សេចក្ដីសង្ខេបសម័យប្រជុំព្រឹកថ្ងៃសៅរ៍សម្រាប់សន្និសីទទូទៅ ខែមេសា ឆ្នាំ២០២៦

1 / 2

Download Photos

ពួកបរិសុទ្ធថ្ងៃចុងក្រោយទូទាំងពិភពលោកបានគាំទ្រជាផ្លូវការថាជាព្យាការី ជាអ្នកមើលឆុត ជាអ្នកទទួលវិវរណៈ និងជាប្រធានសាសនាចក្រ គឺប្រធាន ដាល្លិន អេក អូក និងទីប្រឹក្សារបស់លោកនៅក្នុងគណៈប្រធានទីមួយ ដែលមានប្រធាន ហែនរី ប៊ី អាវរិង និងប្រធាន ឌី ថត គ្រីស្តូហ្វឺសិន នៅក្នុងអំឡុងពេលនៃជំនុំមុតមាំនៅព្រឹកថ្ងៃសៅរ៍ ទី៤ ខែមេសា ឆ្នាំ២០២៦ ។

ដោយសំដៅទៅលើជំនុំមុតមាំគឺជា « ព្រឹត្តិការណ៍ដ៏អស្ចារ្យមួយ » ប្រធាន អូក បានមានប្រសាសន៍នៅក្នុងសុន្ទរកថាបើកនៃសន្និសីទទូទៅខែមេសា ឆ្នាំ២០២៦ របស់លោកថា « ខ្ញុំមានអំណរគុណដែលបាននៅក្នុងចំណោមថ្នាក់ដឹកនាំទាំងនោះ ដែលត្រូវបានទទួលស្គាល់ជាផ្លូវការដោយវិធីនេះ » ហើយបង្ហាញអំណរគុណចំពោះការលើកដៃគាំទ្រ ការអធិស្ឋាន ការផ្ដល់ជំនួយគាំទ្រ និងការបម្រើរបស់សមាជិកសាសនាចក្រ ។

លោកបានបញ្ចប់ថា « នារដូវកាលបុណ្យអ៊ីស្ទើរនេះ ខ្ញុំសូមអះអាងជាថ្មីនូវទីបន្ទាល់របស់យើងអំពីព្រះអម្ចាស់ដ៏មានព្រះជន្មរស់ឡើងវិញ ហើយទទួលស្គាល់ថា ទ្រង់ជាព្រះសិរនៃសាសនាចក្រនេះ » ។

ប្រធាន គ្រីស្តូហ្វឺសិន បានដឹកនាំសម័យប្រជុំនៅឯមជ្ឈមណ្ឌលសន្និសីទនៅក្នុងទីក្រុង សលត៍ លេក រដ្ឋយូថាហ៍ ។ មនុស្សជាង ២០,០០០ នាក់បានចូលរួមដោយផ្ទាល់នៅទីតាំងផ្សេងៗគ្នានៅឯវិសាលដ្ឋានព្រះវិហារបរិសុទ្ធ ។

ស្តីពីប្រធានបទនៃការអធិស្ឋាន ប្រធាន អាវរិង បានមានប្រសាសន៍ថា ទោះបីជាពិភពលោកហាក់ដូចជាពោរពេញដោយភាពចលាចលក៏ដោយ ក៏ពួកបរិសុទ្ធថ្ងៃចុងក្រោយដ៏ស្មោះត្រង់នៅទូទាំងពិភពលោកបានអធិស្ឋានទៅកាន់ស្ថានសួគ៌យ៉ាងច្រើនសន្ធឹកសន្ធាប់ផងដែរ ដោយការអង្វរព្រះអម្ចាស់ទូលសុំជំនួយ ការលួងលោម ការដឹកនាំ និងសេចក្តីសុខសាន្តដែរ ។ ការបើកទ្វារនៃស្ថានសួគ៌តាមរយៈការអធិស្ឋានដ៏ក្លៀវក្លា មិនតម្រូវឲ្យប្រើពាក្យសម្ដី ឬភាសាដ៏ស្រទន់ច្រើនហូរហែនោះទេ ។

