ខេត្តកំពង់ធំ ប្រារព្ធពិធីការជួសជុលផ្នែកសំខាន់ៗនៃមន្ទីរពេទ្យ ចំនួន ៣ កន្លែ

ខេត្តកំពង់ធំ ប្រទេសកម្ពុជា — កាលពីថ្ងៃទី ១១ ខែ មីនា ឆ្នាំ ២០២៤ រដ្ឋបាលខេត្តកំពង់ធំ បានរៀបចំពិធីប្រគល់និង ទទួលដើម្បីរំឭកដល់ការបញ្ចប់គម្រោងជួសជុលសំខាន់ៗ នៅមន្ទីរពេទ្យបង្អែកទីរួមខេត្តកំពង់ធំ និងមន្ទីរពេទ្យបង្អែកស្រុកស្ទោង ។ គម្រោងទាំងនេះត្រូវបានផ្តល់មូលនិធិ និងចាត់ចែងដោយសមាគមនិកាយនៃសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ នៅប្រទេសកម្ពុជា ដែលជាផ្នែកមួយនៃកិច្ចខិតខំលើកកម្ពស់សុខភាពកម្ពុជា (CHIE) របស់សាសនាចក្រ ។

ពិធីនេះរៀបចំនៅមន្ទីរពេទ្យបង្អែកទីរួមខេត្តកំពង់ធំ ដោយមានការចូលរួមពី ឯកឧត្តម ញឹក បានខេង អភិបាលរងខេត្តកំពង់ធំ អែលឌើរ ខេលី អរ ចនសុន នៃគណៈប្រធានតំបន់អាស៊ីនៃសាសនាចក្រ លោកវេជ្ជបណ្ឌិត ស្រី ស៊ិន ប្រធានមន្ទីរសុខាភិបាលខេត្តកំពង់ធំ ថ្នាក់ដឹកនាំចំនួនដប់រូបមកពីក្រុមជំនុំនៃសាសនាចក្រនៅក្នុងខេត្ត អ្នកគ្រប់គ្រងមន្ទីរពេទ្យ និងបុគ្គលិក ពួកអ្នកផ្សព្វផ្សាយសាសនាផ្នែកមនុស្សធម៌ និងអ្នកឯកទេសខាងវេជ្ជសាស្ត្រមកពីសាសនាចក្រ និងអ្នកចូលរួមជាសាធារណៈជាង ១០០ នាក់ ។

1 / 2

Download Photos

លោកវេជ្ជបណ្ឌិត ស៊ិន បានរៀបរាប់ពីលក្ខណៈ និងវិសាលភាពនៃគម្រោង ដែលរួមមានការជួសជុល និងពង្រីកអគារជាង ៤០ នៅទូទាំងមន្ទីរពេទ្យទាំងបី ការដោះស្រាយលើបញ្ហាទឹកលិច ការផ្តល់ឧបករណ៍វេជ្ជសាស្ត្រសំខាន់ៗ និងការបណ្តុះបណ្តាលដល់បុគ្គលិកពេទ្យ ។ បរិក្ខារពេទ្យទំនើបៗជាច្រើនប្រភេទដែលផ្តល់ជូនមានប្រព័ន្ធផ្តល់អុកស៊ីសែន សម្ភព រោគក្រពះ ពោះវៀន ទន្តសាស្ត្រ ឧបករណ៍ផ្នែកឆ្អឹង និងឧបករណ៍ផ្នែកភ្នែក សម្រាប់ការផ្គត់ផ្គង់ក្នុងបន្ទប់ប្រតិបត្តិការ និងឧបករណ៍មន្ទីរពិសោធន៍រោគវិនិច្ឆ័យ ។ សម្ភារទាំងនេះ បានផ្លាស់ប្តូរនូវវិសាលភាព និងគុណភាពនៃការថែទាំអ្នកជំងឺនៅមន្ទីរពេទ្យយ៉ាងសំខាន់ ។

1 / 2

Download Photos

អែលឌើរ ចនសុន បានសម្តែងការដឹងគុណចំពោះសេចក្តីសប្បុរសរបស់សមាជិកសាសនាចក្រទូទាំងពិភពលោក ដោយថ្លែងថា « ប្រាក់សម្រាប់គម្រោងទាំងនេះបានមកពីសមាជិករបស់យើងនៅទូទាំងពិភពលោក ដែលជ្រើសរើសតមអាហារពីរពេលជាទៀងទាត់ ហើយបរិច្ចាគតម្លៃអាហារទាំងនោះដើម្បីជួយអ្នកដែលខ្វះខាត ។ លោកក៏បានថ្លែងពីវត្តមានរបស់ថ្នាក់ដឹកនាំព្រះវិហារក្នុងមូលដ្ឋាននៅក្នុងពិធីនោះដែរ ដោយលោកបានបន្ថែមថា « យើងទាំងអស់គ្នាជាបងប្អូននឹងគ្នា ។ យើងចង់ធ្វើរឿងល្អៗ ។ យើងធ្វើតាមការបង្គាប់របស់ព្រះអង្គសង្គ្រោះរបស់យើង ឲ្យស្រឡាញ់អ្នកជិតខាងរបស់យើង ដូចជាយើងស្រឡាញ់ខ្លួនយើងដែរ » ។

