អ្នកជំងឺនៅមន្ទីរពេទ្យកាន់តែច្រើនឡើងៗនៅក្នុងប្រទេសកម្ពុជា ដែលមានតម្រូវការវះកាត់សំខាន់ៗ កំពុងទទួលបានអត្ថប្រយោជន៍ដ៏អស្ចារ្យនៃការវះកាត់ចោះតាមបែបសម័យទំនើប ។
Medical-personnel-at-Battambang-Provincial-Hospital-view-instruments-used-in-laparoscopic-surgery.jpeg
បុគ្គលិកសុខាភិបាលនៅមន្ទីរពេទ្យខេត្តបាត់ដំបងមើលឧបករណ៍ដែលប្រើក្នុងការវះកាត់ដោយការចោះ ។2025 by Intellectual Reserve, Inc. All rights reserved.ភាពជាដៃគូដ៏រឹងមាំមួយកំពុងអភិវឌ្ឍនៅក្នុងមន្ទីរពេទ្យ និងប្រព័ន្ធថែទាំសុខភាពជាច្រើននៅក្នុងប្រទេសកម្ពុជា ជាមួយសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងមជ្ឈមណ្ឌលសម្រាប់ការវះកាត់សកល ដែលទាក់ទងជាមួយសាកលវិទ្យាល័យយូថាហ៍ ។
ក្រុមគ្រូពេទ្យវះកាត់កម្ពុជាកំពុងទទួលការបំពាក់បំប៉នពីក្រុមគ្រូពេទ្យវះកាត់មកពីមជ្ឈមណ្ឌលសម្រាប់ការវះកាត់សកល ហើយបំពាក់ដោយឧបករណ៍ និងគ្រឿងបរិក្ខារសម្រាប់ធ្វើការវះកាត់តាមបែបសម័យទំនើបនេះ ។ ភាពជាដៃគូ និងគម្រោងបំពាក់បំប៉ននេះនឹងផ្តល់ពរដល់អាយុជីវិតអ្នកជំងឺផ្នែកវះកាត់នៅកម្ពុជារាប់ពាន់នាក់ក្នុងរយៈពេលជាច្រើនឆ្នាំខាងមុខនេះ ។
ការវះកាត់ដោយការចោះ ត្រូវបានធ្វើឡើងតាមរយៈការចោះរន្ធតូច ដើម្បីចូលទៅកាន់សរីរាង្គក្នុងរាង កាយ ។ នៅពេលដែលចេះស្ទាត់ជំនាញ នោះការវះកាត់ដោយការចោះនេះ គឺមានសុវត្ថិភាពខ្លាំងជាង មិនសូវរាតត្បាត ចំណាយតិច ហើយផ្តល់លទ្ធផលនៃការជាសះស្បើយឡើងវិញក្នុងរយៈពេលខ្លី បើប្រៀបធៀបទៅនឹងការវះកាត់ធម្មតា ដែលគ្រូពេទ្យត្រូវវះកាត់បើករាងកាយរបស់អ្នកជំងឺ ដើម្បីធ្វើការលើសរីរាង្គ ។ សូម្បីតែអ្នកជំងឺដែលបានទទួលការវះកាត់ធំៗ ជារឿយៗក៏អាចត្រឡប់ទៅផ្ទះវិញក្នុងរយៈពេលពីរបីថ្ងៃដែរ ។
Doctors-in-training-watch-laparoscopic-surgery-on-a-monitor.jpeg
វេជ្ជបណ្ឌិតក្នុងការបំពាក់បំប៉នមើលការវះកាត់ដោយការចោះនៅលើម៉ូនីទ័រ ។2025 by Intellectual Reserve, Inc. All rights reserved.ខណៈដែលការវះកាត់ដោយការចោះ គឺជារឿងធម្មតានៅក្នុងប្រទេសអភិវឌ្ឍ នោះនៅប្រទេសកម្ពុជា និងប្រទេសកំពុងអភិវឌ្ឍជាច្រើនទៀត មានវេជ្ជបណ្ឌិត និងមន្ទីរពេទ្យតិចតួចប៉ុណ្ណោះដែលទទួលបានការបំពាក់បំប៉ន និងគ្រឿងបរិក្ខារដើម្បីផ្តល់នីតិវិធីនេះ ។