សូម្បីតែនៅពេលដែលបុគ្គលម្នាក់ៗមិនមានអារម្មណ៍ចង់អធិស្ឋាន ឬមិនដឹងថាត្រូវនិយាយអ្វីក៏ដោយ ព្រះអម្ចាស់ទ្រង់ស្តាប់ឮការអធិស្ឋានដ៏សម្ងាត់នៃដួងចិត្តរបស់ពួកគេ ។ លោកបានមានប្រសាសន៍ថា ដោយសារតែការយកព្រះទ័យទុកដាក់ពេញដោយក្តីស្រឡាញ់របស់ទ្រង់ « នៅពេលយើងអធិស្ឋានឥតឈប់ឈរ មិនថាកាលៈទេសៈនៃជីវិតយ៉ាងណានោះទេ នោះព្រះអម្ចាស់នឹងប្រទានភាពសុខសាន្ត និងការគាំទ្រដ៏ស្ថិតស្ថេរដល់យើង » ។

អែលឌើរ ផាទ្រីក ខៀរ៉ុន ក្នុងកូរ៉ុមនៃពួកសាវកដប់ពីរនាក់បានបង្រៀនថា ការបម្រើរបស់យើងគឺជាជម្រើស ជាដង្វាយដល់ព្រះ និងជាពរជ័យ ។ លោកបានមានប្រសាសន៍ពីរបៀបដែលបុគ្គលម្នាក់ៗបម្រើ មិនមែនអំពីកន្លែងបម្រើទេដែលសំខាន់ចំពោះទ្រង់នោះ ។ ព្រះអម្ចាស់ធ្វើការជាមួយអ្នកបម្រើដែលមិនឥតខ្ចោះ ហើយការហៅខ្លះតម្រូវឲ្យមានការពង្រីកសមត្ថភាព ។

លោកបានមានប្រសាសន៍ថា « ការហៅពីព្រះអម្ចាស់គឺជាការរៀបរៀងយ៉ាងពិសេសសម្រាប់ការរីកចម្រើនរបស់យើង ។ កាលណាយើងបន្ទាបខ្លួនយើង គិតពីអ្នកដទៃមុនខ្លួនឯង ហើយរៀនថា កាលណាយើងនៅក្នុងការបម្រើដល់មនុស្សទូទៅ នោះយើងគ្រាន់តែនៅក្នុងការបម្រើដល់ព្រះរបស់យើងតែប៉ុណ្ណោះ » ។

នៅក្នុងព្រះវិហារបរិសុទ្ធ ព្រះយេស៊ូវដែលមានព្រះជន្ម១២ព្រះវស្សា បានមានបន្ទូលថា ទ្រង់កំពុងធ្វើកិច្ចការរបស់ព្រះវរបិតាទ្រង់ ។ អែលឌើរ ខៀរ៉ុន បានមានប្រសាសន៍ថា « ទ្រង់ត្រូវការបងប្អូន ហើយទ្រង់ក៏ត្រូវការខ្ញុំដែរ ។ ជីវិតនឹងប្រសើរឡើង—អ្វីគ្រប់យ៉ាងនឹងប្រសើរឡើង— នៅពេលយើងនៅក្នុងកិច្ចការរបស់ទ្រង់ » ។

gen-conf-26
ព្រះអាទិត្យរះពីលើព្រះវិហារបរិសុទ្ធ សលត៍ លេក ដែលកំពុងជួសជុលឡើងវិញ ។2026 by Intellectual Reserve, Inc. All rights reserved.

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានបង្រៀនថា ការប្រកាន់ខ្ជាប់ខាងវិញ្ញាណគឺលើសពីការគ្រាន់តែតស៊ូយ៉ាងស្វិតស្វាញដើម្បីបំពេញកាតព្វកិច្ច ឬបញ្ហាប្រឈមដ៏លំបាកទៅទៀត ។

លោកបានមានប្រសាសន៍ថា « ការកាន់ខ្ជាប់ដរាបដល់ចុងបំផុតគឺជាដំណើរស្វែងរកដ៏រីករាយពេញមួយជីវិត ។ ជាការឈានទៅមុខដោយមានសេចក្ដីជំនឿលើព្រះយេស៊ូវគ្រីស្ទ ក្នុងដំណើរការទុកចិត្តលើព្រះអង្គសង្គ្រោះរបស់យើង និងទទួលជំនួយពីទ្រង់បន្តិចម្តងៗ ដើម្បីប្រែក្លាយកាន់តែដូចទ្រង់ ។ នៅពេលសេចក្ដីស្រឡាញ់របស់យើងចំពោះទ្រង់ដុះដាលកាន់តែរឹងមាំ និងជ្រាលជ្រៅជាងមុន នោះយើងអាចមានពរឲ្យទទួលបានទស្សនវិស័យខាងវិញ្ញាណ ព្រះគុណដ៏មានឫទ្ធានុភាពរបស់ព្រះអម្ចាស់ និងអំណរដ៏អស្ចារ្យ និងមិនអាចពិពណ៌នាបាន » ។

