អែលឌើរ ហ្គែរ៉ល កូសសេត្រូវបានហៅជាកូរ៉ុមនៃពួកសាវកដប់ពីរនាក់ ។

2024_07_22_GeraldCausse_OlympicFireside_JimmerFredettePeterVidmar_16.jpg

អែលឌើរ ហ្គែរ៉ល កូសសេ គឺជាសមាជិកនៃកូរ៉ុមនៃពួកសាវកដប់ពីរនាក់ថ្មីជាងគេបំផុត របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ លោកត្រូវបានហៅនៅថ្ងៃព្រហស្បត្តិ៍ ទី៦ ខែវិច្ឆិកា ឆ្នាំ២០២៥ ហើយត្រូវបានតែងតាំងនៅថ្ងៃដដែលនោះដោយប្រធាន ដាល្លិន អេច អូក និងសមាជិកដទៃទៀតនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់ ។

អែលឌើរ កូសសេ បានថ្លែងនៅថ្ងៃព្រហស្បត្តិ៍ថា « ខ្ញុំតែងតែមានទីបន្ទាល់មួយអំពីព្រះយេស៊ូវគ្រីស្ទ » ។ « ទ្រង់តែងតែស្ថិតនៅជាស្នូលនៃជីវិតខ្ញុំ ។ ខ្ញុំដឹងថាព្រះយេស៊ូវគ្រីស្ទមានព្រះជន្មរស់ ។ ហើយខ្ញុំដឹងថាទ្រង់គឺជាព្រះអង្គសង្គ្រោះ និងព្រះប្រោសលោះរបស់យើង ។ ឱនោះគឺជារឿងដ៏អស្ចារ្យណាស់ដើម្បីធ្វើជាសាក្សីម្នាក់របស់ព្រះគ្រីស្ទ ។ នោះគឺជាទំនួលខុសត្រូវ ឬកិច្ចការដ៏ល្អបំផុត ដែលយើងអាចមាននៅក្នុងជីវិតរបស់យើង » ។

ពួកសាវក គឺជាសាក្សីពិសេសនៃព្រះនាមរបស់គ្រីស្ទទៅកាន់មនុស្សទូទាំងពិភពលោក ។ ពួកលោកក៏ចូលរួមនៅក្នុងការទទួលខុសត្រូវសំខាន់ៗផ្នែករដ្ឋបាលដោយមើលខុសត្រូវទៅលើកិច្ចប្រតិបត្តិការ និងការអភិវឌ្ឍន៍សាសនាចក្រជាសាកលផងដែរ ។ ពួកកូរ៉ុមនៃពួកសាវកដប់ពីរនាក់គឺជាស្ថាប័នជាអធិបតីទីពីរនៅក្នុងការគ្រប់គ្រងសាសនាចក្រ ។ ពួកលោកបម្រើនៅក្រោមការដឹកនាំរបស់គណៈប្រធានទីមួយ ដែលរួមមាននូវប្រធាននៃសាសនាចក្រ និងទីប្រឹក្សាពីររូប ។

អែលឌើរ កូសសេ មានអាយុ ៦២ ឆ្នាំ មានដើមកំណើតមកពីទីក្រុង ប័រដូ ប្រទេសបារាំង ។ នៅពេលលោកទទួលការហៅនេះ លោកបម្រើជាប៊ីស្សពជាអធិបតីទី១១ របស់សាសនាចក្រ ។ លោកគឺជាប៊ីស្សពជាអធិបតីទីបីដែលមានដើមកំណើតនៅក្រៅសហរដ្ឋ ហើយជាបុគ្គលទីមួយដែលនិយាយភាសាអង់គ្លេស ជាភាសាទីពីរ ។ គណៈប៊ីស្សពជាអធិបតី គ្រប់គ្រងនូវកិច្ចការដូចជាជំនួយមនុស្សធម៌ កម្មវិធីសុខុមាលភាព ដង្វាយមួយភាគដប់ និងដង្វាយតមអាហារ អគារ និងការរៀបចំកំណត់ត្រាសមាជិកភាព ព្រមទាំងកិច្ចការដទៃទៀតជាច្រើន ។ ពួកលោកក៏ធ្វើដំណើរជាញឹកញាប់ដើម្បីបម្រើសមាជិកសាសនាចក្រនៅជុំវិញពិភពលោកផងដែរ ។

1 / 2

Download Photos

អែលឌើរ កូសសេក៏បានបម្រើជាទីប្រឹក្សាមួយរូបនៅក្នុងគណៈប៊ីស្សពជាអធិបតី ( ឆ្នាំ២០១២-២០២៥ ) ហើយជាពួកចិតសិបនាក់ដែលមានសិទ្ធិអំណាចទូទៅ ( ឆ្នាំ២០០៨-២០១២ ) ។

