សេចក្ដីសង្ខេបនៃសុន្ទរកថាសន្និសីទទូទៅ ខែតុលា ឆ្នាំ២០២៤ ព័ត៌មាន និងសេចក្តីប

សន្និសីទទូទៅនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ធ្វើឡើងរៀងរាល់ប្រាំមួយខែម្តង ។ សម័យប្រជុំទាំងប្រាំនៃសន្និសីទ ខែតុលា ឆ្នាំ២០២៤ ( ថ្ងៃទី៥–៦ ខែតុលា ) ត្រូវបានចាក់ផ្សាយបន្តផ្ទាល់ពីវិសាលដ្ឋានព្រះវិហារបរិសុទ្ធ នៅទីក្រុង សលត៍ លេក ។ ទំព័រនេះគឺជាសេចក្ដីសង្ខេបនៃការបង្រៀនទាំងឡាយមកពីសន្និសីទ ព័ត៌មាន និងសេចក្តីប្រកាស ។

Downloadable b-roll and sots

Additional photos for media use

1 / 2

Download Photos

ព័ត៌មានសន្នសីទទូទៅ

សុន្ទរកថាពេញមកពីសន្និសីទទូទៅ ខែតុលា ឆ្នាំ២០២៤
ព្យាការីប្រកាសព្រះវិហារបរិសុទ្ធថ្មីចំនួន ១៧ នៅសន្និសីទទូទៅ ខែតុលា ឆ្នាំ២០២៤
ពួកចិតសិបនាក់ប្រចាំតំបន់ចំនួនប្រាំមួយនាក់ថ្មីត្រូវបានហៅនៅសម័យប្រជុំថ្នាក់ដឹកនាំ

សេចក្ដីសង្ខេបសុន្ទរកថាតាមសម័យប្រជុំ

ព្រឹកថ្ងៃសៅរ៍

អំឡុងសម័យប្រជុំព្រឹកថ្ងៃសៅរ៍នៃ សន្និសីទទូទៅ នៅថ្ងៃសៅរ៍ ទី៥ ខែតុលា ឆ្នាំ២០២៤ ប្រធាន ដាល្លិន អេក អូក បានរំឭកពួកបរិសុទ្ធថ្ងៃចុងក្រោយអំពីបទបញ្ញត្តិរបស់ព្រះអង្គសង្គ្រោះដែលឲ្យចៀសវាងពីការទាស់ទែងគ្នា និងធ្វើជាពួកអ្នកផ្សះផ្សាគេ ។

ទីប្រឹក្សាទីមួយក្នុងគណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានមានប្រសាសន៍ថា « ក្នុងនាមជាអ្នកដើរតាមព្រះគ្រីស្ទ យើងបង្រៀន និងថ្លែងទីបន្ទាល់អំពីព្រះយេស៊ូវគ្រីស្ទ ជាអង្គគំរូដ៏ឥតខ្ចោះរបស់យើង ។ ដូច្នេះចូរយើងធ្វើតាមទ្រង់ដោយពុំមានការទាស់ទែងគ្នាឡើយ ។ នៅពេលយើងអនុវត្តគោលនយោបាយដែលយើងពេញចិត្តនៅក្នុងទង្វើជាសាធារណៈ ចូរយើងធ្វើខ្លួនឲ្យសមនឹងពរជ័យរបស់ទ្រង់តាមរយៈការប្រើភាសា និងវិធីសាស្ត្រជាអ្នកផ្សះផ្សាគេ » ។

ប្រធាន ហែនរី ប៊ី អាវរិង ទីប្រឹក្សាទីពីរនៅក្នុងគណៈប្រធានទីមួយបានដឹកនាំសម័យប្រជុំនេះ ហើយបានដឹកនាំការគាំទ្រដល់ ពួកអ្នកមានសិទ្ធិអំណាចទូទៅ និងពួកអ្នកកាន់តំណែងទូទៅ ។ ប្រធាន រ័សុល អិម ណិលសុន បានចូលរួមក្នុងសន្និសីទពីគេហដ្ឋានរបស់លោក ។

អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ថា « បងប្អូនប្រុសស្រីខ្ញុំអើយ សេចក្តីសង្ឃឹមគឺជាអំណោយទានដែលមានជីវិត អំណោយទានដែលរីកដុះឡើងនៅពេលយើងបង្កើនសេចក្តីជំនឿរបស់យើងទៅលើព្រះយេស៊ូវគ្រីស្ទ » ។

អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានបង្រៀនថា « សាសនាចក្ររបស់ព្រះអង្គសង្គ្រោះគឺពិសេសបើវាស្ថាបនានៅលើដំណឹងល្អរបស់ទ្រង់នោះ » ។ ប្រធានយុវនារីទូទៅ
អេមីលី បេលី ហ្វ្រីមែន និងពួកចិតសិបនាក់ដែលមានសិទ្ធិអំណាចទូទៅ អែលឌើរ ក្រេហ្គូរីយ៉ូ អ៊ី កាស៊ីឡាស អែលឌើរ ខាល ឌី ហើសត៍ និង អែលឌើរ ដេវីឌ ភី ហូមើរ ក៏បានថ្លែងអំឡុងសម័យប្រជុំ
នេះផងដែរ ។

មជ្ឈមណ្ឌលសន្និសីទមានមនុស្សស្ទើរតែពេញទាំងស្រុង ដោយមិនមានការដាក់កំហិតកន្លែងអង្គុយទេ ដែលជាលើកដំបូងចាប់តាំងពីសន្និសីទ ខែមេសា ឆ្នាំ២០២០ ដោយមានតែតាមឌីជីថល ដែលត្រូវបានចាក់ផ្សាយពីសាលប្រជុំតូចមួយនៅវិសាលដ្ឋានព្រះវិហារបរិសុទ្ធ ដោយសារតែជំងឺរាតត្បាតកូវីដ-១៩ ។

ក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធ ដែលដឹកនាំដោយ ម៉ាក វីលប៊ឺក និង រ៉ាយអ៊ិន ម៉ហ្វី ដោយមាន រីឆាដ អ៊ីលៀត និង ប្រាយអែន ម៉ាធៀ លេងព្យាណូខ្យល់ ។ ជម្រើសបទរបស់ក្រុមចម្រៀងរួមមាន « God’s Gracious Love » ( ល.រ.. ១០១៣ ) ចេញពីសៀវភៅទំនុកតម្កើងសកលថ្មី « Hymns – For Home and Church » ។

អែលឌើរ ជេ គីម៉ូ អេសព្លិន ពួកចិតសិបនាក់ដែលមានសិទ្ធិអំណាចទូទៅ បានផ្ដល់ការអធិស្ឋានបើក ហើយការអធិស្ឋានបិទដោយ អាយហ្សេក ខេ ម៉ូរីសុន ពួកចិតសិបនាក់ដែលមានសិទ្ធិអំណាចទូទៅ ។

រសៀលថ្ងៃសោរ៍

អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបើកសម័យប្រជុំរសៀលថ្ងៃសៅរ៍នៃសន្និសីទទូទៅ នាថ្ងៃទី៥ ខែតុលា ឆ្នាំ២០២៤ ដោយចែកចាយដំណើររឿងចេញពីព្រះគម្ពីរមរមនអំពីពួកអ្នកប្រែចិត្តជឿសាសន៍លេមិនរបស់ពួកបុត្រារបស់ម៉ូសាយ ដែលបានកប់គ្រឿងសស្ត្រាវុធនៃការបះបោររបស់ពួកគេ ។

លោកបានមានប្រសាសន៍ថា « យើងអាចសួរខ្លួនយើងនូវអ្វីដែលយើងអាចធ្វើដើម្បីធ្វើតាមលំនាំនេះ ក្នុងការ ‹ ដាក់គ្រឿងសស្ត្រាវុធនៃការបះបោរ [ របស់យើង ] ចុះ › មិនថាវាជាអ្វីនោះទេ ហើយក្លាយជា ‹ ប្រែចិត្តជឿ[ ដល់ ]ព្រះអម្ចាស់ › ដើម្បីឲ្យស្នាមប្រឡាក់នៃអំពើបាប និងបំណងប្រាថ្នាធ្វើអំពើបាប ត្រូវបានយកចេញពីដួងចិត្តរបស់យើង ហើយយើងនឹងពុំបោះបង់ចោលឡើយ » ។

