វគ្គបណ្តុះបណ្តាលសម្រាប់ការជួយសង្គ្រោះជីវិតទារកទើបនឹងកើត នៅប្រទេសកម្ព

Neonatal-Resuscitation-Training,-April-2032,-Cambodia.
ម្តាយជាស្រ្តីខ្មែរម្នាក់កំពុងបីទារកទើបនឹងកើតរបស់នាង ។ អ្នកជំនាញផ្នែកវេជ្ជសាស្រ្ដមកពីអង្គការសប្បុរសធម៌ អិល.ឌី.អេស.និងពួកអ្នកផ្សព្វផ្សាយសាសនាផ្នែកមនុស្សធម៌នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានស្ម័គ្រលះបង់ពេលវេលា និងទេពកោសល្យរបស់ពួកគាត់ ដើម្បីផ្តល់ការបណ្តុះបណ្តាលពីរបៀបជួយសង្គ្រោះជីវិតទារកទើបនឹងកើតដល់វេជ្ជបណ្ឌិត និងពេទ្យឆ្មបនៅប្រទេសកម្ពុជា ។ ការបណ្ដុះបណ្ដាលនេះធ្វើឡើងនៅខេត្តតាកែវ និងកំពង់ចាម ចាប់ពីថ្ងៃទី១៧ ដល់ថ្ងៃទី ២២ ខែ មេសា ឆ្នាំ ២០២៣ ។© 2023 by Intellectual Reserve, Inc. All rights reserved.

កំណើតដ៏រីករាយរបស់ទារកអាចប្រែទៅជាសោកនាដកម្មយ៉ាងឆាប់រហ័ស បើទារកមិនអាចដកដង្ហើមបានទេនោះ ។ ការជួយសង្គ្រោះទារកទើបនឹងកើត អាចធ្វើឲ្យមានភាពខុសគ្នារវាងការរស់រានមានជីវិត និងសេចក្តីស្លាប់ដោយការស្តារដង្ហើមទារកទើបនឹងកើត ។ ការបណ្តុះបណ្តាលដ៏សំខាន់នេះបានផ្តល់ជូនដល់វេជ្ជបណ្ឌិត និងពេទ្យឆ្មបនៅប្រទេសកម្ពុជាដោយអ្នកជំនាញផ្នែកវេជ្ជសាស្ត្រមកពីអង្គការសប្បុរសធម៌ អិល.ឌី.អេស.( LDSC ) និងពួកអ្នកផ្សព្វផ្សាយសាសនាផ្នែកមនុស្សធម៌មកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានរួមគ្នាស្ម័គ្រលះបង់ពេលវេលា និងទេពកោសល្យរបស់ពួកគាត់ក្នុងការងារនេះ ។ គម្រោងបណ្តុះបណ្តាលស្តីពីសារៈសំខាន់នៃការមើលថែដល់ទារកទើបនឹងកើត (ENC) ត្រូវបានរៀបចំឡើងដោយសហការជាមួយមន្ទីរសុខាភិបាលខេត្តតាកែវ និងកំពង់ចាម និងរៀបចំដោយខេត្តរៀងៗខ្លួន ចាប់ពីថ្ងៃទី ១៧ ដល់ថ្ងៃទី ២២ ខែមេសា ឆ្នាំ ២០២៣ ។

វគ្គសិក្សា ENC គឺជាការណែនាំដែលបង្កើតឡើងដោយអង្គការសុខភាពពិភពលោក ( WHO ) ដែលប្រើប្រាស់វិទ្យាសាស្ត្រវេជ្ជសាស្ត្រទាន់សម័យដើម្បីបណ្តុះបណ្តាលវេជ្ជបណ្ឌិត និងពេទ្យឆ្មបអំពីរបៀបអនុវត្តនីតិវិធីសង្គ្រោះជីវិតទារក ។ នៅពេលដែលត្រូវបានគ្រប់គ្រងជាមួយនឹងកម្មវិធីបណ្តុះបណ្តាលការជួយសង្គ្រោះទារកទើបនឹងកើតរបស់ LDSC វេជ្ជបណ្ឌិត និងពេទ្យឆ្មបទាំងនេះក៏រៀនពីរបៀបបង្រៀនដល់បុគ្គលិកពេទ្យផ្សេងទៀតក្នុងជំនាញដូចគ្នានេះ ដើម្បីប្រើប្រាស់ការឆ្លើយតបជាក្រុមទៅនឹងតម្រូវការទារកទើបនឹងកើត ។ គម្រោងបណ្តុះបណ្តាល ENC ដែលផ្តោតលើការជួយសង្គ្រោះទារកទើបនឹងកើតផ្តល់ឧបករណ៍ចាំបាច់សម្រាប់វេជ្ជបណ្ឌិត និងពេទ្យឆ្មបកម្ពុជា ដើម្បីជួយសង្គ្រោះជីវិតទារកទើបនឹងកើតដែលមិនដកដង្ហើម ។

