឡាសិន ដែលបម្រើជាអ្នកផ្សព្វផ្សាយសាសនាផ្នែកមនុស្សធម៌សម្រាប់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានឈរក្បែរគ្នា ខណៈដែលវេជ្ជបណ្ឌិត ឡាសិន បានចែកចាយបទពិសោធន៍មួយចំនួន ក្នុងតួនាទីរបស់ពួកគាត់ដើម្បីជួយសម្រាលទុក្ខលំបាកដល់បុត្រាបុត្រីរបស់ព្រះ ។ គាត់បានមានប្រសាសន៍ថា ៖ « នេះគឺជាឱកាសដ៏ពិសេសមួយ ។ មន្ទីរពេទ្យនេះជាមន្ទីរពេទ្យជនបទដំបូងគេនៅក្នុងតំបន់បាត់ដំបង ដែលសាសនាចក្របានជួយ » ។ គាត់បានបញ្ជាក់ថា « វាជាអភ័យឯកសិទ្ធិដ៏ថ្លៃថ្លាណាស់ដែលបានធ្វើជាតំណាងឲ្យសាសនាចក្រធ្វើការងារមនុស្សធម៌នៅប្រទេសកម្ពុជា » ។ គាត់បានពន្យល់ថា ទឹកប្រាក់ដែលសាសនាចក្របានបរិច្ចាគឲ្យគឺបានមកពីសមាជិកនៃសាសនាចក្រ និងអ្នកដទៃទៀត ហើយជាញឹកញាប់ត្រូវបានបរិច្ចាគដោយមនុស្សសាមញ្ញៗមកពីជុំវិញពិភពលោកដែលចង់ជួយបងប្អូនរបស់ពួកគេ ។ គាត់បានបន្ថែមថា ៖ « យើងជាបុត្រាបុត្រីរបស់ព្រះវរបិតាសួគ៌ ដែលចង់ឲ្យយើងមើលថែគ្នាទៅវិញទៅមក ។ គម្រោងនេះតំណាងឲ្យអ្នកដែលជួយមើលថែបងប្អូនប្រុស និងបងប្អូនស្រីរបស់ពួកគេ » ។

ពិធីនេះមានការសម្តែងពីក្រុមរាំរបាំប្រពៃណី និងវាគ្មិនខ្មែរ ដែលរួមមាន លោកវេជ្ជបណ្ឌិត អេង ដែលលោកមានប្រសាសន៍អំពីព្រឹត្តិការណ៍ដ៏រន្ធត់នៃអគ្គីភ័យ និងអំពីមន្ទីរពេទ្យដែលកំពុងត្រូវបានសាងសង់ឡើងវិញនេះ ។ លោកបានសម្ដែងការដឹងគុណចំពោះសាសនាចក្រ និងសហគមន៍ចំពោះការគាំទ្រដែលលោកបានទទួល ។

លោកអនុប្រធានមន្ទីរសុខាភិបាលខេត្តបាត់ដំបង វេជ្ជបណ្ឌិត ចេង លីសុនខេង ក៏បានសម្តែងការដឹងគុណចំពោះសាសនាចក្រ និងបានមានប្រសាសន៍អំពីរបៀបដែលមន្ទីរពេទ្យនេះគឺជា « មន្ទីរពេទ្យសម្រាប់ប្រជាជនពិតប្រាកដ » ។ អគារថ្មីត្រូវបានបំពាក់ដោយម៉ាស៊ីនត្រជាក់នៅក្នុងបន្ទប់អ្នកជំងឺផងដែរ ។ លោកបានមានប្រសាសន៍ថា ៖ « មិនថាបងប្អូនជាអ្នកមាន ឬជាអ្នកក្រនោះទេ បងប្អូនទាំងអស់គ្នានឹងទទួលបានការថែទាំនិងការព្យាបាលយ៉ាងល្អនៅមន្ទីរពេទ្យនេះ » ។

ក្នុងនាមជាពួកអ្នកផ្សព្វផ្សាយសាសនាផ្នែកមនុស្សធម៌ អែលឌើរ ឡាសិន បានធ្វើការរួមគ្នាជាមួយថ្នាក់ដឹកនាំនៃរាជរដ្ឋាភិបាលក្នុងតំបន់ និងនាយកមន្ទីរពេទ្យ ដើម្បីជួយសាងសង់ និងជួសជុលមន្ទីរពេទ្យរកាឡើងវិញ ។ វេជ្ជបណ្ឌិត ឡាសិន បានបញ្ជាក់ថា វេជ្ជបណ្ឌិត អេង បានខិតខំប្រឹងប្រែងយ៉ាងខ្លាំង ដើម្បីឲ្យមន្ទីរពេទ្យនេះសាងសង់ឡើងវិញ និងជានាយកដ៏ឆ្នើមមួយរូប ។ អគារមន្ទីរពេទ្យធំត្រូវបានជួសជុលឡើងវិញដោយមានឱសថស្ថានថ្មី អគាររដ្ឋបាល បន្ទប់សង្គ្រោះបន្ទាន់ដែលមានផ្លូវសម្រាប់រទេះរុញ ម៉ាស៊ីនអ៊ុលត្រាសោន ម៉ាស៊ីន HbA1c ម៉ាស៊ីនវិភាគជីវវេជ្ជសាស្ត្រ ប្រព័ន្ធចែកចាយអុកស៊ីហ្សែន ម៉ាស៊ីនចម្រោះទឹក និងម៉ាស៊ីនចែកចាយទឹកចំនួនបួន បន្ទប់ទឹក ការលាបជញ្ជាំងថ្មីវិញ ឧបករណ៍ទប់លំនឹងចរន្តអគ្គីសនី ដើម្បីជួយការពារឧបករណ៍ថ្មី និងកៅអីថ្មីចំនួន ៤៨ សម្រាប់បន្ទប់រង់ចាំដែលត្រូវបានកែលម្អថ្មី ។