ពួកបរិសុទ្ធថ្ងៃចុងក្រោយរាប់ពាន់នាក់បានប្រមូលផ្តុំគ្នានៅខាងក្នុង និងជុំវិញវិសាលដ្ឋានព្រះវិហារបរិសុទ្ធ និងទីស្នាក់ការកណ្តាលនៃសាសនាចក្រ នៅរសៀលនៃរដូវស្លឹកឈើជ្រុះដែលមានពន្លឺថ្ងៃចែងចាំង សម្រាប់សម័យប្រជុំទីពីរនៃសម័យប្រជុំទាំងប្រាំនៃសន្និសីទទូទៅពាក់កណ្តាលឆ្នាំលើកទី ១៩៤ របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

ប្រធានសាសនាចក្រ រ័សុល អិម ណិលសុន ដែលបានប្រារព្ធខួបគម្រប់ជន្មាយុ ១០០ ឆ្នាំរបស់លោក នាថ្ងៃទី៩ ខែកញ្ញា បានចូលរួមសម័យប្រជុំនេះ ដែលមានមនុស្សស្ទើរតែពេញទាំងស្រុងក្នុងមជ្ឈមណ្ឌលសន្និសីទ ។ អែលឌើរ ហ្គើរីត ដបុលយូ ហ្គង ក្នុងកូរ៉ុមនៃពួកសាវកដប់ពីរនាក់ បានដឹកនាំសម័យប្រជុំនេះ ។

ពួកសាវក អែលឌើរ អូលីសេស សូរ៉េស និងអែលឌើរ ផាទ្រីក ខៀរ៉ុន ក៏បានថ្លែងសុន្ទរកថាផងដែរ ។

អែលឌើរ សូរ៉េស បានមានប្រសាសន៍ថា « ដើម្បីធ្វើតាមព្រះឆន្ទៈរបស់ព្រះអម្ចាស់ដោយមិនបដិសេធ និងដោយគ្មានការសង្ស័យ តម្រូវឲ្យមានភាពជាសិស្សដ៏អស្ចារ្យ និងប្រកបដោយវីរភាព » ។

អែលឌើរ ខៀរ៉ុន បានបង្រៀនថា ដោយសារតែអំណោយនៃភាពសុខសាន្ត និងពន្លឺរបស់ព្រះអង្គសង្គ្រោះ ដែលយើងអាចដកពិសោធន៍រៀងរាល់ថ្ងៃឈប់សម្រាក នោះពួកបរិសុទ្ធថ្ងៃចុងក្រោយស្ថិតនៅក្នុង « សាសនាចក្រនៃអំណរ » ។

អែលឌើរ ហូសេ អេ តិក្សេរ៉ា ក្នុងគណៈប្រធាននៃពួកចិតសិបនាក់ក៏បានមានប្រសាសន៍ផងដែរ ក្នុងនាមជាពួកចិតសិបនាក់ដែលមានសិទ្ធិអំណាចទូទៅ ដែលបានទទួលការគាំទ្រអំឡុងសន្និសីទទូទៅ ខែមេសា ឆ្នាំ២០២៤ ៖ អែលឌើរ ហ្វ័ន ប៉ាប្លូ វីឡា អែលឌើរ ដេវីឌ អិល បាកណឺ អែលឌើរ ឌី ម៉ាទីន ហ្គូរី និង អែលឌើរ អារ៉ូលដូ ប៊ី កាវ៉ាល់ខេនធេ ។

តន្ត្រីសម្រាប់សម័យប្រជុំនេះត្រូវបានផ្ដល់ដោយក្រុមចម្រៀងកុមារ ដែលមានកុមារអាយុ ៨ ដល់ ១២ ឆ្នាំ មកពីស្តេកទាំងឡាយនៅក្នុងរដ្ឋយូថាហ៍ភាគខាងត្បូង និងដឹកនាំដោយ ឡេសលី វ៉កឃើរ ដោយមាន យ៉ូសែប ភីពល និង លីនដា ម៉ាហ្គែត ជាអ្នកលេងព្យាណូខ្យល់ ។ ក្រុមចម្រៀងស្លៀកពាក់ពណ៌ស បានច្រៀងជម្រើសបទមួយចំនួនមកពី សៀវភៅទំនុកតម្កើងសកលថ្មី រួមទាំងបទ « Gethsemane » ( ល.រ. ១០០៩ ) និង « When the Savior Comes Again » ( ល.រ. ១០០២ ) ផងដែរ ។