វេជ្ជបណ្ឌិត មីធ ម៉ូហ្វីត ជាអ្នកជំនាញផ្នែកវេជ្ជសាស្ត្រម្នាក់នៃក្រុមស្ម័គ្រចិត្ត ENC បានប្រាប់អ្នកចូលរួមវគ្គបណ្តុះបណ្តាលនៅខេត្តកំពង់ចាមថា « យើងរំភើបណាស់ដែលអ្នកទាំងអស់គ្នាបានរៀនជំនាញសំខាន់ៗទាំងនេះ ប៉ុន្តែវានឹងមិនមានអារម្មណ៍ថាជោគជ័យទេ រហូតដល់អ្នកចាប់ផ្តើមបង្រៀនដល់អ្នកដទៃទៀត » ។ ការផ្ទេរចំណេះដឹង និងជំនាញពីអ្នកជំនាញវេជ្ជសាស្ត្រ LDSC មកពីសហរដ្ឋអាមេរិកទៅកាន់វេជ្ជបណ្ឌិត ពេទ្យឆ្មប និងអ្នកអប់រំមកពីស្រុកចំនួនប្រាំបីក្នុងខេត្តទាំងពីរនឹងមានឥទ្ធិពលយ៉ាងសំខាន់ក្នុងការជួយអ្នកដែលបានទទួលការបណ្តុះបណ្តាលឲ្យមានភាពជឿជាក់លើខ្លួនឯង និងបង្រៀនបុគ្គលិកពេទ្យផ្សេងទៀតផងដែរ ។

1 / 2

Download Photos

គម្រោងនេះតម្រូវឲ្យគ្រូពេទ្យកម្ពុជាដែលទើបទទួលបានការបណ្ដុះបណ្តាលជំនាញថ្មីទាំងនោះ ត្រឡប់ទៅមន្ទីរពេទ្យបង្អែករបស់ពួកគេវិញដើម្បី បង្រៀនជំនាញថ្មីនេះដល់គ្រូពេទ្យផ្សេងទៀត ។ ដូច្នេះ ជាមួយការគាំទ្រសហគមន៍ពីមន្ទីរសុខាភិបាលខេត្ត គម្រោងនេះនឹងក្លាយទៅជាគម្រោងទ្រទ្រង់ និងជួយកែលម្អស្ថានការណ៍របស់ប្រជាជនកម្ពុជាឲ្យកាន់តែប្រសើរឡើងតាមរបៀបដែលប្រកបដោយអត្ថន័យ និងអចិន្ត្រៃយ៍ ។ វេជ្ជបណ្ឌិត ជិន ដារិទ្ធ ជាសិក្ខាកាមម្នាក់ក្នុងខេត្តកំពង់ចាមបានមានប្រសាសន៍ថា « ខ្ញុំមានអំណរគុណចំពោះការបណ្តុះបណ្តាលនេះ ហើយមានអារម្មណ៍ថា ពេលនេះខ្ញុំអាចជួយជីវិត និងជួយអ្នកដទៃឲ្យរៀនជំនាញដូចគ្នានេះ » ។