លោកកើតនៅទីក្រុងប័រដូ ប្រទេសបារាំង នៅថ្ងៃទី២០ ខែឧសភា ឆ្នាំ១៩៦៣ នៅក្នុងគ្រួសាររបស់ជេន កូសសេ និងម៉ារី ប្លាន បុនណេត កូសសេ អែលឌើរ កូសសេបានផ្លាស់ទៅទីក្រុងប៉ារីសនៅពេលលោកមានអាយុ ១៩ ឆ្នាំ ។ នៅទីនោះ លោកបានចូលបម្រើកងទ័ពរយៈពេលមួយឆ្នាំ ។ លោកបានដើរលេងជាគូរនឹងវ៉ាឡេរី បាប៊ីន ដែលលោកបានស្គាល់តាំងពីវ័យកុមារ នៅពេលដែលពួកគាត់នៅក្នុងវួដជាមួយគ្នានៅទីក្រុងប៉ារីស ។ ពួកលោកទាំងពីរនាក់ជាពួកបរិសុទ្ធថ្ងៃចុងក្រោយជំនាន់ទីពីរ ។ ឪពុកម្ដាយរបស់អែលឌើរ កូសសេបានជ្រមុជទឹកនៅពេលលោកមានអាយុប្រាំមួយខែ ហើយឪពុកម្ដាយរបស់វ៉ាឡេរី បានចូលរួមក្នុងសាសនាចក្រនៅពេលគាត់មានអាយុ ៣ ឆ្នាំ ។

ពួកលោកបានរៀបការនៅថ្ងៃទី៥ ខែសីហា ឆ្នាំ ១៩៨៦ នៅក្នុងព្រះវិហារបរិសុទ្ធ ប៊ឺន ស្វីស ហើយពួកលោកមានកូនប្រាំនាក់ ។

7IV04444-2.jpg
អែលឌើរ ហ្គែរ៉ល កូសសេ និងភរិយារបស់លោក វ៉ាឡេរី ថ្លែងអំពីការហៅថ្មីរបស់លោកនៅក្នុងកូរ៉ុមនៃពួកសាវកដប់ពីរនាក់ចេញមកពីអគាររំឭកចាំយ៉ូសែបស្ម៊ីធនៅវិសាលនដ្ឋានព្រះវិហារបរិសុទ្ធនៅទីក្រុងសលត៍ ឡេក រដ្ឋយូថាហ៍ នៅថ្ងៃព្រហស្បត្តិ៍ ទី៦ ខែវិច្ឆិកា ឆ្នាំ២០២៥ ។© 2025 by Intellectual Reserve, Inc. All rights reserved.

ការចាត់តាំងរបស់អែលឌើរ កូសសេក្នុងនាមជាអ្នកមានសិទ្ធិអំណាចទូទៅដំបូងគេ គឺបាននាំលោក និងវ៉ាឡេរី និងកូនៗបីនាក់របស់ពួកគាត់ទៅកាន់ប្រទេសអាល្លឺម៉ង់ ហើយបន្ទាប់មកសហរដ្ឋអាមេរិក ។ គ្រួសារកូសសេបានកោតសរសើរដល់កូនៗដែលបានស៊ូទ្រាំនៅក្នុងការផ្លាស់ទីលំដៅដ៏លំបាកទាំងនោះ ។

អែលឌើរ កូសសេ បានថ្លែងថា « រឿងនោះវាពុំមែនជារឿងងាយស្រួលដើម្បីធ្វើនោះទេ » ។ « ពួកយើងសរសើរពួកគេដែលមានការលះបង់ខ្ពស់ ។ ពួកគេពុំដែលរអ៊ូរទាំឡើយ ។ ពួកគេបានផ្លាស់មកជាមួយពួកយើង ហើយបានផ្លាស់ប្ដូរជីវិត ។ ហើយកូនៗដែលនៅបារាំង ពួកយើងសរសើរចំពោះការដែលរស់នៅដោយគ្មានឪពុកម្ដាយនៅជិតអស់រយៈពេលជិត ១៧ ឆ្នាំហើយមកដល់ឥឡូវនេះ ។

ស៊ីស្ទើរ កូសសេបានបន្ថែមថា « ពួកគេលើកទឹកចិត្តដល់ពួកយើង » ។ « កូនម្នាក់បានប្រាប់ពួកយើងថា គាត់បានយំរាល់យប់ ហើយគាត់មិនដឹងថាត្រូវប្រាប់ពួកយើងយ៉ាងណាទេ ក្រៅពីការលើកទឹកចិត្ត ។ ពួកយើងមានមោទនភាពចំពោះពួកគេណាស់ » ។