អែលឌើរ ស៊ាយរ៉ូ ឈឺម៉ែល ពួកចិតសិបនាក់ដែលមានសិទ្ធិអំណាចទូទៅ និងប្រធានអង្គការបឋមសិក្សា ស៊ូសាន អេច ផតធ័រ បានផ្ដល់ការអធិស្ឋានបើក និងបិទរៀងៗខ្លួន ។

ល្ងាចថ្ងៃសៅរ៍

ពួកបរិសុទ្ធថ្ងៃចុងក្រោយអាចចៀសវាងពីអំពើបាបនៃភាពឆ្មើងឆ្មៃដោយការសិក្សា និងរៀនមេរៀនមកពីព្រះគម្ពីរមរមន ដែលបានបង្រៀនដោយអែលឌើរ ដេវីឌ អេ បែដណា អំឡុងសម័យប្រជុំល្ងាចថ្ងៃសៅរ៍ នៃសន្និសីទទូទៅ នាថ្ងៃទី៥ ខែតុលា ។

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានមានប្រសាសន៍ថា « ខ្ញុំសូមផ្ដល់យោបល់ថា ប្រសិនបើអ្នក ឬខ្ញុំជឿថាយើងរឹងប៉ឹង និងមាំមួនគ្រប់គ្រាន់ដើម្បីចៀសពីភាពល្ងង់ខ្លៅនៃភាពឆ្មើងឆ្មៃ នោះប្រហែលជាយើងកំពុងរងទុក្ខដោយសារជំងឺដែលអាចស្លាប់ខាងវិញ្ញាណហើយ » ។

លោកមានប្រសាសន៍ទៀតថា « ខ្ញុំថ្លែងទីបន្ទាល់ថា នៅពេលយើងដើរដោយរាបសានៃព្រះវិញ្ញាណនៃព្រះអម្ចាស់ នោះយើងនឹងចៀសផុត ហើយយកឈ្នះលើភាពឆ្មើងឆ្មៃ ហើយមានភាពសុខសាន្ដនៅក្នុងទ្រង់ » ។

អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរ បានដឹកនាំសម័យប្រជុំល្ងាចថ្ងៃសៅរ៍ នៅមជ្ឈមណ្ឌលសន្និសីទ ជាកន្លែងដែលសាសនាចក្រពុំមានកំណត់កន្លែងអង្គុយសម្រាប់សន្និសីទនេះឡើយ ។

អែលឌើរ ដេណិលសុន ស៊ីលវ៉ា និងអែលឌើរ រ៉ូប៊ើត អិម ដេនស៍ ទាំងពីរនាក់ជាពួកចិតសិបនាក់ដែលមានសិទ្ធិអំណាចទូទៅ បានផ្ដល់ការអធិស្ឋានបើក និងបិទរៀងៗខ្លួន ។

អ្វីដែលពិសេសក្នុងសម័យប្រជុំនេះគឺពួកអ្នកផ្សព្វផ្សាយសាសនាជាអែលឌើរ និងស៊ីស្ទើរដែលកំពុងបម្រើនៅតំបន់យូថាហ៍ ដឹកនាំដោយ ខូរី មេនដិនហល និង ឆេមេន អេវិនស៍ ជាមួយនឹង លីនដា ម៉ាហ្គែត និង យ៉ូសែប ភីពល ជាអ្នកលេងព្យាណូខ្យល់ ។ ជម្រើសទំនុកតម្កើងពីររបស់ក្រុមចម្រៀងគឺមកពីសៀវភៅទំនុកតម្កើងថ្មី « Hymns—For Home and Church » ថ្មី ។ « I Will Walk With Jesus » ( ល.រ. ១០០៤ ) និង « Come, Lord Jesus » ( ល.រ. ១០១៨ ) ។

កម្លាំងអ្នកផ្សព្វផ្សាយសាសនាជាសកលរបស់សាសនាចក្របានមានចំនួនកើនឡើងក្នុងឆ្នាំកន្លងមកនេះ ដោយមានបេសកកម្មចំនួន ៤៥០ នៅទូទាំងពិភពលោក និងចំនួនពួកអ្នកផ្សព្វផ្សាយសាសនាពេញម៉ោងដែលកំពុងបម្រើ កំពុងឈានដល់ និងកំពុងកើនឡើងលើសពីចំនួនកាលពីមុនមានជំងឺរាតត្បាត ។