វេជ្ជបណ្ឌិត រីឆាត ប៊ែល ដែលជាវេជ្ជបណ្ឌិតនៅក្នុងក្រុមស្ម័គ្រចិត្តដែលបានធ្វើដំណើរ និងបង្រៀនកម្មវិធីនេះតាំងពីទសវត្សរ៍ឆ្នាំ ១៩៩០ បានចែកចាយទស្សនៈផ្សេងគ្នាអំពីឥទ្ធិពលនៃការបណ្តុះបណ្តាល ។ លោកបានមានប្រសាសន៍ថា « វគ្គបណ្តុះបណ្តាលនេះមិនមែនតែអំពីតួលេខនោះទេ គឺនិយាយអំពីទារក និងម្តាយ និងគ្រួសារផងដែរ ។ វាគឺអំពីកូនរបស់ព្រះ ។ នៅពេលដែលទារកស្លាប់ វាមិនត្រឹមតែប៉ះពាល់ដល់គ្រួសារប៉ុណ្ណោះទេ ប៉ុន្តែវាក៏អាចប៉ះពាល់ដល់សហគមន៍ផងដែរ » ។ ស្រដៀងគ្នានេះដែរ គម្រោងនេះទាមទារឲ្យមានកិច្ចខិតខំប្រឹងប្រែងជាសហគមន៍រួមគ្នាដើម្បីធ្វើឲ្យវាអាចដំណើរការបាន ។

Neonatal-Resuscitation-Training-in-Cambodia,-April-2023.
អ្នកជំនាញស្ម័គ្រចិត្តផ្នែកវេជ្ជសាស្ត្រ វេជ្ជបណ្ឌិត រីឆាត ប៊ែល បង្រៀននៅក្នុងគម្រោងបណ្តុះបណ្តាលស្តីពីសារៈសំខាន់នៃការមើលថែដល់ទារកទើបនឹងកើតនៅប្រទេសកម្ពុជា ដែលជាកិច្ចខិតខំប្រឹងប្រែងរួមគ្នាជាមួយមន្ទីរសុខាភិបាលខេត្តតាកែវ និងខេត្តកំពង់ចាម ពួកអ្នកផ្សព្វផ្សាយសាសនាផ្នែកមនុស្សធម៌មកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និង អ្នកជំនាញផ្នែកវេជ្ជសាស្រ្ដមកពីសហរដ្ឋអាមេរិក ក្រោមអង្គការសប្បុរសធម៌ អិល.ឌី.អេស. ដើម្បីផ្តល់ការបណ្តុះបណ្តាលនៅខែមេសា ឆ្នាំ ២០២៣ ។© 2023 by Intellectual Reserve, Inc. All rights reserved.

វេជ្ជបណ្ឌិត ប៊ែល និងវេជ្ជបណ្ឌិត រ៉ូប៊ឺត ក្លាក គឺជាវេជ្ជបណ្ឌិតមកពីសាសនាចក្រដែលលះបង់ពេលវេលា និងការបម្រើរបស់ពួកលោកដើម្បីបង្រៀនវេជ្ជបណ្ឌិត បុគ្គលិកពេទ្យ និងពេទ្យឆ្មបផ្សេងទៀតនៅជុំវិញពិភពលោកអំពីបច្ចេកទេសសង្គ្រោះជីវិតនៃការបណ្តុះបណ្តាលជួយសង្គ្រោះទារកទើបនឹងកើត ។ បណ្ឌិត ប៊ែល និងវេជ្ជបណ្ឌិត ក្លាក បានបម្រើរួមគ្នាជាពួកអ្នកផ្សព្វផ្សាយសាសនាសម្រាប់សាសនាចក្រនៅដើមទសវត្សរ៍ឆ្នាំ ១៩៧០ នៅហុងកុង ។ បន្ទាប់ពីការណែនាំពីកម្មវិធីជួយសង្គ្រោះទារកទើបនឹងកើតដោយ សាកលវិទ្យាល័យជំងឺកុមារអាមេរិកាំង ពួកលោកបានចាប់ផ្តើមបណ្តុះបណ្តាលវេជ្ជបណ្ឌិតនៅក្នុងប្រទេសចិននៅដើមទសវត្សរ៍ឆ្នាំ ១៩៩០ ដើម្បីជួយកាត់បន្ថយការស្លាប់របស់ទារកទើបនឹងកើតនៅទីនោះ ។ នៅទីបំផុត កម្មវិធីនេះត្រូវបានអនុម័តដោយសាសនាចក្រក្រោមដៃសប្បុរសធម៌ LDSC ហើយក្រុមស្ម័គ្រចិត្តត្រូវបានរៀបចំឡើងដើម្បីជួយសម្រួលដល់ការបណ្តុះបណ្តាលកាន់តែប្រសើរឡើង ។

