អែលឌើរ រ៉ូណល អេ រ៉ាសបាន ធ្វើការឧទ្ទិសឆ្លងព្រះវិហារបរិសុទ្ធ បាងកក ប្រទេសថៃ

ដោយមានអែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ ធ្វើជាអធិបតីនៅ ថ្ងៃទី ២២ ខែ តុលា ឆ្នាំ ២០២៣ ។ ការឧទ្ទិសឆ្លងព្រះវិហារបរិសុទ្ធ បាងកក ប្រទេសថៃ ថ្មី របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមិនត្រឹមតែមានព្រះវិហារបរិសុទ្ធដែលកំពុងប្រតិបត្តិការទី ១៨៥ នៅទូទាំងពិភពលោកប៉ុណ្ណោះទេ ប៉ុន្តែវាជាព្រះវិហារបរិសុទ្ធដំបូងគេបង្អស់ នៅឧបទ្វីបអាស៊ីអាគ្នេយ៍ផងដែរ ។

កម្មវិធីឧទ្ទិសឆ្លងកាលពីថ្ងៃអាទិត្យបានទាក់ទាញពួកបរិសុទ្ធថ្ងៃចុងក្រោយជាច្រើនពាន់នាក់ពេញមួយថ្ងៃនោះ ដោយសារអ្នកចូលរួមមិនត្រឹមតែបានអង្គុយក្នុងបរិវេណនៃព្រះវិហារបរិសុទ្ធដែលមានក្រឡាផ្ទៃចំនួន ៤៨,៥២៥ ហ្វីតការ៉េ ដែលមានកម្ពស់ប្រាំមួយជាន់ និងកំពូលចំនួនប្រាំបួន សម្រាប់ទាំងពីរវគ្គប៉ុណ្ណោះទេ ប៉ុន្តែថែមទាំងអង្គុយនៅក្នុងរោងជំនុំធំពីរ និងអគារបន្ថែមរបស់ព្រះវិហារបរិសុទ្ធនៅជិតៗនោះផងដែរ ។

1 / 2

Download Photos

នៅពេលលោកបានរៀបចំដើម្បីថ្លែងសុន្ទរកថានៅក្នុងសម័យប្រជុំនេះ ហើយពោលពាក្យអធិស្ឋានឧទ្ទិសឆ្លងនីមួយៗ អែលឌើរ រ៉ាសបាន បានមានប្រសាសន៍ថា លោកបានមើលប្រវត្តិសាស្ត្ររបស់ប្រទេសថៃ និងប្រវត្តិសាស្ត្ររបស់សាសនាចក្រក្នុងប្រទេសនេះ និងទូទាំងអាស៊ីអាគ្នេយ៍ ។ អែលឌើរ រ៉ាសបាន មានប្រសាសន៍ថា « អ្វីដែលបានដក់ជាប់ក្នុងចិត្តខ្ញុំ គឺរបៀបដែលប្រទេសនេះ និងព្រះវិហារបរិសុទ្ធនេះស្ថិតក្នុងដៃរបស់ព្យាការី និងសាវក » ។

នោះរាប់ទាំងការឧទ្ទិសឆ្លងប្រទេសថៃនាឆ្នាំ ១៩៦៦ សម្រាប់ការផ្សព្វផ្សាយដំណឹងល្អដោយអែលឌើរ ហ្គរដុន ប៊ី ហ៊ិងគ្លី ដែលនៅពេលនោះជាកូរ៉ុមនៃពួកសាវកដប់ពីរនាក់ និងក្រោយមកជាប្រធានសាសនាចក្រ និងការឧទ្ទិសឆ្លងសាលាប្រជុំដំបូងក្នុងប្រទេសនេះនាឆ្នាំ ១៩៧៤ ដោយអែលឌើរ ដេវីឌ ប៊ី ហេត នៃពួកដប់ពីរនាក់ ។

លោកបានផ្ដល់ការគោរពជាពិសេសចំពោះតួនាទីរបស់ប្រធានសាសនាចក្រចុងក្រោយបីរូបក្នុងការនាំមកនូវព្រះដំណាក់ព្រះអម្ចាស់នៅទីក្រុងបាងកក— ប្រធាន ហ៊ិងគ្លី ដែលនៅឆ្នាំ ២០០០ បានប្រាប់ជាមុនអំពីព្រះវិហារបរិសុទ្ធមួយ ។ ប្រធាន ថូម៉ាស អេស ម៉នសុន ដែលបានប្រកាសជាផ្លូវការអំពីព្រះវិហារបរិសុទ្ធនៅឆ្នាំ ២០១៥ និងប្រធាន រ័សុល អិម ណិលសុន ដែលបានទៅទស្សនាទីកន្លែងព្រះវិហារបរិសុទ្ធកាលពីប្រាំឆ្នាំមុន ហើយបានចាត់ឲ្យអែលឌើរ រ៉ាសបាន ធ្វើការឧទ្ទិសឆ្លងនៅថ្ងៃចុងសប្តាហ៍នេះ ។