ទោះជាយ៉ាងណាក៏ដោយ ទស្សនវិស័យនេះកំពុងប្រសើរឡើង ។ គម្រោងបំពាក់បំប៉នអំពីការវះកាត់ដោយការចោះថ្មីៗបំផុតនេះគឺបានធ្វើឡើងនៅក្នុងខែមករា ឆ្នាំ២០២៥ ។ ក្រុមគ្រូពេទ្យវះកាត់មកពីមជ្ឈមណ្ឌលសម្រាប់ការវះកាត់សកលបានបំពាក់បំប៉នវេជ្ជបណ្ឌិតវះកាត់ពីររូប និងបុគ្គលិកពេទ្យដែលទាក់ទងក្នុងការវះកាត់កម្រិតខ្ពស់នៅមន្ទីរពេទ្យបង្អែកខេត្តបាត់ដំបង ភាគពាយព្យនៃប្រទេសកម្ពុជា ។ វេជ្ជបណ្ឌិតផ្នែកវះកាត់ជាច្រើនទៀត និងក្រុមរបស់ពួកគាត់មកពីមន្ទីរពេទ្យកម្ពុជាផ្សេងទៀតបានចូលរួមក្នុងផ្នែកខ្លះនៃការបំពាក់បំប៉ននេះ ។
សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅកម្ពុជា បានផ្តល់ឧបករណ៍ និងគ្រឿងបរិក្ខារដែលមានបច្ចេកវិទ្យាទំនើបសម្រាប់ការវះកាត់ដោយការចោះនេះ ព្រមទាំងបានបង់ថ្លៃលើការធ្វើដំណើរ និងការចំណាយលើការស្នាក់នៅរបស់ក្រុមបំពាក់បំប៉ននេះផងដែរ ។
Cambodian-surgeons-learn-laparoscopic-surgery-from-U.S.-medical-team.jpeg
វេជ្ជបណ្ឌិតវះកាត់កម្ពុជារៀនវះកាត់ដោយការចោះ ពីក្រុមវេជ្ជបណ្ឌិតមកពីអាមេរិក ។2025 by Intellectual Reserve, Inc. All rights reserved.វេជ្ជបណ្ឌិត រ៉េយមិន ផ្រាយស៍ ដែលជាវេជ្ជបណ្ឌិតវះកាត់ MD ដែលទាក់ទងនឹង Intermountain Medical Center (IMC) និងសាកលវិទ្យាល័យយូថាហ៍ ដឹកនាំមជ្ឈមណ្ឌលសម្រាប់ការវះកាត់សកលនេះ ។ ជាមួយនឹងក្រុមរបស់លោក លោកបានអនុវត្តគម្រោងបំពាក់បំប៉នជាង ៥០ គម្រោង ដោយចាប់ផ្តើមពីឆ្នាំ២០០៥ នៅប្រទេសដូចជា ម៉ុងហ្គោលី ( ២៨ គម្រោង ) អេត្យូពី អេក្វាឌ័រ និងហ្គាណា ។ មជ្ឈមណ្ឌលសម្រាប់ការវះកាត់សកលត្រូវបានបង្កើតឡើងជាផ្លូវការក្នុងឆ្នាំ២០១១ ។
