នៅពេលប្រធាន រ័សុល អិម ណិលសុន ខិតជិតដល់ថ្ងៃខួបកំណើតគម្រប់ ១០០ នៃជន្មាយុរបស់លោក ( ថ្ងៃទី៩ ខែកញ្ញា ឆ្នាំ២០២៤ ) លោកបានគូសបញ្ជាក់ពីកន្លែងមួយនៅក្នុងបទ គម្ពីរ ដែលព្រះយេស៊ូវគ្រីស្ទប្រើលេខ ១០០ ដើម្បីបង្រៀនមេរៀនមួយអំពីការបម្រើ និងសេចក្តីស្រឡាញ់ ។
នៅក្នុងរឿងប្រៀបប្រដូចនៃចៀមដែលវង្វេង ( ម៉ាថាយ ១៨ និង លូកា ១៥ ) ព្រះយេស៊ូវបង្រៀនថា យើងគួរឈោងទៅជួយអ្នកដទៃដែលត្រូវការជំនួយតាមរបៀបដែលអ្នកគង្វាលដែលយកចិត្តទុកដាក់នឹងធ្វើសម្រាប់ចៀមរបស់គាត់—សូម្បីបាត់តែមួយក្បាលពីហ្វូងដែលមានចំនួន ១០០ ក៏ដោយ ។ ដោយលើកឡើងពីឧទាហរណ៍នេះ ប្រធាន ណិលសុន បានផ្ដល់មតិយោបល់ថា របៀបមួយដែលយើងអាចជួយប្រារព្ធខួបកំណើតលើកទី១០០ នៃជន្មាយុរបស់លោក គឺជាការឈោងទៅជួយ « បុគ្គលម្នាក់ » ដែលត្រូវការជំនួយ ។
នៅក្នុងសារលិខិតមួយដែលបានចុះផ្សាយនៅលើបណ្តាញប្រព័ន្ធផ្សព្វផ្សាយសង្គម ១០០ ថ្ងៃមុនថ្ងៃខួបកំណើត នាថ្ងៃទី៩ ខែកញ្ញារបស់លោក ប្រធាន ណិលសុន បានថ្លែងថា
« អំណាយខាងវិញ្ញាណមួយដែលនឹងបំភ្លឺជីវិតរបស់ខ្ញុំ គឺសូមឲ្យយើងម្នាក់ៗឈោងទៅជួយ ‹ បុគ្គលម្នាក់ › ដែលនៅក្នុងជីវិតរបស់យើង ដែលអាចនឹងមានអារម្មណ៍វង្វេង ឬឯកោ ។ នៅប៉ុន្មានខែខាងមុខនេះ ខ្ញុំសូមអញ្ជើញបងប្អូនឲ្យពិចារណាប្រកបដោយការអធិស្ឋាន ៖ តើបងប្អូនស្គាល់នរណាម្នាក់ដែលអាចកំពុងបាក់ទឹកចិត្តដែរឬទេ ? តើនរណាដែលបងប្អូនត្រូវផ្សះផ្សាជាមួយ ឬសូមការអភ័យទោសដែរឬទេ ? តើមានឈ្មោះមួយនៅក្នុងចិត្តរបស់បងប្អូនក្នុងពេលថ្មីៗនេះទេ ទោះបីជាបងប្អូនមិនដឹងពីមូលហេតុក៏ដោយ ? នៅពេលបងប្អូននាំយកសំណួរទាំងនេះទៅកាន់ព្រះអម្ចាស់ ទ្រង់នឹងបំផុសគំនិតបងប្អូនឲ្យដឹងពីរបៀបដែលបងប្អូនអាចឈោងទៅជួយ និងលើកបុគ្គលដែលត្រូវការជំនួយ » ។
តាមរយៈការធ្វើតាមគំរូរបស់ព្រះអង្គសង្គ្រោះ ប្រធាន ណិលសុន បានបន្តថា យើងអាច « ចែកចាយសេចក្ដីស្រឡាញ់របស់ព្រះយេស៊ូវគ្រីស្ទនៅទូទាំងពិភពលោក » ។
សូមមើលការចុះផ្សាយរបស់ព្យាការីនៅលើ Facebook, Instagram និង X ( អតីត Twitter ) ។
រ័សុល អិម ណិលសុន
ថ្ងៃទី១ ខែមិថុនា
ឆាប់ៗនេះ ខ្ញុំឈានដល់ខួបគម្រប់ ១០០ នៃជន្មាយុរបស់ខ្ញុំហើយ ។ កន្លែងមួយដែលព្រះអង្គសង្គ្រោះបានប្រើលេខ ១០០ ក្នុងព្រះគម្ពីរគឺជារឿងប្រៀបប្រដូចអំពីចៀមដែលវង្វេងបាត់ ។ ទោះបីជាហ្វូងចៀមរបស់គាត់ចំនួន ៩៩ ក្បាលបាននៅក្បែរគាត់ដោយសុវត្ថិភាពក៏ដោយ អ្នកគង្វាលបានស្វែងរកចៀម ១ ក្បាលដែលបានវង្វេងបាត់ដែរ ។
នៅជន្មាយុ ៩៩ នេះ ខ្ញុំមិនត្រូវការអំណោយខាងសាច់ឈាមនោះទេ ។ ប៉ុន្តែអំណោយខាងវិញ្ញាណមួយដែលនឹងបំភ្លឺជីវិតរបស់ខ្ញុំ គឺសូមឲ្យយើងម្នាក់ៗឈោងទៅជួយ ‹ បុគ្គលម្នាក់ › ដែលនៅក្នុងជីវិតរបស់យើង ដែលអាចនឹងមានអារម្មណ៍វង្វេង ឬឯកោ ។
នៅប៉ុន្មានខែខាងមុខនេះ ខ្ញុំសូមអញ្ជើញបងប្អូនឲ្យពិចារណាប្រកបដោយការអធិស្ឋាន ៖ តើបងប្អូនស្គាល់នរណាម្នាក់ដែលអាចកំពុងបាក់ទឹកចិត្តដែរឬទេ ? តើនរណាដែលបងប្អូនត្រូវផ្សះផ្សាជាមួយ ឬសូមការអភ័យទោសដែរឬទេ ? តើមានឈ្មោះមួយនៅក្នុងចិត្តរបស់បងប្អូនក្នុងពេលថ្មីៗនេះទេ ទោះបីជាអ្នកមិនដឹងពីមូលហេតុក៏ដោយ ? នៅពេលបងប្អូននាំយកសំណួរទាំងនេះទៅកាន់ព្រះអម្ចាស់ ទ្រង់នឹងបំផុសគំនិតបងប្អូនឲ្យដឹងពីរបៀបដែលបងប្អូនអាចឈោងទៅជួយ និងលើកបុគ្គលដែលត្រូវការជំនួយ ។
ឱ នោះគឺជាគំរូដ៏ស្រស់ស្អាតខាងវិញ្ញាណដែលព្រះអង្គសង្គ្រោះបានបង្ហាញដល់យើង—ថា តាមរយៈយើងម្នាក់ៗដែលធ្វើការងារបម្រើដល់មនុស្សតែម្នាក់គត់ដែលយើងអាចឈោងទៅដល់ នោះយើងអាចចែកចាយសេចក្តីស្រឡាញ់របស់ព្រះយេស៊ូវគ្រីស្ទបានពាសពេញពិភពលោក ។ #99plus1