នៅថ្ងៃទី២០ ខែកញ្ញា ឆ្នាំ២០២៤ សមាគមនិកាយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានបរិច្ចាគឧបករណ៍វះកាត់ដែលត្រូវការជាច្រើនដល់បេសកកម្មវះកាត់នៃអង្គការស្នាមញញឹមកម្ពុជា នៃមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ប្រទេសកម្ពុជា ។ វត្តមាននៅក្នុងកម្មវិធីនោះ មាននាយកប្រតិបត្តិអង្គការស្នាមញញឹមកម្ពុជា លោក ចាន់ កុកចយ វេជ្ជបណ្ឌិតវះកាត់ លោកវេជ្ជបណ្ឌិត នូ សារុំ សមាជិកក្រុមប្រឹក្សាភិបាល ចាក លី និងអ្នកមើលការខុសត្រូវ ផុន បូរ៉ា រួមជាមួយបុគ្គលិកមន្ទីរពេទ្យ និងអ្នកផ្គត់ផ្គង់ផ្សេងទៀត ។ មានវត្តមានមកពីសមាគមនិកាយ អនុប្រធាន កញ្ញា យន សូផាណែត លោក អ៊ុល ភន់ ជាប្រធានស្តេកខាងត្បូងភ្នំពេញកម្ពុជា និងគូស្វាមីភរិយាស្ម័គ្រចិត្តពេញម៉ោងក្នុងសាសនាចក្រ អែលឌើរ នែល និងស៊ីស្ទើរ ខារ៉ូល អាន ឃ្លីងជឺ ព្រមទាំងអែលឌើរ ឃឹមបឹល និងស៊ីស្ទើរ ស៊ូសាន ហារីស ក៏បានចូលរួមផងដែរ ។
IMG_5281.jpeg
បថតថតក្នុងពិធីប្រគល់-ទទួលបរិក្ខារវះកាត់ពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដល់បេសកកម្មវះកាត់នៃអង្គការស្នាមញញឹមកម្ពុជា នាថ្ងៃទី២០ ខែកញ្ញា ឆ្នាំ២០២៤ នៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ប្រទេសកម្ពុជា ។© 2024 by Intellectual Reserve, Inc. All rights reserved.អង្គការស្នាមញញឹមកម្ពុជា គឺជាអង្គការដែលមានមូលដ្ឋានស្ម័គ្រចិត្តទាំងស្រុង ដែលផ្តល់ការព្យាបាលដោយឥតគិតថ្លៃដល់អ្នកជំងឺដែលមានបញ្ហាដូចជា ឆែបបបូរមាត់ ឆែបក្រអូមមាត់ និងបញ្ហាមុខផ្សេងៗទៀត ។ ក្រៅពីការព្យាបាលដោយការវះកាត់ ជំនួយរបស់ពួកគេរួមមានអាហារសម្រាប់អ្នកជំងឺ និងក្រុមគ្រួសារ ការថែទាំតាមដាន និងការព្យាបាលការនិយាយ ។ ដោយជាផ្នែកមួយរបស់អង្គការស្នាមញញឹមប្រចាំតំបន់អាស៊ី ពួកគេផ្តល់សេវាកម្មទាំងនេះដល់អ្នកជំងឺនៅក្នុងទីក្រុងភ្នំពេញ តាមបណ្ដាខេត្តនៃ កម្ពុជា និងតំបន់អាស៊ី ។ លោកនាយក កុកចយ បានចែកចាយថា មកទល់នឹងពេលនេះអង្គការស្នាមញញឹមកម្ពុជា បានធ្វើការវះកាត់ជាង ៥,៤០០ ដងមកហើយ ។
IMG_5267.jpeg
លោក ចាន់ កុកចយ នាយកប្រតិបត្តិអង្គការស្នាមញញឹមកម្ពុជា ជួបជាមួយនឹងអនុប្រធាន កញ្ញា យន សូផាណែត មកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ក្នុងពិធីប្រគល់-ទទួលអំណោយបរិក្ខារវះកាត់ពីសាសនាចក្រ ដល់អង្គការស្នាមញញឹមកម្ពុជា នាថ្ងៃទី២០ ខែកញ្ញា ឆ្នាំ២០២៤ នៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ប្រទេសកម្ពុជា ។© 2024 by Intellectual Reserve, Inc. All rights reserved.