សម្ភារបរិក្ខារពេទ្យដល់មណ្ឌលសុខភាពខេត្តព្រៃវែង

ស្រុកពារាំង នៃប្រទេសកម្ពុជា — នៅថ្ងៃទី ១៨ ខែ មេសា ឆ្នាំ ២០២៤ វេលាម៉ោង ៩ ព្រឹក ពិធីប្រគល់-ទទួលមួយត្រូវបានធ្វើឡើងនៅ មន្ទីរពេទ្យបង្អែក ពារាំង ដើម្បីថ្លែងអំណរគុណចំពោះសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានបរិច្ចាគសម្ភារបរិក្ខារពេទ្យយ៉ាងច្រើនដល់មណ្ឌលសុខភាពនៅទីជនបទចំនួនប្រាំបីកន្លែង ដែលមានទីតាំងនៅជុំវិញខេត្តព្រៃវែងនៃប្រទេសកម្ពុជា ៖

មណ្ឌលសុខភាព ព្រៃស្នៀត
មណ្ឌលសុខភាព ព្រៃព្នៅ
មណ្ឌលសុខភាព ព្រៃស្រឡិត
មណ្ឌលសុខភាព កំពង់ពពិល
មណ្ឌលសុខភាព កញ្ចំ
មណ្ឌលសុខភាព រកា
មណ្ឌលសុខភាព រាប
មណ្ឌលសុខភាព កំពង់ប្រាំង

PreyVengHealthCenterHandover-11.jpg
មន្ទីរពេទ្យបង្អែក ពារាំង ប្រទេសកម្ពុជា - រូបថតជាក្រុម ជាការផ្ដិតយកនូវគ្រាដ៏សំខាន់ដែលតំណាងសាសនាចក្រ អ្នកជំនាញខាងសុខាភិបាល និងបុគ្គលិកមន្ទីរពេទ្យជួបជុំគ្នាដើម្បីអបអរសាទរចំពោះការបរិច្ចាគសម្ភារបរិក្ខារពេទ្យយ៉ាងច្រើនដល់មណ្ឌលសុខភាពទាំងប្រាំបីក្នុងខេត្តព្រៃវែង ដោយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ថ្ងៃទី ១៨ ខែ មេសា ឆ្នាំ ២០២៤ ដែលជាកាយវិការដែលនឹងលើកកម្ពស់សេវាថែទាំសុខភាពក្នុងតំបន់ ។2024 by Intellectual Reserve, Inc. All rights reserved.

នៅក្នុងពិធីថ្ងៃនោះ មានការអញ្ជើញចូលរួមពីសំណាក់លោកវេជ្ជបណ្ឌិត ហួត កល្យាណ ប្រធានការិយាល័យប្រតិបត្តិស្រុកពារាំង លោក រ័ត្ន ច័ន្ទសុភា ប្រធានសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅប្រទេសកម្ពុជា និង កញ្ញា យន សូផាណែត អ្នកគ្រប់គ្រងគម្រោងសុខុមាលភាព និងភាពខ្លួនទីពឹងខ្លួនរបស់សាសនាចក្រ រួមជាមួយនឹងបុគ្គលិកមន្ទីរពេទ្យ និងអ្នកឯកទេសខាងគម្រោងវេជ្ជសាស្ត្ររបស់សាសនាចក្រជាច្រើននាក់ ។

លោកវេជ្ជបណ្ឌិត កល្យាណ បានសម្តែងការដឹងគុណចំពោះការគាំទ្ររបស់សាសនាចក្រ ដោយមានប្រសាសន៍ថា « ការគាំទ្រដ៏សប្បុរសរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺមានសារៈសំខាន់បំផុតចំពោះមណ្ឌលសុខភាពទាំងប្រាំបីនេះ ហើយនឹងជួយមណ្ឌលសុខភាពទាំងនេះបម្រើប្រជាពលរដ្ឋក្នុងតំបន់បានកាន់តែល្អប្រសើរជាងមុន ។ នេះគឺជាកាយវិការសប្បុរសធម៌ដែលប្រជាពលរដ្ឋរស់នៅតំបន់នេះមិនអាចបំភ្លេចបានឡើយ » ។