ព្រឹកថ្ងៃអាទិត្យ

ប្រធាន ហែនរី ប៊ី អាវរិង ក្នុងគណៈប្រធានទីមួយ បានសង្កត់ធ្ងន់ពីសារៈសំខាន់នៃការបង្រៀនភាពសាមញ្ញនៃគោលលទ្ធិនៃព្រះយេស៊ូវគ្រីស្ទ អំឡុងសន្និសីទទូទៅព្រឹកថ្ងៃអាទិត្យ នាថ្ងៃទី៦ ខែតុលា ។

នៅចុងបញ្ចប់នៃសម័យប្រជុំពេលព្រឹកថ្ងៃអាទិត្យនៃសន្និសីទទូទៅ ខែតុលា ឆ្នាំ២០២៤ របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្រធាន អាវរិង បានមានប្រសាសន៍ថា « យើងត្រូវតែចៀសវាងការប៉ាន់ស្មាន ឬការបកស្រាយផ្ទាល់ខ្លួន ដែលហួសពីការបង្រៀនគោលលទ្ធិពិត » ។

លោកបានថ្លែងទីបន្ទាល់ថា ការបង្រៀនពីគោលលទ្ធិរបស់ព្រះគ្រីស្ទ — សេចក្ដីជំនឿលើព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការតស៊ូដល់ទីបញ្ចប់ — គឺជាកិច្ចការដ៏ពិសិដ្ឋ ហើយព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្ដីពិតទាំងនេះ ។

ប្រធាន អាវរិង បានមានប្រសាសន៍ថា « ខ្ញុំសូមធ្វើជាសាក្សីអំពីកិច្ចការដ៏ពិសិដ្ឋនៃការបង្រៀនបុត្រាបុត្រីរបស់ព្រះវរបិតាសួគ៌នូវគោលលទ្ធិដ៏សាមញ្ញរបស់ព្រះយេស៊ូវគ្រីស្ទ ដែលអនុញ្ញាតឲ្យយើងបានស្អាតខាងវិញ្ញាណ ហើយនៅទីបំផុតត្រូវបានស្វាគមន៍ទៅក្នុងវត្តមានរបស់ព្រះ ដើម្បីរស់នៅជាមួយទ្រង់ និងព្រះរាជបុត្រាទ្រង់ដោយសិរីរុងរឿងជារៀងរហូត » ។

ប្រធាន ជែហ្វ្រី អ័រ ហូឡិន ប្រធានស្ដីទីក្នុងកូរ៉ុមនៃពួកសាវកដប់ពីរនាក់ ក៏បានបង្រៀនអំពី « គោលការណ៍ និងពិធីបរិសុទ្ធ » ជាមូលដ្ឋានដែលកំណត់លក្ខណៈដោយសាសនាចក្ររបស់ព្រះគ្រីស្ទ ។

« សេចក្ដីជំនឿ ការប្រែចិត្ត ពិធីបុណ្យជ្រមុជទឹកដោយជ្រមុជទៅក្នុងទឹកដោយដៃរបស់បុរសម្នាក់ដែលមានសិទ្ធិអំណាចពីព្រះដើម្បីធ្វើដូច្នោះ ការទទួលអំណោយទាននៃព្រះវិញ្ញាណបរិសុទ្ធជាផ្នែកមួយនៃការបញ្ជាក់របស់បុគ្គលម្នាក់ចូលទៅក្នុងសាសនាចក្រ ហើយទទួលយកពរជ័យដ៏ពិសិដ្ឋរបស់យើងនៅក្នុងដំណាក់នៃព្រះអម្ចាស់—ទាំងនេះគឺជាគ្រឹះនៃ ‹ គោលការណ៍ និងពិធីបរិសុទ្ធ › ដែលកំណត់ពីសេចក្ដីស្រឡាញ់របស់យើងចំពោះព្រះ និងអ្នកជិតខាង ហើយកំណត់អំពីសាសនាចក្រពិតរបស់ព្រះគ្រីស្ទ » ។

អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍អំពី « ឱកាសដ៏អស្ចារ្យដើម្បីបម្រើ រួបរួមជាមួយសមាជិក និងមិត្តភក្តិ និងដើម្បីណែនាំសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដល់មនុស្សកាន់តែច្រើនជាងពេលមុនៗ » នៅក្នុងទសវត្សរ៍ខាងមុខនេះ ។

ឱកាសនាពេលខាងមុខរួមមានចំនួននៃការសម្ពោធ និងឧទ្ទិសឆ្លងព្រះវិហារបរិសុទ្ធដែលមិនធ្លាប់មានពីមុនមក ខួបគម្រប់ពីររយឆ្នាំនៃការបង្កើតសាសនាចក្រនៅឆ្នាំ២០៣០ និងព្រឹត្តិការណ៍កីឡាអូឡាំពិករដូវរងាឆ្នាំ២០៣៤ នៅឯទីក្រុង សលត៍ លេក ។

អ្នកថ្លែងសុន្ទកថាផ្សេងទៀតនៅក្នុងសម័យប្រជុំនេះគឺ ប៊ីស្សព អិល ថត បាជច៍ ទីប្រឹក្សាទីពីរក្នុងគណៈប៊ីស្សពជាអធិបតី អែលឌើរ ប្រ៊ូក ភី ហេលស៍ ជាពួកចិតសិបនាក់ដែលមានសិទ្ធិអំណាចទូទៅ បងប្រុស ប្រ៊ាតលី អ័រ វិលខក់ ទីប្រឹក្សាទីមួយនៅក្នុងគណៈប្រធានយុវជនទូទៅ និងស៊ីស្ទើរ ត្រេស៊ី វ៉ាយ ប្រោននីង ទីប្រឹក្សាទីពីរក្នុងគណៈប្រធានអង្គការបឋមសិក្សាទូទៅ ។

ប្រធាន ដាល្លិន អេក អូក ទីប្រឹក្សាទីមួយក្នុងគណៈប្រធានទីមួយ បានដឹកនាំសម័យប្រជុំនេះ ដែលមានមនុស្សស្ទើរតែពេញទាំងស្រុងក្នុងមជ្ឈមណ្ឌលសន្និសីទ ។

ការអធិស្ឋានត្រូវបានផ្ដល់ដោយ អែលឌើរ ចូណាថាន អេស ឈ្មីត ពួកចិតសិបនាក់ដែលមានសិទ្ធិអំណាចទូទៅ និងបងប្រុស ឆាត អេច វិប ទីប្រឹក្សាទីមួយក្នុងគណៈប្រធានសាលាថ្ងៃអាទិត្យទូទៅ ។

តន្ត្រីត្រូវបានផ្ដល់ឲ្យដោយក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធ ដែលដឹកនាំដោយ ម៉ាក វីលប៊ឺក ដោយមាន អានឌ្រូ អាន់ស្វើស និង រីឆាដ អ៊ីលៀត ជាអ្នកលេងព្យាណូខ្យល់ ។ ជម្រើសបទមួយរបស់ក្រុមចម្រៀងគឺ « My Shepherd Will Supply My Need » ( ល.រ. ១០១៤ ) មកពីសៀវភៅទំនុកតម្កើងសកលថ្មី « Hymns—For Home and Church »

រសៀលថ្ងៃអាទិត្យ

នៅចុងបញ្ចប់នៃសន្និសីទទូទៅ ខែតុលា ឆ្នាំ២០២៤ ប្រធាន រ័សុល អិម ណិលសុន បានលើកទឹកចិត្តពួកបរិសុទ្ធថ្ងៃចុងក្រោយឲ្យ « ឧទ្ទិសជីវិតរបស់បងប្អូនសាជាថ្មីថ្វាយដល់ព្រះយេស៊ូវគ្រីស្ទ » និងរៀបចំសម្រាប់ការយាងមកជាលើកទីពីររបស់ទ្រង់ ដោយការទៅចូលរួមនៅព្រះវិហារបរិសុទ្ធជាទៀងទាត់ ។