ចំណែកនៃការបម្រើរបស់អែលឌើរ កូសសេក្នុងនាមជាអ្នកមានសិទ្ធិអំណាចទូទៅគឺជំនាន់កំពុងពេញវ័យ ។ ជាឧទាហរណ៍ នៅខែសីហា ឆ្នាំ២០២៥ លោកបានរំឭកដល់យុវមជ្ឈិមវ័យថា កិច្ចការនៃការប្រមូលផ្ដុំអ៊ីស្រាអែលគឺជារឿងដ៏សំខាន់បំផុតដែលត្រូវធ្វើនៅសព្វថ្ងៃនេះ — ហើយក្នុងនាម ជាពួកបរិសុទ្ធថ្ងៃចុងក្រោយ ពួកគេត្រូវបានហៅឲ្យចូលរួមចំណែក ។

« សាសនាចក្រត្រូវការបងប្អូន — មិនថាបងប្អូនជានរណាទេ ប៉ុន្តែគឺដោយសារតែបងប្អូននោះហើយ ។ « បងប្អូនម្នាក់ៗមានអំណោយទានពិសេស និងបទពិសោធន៍ជីវិតជាច្រើន ដែលសំខាន់នៅក្នុងការបំពេញតាមគោលបំណងរបស់ព្រះអម្ចាស់ » ។

សាវកថ្មីក៏បានផ្ដល់សុន្ទរកថាសំខាន់ផងដែរអំពីសារៈសំខាន់នៃការមើលថែចំពោះការបង្កបង្កើតរបស់ព្រះ ។ ជាឧទាហរណ៍ នៅក្នុងសន្និសីទមួយនៅប្រទេសប្រេស៊ីលក្នុងឆ្នាំ២០២៣ លោកបានថ្លែងទៅកាន់អ្នកមានវិជ្ជាជីវៈវ័យក្មេងដែលជាពួកបរិសុទ្ធថ្ងៃចុងក្រោយចំនួន ១០០ នាក់អំពីវិធីសាស្ត្ររបស់សាសនាចក្រចំពោះនិរន្ដរភាពដល់បរិដ្ឋាន ។

អែលឌើរ កូសសេ បានថ្លែងថា « ព្រះបានទុកចិត្តផ្ដល់កិច្ចការដល់យើងឲ្យមើលថែការបង្កបង្កើតរបស់ទ្រង់ រួមមានទាំងការមើលថែដល់កូនចៅរបស់ទ្រង់ — ដែលជាបងប្អូនប្រុសស្រីរបស់យើង » ។ « ការធ្វើកិច្ចការនេះជំនួសឲ្យទ្រង់គឺជារបៀបមួយនៃការចែកចាយសេចក្ដីស្រឡាញ់ដែលអង្គបង្កបង្កើតបានផ្ដល់មកកាន់ពួកយើង ។ សិស្សរបស់ព្រះគ្រីស្ទគ្រប់រូបគួរតែដឹងពីសារៈសំខាន់នៃការប្រទានពរដល់ក្រុមគ្រួសារ និងសហគមន៍ដែលពួកគេរស់នៅ » ។

ដែលសំខាន់បំផុតនោះ លោកបានផ្ដោតទៅលើសេចក្ដីសង្ឃឹមមាននៅក្នុងព្រះយេស៊ូវគ្រីស្ទជាប្រធានបទមួយដែលលោកបានថ្លែងនៅក្នុងសុន្ទរកថាសន្និសីទថ្មីៗបំផុតរបស់លោក ។

អែលឌើរ កូសសេ បានមានប្រសាសន៍នៅក្នុងខែមេសា ឆ្នាំ២០២៥ ថា « សារលិខិតនៃក្ដីសង្ឃឹម និងការលួងលោមចិត្តនេះ គឺមានសម្រាប់យើងទាំងអស់គ្នា ដែលជាកូនចៅរបស់ព្រះ » ។ « ពុំមានគ្នាយើងណាម្នាក់អាចចៀសផុតពីឧបសគ្គ និងការដាក់កំហិតនៅក្នុងជីវិតរមែងស្លាប់នេះទេ ។ បន្ទាប់នោះ យើងទាំងអស់គ្នាកើតមកជាមួយនឹងភាពអសមត្ថភាពដើម្បីសង្គ្រោះខ្លួនយើង ។ ប៉ុន្តែ យើងមានព្រះអង្គសង្គ្រោះ ជាទីស្រឡាញ់ ហើយ ‹ យើងដឹងថា មានតែដោយព្រះគុណទេ ទើបយើងបានសង្គ្រោះ បន្ទាប់ពីអ្វីៗទាំងអស់ដែលយើងអាចធ្វើបាន › (នីហ្វៃទី២ ២៥:២៣ ) ។

អែលឌើរ ហ្គែរ៉ល កូសសេ​ត្រូវ​បាន​ហៅ​ជា​កូរ៉ុម​នៃ​ពួកសាវក​ដប់ពីរនាក់

7IV04444-2.jpg

អែលឌើរ ហ្គែរ៉ល កូសសេត្រូវបានហៅជាកូរ៉ុមនៃពួកសាវកដប់ពីរនាក់