1 / 2

Download Photos

សម្ភារបរិក្ខារពេទ្យដែលបានបរិច្ចាគរួមមាន ឧបករណ៍តាមដានចង្វាក់បេះដូងទារក ឧបករណ៍វាស់សម្ពាធឈាម ម៉ូនីទ័រពិនិត្យមើលជាតិស្ករក្នុងឈាម ឧបករណ៍វាស់ជីពចរ គ្រែអ្នកជំងឺ ម៉ូនីទ័រអ្នកជំងឺ ឈុតឧបករណ៍សម្ភព និងសម្ភារកុំព្យូទ័រ ។ សម្ភារបរិក្ខារពេទ្យថ្មីនេះនឹងពង្រឹងសមត្ថភាពរបស់មណ្ឌលសុខភាពទាំងនេះ ដើម្បីមើលថែដល់អ្នកជំងឺដែលមានចំនួនកាន់តែច្រើនឡើងនៅក្នុងស្រុកនេះ ។
ជាងនេះទៅទៀត ការបរិច្ចាគទាំងនេះស្របតាមគំនិតផ្តួចផ្តើមថ្នាក់ជាតិរបស់ក្រសួងសុខាភិបាលកម្ពុជា ដើម្បីបង្កើន និងពង្រីកការព្យាបាលជំងឺទឹកនោមផ្អែម និងជំងឺលើសឈាមនៅទូទាំងប្រទេស ។

1 / 2

Download Photos

នៅក្នុងសុន្ទរកថារបស់លោករួមជាមួយនឹងការបរិច្ចាគរបស់សាសនាចក្រ លោក រ័ត្ន ច័ន្ទសុភា បានចូលរួមលើកទឹកចិត្ត ដោយដកស្រង់ប្រសាសន៍របស់ប៊ីស្សព ដបុលយូ គ្រីស្តូហ្វើរ វ៉តឌែល ជាទីប្រឹក្សាទីមួយនៅក្នុងគណៈប៊ីស្សពជាអធិបតី នៅក្នុងការពន្យល់របស់លោកអំពីរបៀបដែលសាសនាចក្របំពេញតាមសេចក្ដីបង្គាប់របស់ព្រះយេស៊ូវគ្រីស្ទឲ្យស្រឡាញ់អ្នកជិតខាងរបស់ខ្លួនថា « តើអ្នកជិតខាងរបស់យើងជានរណា ? មនុស្សគ្រប់គ្នាគឺជាអ្នកជិតខាងរបស់យើង ។ . . . យើងជួយមនុស្សគ្រប់គ្នា ទោះក្នុងកាលៈទេសៈណាក៏ដោយ មិនថាពួកគេមកពីណា មានជាតិសាសន៍ ឬសាសនាអ្វីនោះទេ ។ យើងនៅទីនេះដើម្បីផ្ដល់ពរជ័យដល់មនុស្សគ្រប់គ្នាដែលយើងអាចផ្ដល់ឲ្យបាន » ។ លោក ច័ន្ទសុភា ក៏បានលើកទឹកចិត្តដល់បុគ្គលិកមណ្ឌលសុខភាពខេត្តព្រៃវែងឲ្យប្រើប្រាស់ឧបករណ៍ថ្មីនេះប្រកបដោយប្រសិទ្ធភាព និងថែទាំវាឲ្យបានត្រឹមត្រូវ ដោយត្រូវប្រាកដថា ឧបករណ៍ថ្មីនេះអាចជួយផ្តល់ការថែទាំជាច្រើនឆ្នាំទៅមុខទៀត ។