1 / 2

Download Photos

ឯកឧត្តម ញឹក បានខេង អភិបាលរងខេត្តកំពង់ធំ បានទទួលស្គាល់នូវសេចក្តីស្រឡាញ់ និងការគាំទ្រពីសាសនាចក្រ ដោយមានប្រសាសន៍ថា « យើងទាំងអស់គ្នាជាបងប្អូននឹងគ្នា សូមជួយគ្នាទៅវិញទៅមក ។ យើងទទួលបាននូវអារម្មណ៍នៃក្តីស្រឡាញ់ពីសាសនាចក្រ ។ អគារដែលបានជួសជុលឡើងវិញមានភាពស្រស់ស្អាត ហើយអ្នកជំងឺរីករាយក្នុងការទទួលបានការថែទាំនៅទីនេះ ។ ឥឡូវនេះ មន្ទីរពេទ្យស្អាតជាងមុន ហើយមានអនាម័យជាងមុន » ។

1 / 2

Download Photos

នៅចុងបញ្ចប់នៃពិធីនេះ អភិបាលរងបានប្រគល់ជូនប័ណ្ណសរសើរជាផ្លូវការមួយដល់អែលឌើរ ចនសុន ។ បន្ទាប់មក ឥស្សរជន និងអ្នកគ្រប់គ្រងមន្ទីរពេទ្យបានចុះទៅមើលបន្ទប់ថែទាំដែលទើបនឹងជួសជុលថ្មី ដើម្បីផ្តល់ភាពកក់ក្តៅដល់អ្នកជំងឺដែលកំពុងទទួលការថែទាំនៅទីនោះ ។

1 / 2

Download Photos

កិច្ចខិតខំប្រឹងប្រែងរបស់សាសនាចក្រក្នុងការជួសជុល និងកែលម្អមន្ទីរពេទ្យទាំងនេះក្នុងខេត្តកំពង់ធំ ឆ្លុះបញ្ចាំងពីសេចក្តីអាណិតអាសូរ និងសេចក្តីមេត្តាករុណាដែលព្រះយេស៊ូវគ្រីស្ទ បានធ្វើជាគំរូក្នុងអំឡុងពេលធ្វើការងារបម្រើរបស់ទ្រង់នៅលើផែនដី ។ ដូចដែលបានកត់ត្រានៅក្នុងព្រះគម្ពីរមរមន នៅពេលដែលព្រះយេស៊ូវបានទៅជួបពួកសាសន៍នីហ្វៃ ទ្រង់បានមានបន្ទូលថា « តើនៅក្នុងចំណោមអ្នករាល់គ្នា មានអ្នកណាឈឺទេ ? ចូរនាំអ្នកទាំងនោះមកទីនេះចុះ ។ តើមាននរណាខ្វិន ឬខ្វាក់ ឬគ ឬបាក់ដៃបាក់ជើង ឬឃ្លង់ ឬស្ពឹកស្រពន់ ឬថ្លង់ ឬក៏ត្រូវរងទុក្ខ ដោយហេតុណាផ្សេងទៀត ? ចូរនាំពួកគេមកទីនេះចុះ ហើយយើងនឹងប្រោសឲ្យពួកគេបានជា ដ្បិតយើងមានចិត្តអាណិតអាសូរដល់ពួកអ្នករាល់គ្នា ចិត្តយើងពោរពេញទៅដោយសេចក្ដីមេត្តាករុណា » ( នីហ្វៃទី៣ ១៧:៧ ) ។ ក្នុងស្មារតីនៃសេចក្ដីស្រឡាញ់ និងការខ្វល់ខ្វាយស្រដៀងគ្នានេះចំពោះការរងទុក្ខ នោះសាសនាចក្របានអនុវត្តគម្រោងទាំងនេះ ដើម្បីផ្ដល់ពរដល់ជីវិតនៃអ្នកដែលខ្វះខាត ។

ការជួសជុលនៃមន្ទីរពេទ្យទាំងនេះនៅក្នុងខេត្តកំពង់ធំ គឺជាផ្នែកមួយនៃ កិច្ចខិតខំលើកកម្ពស់សុខភាពកម្ពុជា (CHIE) របស់សាសនាចក្រ ដែលជាយុទ្ធសាស្រ្តថ្មីដើម្បីកែលម្អសេវាសុខភាព និងផ្ដល់ជំនួយសប្បុរសធម៌សម្រាប់ប្រជាជនកម្ពុជា ។ ដោយមានកិច្ចសហការជាមួយរដ្ឋាភិបាល និងអ្នកដឹកនាំសេវាសុខាភិបាល CHIE ផ្តល់ការបណ្តុះបណ្តាល ឧបករណ៍ និងគម្រោងសាងសង់ជាច្រើន ។ កម្មវិធីនេះបានចាប់ផ្ដើមនៅឆ្នាំ ២០១៨ ដោយគណៈប្រធានតំបន់អាស៊ីនៃសាសនាចក្រ ។

ការបញ្ចប់គម្រោងនេះមានអត្ថន័យជាពិសេស ដែលពិធីនេះចំអំឡុងពេលរំឮកខួបលើកទី ៣០ ឆ្នាំ របស់សាសនាចក្រ ដែលត្រូវបានទទួលស្គាល់ជាផ្លូវការនៅក្នុងព្រះរាជាណាចក្រកម្ពុជា ។ សាសនាចក្រនៅតែបន្តតាំងចិត្តបម្រើ និងគាំទ្រដល់ប្រជាជនកម្ពុជា តាមរយៈកិច្ចខិតខំប្រឹងប្រែងផ្នែកមនុស្សធម៌ និង ជំនួយខាងវិញ្ញាណ ។

ខេត្តកំពង់ធំ ប្រារព្ធពិធីការជួសជុលផ្នែកសំខាន់ៗនៃមន្ទីរពេទ្យ ចំនួន ៣ កន្លែង នៅប្រទេសកម្ពុជា