សាវកបានមានប្រសាសន៍លើកឡើងនូវសម្រង់ពាក្យចំនួនបី— សម្រង់មួយចេញពីប្រធានសាសនាចក្រទាំងបីរូប— តំណាងឲ្យដំណើរនៃការព្យាករណ៍ ។

លោកបានដកស្រង់ប្រសាសន៍របស់ប្រធាន ហ៊ិងគ្លី ចេញមកពីការប្រជុំ ខែមិថុនា ឆ្នាំ ២០០០ ជាមួយសមាជិកនៅទីក្រុងបាងកក ៖ « ព្រះអម្ចាស់បានស្តាប់ឮការអធិស្ឋានរបស់យើង ។ ទ្រង់បានដឹកនាំយើងក្រោមការលំបាកអស់រយៈពេលយ៉ាងយូរ ។ ប៉ុន្តែឥឡូវនេះ ស្ថានសួគ៌កំពុងញញឹមដាក់យើងហើយ ។ បងប្អូនគឺជាអ្នកត្រួសត្រាយនៅទីនេះក្នុងការបន្តកិច្ចការរបស់ព្រះអម្ចាស់នៅក្នុងប្រទេសនេះ ហើយខ្ញុំសូមសន្យាថា ប្រសិនបើបងប្អូនមានចិត្តស្មោះត្រង់ នោះពេលវេលានឹងមកដល់គ្រាដែលព្រះវិហារបរិសុទ្ធមួយនឹងត្រូវសាងសង់នៅក្នុងប្រទេសថៃ » ។

លោកបានដកស្រង់ការប្រកាសរបស់ប្រធាន ម៉នសុន អំពីព្រះវិហារបរិសុទ្ធសម្រាប់ទីក្រុងបាងកក នៅសម័យប្រជុំព្រឹកថ្ងៃអាទិត្យនៃសន្និសីទទូទៅខែ មេសា ឆ្នាំ ២០១៥ ៖ « ព្រឹកនេះ ខ្ញុំរីករាយយ៉ាងខ្លាំងដើម្បីប្រកាសថា មានព្រះវិហារបរិសុទ្ធបីទៀត ដែលនឹងសាងសង់នៅក្នុងទីតាំងដូចខាងក្រោម ៖ ទីក្រុង អាប៊ីយ៉ាន ប្រទេសឈូងសមុទ្រអាយវ៉ូរី ទីក្រុងផត អូ ព្រីនស៍ ប្រទេសហៃទី និងទីក្រុង បាងកក ប្រទេសថៃ ។ នោះជាពរជ័យដ៏អស្ចារ្យដែលមានសម្រាប់ពួកបរិសុទ្ធដ៏ស្មោះត្រង់របស់យើង នៅក្នុងតំបន់ទាំងនេះ » ។

ហើយលោកបានដកស្រង់ពីប្រធាន ណិលសុន ដែលបានអញ្ជើញមកប្រទេសថៃជាលើកដំបូងក្នុងនាមជាគ្រូពេទ្យ មុនពេលលោកត្រូវបានហៅឲ្យបម្រើជាសាវកនៅឆ្នាំ ១៩៨៤ ហើយក្រោយមកបានអញ្ជើញមកក្នុងនាមជាថ្នាក់ដឹកនាំជាន់ខ្ពស់នៃសាសនាចក្រ ដែលកន្លងទៅថ្មីៗនេះបំផុតគឺការសម្ពោធការងារបម្រើទូទាំងពិភពលោកនាឆ្នាំ ២០១៨ ។ ក្នុងអំឡុងការប្រជុំនាខែ មេសា ឆ្នាំ ២០១៨ ជាមួយសមាជិកនៅទីក្រុង បាងកក ប្រធាន ណិលសុន បានសន្យាថា ៖ « ខ្ញុំសូមផ្ដល់ពរជ័យឲ្យបងប្អូនមានសេចក្ដីស្រឡាញ់នៅក្នុងផ្ទះ ជោគជ័យក្នុងកិច្ចការរបស់បងប្អូន និងអំណរក្នុងចិត្តរបស់បងប្អូន ពេលបងប្អូនរៀបចំខ្លួនសម្រាប់ព្រះវិហារបរិសុទ្ធនៃព្រះអម្ចាស់នៅក្នុងប្រទេសដ៏ពិសិដ្ឋនេះ » ។