ការបំពាក់បំប៉ននៅមន្ទីរពេទ្យបង្អែកខេត្តបាត់ដំបង គឺជាផ្នែកមួយនៃគម្រោងបំពាក់បំប៉នផ្នែកវះកាត់ដោយការចោះ ដែលមានជាបន្តបន្ទាប់នៅប្រទេសកម្ពុជា ។ ការបំពាក់បំប៉នផ្សេងទៀតបានធ្វើឡើងនៅមន្ទីរពេទ្យកាល់ម៉ែតក្នុងរាជធានីភ្នំពេញ ជារាជធានីរបស់ប្រទេសកម្ពុជា និងក្នុងខេត្តកំពង់ចាម ។ វេជ្ជបណ្ឌិតវះកាត់ និងក្រុមរបស់ពួកគាត់មកពីវគ្គបំពាក់បំប៉នមុនៗក៏បានចូលរួមក្នុងវគ្គបំពាក់បំប៉ននេះនៅខេត្តបាត់ដំបងផងដែរ ។ បុគ្គលិកសុខាភិបាលមកពីមង្គលបូរី ដែលរំពឹងថានឹងក្លាយជាទីតាំងនៃគម្រោងបំពាក់បំប៉នធំបន្ទាប់ទៀត ក៏ទទួលបានការណែនាំអំពីការវះកាត់ដោយការចោះនេះផងដែរ ។ គោលដៅគឺដើម្បី « បំពាក់បំប៉នដល់វេជ្ជបណ្ឌិតដែលផ្ដល់ការបំពាក់បំប៉ន » ដើម្បីឲ្យវេជ្ជបណ្ឌិតវះកាត់កម្ពុជាដែលមានជំនាញទាំងនេះ អាចធ្វើការបំពាក់បំប៉នដល់វេជ្ជបណ្ឌិតផ្សេងទៀត ។
ក្រៅពីវេជ្ជបណ្ឌិត ផ្រាយស៍ ក្រុមការងារដែលអញ្ជើញមកពីមជ្ឈមណ្ឌលសម្រាប់ការវះកាត់សកល រួមមាន វេជ្ជបណ្ឌិត នីកូឡាស ប៊ឺច ជាវេជ្ជបណ្ឌិតវះកាត់ MD, វេជ្ជបណ្ឌិត ស្កត ហ៊ឺស MD, វេជ្ជបណ្ឌិតឯកទេសខាងថ្នាំសណ្ដំ, យ៉ាម៉ន អេឌវឺដស៍ ផ្នែកបច្ចេកវិទ្យាសម្លាប់មេរោគ, ហ្វីល ផាហ្គីត ផ្នែកជីវបច្ចេកវិទ្យា និង លីហ្វ សូរីនសិន ជំនួយការស្រាវជ្រាវ/អ្នកអប់រំ ។ ក្រុមការងារទាំងអស់គឺមកពីរដ្ឋយូថាហ៍ ហើយទាក់ទងជាមួយនឹងសាកលវិទ្យាល័យយូថាហ៍ និង/ឬ Intermountain Healthcare ។
ពួកអ្នកផ្សព្វផ្សាយសាសនាផ្នែកមនុស្សធម៌មកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានធ្វើការជាមួយមន្ទីរពេទ្យ និងមជ្ឈមណ្ឌលសម្រាប់ការវះកាត់សកល ។ ពួកគេបានជួយរៀបចំថវិកាសម្រាប់ឧបករណ៍ចាំបាច់ និងសម្រាប់ការធ្វើដំណើរ ព្រមទាំងការចំណាយរបស់ក្រុមគ្រូពេទ្យវះកាត់មកពីសហរដ្ឋអាមេរិក ។
វេជ្ជបណ្ឌិតវះកាត់ពីររូប ជំនួយការសាស្ត្រាចារ្យ ហួត សុជាតិ និងវេជ្ជបណ្ឌិត តុល កុសល បានទទួលការបំពាក់បំប៉នយ៉ាងយកចិត្តទុកដាក់នៅមន្ទីរពេទ្យបង្អែកខេត្តបាត់ដំបង រួមជាមួយនឹងក្រុមគ្រូពេទ្យវះកាត់របស់ពួកគាត់ ។ ក្នុងអំឡុងពេលនៃការបំពាក់បំប៉ននេះ ការវះកាត់យកថង់ទឹកប្រមាត់ចំនួន ៣ ឬ ៤ដង ត្រូវបានអនុវត្តជារៀងរាល់ថ្ងៃ ដែលមានចំនួនសរុប ២៧ដង ។ ការវះកាត់ខ្នែងពោះវៀនបន្ទាន់ក៏ត្រូវបានធ្វើឲ្យគិលានុបដ្ឋាយិកានៅមន្ទីរពេទ្យនោះផងដែរ ដែលមានជំងឺរលាកខ្នែងពោះវៀនធ្ងន់ធ្ងរ ។