លោកបានមានប្រសាសន៍ថា « នេះជាការសន្យារបស់ខ្ញុំចំពោះបងប្អូន ៖ អ្នកដែលស្វែងរកព្រះយេស៊ូវគ្រីស្ទដោយស្មោះត្រង់គ្រប់រូបនឹងរកឃើញទ្រង់នៅក្នុងព្រះវិហារបរិសុទ្ធ ។ បងប្អូននឹងទទួលអារម្មណ៍នៃសេចក្ដីមេត្តារបស់ទ្រង់ ។ បងប្អូននឹងរកឃើញចម្លើយចំពោះសំណួរដែលគួរឲ្យរំខានបំផុតរបស់បងប្អូន ។ បងប្អូននឹងយល់កាន់តែច្បាស់អំពីអំណរនៃដំណឹងល្អរបស់ទ្រង់ » ។

ដោយសង្កត់ធ្ងន់ពីតួនាទីរបស់ព្រះវិហារបរិសុទ្ធនៅក្នុងការជួយរៀបចំពួកបរិសុទ្ធឲ្យរៀបចំពិភពលោកនេះ ប្រធាន ណិលសុន បានកត់សម្គាល់ពី « ល្បឿនដែលមិនធ្លាប់មានពីមុនមក » នៃការសាងសង់ព្រះវិហារបរិសុទ្ធ ។ លោកបានប្រកាសទីតាំងព្រះវិហារបរិសុទ្ធថ្មីចំនួន ១៧ ហើយបានមានប្រសាសន៍ថា ការជួសជុលព្រះវិហារបរិសុទ្ធ និងវិសាលដ្ឋានព្រះវិហារបរិសុទ្ធ សលត៍ លេក នឹងត្រូវបញ្ចប់ត្រឹមចុងឆ្នាំ២០២៦ ។

អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានដឹកនាំសម័យប្រជុំនេះចេញពីមជ្ឈមណ្ឌលសន្និសីទដែលមានមនុស្សស្ទើរតែពេញទាំងស្រុង ដោយមានអ្នកចូលរួមជិត ១០០,០០០ នាក់នៅទីនោះ ក្នុងកន្លែងដែលបម្រុងទុកសម្រាប់ពេលលើសចំនួន និងនៅជុំវិញទីធ្លាវិសាលដ្ឋានព្រះវិហារបរិសុទ្ធ ។

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ បានអញ្ជើញអ្នកស្ដាប់ឲ្យចិញ្ចឹមបីបាច់សេចក្ដីជំនឿ និងការតាំងចិត្តរបស់ពួកគេចំពោះព្រះយេស៊ូវគ្រីស្ទ ។ លោកបានមានប្រសាសន៍ថា « ជំនឿរឹងមាំ នៅពេលវាបានចាក់ឫសយ៉ាងជ្រៅក្នុងបទពិសោធន៍ផ្ទាល់ខ្លួន ការប្តេជ្ញាផ្ទាល់ខ្លួនចំពោះព្រះយេស៊ូវគ្រីស្ទ ដោយមិនផ្តេកផ្តួលទៅលើទំនៀមទម្លាប់របស់យើង ឬអ្វីដែលអ្នកដទៃនិយាយឬធ្វើឡើយ » ។

អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍អំពីសារៈសំខាន់នៃការគាំទ្រព្យាការី ប្រធាន ណិលសុន ដោយការធ្វើតាមដំបូន្មានរបស់លោក និងការបង្រៀនពាក្យសម្ដីរបស់លោក ។ លោកបានមានប្រសាសន៍ថា « យើងទាំងអស់គ្នាត្រូវការការលើកឡើងដោយព្រះអម្ចាស់តាមរយៈសេចក្ដីសុខសាន្ត ការលួងលោមចិត្ត ហើយសំខាន់បំផុតគឺវិវរណៈផ្ទាល់ខ្លួនដើម្បីតតាំងនឹងសេចក្ដីភ័យខ្លាច សេចក្ដីងងឹត និងការឈ្លោះប្រកែកគ្នាជុំវិញពិភពលោក » ។

អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់ បានថ្លែងទីបន្ទាល់អំពីអំណាចនៃព្រះគម្ពីរក្នុងការកសាងសេចក្ដីជំនឿ ។ « រួមផ្សំជាមួយការបង្រៀនរបស់ព្យាការីដែលនៅរស់ ព្រះគម្ពីរពិសិដ្ឋទាំងនេះផ្តល់នូវការណែនាំខាងគោលលទ្ធិសម្រាប់យើងនៅក្នុងពិភពលោកសព្វថ្ងៃនេះ ។ ព្រះគម្ពីរទាំងនេះពោរពេញដោយព្រះចេស្តា នៅពេលព្រះគម្ពីរទាំងនេះផ្តល់នូវការបង្ហាត់ ការប្រដៅតម្រង់ ការលួងលោម និងការលួងចិត្តដល់បុគ្គល និងក្រុមគ្រួសារដែលស្វែងរកការណែនាំពីព្រះអម្ចាស់ » ។

អ្នកថ្លែងសុន្ទរកថាផ្សេងទៀតនៅក្នុងសម័យប្រជុំរសៀលថ្ងៃសៅរ៍នេះគឺ អែលឌើរ តាកាស្ស៊ី វ៉ាដា អែលឌើរ រ៉ូប៉េន វី អាល់លៀដ និង អែលឌើរ អាយ រ៉េម៉ុន អេហ្គបូ ទាំងអស់គឺជាពួកចិតសិបនាក់ដែលមានសិទ្ធិអំណាចទូទៅ ។

អែលឌើរ អាម៉េឌ អេស ខ័របីត ជាពួកចិតសិបនាក់ដែលមានសិទ្ធិអំណាចទូទៅ និងស៊ីស្ទើរ ថាម៉ារ៉ា ដបុលយូ រូនៀ ជាទីប្រឹក្សាទីមួយក្នុងគណៈប្រធានយុវនារីទូទៅ បានផ្ដល់ការអធិស្ឋាន ។

ក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធ ដែលដឹកនាំដោយ ម៉ាក វីលប៊ឺក និង រ៉ាយអ៊ិន ម៉ហ្វី ដោយមាន ប្រាយអែន ម៉ាធៀ និង អានឌ្រូ អាន់ស្វើស ជាអ្នកលេងព្យាណូខ្យល់ បានផ្ដល់តន្ត្រីសម្រាប់សម័យប្រជុំនេះ ។ ជម្រើសបទរបស់ក្រុមចម្រៀងរួមមាន « Think a Sacred Song » ( ល.រ. ១០០៦ ) ជាទំនុកតម្កើងទីប្រាំបីដែលត្រូវបានច្រៀងក្នុងសន្និសីទនេះដែលចេញមកពីសៀវភៅទំនុកតម្កើងសកលថ្មី « Hymns – For Home and Church » ។

1 / 2

Download Photos

តើខ្ញុំអាចមើល ឬស្ដាប់ពេលក្រោយដោយរបៀបណា ?

បន្ទាប់ពីការចាក់ផ្សាយនេះ សារលិខិតទាំងឡាយនឹងមានជាទម្រង់អត្ថបទ សំឡេង និងវីដេអូនៅលើបណ្ដាញនានាច្រើនជាង ៧០ ភាសាសម្រាប់ការមើលតាមតម្រូវការ និង ការសិក្សា ។ បណ្ដាញទាំងនេះរួមមាន បណ្ណាល័យដំណឹងល្អ, Media Library, General Conference YouTube channel, Gospel Stream និង ទស្សនាវដ្ដីសាសនាចក្រ ។

សេចក្ដី​សង្ខេប​នៃ​សុន្ទរកថា​សន្និសីទ​ទូទៅ ខែតុលា ឆ្នាំ២០២៤ ព័ត៌មាន និង​សេចក្តីប្រកាស

ព័ត៌មាន​សន្នសីទ​ទូទៅ

សេចក្ដី​សង្ខេប​សុន្ទរកថា​តាម​សម័យ​ប្រជុំ

តើ​ខ្ញុំ​អាច​មើល ឬ​ស្ដាប់​ពេល​ក្រោយ​ដោយ​របៀប​ណា ?

សេចក្ដីសង្ខេបនៃសុន្ទរកថាសន្និសីទទូទៅ ខែតុលា ឆ្នាំ២០២៤ ព័ត៌មាន និងសេចក្តីប្រកាស

ព័ត៌មានសន្នសីទទូទៅ

សេចក្ដីសង្ខេបសុន្ទរកថាតាមសម័យប្រជុំ

តើខ្ញុំអាចមើល ឬស្ដាប់ពេលក្រោយដោយរបៀបណា ?