បន្ថែមពីលើលោកវេជ្ជបណ្ឌិត ប៊ែល និងក្លាក ក៏មានក្រុមការងារ ENC ប្រចាំប្រទេសកម្ពុជារួមមានគ្រូពេទ្យផ្នែកកុមារ វេជ្ជបណ្ឌិត ម៉ូហ្វីត ជាមួយ ជេនីហ្វឺ ជ័រហ្គីនសុន និង សារ៉ា ក្លាក ដែលជាគិលានុបដ្ឋាយិកាផ្នែកទារកទើបនឹងកើត និងអ្នកអប់រំផ្នែកសម្រាលកូនរៀងៗខ្លួន ។ នៅភាគីកម្ពុជា លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានអនុញ្ញាតឲ្យមានកម្មវិធីបណ្តុះបណ្តាលនេះ និងចូលរួមក្នុងពិធីបិទ ។ អនុប្រធានរបស់លោកគឺលោកវេជ្ជបណ្ឌិត ប្រាក់ សូណារិទ្ធ គឺជាអ្នកតំណាងកម្ពុជានៃគណៈកម្មាធិការកម្មវិធីបណ្តុះបណ្តាលនេះ និងធ្វើជាម្ចាស់ផ្ទះវគ្គបណ្តុះបណ្តាលនៅនាយកដ្ឋានរបស់ពួកលោក ។ នៅខេត្តកំពង់ចាម អនុប្រធានមន្ទីរសុខាភិបាល លោកវេជ្ជបណ្ឌិត តាំង ប៊ុនស្រេង បានត្រួតពិនិត្យវគ្គបណ្តុះបណ្តាលនេះ ដោយមានលោកវេជ្ជបណ្ឌិត សៀង សុឌី លោកវេជ្ជបណ្ឌិត ម៉េង លាង និងគិលានុបដ្ឋាយិកា ប៉ាល់ ស្រីស៊ី មកពីមជ្ឈមណ្ឌលជាតិគាំពារមាតា និងទារក ដែលពួកលោកបានចូលរួមធ្វើជាគ្រូបង្ហាត់ផ្នែកខ្មែរ ។ វេជ្ជបណ្ឌិត សំ កុម្ភៈ មកពីសម្ព័ន្ធសុខភាពបន្តពូជ និងកុមារ បានបកប្រែឯកសារបណ្តុះបណ្តាលជាភាសាខ្មែរ និងបានចូលរួមធ្វើជាគ្រូបង្ហាត់ផងដែរ ។

ក្រុមទាំងពីរបាននាំមកចូលរួមធ្វើការជាមួយគ្នាដោយពួកអ្នកផ្សព្វផ្សាយសាសនាផ្នែកមនុស្សធម៌ខាងកិច្ចខិតខំលើកកម្ពស់សុខភាពកម្ពុជា (CHIE) មកពីសាសនាចក្រ អែលឌើរ ប៊្រីន និង ស៊ីស្ទើរ អេឡិន មូហ៍ឡេស្ទីន និង អែលឌើរ ម៉ៃឃើល និង ស៊ីស្ទើរ ថានយ៉ា ឆានល័រ ។ គូស្វាមីភរិយាទាំងពីរបានរៀបចំ និងសម្របសម្រួលព្រឹត្តិការណ៍រយៈពេលមួយសប្តាហ៍នៅខេត្តតាកែវ និងកំពង់ចាម ដែលមានការចូលរួមមិនត្រឹមតែមន្ទីរសុខាភិបាលប៉ុណ្ណោះទេ ប៉ុន្តែក៏មានប្រធានមន្ទីរពេទ្យ អង្គការមិនមែនរដ្ឋាភិបាលក្នុងស្រុក និងអ្នកបកប្រែផងដែរ ។

អែលឌើរ ឆានល័រ បានមានប្រសាសន៍ថា « វាជាគម្រោងដ៏ស្មុគស្មាញមួយដែលត្រូវនាំអ្នកជំនាញ និងគ្រឿងបរិក្ខារមកពីសហរដ្ឋអាមេរិក និងកម្ពុជាមកចូលរួមជាមួយគ្នានៅខេត្តពីរផ្សេងគ្នា បូករួមទាំងរាជធានីភ្នំពេញផងដែរ ប៉ុន្តែដោយមានជំនួយពីប្រធានសុខាភិបាលខេត្ត នោះការបណ្តុះបណ្តាលបានប្រព្រឹត្តទៅដោយជោគជ័យ និងបានកំណត់ដំណាក់កាល ដើម្បីបន្តការបណ្តុះបណ្តាលទូទាំងខេត្តផ្សេងៗទៀតផងដែរ » ។