1 / 2

Download Photos

អែលឌើរ រ៉ាសបាន បានធ្វើដំណើរជាច្រើនដងកាលពីមុនទៅទីក្រុងបាងកក និងប្រទេសថៃ ក្នុងនាមជាអតីតនាយកប្រតិបត្តិក្រុមហ៊ុន Huntsman Chemical រួមទាំងប្រធាន និងនាយកប្រតិបត្តិផងដែរ ។ ការឧទ្ទិសឆ្លងព្រះវិហារបរិសុទ្ធគឺជាកិច្ចការចុងក្រោយបំផុតក្នុងកិច្ចការដឹកនាំដ៏ច្រើន ដែលលោកបានបំពេញនៅក្នុងប្រទេសថៃ ។

អែលឌើរ រ៉ាសបាន បានមានប្រសាសន៍ថា វាបានធ្វើឡើងសម្រាប់ការចាត់តាំងដែលគួរឲ្យតម្លៃ បន្ទាបខ្លួន និង « អស្ចារ្យ » ។

Church News Bangkok Thailand Temple dedicatory prayer by Elder Rasband

លោកបានចូលរួមក្នុងព្រឹត្តិការណ៍ឧទ្ទិសឆ្លង ជាមួយនឹងភរិយារបស់លោក គឺស៊ីស្ទើរ មេឡានី រ៉ាសបាន និងដោយមានអែលឌើរ បេនយ៉ាមីន អិម ហ្ស៊ី តៃ ជាពួកចិតសិបនាក់ដែលមានសិទ្ធិអំណាចទូទៅ និង ជាប្រធានអាស៊ី និងស៊ីស្ទើរ ណាអូមី តូម៉ា តៃ អែលឌើរ ខេវិន អ័រ ដាន់ខេន ជាពួកចិតសិបនាក់ដែលមានសិទ្ធិអំណាចទូទៅ និងជានាយកប្រតិបត្តិនៃនាយកដ្ឋានព្រះវិហារបរិសុទ្ធ និងភរិយារបស់លោកគឺ ស៊ីស្ទើរ ណាន់ស៊ី ដាន់ខេន និងអែលឌើរ អ៊ីរីច ដបុលយូ. កូពីសឆ្កេរ ជាពួកចិតសិបនាក់ដែលមានសិទ្ធិអំណាចទូទៅ និងជំនួយការនាយកប្រតិបត្តិនៃនាយកដ្ឋានព្រះវិហារបរិសុទ្ធ និងភរិយារបស់លោកគឺ ស៊ីស្ទើរ គ្រីស្ទីន កូពីសឆ្កេរ ។

ពរជ័យនៃព្រះវិហារបរិសុទ្ធ បាងកក ប្រទេសថៃនឹងសាយភាយហួសពីព្រំដែននៃប្រទេសនេះទៅទៀត ។ មណ្ឌលព្រះវិហារបរិសុទ្ធនេះលាតសន្ធឹងចាប់ពីប្រទេសកម្ពុជាទៅដល់ប្រទេសប៉ាគីស្ថាន និងពីប្រទេសនេប៉ាល់ទៅដល់ប្រទេសឥណ្ឌូនេស៊ី ។

ក្នុងឆ្នាំ ១៨៥២ ប្រធានព្រិកហាំ យ៉ង់ បានហៅពួកអ្នកផ្សព្វផ្សាយសាសនាបួននាក់ឲ្យបម្រើនៅប្រទេសថៃ ដែលកាលនោះត្រូវបានគេស្គាល់ថាជាប្រទេសសៀម ។ មានតែម្នាក់គត់ដែលបានមកដល់ ប៉ុន្តែមិនបានមកដល់លុះត្រាដល់ឆ្នាំ ១៨៥៤ ហើយស្នាក់នៅបានត្រឹមតែ ៤ ខែប៉ុណ្ណោះដោយសារតែបញ្ហាភាសា ។

គ្រួសារសមាជិកដែលរស់នៅក្នុងទីក្រុងបាងកកនៅក្នុងទសវត្សរ៍ឆ្នាំ ១៩៥០ បានចាប់ផ្តើមរៀបចំការប្រជុំក្រៅផ្លូវការ និងញឹកញាប់ រហូតដល់សាសនាចក្របានអនុញ្ញាតកម្មវិធីថ្វាយបង្គំជាទៀងទាត់សម្រាប់ក្រុមជំនុំតូចមួយដែលនិយាយភាសាអង់គ្លេសនៅ ឆ្នាំ ១៩៦១ ដែលបានដំណើរការតាំងពីពេលនោះមក ។