1 / 2

Download Photos

ពិធីប្រគល់-ទទួលអំណោយសម្ភារបរិក្ខារពេទ្យ ដែលបានធ្វើនាថ្ងៃនេះ បង្កើតឡើងលើការគាំទ្រពីមុនរបស់សាសនាចក្រនៅក្នុងតំបន់ ។ នៅខែមករា ឆ្នាំ ២០២០ សាសនាចក្របានបរិច្ចាគ ម៉ាស៊ីនភ្លើងថ្មី និងរថយន្តគិលានសង្រ្គោះដល់មន្ទីរពេទ្យបង្អែក ពារាំង ដោយជួយលើកកម្ពស់សមត្ថភាពរបស់ខ្លួនក្នុងការផ្តល់សេវាសង្គ្រោះបន្ទាន់ដល់ប្រជាពលរដ្ឋរស់នៅក្នុងខេត្តព្រៃវែង ។ ម៉ាស៊ីនភ្លើងដែលមានកម្រិត ១៥០ កាវេអា ធានាដល់ការផ្គត់ផ្គង់ថាមពលដល់មន្ទីរពេទ្យទាំងមូលក្នុងអំឡុងពេលដាច់ភ្លើង ខណៈដែលរថយន្តគិលានសង្រ្គោះបានកាត់បន្ថយពេលវេលាធ្វើដំណើរសម្រាប់អ្នកជំងឺធ្ងន់ធ្ងរដែលរស់នៅតំបន់ឆ្ងាយៗ ។

កិច្ចការក្នុងខេត្តព្រៃវែងគឺជាផ្នែកមួយនៃ កិច្ចខិតខំលើកកម្ពស់សុខភាពកម្ពុជារបស់សាសនាចក្រ (CHIE) ដែលត្រូវបានបំផុសគំនិតដោយទង្វើព្យាបាលដោយក្តីមេត្តារបស់ព្រះយេស៊ូវគ្រីស្ទអំឡុងពេលការងារបម្រើរបស់ទ្រង់នៅលើផែនដី ។ CHIE ត្រូវបានផ្តួចផ្តើមឡើងនៅក្នុងឆ្នាំ ២០១៨ ដោយគណៈប្រធានតំបន់អាស៊ីនៃសាសនាចក្រ ដោយសហការជាមួយរដ្ឋាភិបាល និងថ្នាក់ដឹកនាំផ្នែកសុខាភិបាល ដើម្បីផ្តល់ការបណ្តុះបណ្តាល ឧបករណ៍ និងគម្រោងសាងសង់សម្រាប់ស្ថាប័នសុខាភិបាលដែលបម្រើដល់ប្រជាជនដែលងាយរងគ្រោះបំផុតនៅក្នុងប្រទេសកម្ពុជា ។

ពិធីប្រគល់-ទទួលអំណោយសម្ភារបរិក្ខារពេទ្យថ្ងៃនេះមានអត្ថន័យពិសេស ខណៈដែលពិធីនេះប្រព្រឹត្តទៅក្នុងឱកាសខួបលើកទី ៣០ នៃការទទួលស្គាល់សាសនាចក្រជាផ្លូវការនៅក្នុងព្រះរាជាណាចក្រកម្ពុជា ។ ក្នុងរយៈពេលដ៏ខ្លីរបស់សាសនាចក្រនៅក្នុងប្រទេសកម្ពុជា សាសនាចក្របានធ្វើគម្រោងមនុស្សធម៌រាប់រយគម្រោង ហើយបានធ្វើការផ្សព្វផ្សាយខាងវិញ្ញាណយ៉ាងស្វាហាប់ ដើម្បីពង្រឹងដល់បុគ្គល និងក្រុមគ្រួសារតាមរយៈការបង្រៀនរបស់ព្រះយេស៊ូវគ្រីស្ទ ។

PreyVengHealthCenterHandover-11.jpg