សរុបមក វេជ្ជបណ្ឌិតកម្ពុជាចំនួន ១១ នាក់ បានចូលរួម ឬសង្កេតមើលផ្នែកខ្លះនៃការបំពាក់បំប៉ន ឬការបំពាក់បំប៉នទាំងស្រុង រួមជាមួយនឹងគិលានុបដ្ឋាយិកាជំនួយការវះកាត់ ១៨ នាក់ និងវេជ្ជបណ្ឌិតផ្នែកថ្នាំសណ្ដំចំនួន ១២ នាក់ ។
Surgeons-and-medical-personnel-gather-in-operating-room-to-observe-laparoscopic-surgery.jpeg
វេជ្ជបណ្ឌិតវះកាត់ និងបុគ្គលិកសុខាភិបាលជួបជុំគ្នានៅក្នុងបន្ទប់វះកាត់ ដើម្បីសង្កេតមើលការវះកាត់ដោយការចោះ ។2025 by Intellectual Reserve, Inc. All rights reserved.ដំបូង ក្រុមគ្រូពេទ្យកម្ពុជាអនុវត្តដោយប្រើ « ប្រអប់បំពាក់បំប៉ន » ដើម្បីឲ្យស្គាល់ឧបករណ៍ និងគ្រឿងបរិក្ខារការវះកាត់ដោយការចោះ និងរបៀបប្រើប្រាស់ឧបករណ៍ទាំងនោះ ។
វេជ្ជបណ្ឌិត ផ្រាយស៍ បានមានប្រសាសន៍ថា « វគ្គបំពាក់បំប៉ននេះ មិនត្រឹមតែមានការវះកាត់ប៉ុណ្ណោះទេ ប៉ុន្តែបង្រៀនពីដំណើរការវះកាត់ទាំងមូល ។ វារួមមាននីតិវិធីមុន និងក្រោយការវះកាត់ ការរក្សាឧបករណ៍ឲ្យស្អាត នីតិវិធីរៀបចំឯកសារ ការកំណត់ទីតាំងម៉ូនីទ័រ ប្រភេទនៃបន្ទប់វះកាត់ និងគ្រែដែលត្រូវការ និងសូម្បីតែរបៀបដែលគ្រូពេទ្យវះកាត់គួរតែឈរដើម្បីការពាររបួសដោយសារចលនាដដែលៗអំឡុងពេលវះកាត់ ។
វេជ្ជបណ្ឌិត ផ្រាយស៍ បានមានប្រសាសន៍ថា « ពិតណាស់ គោលបំណងដ៏សំខាន់របស់យើងគឺដើម្បីបង្រៀនការវះកាត់ដោយការចោះ ។ ប៉ុន្តែវត្តមានរបស់យើង និងដំណើរការបំពាក់បំប៉នរបស់យើងពង្រឹងប្រព័ន្ធសុខភាពទាំងមូល ។ វេជ្ជបណ្ឌិត និងបុគ្គលិកមន្ទីរពេទ្យមើលឃើញរបៀបកែលម្អដើម្បីដាក់កាលវិភាគ និងរៀបចំការវះកាត់ ថែទាំ រក្សាឧបករណ៍ឲ្យស្អាតគ្មានមេរោគ ផ្ដល់ឱសថ ការចាក់ថ្នាំសណ្ដំ របៀបថែទាំឧបករណ៍ ជាដើម ។ យើងជួយពួកគេឲ្យមានទំនុកចិត្តថា ពួកគេអាចធ្វើការវះកាត់តាមបែបទំនើបបាន និងធ្វើឲ្យលទ្ធផលរបស់អ្នកជំងឺប្រសើរឡើង » ។
ដំបូង សមាជិកក្រុមដែលទទួលការបំពាក់បំប៉ន សង្កេតមើលការវះកាត់ដោយការចោះជាក់ស្តែងសិន បន្ទាប់មកជួយវះកាត់ រួចមកធ្វើការវះកាត់ដោយការចោះដោយមានជំនួយពីលើ ក្រោយមកទៀតធ្វើការវះកាត់ដោយមានការត្រួតពិនិត្យ និងចុងក្រោយធ្វើការវះកាត់ដោយការចោះដោយខ្លួនឯង ។ ក្រុមគ្រូពេទ្យវះកាត់មកពីរដ្ឋយូថាហ៍ ប្រើអ្នកបកប្រែជាច្រើននាក់ ដើម្បីទំនាក់ទំនងយ៉ាងច្បាស់ជាមួយក្រុមគ្រូពេទ្យវះកាត់កម្ពុជា ។