ពួកអ្នកផ្សព្វផ្សាយសាសនាចំនួនប្រាំមួយនាក់ត្រូវបានបញ្ជូនមកប្រទេសថៃជាលើកដំបូងក្នុង ឆ្នាំ ១៩៦៨ ជាមួយនឹងបេសកកម្មមួយនៅក្នុងប្រទេសនេះដែលត្រូវបានបង្កើតឡើងក្នុងឆ្នាំ ១៩៧៣ ។ ស្ដេកទីមួយត្រូវបានបង្កើតឡើងនៅទីក្រុងបាងកកក្នុង ឆ្នាំ ១៩៩៥ ដោយមានស្ដេកទីពីរបង្កើតឡើងនៅក្នុងទីក្រុងនេះនៅឆ្នាំ ២០១៤ និងទីបីនៅពេលពីរឆ្នាំក្រោយមក ។

Bangkok-temple-dedication
ពួកបរិសុទ្ធថ្ងៃចុងក្រោយបានសួរសុខទុក្ខ និងឱបគ្នាបន្ទាប់ពីបានចូលរួមវគ្គដំបូងនៃការឧទ្ទិសឆ្លងព្រះវិហារបរិសុទ្ធ បាងកក ប្រទេសថៃ នៅ ថ្ងៃអាទិត្យ ទី ២២ ខែ តុលា ឆ្នាំ ២០២៣ ។

សមាជិកភាពសាសនាចក្រនៅក្នុងប្រទេសថៃ ឥឡូវនេះមានជាង ២៣,០០០ នាក់ នៅក្នុងក្រុមជំនុំជាង ៤០ ដែលមានសាលាប្រជុំនៅទូទាំងទីក្រុងបាងកក និងនៅកណ្តាលទីក្រុងធំៗនៅក្នុងប្រទេស រួមមាន ឈៀងម៉ៃ នគររាជសីម៉ា ខនខេន អ៊ូដនថានី និងអ៊ូប៊ុនរ៉ាចាថានី ។

ចន់ទីកា « អាប់ផល » ស៊ីហាណាត គឺជាពួកបរិសុទ្ធថ្ងៃចុងក្រោយរបស់ថៃ ជំនាន់ទីពីរ ដែលបានជ្រមុជទឹកនៅអាយុ ៩ ឆ្នាំ ហើយបានបម្រើបេសកកម្មនៅក្នុងប្រទេសថៃ ។ ដោយមានព្រះវិហារបរិសុទ្ធមួយនៅក្នុងទីក្រុងបាងកក ស៊ីហាណាត និយាយថា « ខ្ញុំមានអារម្មណ៍ថាមានផ្ទះមួយទៀតដែលខ្ញុំអាចមកនៅពេលណាក៏បាន ។ ខ្ញុំមានអារម្មណ៍ថានឹងមានសុភមង្គលកើតឡើងក្នុងជីវិតរបស់ខ្ញុំកាន់តែងាយស្រួល ព្រោះវានឹងនៅកាន់តែជិតគ្រួសាររបស់ខ្ញុំ » ។

អយុធ្យាប៉ាកាវ៉ាឌី ម៉ាកចច បាននិយាយថា ការចូលរួមក្នុងការឧទ្ទិសឆ្លងនេះបានផ្តល់ឱកាសមួយសម្រាប់ការបង្កើនវិវរណៈផ្ទាល់ខ្លួន ។ នាងបាននិយាយថា ៖ « ខ្ញុំបានទទួលការយល់ដឹងបន្ថែមទៀតអំពីរបៀបដែលយើងត្រូវអនុវត្តសេចក្ដីសញ្ញារបស់យើងឆ្លងកាត់ទន្លេនៃចរន្តជីវិត » ។

ប៉ាយ៉ាណា ព្រីឆាគុល អាយុ ១៤ ឆ្នាំ បានបន្ថែមថា ៖ « ព្រះវិហារបរិសុទ្ធគឺពិសិដ្ឋណាស់សម្រាប់ខ្ញុំ និងគ្រួសាររបស់ខ្ញុំ ។ នាពេលអនាគត ខ្ញុំចង់នៅក្នុងព្រះវិហារបរិសុទ្ធនេះ ហើយបម្រើនៅទីនេះ » ។

ប៉ារីនយ៉ា ស៊ូផាន អាយុ ១៦ ឆ្នាំ បាននិយាយថា ៖ « វាជាពរជ័យមួយក្នុងការមានព្រះវិហារបរិសុទ្ធនៅទីនេះ ហើយធ្វើការងារព្រះវិហារបរិសុទ្ធសម្រាប់បុព្វការីជនដែលបានស្លាប់ទៅ ។ វាជាពរជ័យសម្រាប់ខ្ញុំ និងសម្រាប់ពួកគាត់ » ។