លោកនាយក កុកចយ បានមានប្រសាសន៍ថា « យើងពិតជាមានអំណរគុណចំពោះការគាំទ្ររបស់សមាគមនិកាយក្នុងការនាំយកសេវាកម្មដែលត្រូវការច្រើនទាំងនេះមកកាន់ប្រទេសកម្ពុជា និងតំបន់អាស៊ី » ។ លោក កុកចយ បានពន្យល់ថា នៅពេលដែលអង្គការស្នាមញញឹមកម្ពុជា មិនប្រើឧបករណ៍វះកាត់ទាំងនេះ នោះផ្នែកវះកាត់ផ្សេងៗទៀតនៅក្នុងមន្ទីរពេទ្យជាអ្នកប្រើប្រាស់ឧបករណ៍ទាំងនោះ ។
លោកវេជ្ជបណ្ឌិត នូ សារុំ បានពន្យល់ពីការប្រើប្រាស់គ្រឿងបរិក្ខារនីមួយៗ និងសារៈសំខាន់នៃការរក្សាអ្នកជំងឺឲ្យមានសុវត្ថិភាព ។ លោកបានចែកចាយថា ឧបករណ៍ថ្មីមួយចំនួននឹងជំនួសឧបករណ៍ចាស់ៗដែលត្រូវប្តូរចេញបន្តិចម្តងៗ ហើយនឹងផ្តល់នូវសមត្ថភាពវះកាត់ថ្មីដែលត្រូវការច្រើន ដែលនឹងធ្វើឲ្យការថែទាំអ្នកជំងឺបានប្រសើរឡើង ។
IMG_5223.jpeg
លោកវេជ្ជបណ្ឌិត នូ សារុំ មកពីបេសកកម្មវះកាត់នៃអង្គការស្នាមញញឹមកម្ពុជា ពន្យល់ពីគម្រោងប្រើប្រាស់ឧបករណ៍បរិក្ខារពេទ្យដែលបានបរិច្ចាគក្នុងពិធីប្រគល់-ទទួលបរិក្ខារពេទ្យកាលពីថ្ងៃទី២០ ខែកញ្ញា ឆ្នាំ២០២៤ នៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ប្រទេសកម្ពុជា ។© 2024 by Intellectual Reserve, Inc. All rights reserved.កញ្ញា យន សូផាណែត បានថ្លែងអំណរគុណដល់អង្គការស្នាមញញឹមកម្ពុជា ដែលបានផ្តល់ឱកាសផ្តល់ការគាំទ្រដល់ពួកគេ ។ នាងបានពន្យល់ថា « យើងជឿថា យើងទាំងអស់គ្នាជាបុត្រាបុត្រីរបស់ព្រះ និងជាបងប្អូននឹងគ្នា ។ ការបរិច្ចាគទាំងនេះ គឺអាចធ្វើទៅបានដោយសារតែការបរិច្ចាគពីសមាជិកនៃសមាគមនិកាយដែលបានតមអាហារពីរពេល និងបរិច្ចាគតម្លៃនៃអាហារទាំងនោះដើម្បីជួយអ្នកផ្សេងទៀតនៅទូទាំងពិភពលោក ។ អែលឌើរ ឃ្លីងជឺ បានមានប្រសាសន៍ថា « យើងទាំងអស់គ្នាសាមគ្គីគ្នាជួយដល់កុមារកម្ពុជា រួមជាមួយនឹងបេសកកម្មរបស់អង្គការស្នាមញញឹមកម្ពុជា » ។
បរិក្ខារដែលបានបរិច្ចាគរួមមាន ម៉ាស៊ីនបូមស្លេះចំនួន ៣ គ្រឿង ម៉ាស៊ីនឆក់បេះដូងចំនួន ១ គ្រឿង ម៉ាស៊ីនតាមដានអ្នកជំងឺចំនួន ២ គ្រឿង ម៉ាស៊ីនចាក់ថ្នាំសណ្ដំចំនួន ២ គ្រឿង និងឧបករណ៍វះកាត់អេឡិចត្រូនិចមួយ ។ ការសហការរវាងសមាគមនិកាយ និងអង្គការស្នាមញញឹមកម្ពុជា នឹងជួយរក្សាស្នាមញញឹមនៅលើផ្ទៃមុខរបស់កុមារពីតំបន់នេះឲ្យកាន់តែមានភាពភ្លឺត្រចេះត្រចង់សម្រាប់ឆ្នាំក្រោយៗទៀត ខណៈដែលក្រុមចុងក្រោយនៅតែបន្តបេសកកម្មរបស់ខ្លួនក្នុងការកែតម្រូវស្ថានភាពស្នាមឆែប និងការខូចទ្រង់ទ្រាយផ្ទៃមុខផ្សេងៗទៀតជាមួយនឹងឧបករណ៍ថ្មីនេះ ។