វេជ្ជបណ្ឌិត ចាន់ ដាវឿង អនុប្រធានមន្ទីរសុខាភិបាលខេត្តបាត់ដំបង និងវេជ្ជបណ្ឌិត ហ៊ាន ឧត្តម ប្រធានមន្ទីរពេទ្យបង្អែកខេត្តបាត់ដំបង លោកទាំងពីរបានថ្លែងនៅក្នុងពិធីបើក មុនពេលចាប់ផ្ដើមវគ្គបំពាក់បំប៉ន ។ ពួកលោកបានថ្លែងអំណរគុណដល់អ្នកដែលចូលរួមក្នុងវគ្គបំពាក់បំប៉ននេះ និងបានអបអរសាទរដល់អត្ថប្រយោជន៍ពីការវះកាត់ដោយការចោះ ដល់អ្នកជំងឺនៅភាគពាយ័ព្យនៃប្រទេសកម្ពុជា ។
Dr.-Chan-Davoeng.jpeg
វេជ្ជបណ្ឌិត ចាន់ ដាវឿង អនុប្រធានមន្ទីរសុខាភិបាលខេត្តបាត់ដំបង ថ្លែងក្នុងពិធីបើកវគ្គបំពាក់បំប៉នផ្នែកវះកាត់ដោយការចោះ ។2025 by Intellectual Reserve, Inc. All rights reserved.កញ្ញា យន សូផាណែត អ្នកគ្រប់គ្រងគម្រោងមនុស្សធម៌នៃសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅកម្ពុជាបានថ្លែងថា សមាជិកសាសនាចក្រជឿថាសុខភាព និងការអប់រំមានសារៈសំខាន់សម្រាប់ប្រជាជនដ៏រីករាយ និងសម្រាប់សង្គមដែលរីកចម្រើន ។ គាត់បានថ្លែងថា ការចូលរួមចំណែកលើថ្លៃសម្ភារ និងការចំណាយសម្រាប់ក្រុមបំពាក់បំប៉ននេះ អាចធ្វើទៅបានដោយសារការបរិច្ចាគដែលធ្វើឡើងដោយសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយពីជុំវិញពិភពលោក ។
ពិធីបើកនេះមានការចូលរួមពីវេជ្ជបណ្ឌិតជំនាញជាង ១០០ នាក់មកពីខេត្តបាត់ដំបង រួមទាំងនិស្សិតពេទ្យមួយចំនួនផងដែរ ។
វេជ្ជបណ្ឌិត ផ្រាយស៍ បានថ្លែងថា ការវះកាត់រាប់លានត្រូវបានធ្វើឡើងជារៀងរាល់ឆ្នាំក្នុងប្រទេសកំពុងអភិវឌ្ឍនៅអាស៊ីអាគ្នេយ៍ ។ អ្នកជំងឺរាប់លាននាក់អាចឆ្លងកាត់នីតិវិធីដែលមានសុវត្ថិភាពជាងមុន ជាសះស្បើយលឿនជាងមុន មិនសូវមានផលវិបាក ទាំងអស់ត្រូវបានធ្វើដោយចំណាយតិច ជាមួយនឹងភាពទូលំទូលាយនៃការវះកាត់ដោយការចោះ ។
ផែនការទាំងឡាយកំពុងធ្វើឡើងដោយមជ្ឈមណ្ឌលសម្រាប់ការវះកាត់សកល និងសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដើម្បីរៀបចំកាលវិភាគនៃការបំពាក់បំប៉នការវះកាត់ដោយការចោះ នៅក្នុងមន្ទីរពេទ្យផ្សេងទៀត ដែលមានទីតាំងជាយុទ្ធសាស្រ្តក្នុងប្រទេសកម្ពុជា ។