លោកបានថ្លែងទីបន្ទាល់ថា អំណាចនៃគោលលទ្ធិ សេចក្តីសញ្ញា និងពិធីបរិសុទ្ធ ព្រមទាំងគំរូរបស់ទ្រង់ អាចប្រទានពរដល់យើងនៅគ្រប់ទិដ្ឋភាពនៃជីវិតរបស់យើង ។

អែលឌើរ ក្លាក ជី ហ្គីលប៊ឺត ក្នុងកូរ៉ុមនៃពួកសាវកដប់ពីរនាក់ នៅក្នុងសុន្ទរកថាជាលើកដំបូងក្នុងសន្និសីទទូទៅក្នុងនាមជាសាវកបានបង្រៀនថា នៅពេលដែលបុគ្គលម្នាក់ៗវង្វេងផ្លូវខាងវិញ្ញាណ ហើយធ្វើខុស ព្រះអង្គសង្គ្រោះជួសជុលចន្លោះប្រហោងរបស់ពួកគេ ហើយអនុញ្ញាតឲ្យពួកគេផ្លាស់ប្តូរ ។

មនុស្សមួយចំនួនមិនរកផ្លូវទៅផ្ទះវិញភ្លាមៗទេ ព្រោះពួកគេមានអារម្មណ៍ថាពួកគេមិនមានកម្មសិទ្ធិ មានអារម្មណ៍ថាមិនគ្រប់គ្រាន់ ពុះពារនឹងការសង្ស័យ ឬត្រូវបានកំណត់ដោយប្រពៃណី ។ ប៉ុន្តែសំណួរដ៏ស៊ីជម្រៅនៃជីវិតមិនរលាយបាត់ឡើយ ។

ព្យាការីបានបង្រៀនថា ដំណើរត្រឡប់ទៅផ្ទះវិញចាប់ផ្តើមដោយត្រឡប់មកពឹងផ្អែកលើព្រះយេស៊ូវគ្រីស្ទវិញ ។

លោកបានមានប្រសាសន៍ថា « យើងទាំងអស់គ្នាមានការលំបាក ហើយយើងត្រូវការការអត់ធ្មត់ ការបម្រើ និងសេចក្ដីស្រឡាញ់ពីគ្នាទៅវិញទៅមក ។ ចំពោះបងប្អូនដែលកំពុងព្យាយាមជួយអស់អ្នកដែលយើងស្រឡាញ់ សូមកាន់ខ្ជាប់នូវសេចក្តីពិត ហើយសូមរក្សាសេចក្ដីសញ្ញារបស់បងប្អូន ។ ចំពោះបងប្អូនដែលកំពុងជួបបញ្ហាដើម្បីត្រឡប់មកផ្ទះវិញ សូមដឹងថា ព្រះអង្គសង្គ្រោះរបស់បងប្អូនកំពុងហៅបងប្អូនឲ្យត្រឡប់មកវិញ ។ នៅទីបំផុត មនុស្សគ្រប់គ្នាត្រូវតែធ្វើការជ្រើសរើសដោយខ្លួនឯង ដើម្បីត្រឡប់មកផ្ទះវិញ » ។

ស៊ីស្ទើរ គ្រីស្ទីន អិម យី ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅបានបង្រៀនថា ពួកសិស្សរបស់ព្រះយេស៊ូវមានពរជ័យ និងការទទួលខុសត្រូវក្នុងការផ្តល់សេចក្ដីស្រឡាញ់របស់ព្រះអង្គសង្គ្រោះ និងការមានចំណែករបស់ទ្រង់ដល់អ្នកដទៃ ។ នៅពេលផ្ដល់ការងារបម្រើដោយសេចក្ដីជំនឿ ព្រះអម្ចាស់បានសន្យាថា ទ្រង់នឹងគង់នៅជាមួយអស់អ្នកដែលកំពុងផ្ដល់ការងារបម្រើទាំងនោះ ។

« ប្រសិនបើបងប្អូនចង់មានអារម្មណ៍ថាមានមូលដ្ឋានរឹងមាំ ទទួលបានអារម្មណ៍នៃការមានចំណែកដ៏ទេវភាព និងធ្វើការផ្លាស់ប្តូរពិតប្រាកដនៅក្នុងពិភពលោក ខ្ញុំសូមអញ្ជើញឲ្យបងប្អូនដើរតាមព្រះអង្គសង្គ្រោះ ហើយបម្រើក្នុងព្រះនាមរបស់ទ្រង់ » ។