1 / 2

Download Photos

នៅចុងបញ្ចប់នៃព្រឹត្តិការណ៍នេះ សិក្ខាកាមម្នាក់ៗបានទទួលវិញ្ញាបនបត្របញ្ជាក់ពីការបញ្ចប់វគ្គសិក្សាដោយជោគជ័យ ។ លើសពីនេះ សិក្ខាកាមមកពីមន្ទីរពេទ្យបង្អែក បានទទួលឧបករណ៍បណ្តុះបណ្តាល និងបរិក្ខារពេទ្យ ដើម្បីយកទៅបណ្តុះបណ្តាលបុគ្គលិកពេទ្យតាមមន្ទីរពេទ្យរៀងៗខ្លួន ដោយសង្ឃឹមថា វានឹងបន្តផ្សព្វផ្សាយ និងទៅដល់គ្លីនិកតូចៗនៅជនបទនៃប្រទេសកម្ពុជា ដែលអាចជួយសម្រាលទារកផងដែរ ។ វេជ្ជបណ្ឌិត ប៊ែល បានមានប្រសាសន៍ថា « ភាពជោគជ័យត្រូវបានវាស់មិនត្រឹមតែនៅក្នុងការបណ្តុះបណ្តាល និងតាមរយៈអត្រាមរណភាពទាបប៉ុណ្ណោះទេ ប៉ុន្តែក៏ត្រូវបានវាស់វែងតាមបទពិសោធន៍ផ្ទាល់ខ្លួនផងដែរ » ។

ការបញ្ចប់គម្រោង ENC នៅក្នុងប្រទេសកម្ពុជា គឺជាផ្នែកមួយផ្សេងទៀតនៃពិភពលោក ដែលការបណ្តុះបណ្តាលនេះបានឈោងទៅដល់ ។ តាមរយៈភាពជាដៃគូជាមួយទីភ្នាក់ងារអន្តរជាតិដូចជា WHO, UNICEF និងអ្នកផ្សេងទៀតជាច្រើន ដែលធ្វើការដោយមិនចេះនឿយហត់ដើម្បីកែលម្អលក្ខខណ្ឌប្រទេសកំពុងអភិវឌ្ឍន៍ ក្រុមចំនួន ៤០ ក្រុមត្រូវបានបញ្ជូនចេញជារៀងរាល់ឆ្នាំទៅកាន់តំបន់ដែលខ្វះខាតដោយអង្គការ LDSC ។

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានជំនឿជាមូលដ្ឋានក្នុងការមើលថែជនក្រីក្រ និងខ្វះខាត ។ វាត្រូវបានបង្កើតឡើងនៅលើគោលការណ៍នៃទំនួលខុសត្រូវផ្ទាល់ខ្លួន ការគាំទ្រសហគមន៍ ការពឹងផ្អែកលើខ្លួនឯង និងនិរន្តរភាព ។ គោលបំណងនៃកិច្ចខិតខំប្រឹងប្រែងផ្នែកមនុស្សធម៌គឺដើម្បីផ្តល់ឲ្យបុគ្គល និងសហគមន៍នូវឧបករណ៍ដែលពួកគេត្រូវការដើម្បីកែលម្អស្ថានភាពផ្ទាល់ខ្លួនរបស់ពួកគេតាមរបៀបអចិន្ត្រៃយ៍ និងមានអត្ថន័យ ។ ការជួយសង្គ្រោះទារកទើបនឹងកើតគឺជាកម្មវិធីមនុស្សធម៌ដ៏សំខាន់មួយក្នុងចំណោមកម្មវិធីមនុស្សធម៌ដ៏សំខាន់ចំនួនប្រាំមួយរបស់សាសនាចក្រ ។

​វគ្គបណ្តុះបណ្តាល​សម្រាប់ការ​ជួយ​សង្គ្រោះជីវិត​ទារក​ទើប​នឹង​កើត ​នៅ​ប្រទេស​កម្ពុជា​

Neonatal-Resuscitation-Training,-April-2032,-Cambodia.

Neonatal-Resuscitation-Training-in-Cambodia,-April-2023.

វគ្គបណ្តុះបណ្តាលសម្រាប់ការជួយសង្គ្រោះជីវិតទារកទើបនឹងកើត នៅប្រទេសកម្ពុជា