វេជ្ជបណ្ឌិត ឡាសិន បានលើកឡើងថា ដោយសារតែគម្រោងជួសជុលមន្ទីរពេទ្យនេះធ្វើឡើងដោយសាសនាចក្រ នោះមន្ទីរពេទ្យនេះបានទាក់ទាញចំណាប់អារម្មណ៍ពីសហគមន៍ថែទាំសុខភាពខេត្តបាត់ដំបង ហើយបានជំរុញឲ្យរដ្ឋាភិបាលខេត្តជួសជុលអគារដែលទ្រុឌទ្រោមរបស់មន្ទីរពេទ្យមួយទៀត និងសាងសង់ឡដុតសម្រាមថ្មីមួយទៀត ។ លើសពីនេះ ម្ចាស់ជំនួយឯកជនបានសាងសង់បង្គន់ និងកន្លែងទឹកសំណល់ដែលខូចរបស់ពួកគេឡើងវិញផងដែរ ។

នៅពេលដែលសមាជិកសហគមន៍មូលដ្ឋានដែលបានចូលរួមការប្រារព្ធពិធីនេះត្រូវបានសួរថាតើពួកគាត់មានអារម្មណ៍យ៉ាងណាចំពោះមន្ទីរពេទ្យនេះ ពួកគាត់ទាំងអស់គ្នាចង់ឆ្លើយតបប្រាប់ ថាតើពួកគាត់ចូលចិត្តកន្លែងថ្មីនេះប៉ុនណា ។ ពួកគាត់បាននិយាយថា ឥឡូវពួកគាត់មិនចាំបាច់ធ្វើដំណើរឆ្ងាយទៀតទេ ហើយអាចទទួលបានការថែទាំយ៉ាងល្អនៅក្នុងមន្ទីរពេទ្យ ។ អ្នកចូលរួមផ្សេងទៀតបានកោតសរសើរអំពីរបៀបដែលមន្ទីរពេទ្យស្អាត និងមានអនាម័យ ។ អ្នកខ្លះបានលើកឡើងអំពីម៉ាស៊ីនត្រជាក់ដែលបានផ្តល់ឲ្យ ហើយអ្នកខ្លះទៀតបានបញ្ជាក់ថាគ្រូពេទ្យល្អណាស់ ។

1 / 2

Download Photos

វេជ្ជបណ្ឌិតនៅមន្ទីរពេទ្យបានមានប្រសាសន៍ថា ឥឡូវនេះពួកគាត់អាចផ្តល់នូវភាពប្រសើរឡើងដែលចាំបាច់ក្នុងការថែទាំសុខភាពដល់អ្នកជំងឺរបស់ពួកគាត់បានហើយ ។ វេជ្ជបណ្ឌិតទាំងអស់ក៏រំភើបចិត្តជាខ្លាំងដែលមានម៉ាស៊ីនអ៊ុលត្រាសោនដើម្បីជួយសង្រ្គោះជីវិតម្តាយ និងទារករបស់ពួកគាត់ផងដែរ ។ ពេលនេះ វេជ្ជបណ្ឌិតទាំងអស់អាចធ្វើរោគវិនិច្ឆ័យជំងឺឆ្លងផ្សេងៗ និងជំងឺទឹកនោមផ្អែមដោយមានមន្ទីរពិសោធន៍ និងឧបករណ៍វេជ្ជសាស្ត្រដែលបានបរិច្ចាគជូន ។

មន្ទីរពេទ្យបង្អែករកា គឺជាកន្លែងថែទាំសុខភាពកម្រិតទីមួយ ( កម្រិតទាប ) ដែលបម្រើដល់ស្រុកចំនួនពីរ ដែលមានប្រជាជនសរុបចំនួន ១៩៦,៦៤៤ នាក់ រស់នៅក្នុងឃុំចំនួន ១០ និងភូមិចំនួន ៦៤ ។ មន្ទីរពេទ្យនេះស្ថិតនៅចម្ងាយប្រហែលដប់គីឡូម៉ែត្រពីខាងកើតនៃខេត្តបាត់ដំបង ហើយក៏ជាពរជ័យមួយដល់សហគមន៍ទាំងអស់នេះផងដែរ ។

សាសនាចក្រ​ជួយ​ជួសជុល​មន្ទីរពេទ្យ​ដែល​រង​ការខូចខាត​ដោយ​អគ្គីភ័យ​នៅក្នុង​ប្រទេស​កម្ពុជា

IMG_5285.PNG

សាសនាចក្រជួយជួសជុលមន្ទីរពេទ្យដែលរងការខូចខាតដោយអគ្គីភ័យនៅក្នុងប្រទេសកម្ពុជា