អែលឌើរ មីហ្គែល ចន យូ ថេ ពួកចិតសិបនាក់បានថ្លែងទីបន្ទាល់ថា នៅពេលដែលបុគ្គលម្នាក់ៗធ្វើតាមការបង្រៀនរបស់ព្យាការី និងពួកសាវកដែលនៅរស់ នោះពួកគេកំពុងធ្វើតាមព្រះយេស៊ូវគ្រីស្ទ ។

លោកបានមានប្រសាសន៍ថា « នៅពេលខ្ញុំខិតខំដើរតាមព្រះអង្គសង្គ្រោះ នោះទ្រង់នឹងប្រើខ្ញុំដើម្បីប្រទានពរដល់អ្នកដទៃ ។ តាមរយៈគំរូ និងការបម្រើរបស់ខ្ញុំដល់អ្នកដទៃ នោះពួកគេនឹងទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះចំពោះពួកគេ » ។

ថ្លែងអំពីប្រធានបទនៃដង្វាយមួយភាគក្នុងដប់ អែលឌើរ ហ៊ោរហេ ធី ប៊ីស៊ីរ៉ា នៃពួកចិតសិបនាក់ បានបង្រៀនថា ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃការដាក់ព្រះជាអាទិភាពក្នុងជីវិតរបស់មនុស្សម្នាក់ ។

លោកបានមានប្រសាសន៍ថា « ខ្ញុំប្រាកដថា ការថ្វាយដង្វាយមួយភាគដប់ និងដង្វាយផ្សេងៗនឹងបង្កើនសមត្ថភាពខាងវិញ្ញាណរបស់យើង នៅពេលយើងដាក់ព្រះជាអាទិភាពទីមួយ ហើយថ្វាយ‹ កូនសត្វច្បងនៃហ្វូងចៀម ›របស់យើង » ។

ការអធិស្ឋានត្រូវបានផ្ដល់ដោយអែលឌើរ អែលឌើរ ម៉ៃខល ប៊ី. ស្រ្ដង និងអែលឌើរ គ្រីស្តូហ្វើរ អេច គីម ដែលលោកទាំងពីរនាក់ជាសមាជិកនៃពួកចិតសិបនាក់ ។ តន្ត្រីត្រូវបានផ្តល់ដោយក្រុមចម្រៀងរោងឱបោសថនៅឯវិសាលដ្ឋានព្រះវិហារបរិសុទ្ធ ដឹកនាំដោយ ម៉ាក វីលប៊ើក និង រ៉ាយអិន មឺហ្វី និងអមដោយអ្នកលេងព្យ៉ាណូខ្យល់ ប្រាយអែន ម៉ាធៀ និង អាន់ឌ្រូ អាន់ស្វើស ។

សេចក្តីសង្ខេបពីសុន្ទរកថារបស់អ្នកឡើងនិយាយម្នាក់ៗ ( តាមលំដាប់លំដោយអ្នកឡើងនិយាយ )

ប្រធាន ដាល្លិន អេក អូក ៖ ‹ សេចក្តីផ្ដើម ›
អែលឌើរ ផាទ្រីក ខៀរ៉ុន ៖ ‹ កិច្ចការរបស់ទ្រង់ ›
ស៊ីស្ទើរ គ្រីស្ទីន អិម យី ៖ ‹ ការងារបម្រើ—« ចូរអ្នករាល់គ្នាស្រឡាញ់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ » ›
អែលឌើរ ក្លាក ជី ហ្គីលប៊ឺត ៖ ‹ មកផ្ទះវិញ ›
អែលឌើរ ដេវីឌ អេ បែដណា ៖ ‹ អស់អ្នកណាដែលស៊ូទ្រាំដោយក្លាហាន ›
អែលឌើរ មីហ្គែល ចន យូ ថេ ៖ ‹ ធ្វើតាមព្យាការី គាត់ស្គាល់ផ្លូវត្រូវ ›
អែលឌើរ ហ៊ោរហេ ធី ប៊ីស៊ីរ៉ា ៖ ‹ ដង្វាយមួយភាគក្នុងដប់—ការដាក់ព្រះជាអាទិភាពទីមួយ ›
ប្រធាន ហែនរី ប៊ី អាវរិង ៖ ‹ ការអធិស្ឋានសម្រាប់ភាពសុខសាន្ត ›